Aisaia 6:1 - Nobonob Baibel

¹ Aria haen King Usia mauhom, maɗ amuppa amu da Naɗi Nug nuhig sia kingppa dayeye anidmi. Sia king nuhig am attannab dayeye, Nug amuppa dayom. Am Naɗi Nug lamen beɗuppa meum am elabnab, lamen elab nuhig amu ukka, nuhig mettid lag ohppa elele mette dayom.

Aisaia 6:1 ပူးပေါင်းရင်းမြစ်များ

1 King 22:19

Ahap nug Jehosapat amegppa anam a amu, Mikaia nug nai amu tuɗitta, nug aum. “Na daut human daappe, geha da Yawenu nai appi doye! Yawe Nug sia king nuhigppa dayeye, nuhikkud engel hab aabppa daatteb oh ag Nug talilidna, naɗiap-ppa nanehppa ele hippaidna daaegeg anadmi.

2 King 15:7

Usia mauhe, ag nug gaɗa Dawitnu Aab, appa nug mamekkud aɗi boumadppigppa, aben amu guguittak nug boumppig. Nug mauhe amu, nug bekka Jotam nug mameg abenabppa king ba dayom.

2 Stori 18:18

Ahap nug Jehosapat amegppa anam a amu, Mikaia nug nai amu tuɗitta nug aum. “Na daut human daappe, geha da Yawenu nai appi doye! Yawe Nug sia king nuhigppa dayeye, nuhikkud engel daup hab aabppa daatteb oh ag Nug naɗiap-ppa nanehppa ele hippaidna daaegeg anadmi.

Job 42:5

Gemu da imu doottem. Tatam amu, laa ag nahipnu aegeg, da daulppaib doomi. Gemu amu, da amelppa na anidmi.

Sam 108:5

O Kayak, na heppe, danab ah oh ag na ohnab eɗattak daattem anidkkulagnu oɗ medattem. Yo, danab ah aben ohppa ag nahip binag amahlak oppiaawak ele anidkkulagnu unuqidttem.

Sam 113:5

Yawe, Nug am ihinig Kayak, laa Nug bia laal ii daatte. Nug hab aabppa sia king nuhigppa daatte.

Sam 46:10

Yawe Nug atte. “Danab ah wanppanu, ag toettan daan, ag imu doyeg! Da am Kayak. Da geha wanppan wan anen anen oh dilag king daakkul. Ao, da geha wan ohnu king daakkul.”

Eksodas 24:9

Moses nug amu oh ha male, dimppa nug, Aron, Nadap, Abihu amu Israel dilag ikki danab 70 ele, ag qaukoppa teppig.

Aisaia 1:1

Juda dilag king Usia, Jotam, Ahas, Hesekaia ele ag haen anen anen king daaegeg, Yawe Nug Juda danab ah oh, laa Jerusalemnu, laa Juda wanppa laih laihnu amu, Nug amu dilagppa aɗi bekkunu Amos bekka Aisaia miagib ippunittom amu, amunu nai am iikku.

Aisaia 12:4

Haen amuppa ag gamalag aheb, geha ahi inam ettan akkulag. “Ag Yawe onig attan humeg! Ag Nug unuqitteg! Ag danab ah wan ohppa amelagppa keeke ena oh Nug heumnu appeg doyeg! Nug laa oh eɗattak, attannab daatte amu, ag danab ah oh amelagppa aig!

Aisaia 57:15

Aɗinu? Yawe, Nug attannab dayaya, keeke laa ohnab eɗadtte, Nug hanhan daatte, nug onig am oppiaawak ele amu, Nug atte. “Da aben attan, aben oppiaawak ele, da amuppa daattem, amge da danab aun laa, nug nukka nuhignu, ‘Da am danab ena, onil okkai ele,’ ii dabmette, nug nukka nug onig qe nette amu, da danab amu ele daattep. Da danab nug nukka nug onig qe nette amu, da nug ooppa ɠagattag qedakkulnu, da anam hettem. Ao, da danab nug nukka nuhignu, ‘Da am danab ena, onil okkai ele,’ ii dabmette amu, da nug nuhig ouɗippa ɠagattag qedakkulnu, da anam hettem.

