Aisaia 61:1 - Nobonob Baibel

^1-3 Yawenu maɗi nid nug inam atte. “Yawe Nug da daɗek dilagppa nai ena mehuqkkulnu goɗen gokkaɗakppa tituaniɗom, diig amunu Naɗi Yawe Nug nuhig Ouɗi dahilppa daatte. Nug da laa ag oolagppa uug okkai ele dootteb ehanadppi, ag oolag uug iitta ele dooglagnu, Laa, ag laa aɗalatteg, ag eppelagppa daatteb amu, da appi, ag uhuqak aoglagnu, Da appi, laa ag maniguittak nau gatatu eleppa daatteb, ag uhuqak aoglagnu, Nug danab ah, ahilagnu ii helo bia me, Nug ag ehanatta, oo mak haen madakku amu, Nug da ag amelagppa amunu akkulnu, Nug danab ah eheɗ hetteb ele, ahilagnu eheɗ haknu nob tutukku madakku haennu akkulnu, Nug danab ah ag oolagppa uug dootteb amu heeb, ag oolag mekkunu madikkulnu, Nug da laa ag Sion appa oolagppa uug doon gaatteb amu, da ag ehanadkkulnu, Nug da heppi, laa ag uug anam doon, ikkilkadppa uhuɗ metteb amu, ag eɗun, ena daan, uhuɗ amu ihappeg ukkeb, igippan haɗ neekkak enanag ele ag anen anen ag ikkilkadppa daaglagnu, da heppi, laa ag oolagppa mahiak dootteb ele amu, ag eɗun, enaib daan, danab nug king daakkunu laa nug igippa goɗen gokkaɗe, gamag ahak dootte, amubia danab ah imu ag gamag ahak dooglagnu, da heppi, laa ag oolagppa uug dootteb, ag ouɗilag na qekkunu hette bia doon, lamen ena ii tagatteb, ag oolagppa oo gamag ahak doona, ag Kayak binag mena, ag lamen ena takkaglagnu meiɗe uɗimi. Ehanittak dahil amuppa ag ad ok Yawe Nug eppom bia bena, genab tutukku hak danab ah daaglag. Ag anam bia daappeg, danab ah laa ag, ag anadna, ag Yawenu binag amahlak oppiaawak ele anidna, ag Nug humidkkulag.

Aisaia 61:1 ပူးပေါင်းရင်းမြစ်များ

Sam 147:3

Nug danab ah ag oo doyak okkai, naɗi dootteb ele ehanatte, ag eɗun, ena daatteb. Ao, Nug danab layag baegppa ihi keeke ele itatte bia, Nug ag atognoadtte.

Sam 149:4

Ag amu hekkulagnu diig am Yawe Nug nuhikkud danab ah dilagnu enanagnab dootte. Ao, Nug danab ah ag akka ag onilag qeeg nette amu, Nug ag padal memananu ehanadtte.

Sam 2:6

Nug amelagppa mattiaya, Nug atte. “Da hei, laa da tituanmi ele, nug Sion appa, king daatte. Ao, qauko Sionnu amu, qauko amu dahilnu tituanak daatte.” Yawe Nug anam awa atte.

Sam 22:26

Daɗek ag ee lappeg, oolag didikku. Amu aun aɗi oh ag Yawe anidna dim lamidkkulagnu Nug maditteb, ag Nug binag mekkulag. Maɗoɗppanu gamag ahak ii tuqa aotte ele amu, Yawe Nug heeb, ag gamag ahak amu aon daan oiglag.

Sam 25:9

Nug danab ag akka ag onilag qeeg ne oitteb ele, am ib tutukku ippunadtte. Ao, Nug danab ah amu, nuhig kobol ena tutukkunab ele ippunadtte.

Sam 34:18

Yawe Nug laa ag oolagppa guittak okkainab, nau ninig ele dootteb amu, Nug ag gukkuatta daatte. Ao, aun aɗi ag oolagppa, “Da eɗue bau ii daapa,” dootteb ele, Nug ag ehanatte, ag padal ii metteb.

