Aisaia 57:5 - Nobonob Baibel

⁵ Ag eheɗ hetteb ele amu, ag ahilag kayak hambuppuak noolagppa dup nona binalag mekkulagnu, ag oo hak nau ahilag dim lamidna, ag kayak hambuppuak amu ad ok waalkadppa ag noolagppa dup nona binalag metteb. Ag amu heegeg, ag ib baag ah kayak hambuppuak amu noolagppa dup nona binalag metteb ele, ag ag ele kobol eheɗ hetteb. Ao, ag ad okkai eppelkad bahia ukkak ele oh waalkadppa ag anam hetteb. Ag ele nid ahilkad diin gona, oolnu noakppa, ag appa ahilkad nid manadna, ahilag kayak hambuppuak madatteb. Ao, ag nid ahilkad diin gona, men gukka waappa ag anam hetteb.

Aisaia 57:5 ပူးပေါင်းရင်းမြစ်များ

1 King 14:23

Juda ag gemu kayak hambuppuak dilag mettid lag nakok, kayak hambuppuak Aserah dabmekkulagnu biidod, amu men gappi ele qauko nakok okkai oh ikkilkadppa, amu ad okkai eppelkad bahia ukkak ele oh waalkadppa bappaladna maadppig.

2 King 17:10

Ag gona, qauko nakok oh igippa, ad okkai eppelkad bahia ukkak ele oh waalkadppa ele, ag men gappi maadna, kayak hambuppuak Aserah dabmekkulagnu biidod ele galadna, ⌊ag keeke amu ag noolagppa dup nona binalag meppig⌋.

2 King 17:7

Uug amu oh Israel dilagppa beum. Aɗinu? Ag Yawe, ahilag Kayak, Nug ag alalkad anukka Paro, Isip dilag king eppegppa daappig, Nug appanu eɗua diia, omalatta uɗiom amu, ag nuhigppa hipunin heppig. Israel ag kayak hambuppuak noolagppa dup nona binalag menana,

2 King 23:10

Amu danab ag aben onig Topet, aben amuam oolnu noak onig Hinom Bekkanu Oolnu Noak, appa dayom amu, ag aben amuppa eɗun gona, ag bekkalkad, aɗelkad aqan manan, kayak hambuppuak Molek mettaglagnu baula hemananu, King Josaia nug aben amu ele he, dubuttid teum.

2 Stori 28:3

Nug oolnu noak onig Hinom Bekkanu Oolnu Noak appa doɗ manatta, kayak hambuppuak matta, am eheɗ hak amu eɗittak, nug bekkod ele appa manatta, kayak hambuppuak mattom. Nug wan anen anennu danab ah, Yawe he, Israel ag lamadppig ele, nug amu dilag kobol, Yawe Nug kobol amunu ooppa uuaknab dootte amu, nug kobol amu dim lamittom.

Eksodas 32:6

Nug anam a, wagɗe deɗ amuppa amu, danab ah ag manaknu ofanu doɗ manadna, ⌊dottog amu⌋ mettona, ag laippu dayaknu ofanu doɗ ele manadna ⌊dottog amu⌋ medappig. Danab ah ag ofa amu mettona, ag ee, le ele lawona, ag ahan gona, ahi uɗa nak ele goɗappig.

Aisaia 1:29

Ag ad ok, ⌊ag amu waalagppa kayak hambuppuak noolagppa dup nona binalag metteb,⌋ ag ad amunu enanagnab dootteb ele, ag amunu uɗalag nekku. Genab, ag dad ena ena, ⌊amuppa ag kayak hambuppuak noolagppa dup nona binalag mekkulagnu⌋ tituantteb amu, ag amunu laa noolagppa uɗa nak nau guittak ele dooglag.

