Aisaia 66:4 - Nobonob Baibel4 Danab amu ag amu heegeg, da ag onilagppa ei, ag nai dahil ii aoppig. Ao, da nai ag amelagppa ami, amge ag dooglagnu uuppig. Ag da noolppa nau heppig. Ao, ag kobol digdig da ool ii hette ele hekkulagnu dabmenan heppig. Ag amu oh heppig amunu, da bu eheɗ madakkulnu dabmein madakkul. Ao, da heppi, ag kobol bemanu baɗatteb ele, kobol amu ahilagppa bekku.” Yawe Nug anam atte. အခန်းကိုကြည့်ပါ။ |
Aisaia 66:4
24 ပူးပေါင်းရင်းမြစ်များ
Manase nug amu ha, nug bekka mana, kayak hambuppuak laa mettom. Nug amu ha, nug emaɗ kobol, eman kobol ele dim lamitta, nug mauhak ele gamag danab, mauhak ele mattiak danab ele gumatta ukka, doyak mettaglagnu oɗ mattom. Nug Yawenu neekkakppa kobol eheɗ iɗu iɗu kuɗum heum. Manase nug hipunin huanak kuɗum amu Yawe noobppa haaha, amuppa nug he, Yawe Nug oo huana nauhom.
Da uɗien, ag onilagppa emi, amge ag oolagppan laa nug nai dahil ii awom. Ao, da ag onilagppa emi, amge laa nug nob laa ii meɗom. Dahil ɠagattag tutu meum amunu, da ag qagaiettakppanu ehanittak okkaippa uhuqadkkulnu elele iittate? Iitta! Ge, da ɠagattag iitta amunu da ag ehanadppi, ag qagaiettakppa ii daamnanu elele iittate? Iitta. Dahil ɠagattag am elele. Ao, da oɗelppaib nai matti, yu qaɗaiedatte. Da hei, le gottomppa am atu taɗak daatte. Yo, da anam hei, kakai ag mauheg, beɗulag beɗatteb.
Doyak diig genabib anttaknu am, laa anam hekkunu elele iitta. Amu auntai nug nau hekkunu uutte amu, laa ag doɗ qeppeg mauhkkunu hetteb bia danab amu qekkulagnu hetteb. Anam daatte amu, Yawe Nug neekka, danab ah oh ag nai doya mala hettoɗia epeɗia elele mettak kobol iinab dim lamidtteb anttom amunu, Nug ena ii doyom.
Da ag hettebnu dabmein, da heppi, laa ag uɗin qep elabppa aqadppeg mauhkkulag. Ao, ag gomelppeg, laa qep elabppa aqadppeg mauhkkulag. Aɗinu? Da ag onilagppa emi, amge ag da baal dooglagnu uuppig. Da ag amelagppa nai mattimi, amge ag dooglagnu uuppig. Ag da amelppa kobol nau heppig. Ao, keeke digdig da ag amu hekkulagnu ool ii daatte ele, ag hekkulagnu dabmenan heppig.” Yawe Nug anam atte.
Da ahilag hipunin, ag mamelkad aɗi ag hipunin amu heegeg, ag tuɗidna heegeg uɗie, gemu ele hetteb amu, da amu ohnu nob nau elele ag madakkul. Da ag doɗ main, kayak hambuppuak qaukoppa mattanna, ag qauko nakokppa dahil nai tappaeg neene, ⌊appa ele ag doɗ main, kayak hambuppuak madappig⌋ amunu, da bu eheɗ ahilag hak eleleppa ag madakkul.” Yawe Nug anam atte.
Ag amu hetteb amunu, da, Yawe, da am Kayak Dakka Ɠagattag Oh Ele, da Israel dilag Kayak, da attem. “Doyeg! Da heppi, uug naunab oh, amu da Jerusalem danab ah oh dilagppa, amu Juda danab ah laa oh ele dilagppa bekkunu ami amu, uug amu oh am bekkulag. Da ag amelagppa nai mattimi, amge ag daulag ii human dooppig. Da ag onilagppa emi, amge ag nai nob laa ii meɗappig.” Da Kayak, da anam awe attem.
Yawe Nug atte. “Aɗinu ⌊da Juda geɗadmi⌋? Juda danab ah ag dahil neekkakppa eheɗ henan daatteb. Ag ahilkad kayak hambuppuak akkan, da laul, da onil aguppa daatte amu, ag da laul amuppa qappaladppig. Dottolkad amunu da oolppa uuaknab doyeye, ag da laulppa qappalatteg, dahil neekkakppa da laul aakku dubuttid tak ele daatte.
Ag amu hetteb amunu, na dahil nai ag amelagppa inam appe doyeg! Naɗi Yawe Nug inam atte. ‘Israel danab laa nug kayak hambuppuak dim lamadkkunu dabmak nug ooppa meum daatte, nug kayak hambuppuak dottolkad, amuam keeke nau, danab he na qette amu, nug amu noolagppa dup noa binalag mette dayeb amu, nug amu haaha oiya, nug aha, dahil propet laa keeke laanu oɗ medakkunu gumitta gokku dayeb amu, da, Yawe, da dakka nuhig hipunin, amuam kayak hambuppuak dim lamadkkunu dabmak nug ooppa ma, amu noolagppa dup noa binag mak hette amu, da hipunin okkainab amu dabmein, da amunu nob elele medakkul.
Aɗinu? Geha danab laa ag hambuppuna, ‘Da am Kristus,’ o ‘Da am propet,’ akkulag. Ag anam anana, ag epponak keeke danab haknu elele iitta okkainab, amu kobol danab haknu elele iitta laala ele hekkulag. Ag amuppa Kayak danab ah, nuhikkud tituanattom ele, ag agnab hambuppualadkkulagnu hekkulag, amge elele iitta.
ကြော်ငြာတွေ