Aisaia 5:22 - Nobonob Baibel

²² Danab ah aun aɗi, ag danab wain lanaknu onilag ele, ahilagnu gadonnab gadon! Ao, danab ah aun aɗi ag le ɠagattag digdig kabolina, huana latteb ele amu, ahilagnu gadonnab gadon! ⌊Ag padal mekkulag.⌋

Aisaia 5:22 ပူးပေါင်းရင်းမြစ်များ

1 King 20:16

Ahap nug a, daup amu oh ag qagmeeg, aam anig, haen amuppa, Benhadat, amu king 32 laa ag Benhadat ehanidppig, ag ahilkad peh lag appa daanna, ag le ɠagattag lanana, ag spak mekkulagnu heegeg, Israel dilag daup amu ag ahan, Samaria uuna, Aram dilag daup ele ban hekkulagnu aab dimittim gonana, ban danab nid bau ag anuqna goppig. Amu Benhadat nug matu ib meitta, keeke laa antta, amunu nai eɗua uɗia mattiaknu danab laa ag gona, Israel dilag daup ag uɗippeg, ag uɗin appeg dookkunu maatte goppig amunu, Israel ag ahan uɗiegeg, danab amu ag amu anidna, ag eɗun, Benhadat amegppa, “Danab ag Samaria aabppanu uɗitteb,” aon appig.

Eksodas 23:8

Danab nug hettoɗiakppa nai hambuppuak genab daakkunu lokkumakppa eheɗ haknu ehanittak mattaknu ab amu, aria ag men doɗo amu aib aoppig. Aɗinu? Kobol anam, amuam he, hettoɗiakppan danab okkai dilag dabmak, amu danab laa dilag dabmak ele he kaboliattette, genab tutukku hak danab dilag nai ele he, kaliak daatte.

Prowerb 20:1

Wain huan lanak amu he, danab kaaka kobol heeg, danab laa ag eheɗ aon aon aqadtteb. Bia nug he, danab ag nug qetteb; aun aɗi ag le laeg, kaaka aqatte, eheɗ oitteb, ag danab doyak dabmak ena ele iitta.

Prowerb 23:29

Aun nug uug okkai dootte? Aun nug oo doyak okkai dootte? Aun nug laikkud ele oolag laippu ii daatteb? Aun nug naittuɗ mak ele? Aun nug guittak awom, amge nug ii aolo? Aun nug ameg kokoɗ eppom daatte?

Prowerb 31:4

O Lemuel, king, ao king, ag wain huana aib lappig. Yo, gumak danab ag aib le ɠagattag lakkulagnu hik qak dooppig.

Prowerb 31:5

King ag le ɠagattag huana lakkulag dayeb amu, ag ɗo aɗi hekkulagnu ippunadtte, ag amu daulag atieb; ag nai doya mala hettoɗia epeɗia elele mettak kobol ii dim lamidna, ag danab ah, laa ag eheɗ hadatteb ele, ag amu dilag oh elele ii hettoɗiadna, elele ii ehanadkkulagtai.

Aisaia 22:13

Amge antteg! Ag oo doyak kobol amu ii hemana. Iitta! Ag oo gamag ahak doon, ahi goɗak, hobul ee naɗi hena, sipsip aqan, makau baalag otaɗadnana, henan lanana, ag wain ele lakkulag. Lanana ag akkulag. “Doppeg, haen elab iitta ig mauhkkunig amunu, ig ee le ele aot latu!,” akkulag.

Aisaia 24:9

Ag baula oo gamag ahak doon, wain lanana, ahi ii ettamna. ⌊Uug ahilkad amu heeb,⌋ le ɠagattag, bia ag latteb amu, ag oɗelagppa ubuhi ii doomna. Iitta. Ag ninig dooglag.

Aisaia 28:7

⌊Amu anam aakku bekku, amge gemu⌋ Israel danab le lanak kobolppa daatteb amu, ag Israel danab ah gumadtteb. Propet danab, mana mettak danab ele oh le ɠagattag lana, spak menan, taataɗ qeegeg, hak ahilag am nauhom. Ag amubia oitteb amunu, dabmak ahilag eɗatte, maɗi ahilag amu, ag tutukku ii hetteb. Propet ag Kayak Nug tulppa keeke ippunatte, ag pehettak ii anidtteb. Mana mettak danab ele ag danab ah dilag keeke tutukku ii epeɗitteb.

Aisaia 5:11

Amu danab ag le ɠagattag digdig lakkulagnu guittak doon, lakkulagnu buttuanab ahatteb amu, ahilagnu gadonnab gadon. Ge, laa ag tueb ukke tugmag mette ele, ag wain lanan, kaaka eheɗ aqadtte amu, ahilagnu gadonnab gadon.

Aisaia 56:12

Ag akka akka nug amegppa mattin atteb. “Ahappeg! Ig gota, wain aotu! Ao, ig gota, bia aot lapput ukkeb, oonig didikku. Ig amu hetata oipput, butti am ele deɗ ena, gemu bia daakku, amge gemu bianab ii daama. Iitta! Buttinu oo gamag ahak am gemunu eɗidkku,” aon atteb.

Habakuk 2:15

Danab nug nuhikkud mudippan laippu ag beɗulag miag daappeg anidkkunu le ɠagattag huan gokkaɗe no, matte laegeg, kaaka aqe, lamen uɗatteb amu, nuhignu gadonnab gadon.