Jeremaia 17:2

Anam daatte amunu, Juda danab ah ag hipunin amu hekkulagnu daulag ii atitte, hakib heegeg, nid ahilkad ele ag amunu dabmakppa daanna, hipunin amu hetteb. Ag kayak hambuppuak dilag qaɗab, amu kayak hambuppuak Aserah dabmekkulagnu biidod ele ad okkai eppelkad bahia ukkak ele guguittak, qauko nakok okkai igippa,

Jeremaia 2:20

Amu Yawe Nug atte. “Anukkanab ag dahil nai, dahil ɗo ele dimettan autna aoppig; ag makau, o danab, nug muɗi o aɗi keekeppa qakkak daatte ele, nug keeke amu he nauhtte, amubia ag heppig. Ag amu henana, ag da amelppa appig. ‘Ig na waatppa iinab daamta,’ aon appig. Ge, ag amu henana, ag qauko nakok ohppa, ad okkai eppelkad bahia ukkak ele oh waalkadppa ele, ag kobol nau heppig; ag ib baag ah danab eeɗadtte, nug ele niitteb, kobol nuhig amubia ag heppig.

Jeremaia 3:13

Da ag keeke laippuib hekkulagnu attem. Ag genab kobol eheɗ heeg, aab ag beɗulagppa daatte miag aig! Ag beɗulagppa aab daattenu diig am inam; ag da Yawe, ahilag Kayak, ag da dimeɗan, dahil nai tappaeg ne, ag kayak hambuppuak laihnu akkan, amu noolagppa dup nona binalag meppig. Ag ad okkai eppelkad bahia ukkak ele oh waalkadppa kobol nau amu henana, ag dahil nai ii dim lamidppig.

Jeremaia 3:6

Amu Josaia nug Juda dilag king dayeye, Yawe Nug da, Jeremaia, Nug da amelppa inam aum. “Israel danab ah ag da dimeɗona kayak hambuppuak laala dim lamadna, kobol nau digdig heppig amu, na amu anidmete? Israel danab ah ag ewau pakkua gappai hak bia hena, ag qauko nakok igippa, ad okkai eppelkad bahia ukkak ele oh waalkadppa ele ag kayak hambuppuak digdig noolagppa dup nona binalag meppig.

Jeremaia 32:35

Ag oolnu noak onig Hinom Bekkanu Oolnu Noak appa kayak hambuppuak Balnu mettid lag nakok bappaladna, amu aben amuppa ele ag bekkalkad, aɗelkad aqan manadna, kayak hambuppuak Molek medappig. Ag ahilkad nid manadna, kayak hambuppuak madappig amu, da ag kobol amu hekkulagnu iinab ami. Kobol amunu da oolppa uuaknab doottem. Ag amu hekkulagnu dahil dabmak nakok laa iinab dayom. Ag anam hetteb amunu, Juda danab ah ag hipunin hena, bu aoglagnuib daatteb.” Yawe Nug anam atte.

Jeremaia 50:38

Laa heeb, Babilon dilag le qaɗaietteg! Anam heeb, le am qaɗaiettaglag. Aɗinu uug amu oh Babilon wanppa bekku? Ag kayak hambuppuak dottolkad noolagppa dup nona binalag metteb. Amu Babilon danab ah ag dottolkad amu dabmenana, ag kaaka danab hette bia hetteb.

Jeremaia 51:7

Wan atu laihppa danab ag hipunin heeg, Yawe Nug ahilagnu oppoɗi be, Nug Babilon ag bu madakkunu uɗat mattom. Nug matte amunu, Babilon kap golppa hak Yawe Nug eppegppa aɗom bia dayom. Yawe Nug danab ah hipunin heppig dilag oppoɗi beum amu, oppoɗi bak amuam wain nau kap-ppa daatte, amubia. Amu Yawe he, wan atu ohppan danab ah ag wain nau amu laeg, kaaka aqom.

Jeremaia 7:31

Oolnu noak onig Hinom Bekkanu Oolnu Noak, appa aben laa onig Topet daatte. Amu Topet appa Juda ag mana mettak aben kayak hambuppuak dilag mettid lag nakokppa bappaladna, appa ag bekkalkad, aɗelkad ele manadna, kayak hambuppuak madatteb. Da ag amu hekkulagnu iinab ami! Ag amu hekkulagnu dahil dabmakppa nakok laa iinab beum.

Esekiel 16:20

Amu Naɗi Yawe, Nug tuɗitta atte. “Na nau amu aakku heme, amge na kobol nau amu eɗittak, amu laa ele heme. Na nahipad nid danab, nid ah ele, dahilnu menuadme amu, na nid amu diin main, kayak hambuppuak amu mattame.