Sam 45:7

Na genab tutukku hak kobolnu oot mauhtte, kobol naunu amu, na nau ninig ele doottem.” Anam amunu, ⌊O king,⌋ Kayak, Nug am nahip Kayak, Nug goɗen gokkaɗakppa tituanitta, maɗoɗppan gamag ahak okkainab, king laa oh eɗattak, na mettom.

Sam 51:17

Amu genab na doɗ mana mettaknu oot ii daatte, amge na oot daatte am, danab nug hipunin qeum, nug ooppa guittak okkai doyaya, nukka nug onig qeeb nekkunu oot hette. O Kayak, danab hipunin heum ele nug ooppa guittak okkai doyaya, nukka onig qe nette dayeb, nug baula hemanu dabmekku dayeb amu, na danab amu ii geɗidmana. Iitta. Na hipunin amu uhuqna medakkut.

Sam 68:7

O Kayak, na danab ah nahipad Isipnu omalatte uɗippig. Yo, na danab ah nahipad wan meu waknu nakokib elele, na amuppa omaladme. Sila.

Sam 69:32

Amu danab ah ag akka ag onilag qeeg ne oitteb ele amu, ag amu anidna, ag oolag gamag ahakku. Ao, ag laa ag Kayak anidna dim lamidkkulagnu Nug maditteb ele, ag amu anidna, ag oolag ɠagattag qedakku.

Eksodas 28:41

Amu Moses na lamen amu na awan Aron, amu nug bekkod ele, na ag bala amu aɗuadppe noppeg, na ag mana mettak danab daaglagnu goɗen gokkaɗakppa tituanadna, baɗ mattan, ag dahil mana mettak danab daan, uɗat hekkulagnu, na ag dahilnu tituanna meɗe!

Eksodas 29:7

Na qakkona, na laittaknu goɗen aon, na goɗen gokkaɗakppa tituanidnana, nug mana mettak danab daakkunu goɗen igippa gokkaɗkkut.

Aisaia 29:19

Haen amu uɗieb amu, danab ag akka ag onilag qeeg nette ele, ag Yawe, nuhig ehanittaknu oolag gamag ahakku. Ao, danab ag keeke iitta ele, ag Yawe, Nug Israel dilag Kayak Oppiaawak Ele, ag nuhig ehanittaknu oolag gamag ahakku.

Aisaia 30:19

Amu danab ah ag Sion daaglag. Ge, ag Jerusalem appa daaglag. Amu ag ⌊Sion danab ah, ag Sion daatteb amu, ag appa⌋ daanna, ag baula ii gaamna. Ag Yawe unuqidppeg, Nug ahilag unuqittak amu doya, Nug oo bodoette enanag maɗoɗ ele hak kobol dim lamitta, ehanadkku. Nug unuqittak ahilag doya, pahanab, haen amuppanab Nug nob ena madakku.

Aisaia 30:26

Qinob, haen amuppa Yawe Nug nuhikkud danab ah Nug eppegppa guittak aoppig ele oh ihilag ita heeb, ihilag oh qaɗaiedakku. Nug anam heebeb, kalamnu amahlak, am aamnu amahlak bia dayebeb, aamnu amahlak gemu amahlak laippu daatte, haen amuppa nuhig amahlak am amahlak eblaih aɗit bia daakku. Deɗ eblaih aɗitnu amahlak deɗ laippuppa haen amuppa daakku.

Aisaia 32:7

Danab nau nug nau hak kobol dim lamidkkunu hette. Nug eheɗ hekkunu lokkumakppa dabmaama, maittak eheɗ awa, daɗek danab heeb nauhkkulagnu hik qeeqe dabmette. Daɗek danab ag eheɗ laa ii heppig, ag tutukkuib henan daaegeg, danab nau nug heeb nauhkkulagnu anam hette.