Aisaia 66:1

Yawe Nug atte. “Hab aab am sia king dahil, wan am da bael maknu balal nakok daatte. Anam daatte amunu, ag lag laa, da aguppa daakkulnu hekkulagnu elelete? Ag aben laa da aguppa hik awe daakkulnu hekkulagnu elelete? Iitta.

Esekiel 1:1

Jehoiakin nug Juda dilag king daya, eheɗ he, Babilon dilag king Nebukatnesar, nuhikkud daup ele ag gona, Juda eɗadna, Nebukatnesar nug Jehoiakin awa, nug awa ukka laih me dayak danab daakkunu Babilon uɗie dayeye, maɗ waɗele uue, maɗ tanig elenu kalam tanig eleppa Kayak Nug digma, tulegleg imu Esekiel ippunitte anttom. Esekiel nug am Busi bekka, Nug am mana mettak danab. Am nug Babilon wanppa le Kebar daugppa dayeye, Kayak Nug he, nug tulegleg antta, Yawenu nai doyom. Appa Yawe Nug Esekiel, uɗat nuhig hekkunu aɗom. Amunu nai imuam Propet Esekielnu nai. Da Esekiel, da maɗ 30 ele daye, maɗ amuppa kalam waɗele, deɗ tanig eleppa da kekeɗ heeg, Israel danab ah ag Babilon wanppa le Kebar daugppa diia ukka laih me dayak danab ah daappig, da ag oolagppa daaiyi, Kayak hab matule, da digmein, tulegleg laala Kayak ippuniɗeɗe anadmi.

Esekiel 10:1

⌊Amu tuleglegppa⌋ da Esekiel, da neekki ukke, da keeke tappiɗ naɗi okkai, danab nug eɗi noum bia, da matu anidmi amu, da keeke amu anidmi. Keeke amuam engel okkai-kerubim attan dayom, amu keeke amu attan keeke laa, sia king men sapaiappa hak bia aakku dayom.

Esekiel 10:4

Bud aben amu ambe, Yawenu binag amahlak oppiaawak ele engel okkai-kerubim daye attan boppala dayom amu, am appanu aha, Kayaknu mettid lagnu od uguppa ukka daye, bud Kayaknu mettid lag ambe, Kayaknu binag amahlak oppiaawak elenu amahlak okkai amahalele, mana mettak danab dilag haɗap-ppa amahlak okkai dayom.

Daniel 10:17

Da am nahip maɗi nid. Na dahil okkai. Da attem heppi, na ele nai mattignih. Dahil ɠagattag iitta meum. Da noolppa hik aokkulnu uug doottem,” awe ami.

Daniel 7:9

Qeqeɗi nakok, dim beum am anam heehe, da neekki ukke, da laa ag kingnu sia enanag kuɗum abenlagppa maatteg daaeg anadmi. Ag maatteg daaegeg, Kayak Hanhan Daatte Nug sia king nuhigppa heɗep na dayom. Lamen nuhig am hakkabnab, sno bia. Nug ikki uɗug am hakkab, sipsip uɗig bia. Sia king nuhig am aab ewak bia dayom. Amu sia king nuhig am ele wil ele, amu wil amu oh am danab aab ile, huana diditte, amubia ag oh huan ewegeg anidmi.

Namba 12:8

Iitta. Haen da nug ele nai madittep amu, ii nug anidɗaɗa nai madittep. Da nai miagib madittem, nai tonak ii madittem. Nug da, da Yawe, nug da attemun amu aniɗtte. Anam aakku daatte amunu, aɗinu aa dahil maɗi nid Moses, aa nuhignu nai eheɗ akkulahnu ii baɗaya, nai eheɗ nuhignu apiɗ,” awa aum.