Esekiel 20:26

Da ag paɗatti, ag doɗ manadna, ahilkad nid ⌊danab⌋ tatamnu ele manadna, kayak hambuppuak mattan, amuppa ag dahil neekkakppa ag oolagppa dubuttid teum ele daappig. Da amu heminu diig am, ag amu heppeg, da heppi, danab keeke naunab antta, ameg iɗuak dootte, amubia ag ameg iɗuak doon, ag da am Yawe dooglagnu anam hemi.’ ” Yawe Nug anam awa atte.

Esekiel 20:28

Da wan laa ag mamelkad madakkulnu dahil nai ɠagattag qetten mattimi amu, da omalatti, ag wan amuppa gona tena dayona, ag qauko laa nakok okkai anidna, o ag aɗi ad okkai ebekkud bahia ukkak ele anidna amu, ag aben amu ohppa qaɗab aqappig. Ag appa qaɗab aqanna, ag doɗ aon, amuppa main, kayak hambuppuak madappig. Ag keeke laala ele, da ag amu haknu oppoɗi bak doottem, ag keeke amu ahilkad kayak hambuppuak madappig. Ag amuppa kalu danab ile muttuɗig enanag bette ele manan, kayak hambuppuak madappig. Ag amuppa amu henana, ag wain gokkaɗaknu ofa ele amuppa heppig.

Esekiel 20:31

Ag kayak hambuppuak dottolkad keeke ena mattana, ag ag bekkalkad diin main, dottolkad amu madatteb amu, kobol amuppa ag heeg, ag dahil neekkakppa ag oolagppa dubuttid teum ele daappig, gemu ⌊nai imu yaak haenppa⌋ ele ag anamib daatteb. Ag Israel danab ah ag amu henan, anam daatteb amunu, da uuadppi, ag da keeke laanu oɗ meɗaglagte? Da genab bau daattem, genab amubia da ag oɗmak meɗaglagnu ib ii madapa.’ ” Naɗi Yawe Nug anam atte.

Esekiel 6:13

Keeke amu ahilagppa beeb, Israel danab ah kuɗum ag mauhadna, ag gaɗalag kayak hambuppuak dottolkad daattebppa, amu dilag qaɗab talilittakppa niippeg, ag gaɗalag qauko nakok oh ikkilkadppa niippeg, ag gaɗalag qauko okkai oh ikkilkadppa ele niippeg, ag gaɗalag ad ok enanag, amu ad okkai eppelkad bahia ukkak ele oh waalkadppa ele niippeg, aben amu ohppa ag kalu danab ile muttuɗig enanag bette ele manan, kayak hambuppuak madappig amu, ag gaɗalag aben amuppa niippeg, laa ii mauhppig ele, ag da am Yawe dooglag.

Lewitikas 18:21

Ag nid naunau ahilkad Molek toppa diin wana, manan nug mettaglag dayeb amu, ag aakku da, ahilag Kayak, ag da onil laa dilag neekkakppa heppeg nauhak daakku. Ag anam aibnab heppig! Da am Yawe.

Namba 25:6

Nug anam aawo amu, Israel danab laa nug Midian ah laa omala, nug baekkudppa daappigppa uɗiom. Moses nug danab ah oh ele ag mettid haknu peh lag danab ah appa qagmetteb ele, ag appa gaanna daaegeg, danab nug ah amu omala waum. Nug omala, ag oh noolagppa waum.

Duteronomi 12:2

Ag danab wan anen anen amuppa daatteb ele lamadna aona, ag ahilkad kayak noolagppa dup noa binag mak aben ele oh loppaɗppeg nauheg! Amuam ag ahilkad kayak noolagppa dup noa binag mak kobol hekkulagnu keeke qauko okkaippa, amu naunauppa ele hadappig; ad okkai eppelkad bahia ukkak ele oh waalkadppa ele keeke hadappig amu, ag amu oh loppaɗatteg!

Revelesen 18:3

Aɗinu? Danab wan atu ohppanu ag danab wain laeg kaaka aqe, kobol kobol hetteb, amubia ag nug ele kobol nau digdig ele, ewau pakkua gappai hak kobol bia heppig,. Amu king atu atunu ele ag nug ele kobol nau digdig, ewau pakkua gappai hak kobol bia, heppig. Wanppan keeke laihnu awa dadennu mak danab ag nuhig keeke ena ena digdig kuɗumnab hik qe awaknu kobolppa enulag ele daappig,” awa aum.