Aisaia 57:11 - Nobonob Baibel

¹¹ Amu ag auntai laa eheɗ baɗidppig amunu, ag da dimeɗan, dahilnu daulag atie, ag dahilnu dabmak ele ii aoppig? Ag eheɗ heegeg, haen elabnab uɗie, da bu ag paha ii mattami amunutai, ag bu mettak dahilnu ag ii baɗatteb?

Aisaia 57:11 ပူးပေါင်းရင်းမြစ်များ

Sam 50:21

Na amu oh heehe, da Kayak, da na bu ii mettami. Ao, da na bu ii nittami amunu, dahil hak amuppanu na da eletai kobol nau amubia hettem dabmeme. Amge da anam ii hettem. Da na daut baten, hettoɗiakppa meidkkul.

Sam 78:36

Anam, amge nakok dimppa ag Nug amegppa nai genab iitta appig. Ao, ag nai hambuppuak Kayak amegppa appig.

Prowerb 29:25

Danab dilagnu baɗittak am pelem bia daatte; amge aun nug Yawenu ooppa genab dootte, nug eleleib daakku.

Eklisiastis 8:11

Danab eheɗ hena, ag paha bu ii aotteb dayeb, danab oh ag hibguitta henana, kobol eheɗ digdig hekkulagnu dabmetteb.

Aisaia 26:10

Nau hak danab ah amu, ag genab tutukku hak kobol ii dootteb. Na ahilagnu kobol ena attem hekkut am ii ehanadma. Iitta. Ag eɗun, genab tutukku hak kobol hekkulagnu iinab dabmemana. Ag danab ah genab tutukku hetteb imu oolagppa daatteb, amge ag ahilag hak nau am ii uutteb. Ag tuɗidna henana, ag Yawe, Nug dagom onig ɠagattag ele daatte amu, ag amu dab-ii-metteb. Iitta!

Aisaia 30:9

Nai amuam hanhan danab ah inam ippunadkku; Juda danab ah imu ag am nai tappe nak danab ah. Ag nid naunau dahilad, amge ag hambuppun oinna, ag hambuppuak danab ah daatteb. Ao, nid naunau ag mamelkad anilkad dilag nai dooglagnu uutteb, amubia danab ah imu ag da, Yawe, ag dahil nai uutteb.

Aisaia 42:14

Yawe Nug ⌊nuhikkud danab ah Israel, Nug ahilagnu⌋ inam atte. “Haen elabnab da toetten dayeye, ⌊da ahilag kekeɗ ag ag aladppig ele, da ag ii hatti nauhppig⌋. Yo, da dakka oɗel qamute dayeye, ⌊da ahilag kekeɗ, ag ag hatteg nauhppig ele, da ag hadappi nauhkkulagnu ib amu, da oo nein,⌋ hamu daami. Amge gemu amu, da ah nug nid menukkunu wagai maama, ewawa, hik qe, hik huana awawa hette, amubia da uɗat okkai, guittak ele doyeye, ag ehanadkkul.

Aisaia 44:20

Danab nug kayak hambuppuak dottog hoiya, binag mette ele, nug am dabmak iittanab iitta. Nuhig doyak am kaliak dayaya he, danab amu nug ib tutukku apiɗitta malom. Nug nukka, nug padal memanu nugakka ehanidkkunu elele iitta dayaya, nug dabmak nau nuhig uua, “Kayak hambuppuaknu dottog imu da eppelppa aɗattem ele, keeke amuam keeke genab iitta, am keeke hambuppuaknab,” akkunu ele, elele iitta.

Aisaia 47:7

Ag Babilon ag kuin laa nug nukka nuhignu, ‘Da hanhan kuin daakkul,’ atte, amubia ag Babilon ag, ‘Ig hanhan wan oh dilag okkai daagnig,’ appig. Ag anam appig, amge ag eheɗ hak ahilag, ag amunu nob nau ii dabmeppig. Ag eheɗ hak ahilag, ag amunu nob nau ahilagppa bekkunu elele amu, ag amunu dabmak nakok laa ii aoppig.

Jeremaia 2:32

Ah laa nug nuhig ewau matulak awaknu bala daug ii atitte. Ao, ah nug ewau matulak awak haenppa aɗi bala meum am dabmette, daug ii atitte. Nug anam hette, amge ag Israel ag dahilnu haen elabnab daulag atie, dahilnu nakok laa ii dabmeppig.

Jeremaia 3:21

Qauko ikkilkadppa qanak baag laa doyeg! Baag amuam Israel danab ah ag kobol eheɗ dim lamidna, kaliak henana, ag Yawe, ahilag Kayak daulag atiom dootteb amunu, ag gaanna, Nug oo doyakppa unuqidtteb.