Matyu 25:31

Jesus Nug anam ana Nug nai tuɗitta aum. “Dimppa haen Danab Bekkalag da, da binal amahlak oppiaawak ele uɗippi, engel oh ele uɗignig, haen amuppa da sia king binag amahlak oppiaawak ele dahilppa daakkul.

Jon 1:18

Danab laippu laa nug haen laa Kayak ii anttom. Iittanab. Kayak Bekka laippunab, Nug Kayak ele ouqak daattep amu, Nug aakkuib anitta doya, Kayak ippunikkom.

Jon 12:41

Aisaia Jesusnu binag amahlak oppiaawak ele anttom amunu, nug Jesusnu aum.

1 Timoti 6:16

Nug nukka aakkuib ii mauhtte; hanhan daatte. Amahlak ig gukkuidta gokkunignu elele iitta ele amu Nug amuppa daatte. Danab laippu laa ele Nug ii anttom, laa anidkkunu ele elele iitta. Nug binag amu nuhig ɠagattag haen oh ele nuhigppa dayeɗ! Amu genab.

Revelesen 15:8

Matte, Kayak binag amahlak oppiaawak ele, amu Nug ebehi ele aa heeh, aab kah Kayaknu mettid lakka ambeum. Laippu laa nug lag ooppa nokkunu elele iitta. Ag engel eblaih aɗit amu amelag mebeppeg, ag heppeg, keeke nau eblaih aɗit ele amu malappeg, laa nokkulnu elele.

Revelesen 20:11

Da amu anttena amu, da imu ele anidmi. Da sia king okkainab, hakkab ele, amuppa Kayak Nug heɗep na dayeye anidmi. Wan imu, hab ele nug noobppanu ooleh, aben laa aa daaglahnu ii dayom.

Revelesen 3:21

Aun laa nug ban eɗidkku amu, da nug daakkunu elele appi, nug da ele dahil sia kingppa, anukka da ban eɗitti, gemu da Mamel ele nuhig sia kingppa daattep amubia daagnih.

Revelesen 4:10

ikki danab 24 amu ag laa, Nug sia king ⌊anuqak,⌋ appa daatte, Nug hanhan bau daatte ele amu, ag Nug noobppa gatelag qaun ona, Nug noobppa dup nona binag mena, ag anen anen ag ahilkad haɗ ag ikkilkadppanu aon, sia king ⌊anuqak⌋ guguittak maadna daaegeg, ikki danab ag inam atteb.

Revelesen 4:2

Anam a, pahanab Kayak Ouɗi dahilppa ambe, da sia king ⌊anuqak⌋ hab aabppa dayom, laa Nug amuppa dayeye ele anidmi.

Revelesen 4:3

Nug beɗu am men jaspa, amu men konilian ele, amubia amahlom. Amahlele, di apinak laa sia king ⌊anuqak⌋ amu talilittak men emeral bia anidmi.

Revelesen 4:9

Hab daup waɗele Kayaknu bauklel aotteb ele, ag Kayak, sia king ⌊anuqak,⌋ appa daatte, Nug ele hanhan bau daatte, ag Nug binag, amu binag amahlak oppiaawak ele menana, “Ena heme,” aon aegeg,

Revelesen 5:1

Laa Nug sia king ⌊anuqak,⌋ appa dayom ele amu, Nug eppeg naɗiap-ppa buk itoɗiak laa anidmi. Buk amu ooppa, dimugppa ele oh yaak ele, amu buk amuam qataqak eblaih aɗit ele.

Revelesen 5:7

Aria, Sipsip Nag amu Nug ukka, Kayak Nug sia king ⌊anuqak,⌋ appa eppeg naɗiap-ppa buk itoɗiak amu aɗa dayeye, Nug aɗitta awom.

Revelesen 6:16

Lokkumna daanna, ag qauko, men ele dilag appig. “Laa nug sia king ⌊anuqak,⌋ appa daatte ele, Nug amegnu lokkumigkkulagnu, amu Sipsip Nag, Nug danab ah dilag hipuninnu oppoɗi bak dootte ele amu, ag oppoɗi bak amunu ele lokkumigkkulagnu, ag nena qena tonikkeg!