Aisaia 40:9

O Sion danab ah, ag nai ena madippeg, laa dooglagnu maɗi ahilagppa daatte, amunu ag qauko laa attan teig! Ao, Jerusalem danab ah, ag nai ena madippeg, laa dooglagnu maɗi ahilagppa daatte amunu, ag qalan, enan mehuqeg! Ag qalan ena akkulagnu aib baɗappig. Ag, “Ahilag Kayak Nug uɗitte,” anana, Juda aab okkai, aab nakok ele ooppan danab ah appeg doyeg!

Aisaia 42:1

Yawe atte. “Antteg! Imuam dahil maɗi nid; da nug haen oh elele daakkunu ɠagattag medattem. Ao, imu amu, da nug tituanmi; da nuhignu enanagnab doottem. Da dahil Ouɗi Nug medappi, dahil maɗi nid nug danab ah oh nai doya mala hettoɗia epeɗia elele mettak kobol ippunadkku.

Aisaia 48:16

Ag Israel danab ah, ag gukkuiɗnanab uɗin, dahil nai doyeg! Anukkanab digmak haenppanu uɗie, gemu ele da keeke bekkunu daatte amu, da lokkumakppa dayeye ii mattimi. Ao, keeke bekkunu daatte mattimi, haen amu uɗie, gemu ele da iikku daattem,” awa atte. Yawe Nug anam atte, amu gemu Naɗi Yawe, Nug nuhig Ouɗi da meɗa, Nug da meiɗe, ⌊nai imu madikkulnu⌋ uɗimi.

Aisaia 49:9

Na danab ah maniguittakppa daatteb amelagppa, ‘Dimittim doig!’ appe dooglag. Ao, na laa, ag maniguittak gatatu eleppa daaglag amelagppa, ‘Ag baula maniguadppeg, gatatuppa aib daappig!’ appe dooglag. Na anam heppe, ag eɗun wanelagppa gobeppeg, da heppi, ag ib daugppa ee elele anidna, ag qauko nakok, ee ii daatteppa ele ee anidkkulag.

Aisaia 52:7

Danab laa nug qauko letata uɗia, danab ah amelagppa nai ena maditte, danab ah laa oh dilag neekkakppa amu, danab amu nug enanag hette anidtteb. Ge! Danab nug uɗia, nug nai ena, maɗoɗnu nai, ehanitteb padal ii maknu nai ele mattiaya, nug Juda danab ah amelagppa, “Ahilag Kayak Nug laa oh eɗatta, keeke oh gumatte,” atte amu, danab ah ag ahilag neekkak nuhignu am enaib anidtteb.

Aisaia 52:9

O Juda danab ah, ag aab nauhak daatte bia daatteb amu, Yawe Nug oo mak ag madakku. Ao, Yawe Nug ag laa eppelagppa dayaknu qagaiettakppanu eɗua uhuqak ha madakku. Anam amunu, ag laippun ahan, gamag ahaknu ele ahi ettalatteg!

Aisaia 57:15

Aɗinu? Yawe, Nug attannab dayaya, keeke laa ohnab eɗadtte, Nug hanhan daatte, nug onig am oppiaawak ele amu, Nug atte. “Da aben attan, aben oppiaawak ele, da amuppa daattem, amge da danab aun laa, nug nukka nuhignu, ‘Da am danab ena, onil okkai ele,’ ii dabmette, nug nukka nug onig qe nette amu, da danab amu ele daattep. Da danab nug nukka nug onig qe nette amu, da nug ooppa ɠagattag qedakkulnu, da anam hettem. Ao, da danab nug nukka nuhignu, ‘Da am danab ena, onil okkai ele,’ ii dabmette amu, da nug nuhig ouɗippa ɠagattag qedakkulnu, da anam hettem.