Jeremaia 38:19

Jeremaia nug Sedekaia amegppa anam a, King Sedekaia nug eɗua nug amegppa aum. “Amge Juda laala ag akka ag gona, ag beɗulag Babilon eppelagppa meppig daatteb amu, Babilon ag da ag eppelagppa meiɗkkulag dayeb, ag da eheɗ heiɗkkulagnu baɗattem,” awa aum

Jeremaia 41:18

Ag Isip gokkulagnu diig am, ag Babilon dilag king aɗi ag ahilagnu aɗi hekkulagnu dabmenan baɗappig. Aɗinu ag anam dabmeppig? Babilon dilag king nug Ahikam bekka Gedalaia nug Juda wannu gawana daakkunu tituane, Netania bekka Ismael nug Gedalaia qe mauhom, am diig amunu ag Babilon dilag king nug aɗi hekkunu baɗan, ag oolna Isip wanppa gokkulagnu goppig.

Jeremaia 42:20

Ag Isip gokkulagnu dabmetteb amu, amuam ag mauhkkulagnu hetteb. Aɗinu? Ag da Yawe, ahilag Kayak, da Nug unuqidkkulnu ag da amelppa, ‘Na Yawe, ihinig Kayak, na Nug ihinignu unuqidppe, Nug aɗi ab appe, ig doot, Nug aɗi aɗi hekkunignu akku amu, ig aakku hekkunig,’ appig.

Esekiel 13:22

Da genab tutukku hak danab ah uug dooglagnu ii hei, ag ah eheɗ hetteb ele ag nai hambuppuak mattiegeg, genab tutukku hak danab ah ag kobol ena dim lamidkkulagnu uug doon oitteb. Ag ah ag eheɗ hetteb, ag anam henana, ag nau hak danab ag mauhmananu, ag oolag eɗueb, eɗun ena daaglagnu dabmak ii madatteb. Iitta! Ag tuɗidna, eheɗ hekkulagnu atteb.

Hosea 11:12

Israel danab ah ag hanhan buppuiɗtteb. Ge, Israel danab ah ag hanhan nai genab iitta da amelppa maditteb. Amge Juda danab ah ag Yawe ele ɠagattag daatteb. Ao, ag tuɗidna, oo metta ii uuak kobol dim lamidna, Kayak Oppiaawak Ele oɗe dim lamidtteb.

Matyu 25:25

Anam amunu, da baɗe, talent laippu nahip meɗame amu awe ukke, wanppa moɗ awe memi. Antte, nahip keeke iikku,’ awa aum.

Aposel 5:3

Nug anam a amu Pita nug aum. “Ananias, aɗinu Satan na ootppa ambe, na Kayak Ouɗi amegppa hambuppuak nai mattinna, ‘Da wan mei, laa nug daden me, men doɗo aomi amu oh iikku,’ ame, amge na laih nahip daakkunu piɗe mee dayeye, laihib aon uɗime?

2 Tesalonaika 2:9

Amge ii nauhak haenppa ɗo ii dim lamittak danab amu nug Satannu ɠagattag ele uɗia, hambuppuak kobol danab haknu elele iitta, laanu dabmettaknu kobol danab haknu elele iitta, amu uɗat ɠagattagnab ele haaha,

1 Timoti 4:2

Nai amuam hambuppuak danab ag kobol hambuppuak henana, nai hambuppuak amu yaaeg bette. Hambuppuak danab amu ag oolagppan oiyak ippunittaknu ulum am uɗat pehettak ii hette amunu, ag ahilag hipuninnu dab-ii-medatteb.

Revelesen 21:8

Amge laa ag baɗanna, akka ahilagnu dabmena hak kobol dim lamidna, laa ag oolagppa genab doyak iitta, laa ag kobol nau uɗig wak hetteb ele, laa ag danab aqaeg mauhtteb, laa ag gappai kobol hetteb, laa ag baɗ mak danab, laa ag dup noa kayak hambuppuak binag mak danab, amu nai hambuppuak danab oh ele, amu oh aab ameg kalu laa huana eotte onig salpa eotteppa, ag amuppa aben aoglag. Amuam mauhak ebqak 2 aakku,” awa aum.

Revelesen 22:15

Amge baɗ mak danab, gappai danab, qe mauhak danab, kayak hambuppuak binag mak danab ele, amu laa oh ag hambuppuak kobol oolag mettan hetteb ele, ag Kayaknu aab okkai dimittim qai bia daaglag.