Aisaia 57:18

Da dahilad danab ah ag attem hena oitteb amu, da antten malami, amge da heppi, ag eɗun, enaib daan oiglag. Da ahilag ulum aɗen, da oo mak ag madakkul.

Aisaia 59:21

Amu Yawe Nug atte. “⌊Danab ah ag oolag eɗuom ele⌋, da, ge da, da ag ele imu hekkunignu nug tituana nai qakkak hettem. Da dahil Ouɗi, Nug ahilagppa daatte, amu da heppi, Nug ag, ag bekkalkad aɗelkad ele, amu ag bekkalkad aɗelkad ele amu, Nug ag oh ele gemu, hanhan ele anam daaglag. Laa, dahil nai, ag oɗelagppa daatte amu, da heppi, nai amuam ag oɗelagppa, ag bekkalkad aɗelkad ele oɗelagppa, amu ag bekkalkad aɗelkad buɗulkad oɗelagppa ele gemu, hanhan ele anam daakku.” Yawe Nug anam atte.

Aisaia 66:2

Da keeke amu oh hattami amunu, ag beppig daatteb.” Yawe Nug anam atte. Amu Yawe imu ele atte. “Aun laa nug nukka nug onig qe ne, nug nug binag ii mette, nug dahil nai dim lamidkkunu dabmak tippalmanu baɗatte amu, da nuhignu enanagnab doottem.

Jeremaia 34:8

Amu King Sedekaia nug he, Juda danab ah Jerusalem daappig ele ag anen anen ahilkad begbeg maɗi nid uhuqadppeg, ag ahilkad okkai waalagppa baula ii daamnanu nug tituana nai qakkak laa heppig. Ag amu heppig dimppa Yawe Nug Jeremaia nai laa mette doyom.

Jeremaia 52:33

Nug anam heum amunu, Jehoiakin nug baula maniguittak lamen ii takkom. Iitta. Nug lamen hamu maatta, hanhan nug King Ewil Merodaknu balalppa ee lattom. Nug anam ee laawo ukke ukke, nug mauhom.

Daniel 9:24

Kayak Nug nahipad danab ah Israel, ag daanna anidkkulagnu, nahip aab okkai Kayaknu tituanak daatte, Jerusalem, amu tonakkunu, Nug haen maha 70 ba gokkunu ɗo laa aakku meum. Haen maha 70 amu bekkunu diig anen anen am inam: Haen maha amuppa Kayak Nug heeb, danab ah ag nai tappe nak kobol uuglag. Nug heeb, ag tuɗidna hipunin ii hemana. Nug eheɗ haknu nob nau nuhig ehanittak okkaippa iitta mekkunu heeb elele medakku. Nug heeb, kobol genab tutukku hanhannu bekku. Nug heeb, nuhikkud danab ag tulegleg genabppa aɗi aɗi keeke anidppig, propet ag dimppa bekkunu nai madippig ele amu, keeke amu oh meu okku. Amu Nug heeb, aben laa tituanaknab daakku.

Hosea 6:1

⌊Amu Israel ag oolag unuqagppanu da aniɗna dim lamiɗkkulagnu mattiɗna, ag akka akka akkulag.⌋ “Ahappeg, ig eɗut, Yawe waappa daatu! Aɗinu? Nug ig doɗ layag beɗu pattiɗe, huppu naunau nette bia guittak okkai naɗi mekkom, amge Nug heeb, ig ena daagnig. Genab, Nug ig bu iqe, beɗunkad ihi mettom, amge Nug ig ihinkad nau bappaidkku.

Lewitikas 7:35

Doɗ danab ag amuppa Yawenu aab aɗunu ofa hetteb ele amu, amuppanu laih Aron, bekkod ele dilag epeɗiak daatte am aakku. Haen Moses ag Yawenu mana mettak danab daaglagnu diiatta, Yawe gumitta wana, Nug mettom, haen amuppa epeɗiak amunu aakku beum.

Maika 3:8

Amge ⌊da Maika⌋ dahilnu amu, da Jakop buɗub, ag hipunin hetteb ele amelagppa akkulnu, ao, da Israel danab ag hipunin hetteb akkulnu, Yawe Nug he, nuhig Ouɗi, ɠagattag, nai doya mala hettoɗia epeɗia elele mettak kobol, aria ooppa ɠagattag doyak ele dahilppa ambe, da oittem.

Matyu 11:5

Amelag gaɗuak ag eɗun neegtteb, baelag nau autaut oitteb amu, ag ena oitteb, gaɗalag oɗe nau ele amu oɗe amu iitta mette, daulag ituak amu ag eɗun nai dootteb, danab mauhppig ele, ag eɗun bau daatteb, amu daɗek danab ag Nai Ena dootteb.

Matyu 3:16

Jesus layattak awa malowa, Nug leppanu beum. Amu haen amuppanab hab obata mette, Kayak Ouɗi Nug uppuɗil beɗulag nakok laabia naana, Nug qaɗeppa dayeye anttom.

Luk 7:22

Amunu Jesus Nug ahilah nai amu eɗua nob ma amelahppa aum. “Aa goya, gemu aa aɗi anidpiɗ, aɗi daulahppa doopiɗ ele aakkude Jon amegppa apeɗ doyaɗ! Danab ag amelag gaɗuak ag eɗun neegtteb, baelag nau autaut oitteb amu, ag ena oitteb, gaɗalag oɗe nau ele amu, oɗe amu iitta mette, daulag ituak amu, ag eɗun nai dootteb, danab mauhppig ele, ag eɗun bau daatteb, amu daɗek danab ag Nai Ena dootteb.

Jon 1:41

Amu nug paha ukka, Saimon antta, nug amegppa aum. “I Mesaia aakku anidmuɗ,” awa aum. Mesaia diig am, danab laa Kayak Nug Nug wan imu ohnu okkai daakkunu epeɗiom. Grik naippa Mesaia eɗuak amu Kristus.

Jon 3:34

Yo, laa Kayak me uɗiom amu, Nug Kayak nai maditte. Aɗinu? Kayak Nug nuhig Ouɗi ambak medatte.

Aposel 10:38

dimppa Kayak he, nuhig Ouɗi Nug Jesus, Nasaret ted, Nug ooppa ambe, ɠagattag okkai ele mettom amunu, Nug Galili appa digma, aabaab oiyaya, danab ah ehanatte, danab oh Satan he ena ii daappig ele amu, Nug bappalatte, ag eɗun ena daappig. Aɗinu? Kayak Nug ele daapiɗ,” awa aum.

Aposel 4:27

Dawit nug aum bia amu ag genab anam heppig. Herot Antipas, Pontius Pailat ele am iitta aɗi danab amu ag Israel ele, ag oh aab okkai imuppa qagmena, ag Jesus geɗidppig, Nug am maɗi nid nahip, oppiaawak ele. Na Nug anukka goɗen gokkaɗakppa tituanme.

2 Korint 3:17

Naɗi Nug am Ouɗi daatte, amu Naɗinu Ouɗi Nug danab laa, nuhigppa daatte dayeb, keeke laa danab amu aɗa ii maniguidma. Iitta. Hamu elele enaib daakku.

2 Korint 7:6

Amge Kayak, Nug danab oo uug ele oo mak medatte amu, Nug he, Taitus gumikka uɗie, amuppa ig oonigppa oo mak doomut.

Hibru 1:9

Na genab tutukku hak kobolnu oot mauhom, gemu ele oot mauhtte, kobol naunu amu, na nau ninig ele doome, gemu ele na anam doottem. Anam amunu, ⌊O king,⌋ Kayak, Nug am nahip Kayak, Nug goɗen gokkaɗakppa tituanitta, maɗoɗppan gamag ahak okkainab, king laa oh eɗattak, na mettom.”