Da danab keeke eppe, ena bette, amubia da Israel danab ah ag wan ele daaglagnu, ag amuppa maɗoɗ ele daaglagnu ehanatten, aben madappi daaglag. Danab nau ag anukka da Israel dilag ikki danab digmein tituanadmi, haen amuppa danab nau amu ag digmena, dahilad danab ah eheɗ hattaegeg uɗie, gemu ele hetteb, amge da heppi, ag amu tuɗidna ii hemana. Amu ele, da heppi, nahipad kekeɗ ag ɠagattag ii daamna. Amu da Yawe, da heppi, na buɗunad oolagppanu laala ele, ag anen anen ahilag haenppa, ag Israel dilag king hanhan bena daaglag.
Aisaia 5:2 - Nobonob Baibel2 Nug wan buue be, men oh akke ukke, muɗi grep eppeg enaib epeɗia eppom. Dad amu gamagppa nug neekkeb ukkeb, aɗi uɗitte anttaknu lag attan ta ukkak menppa hak laa heum. Amu nug dad ooppa nug grep meu tappa leppu awaknu aben laa heum. Nug keeke amu oh ha malowa, nug “Muɗi grep dahil imu geha meulag ena, ubuhi ele daaglag,” dabmeum. Nug anam dabmeum, amge anam iitta. Muɗi grep amu meu ena ii oppig, meulag doɗo naunau oppig; lanaknu am mua ele, ena iitta. အခန်းကိုကြည့်ပါ။ |
Aisaia 5:2
31 ပူးပေါင်းရင်းမြစ်များ
Amu haen amuppa ele amu, da danab laala ag Juda wanppa Sabat deɗppa grep meu, leppu aoglagnu tappaegeg anatte, laa ag ee aeg dad okkaippanu aon uɗin, ee aeg amu, wain doɗ gaɗappa inak, muɗi grepnu meu, ad fig meu, ad meu laala kuɗum ele donki attan mena, ag keeke amu oh aon uɗin, Jerusalem uɗippig ele anadmi. Ag anam heegeg anatten, da baula Sabat deɗppa danab ah ee daden mekkulagnu aon uɗin, dadennu memananu ag amelagppa ami.
Aɗinu? Na ig ele anam ii gopput amu, danab ah huu laa ag na dahilnu ena doottem, am nahipad danab ah dilagnu ele ena doottem amu, ag amu attem dooglagnu elele? Na ig ele, elele anam ii gopput amu, ib adekkuppa danab ah huu laappanu ag dahilnu, nahipad danab ah dilagnu ele, ig am danab ah huu laa dooglag?” awa aum.
Kekeɗ ag heeg, Sion nukkaib daatte. Nug grep dadppan peh ⌊uɗat malak haenppa⌋ nukka, hamu daatte amu, nug amubia daatte. Ao, nug dadppan peh ⌊uɗat malak haenppa⌋ nukka, hamu daatte amu, nug anam bia daatte. Nug kekeɗ ag aab okkai laa talilidna, oo mettaeg, aab amu nukka, piɗe daatte, amubia Jerusalem nukka ⌊laa nug ehanidkkunu iitta⌋ aakku daatte.
Aɗinu? Israel buɗub ag am Yawe Nukka Ɠagattag Oh Ele, ag nuhig muɗi grep dad bia. Ao, Juda buɗub ag am muɗi grep, Yawe eppa, muɗi grep amunu enanagnab doyom bia. ⌊Yawe Nug ag ena atognoattatta,⌋ Nug danab ah amu ag nai doya mala hettoɗia epeɗia elele mettak kobol dim lamidkkulagnu dabmeum, amge iitta! Ag danab aqaeg mauhtteb! Ao, Nug ag anen anen, ag genab tutukku hak kobol danab ah laa dilagppa hekkulagnu dabmeum, amge iitta! Ag danab ah laa dilagppa kobol nau heegeg, danab ah ag uug nau doon gaatteb!
Yawe Nukka Ɠagattag Oh Ele, Nug danab ad eppe ba daatte, amubia Nug ag ehanatte, ag gemu daatteb, amge Nug uug naunab ahilagppa beeb, padal mekkulagnu ɗo ma malom. Aɗinu? Nug amunu atte. “Ag Israel danab ah, Juda danab ah ele ag eheɗ henana, ag kalu danab ile muttuɗig enanag bette ele aon main, kayak hambuppuak Bal mettaegeg, diig amunu da oppoɗil beum, gemu ele daatte,” awa atte.
Israel danab ah, ag am muɗi grep danab eppom, amubia. Muɗi grep amuam enanag, meu okkunu elelenab, oɗe keeke iitta. Nug muɗi grep elele anam eppom, meu enanag aokkun dabmeum, amge muɗi grep ba, okkai ma, meu oum, me meu amuam ena iitta; am meu nau. Muɗi grep amuam eɗua, muɗi grep dakkuɗ, meu ena iitta ele beum. Amu ag Israel danab ah, ag dahilppanu anam bia aakku.
Israel danab ah ag am en kuɗum ele daappig. Ao, ag am grep muɗi ena meu huana oa daatte, ag amubia daappig. Ag keeke kuɗum ele tuɗidna aon daan; ag keeke amu kayak laa madappig. Ag ee huanak aonna, ag men doɗo ele huanak aona; ag men doɗo amuppa men gappi, amuam kayak hambuppuak ahilkad amu, ahilag neekkak ena daaglagnu hena bappaidppig.
Amu aab okkai Jerusalemnu amu, aab amuam lag attan ta ukkak menppa hak sipsip gumak danab nug aguppa ta, sipsip ena daaglagnu neegtte ele amubia daakku. Ao, Sion am ban haknu aben ɠagattag, Israel ag aguppa ena daaglagnu bia daakku. Aab am anambia daakku amu, Yawe Nug heeb, danab ah gumattaknu ehah Jerusalem appa king beɗuppa daakku. Ao, king Jerusalem appa ana daakku.
Da qauko laa imu, aria qauko laala guguittak daatteb ele, ag oh ikkilagppa men eleib, amu da qauko imu igippanab hibaitte daye, da Israel danab ah anadttem. Yo, da qauko imu, amu qauko laala guguittak daatteb ele, ag oh attannab, amu da qauko imuppa hibaitte dayeye, Israel danab ah anadttem. Da Israel danab ah anadttem, me ag am danab ah ameg laa; ag wanppanu danab ah oolagppa ii daatteb. Iitta. Ag amu, ag akkanab awaittak laih daatteb. Ao, ag am wanppan huu laa oh ele dilagnu, ‘Ig ag ele oh laippu daatteb,’ ag amu ii dabmetteb. ⌊Iitta. Ag Yawe dim lamidtteb.⌋
Jesus baula ele amelagppa aum. “Ag keeke danab ag dootteb ii dootteb ele ouaqata ippuanittak nai imu baula doyeg! Danab laa nug wan ele amu, nug grep dad eppowa, aɗ ita, dad ooppa amu nug grep meu tappa leppu awaknu aben laa ha, nug neekkeb ukkeb aɗi uɗitteb anttaknu lag attan ta ukkak laa ele heum. Aria, nug uɗat amu oh ha mala, nug dad uɗat danab, dimppa ag dad amunu meu laih mettaglagnu ag eppelagppa mewowa, nug aha, atu laih umanab ukkom.
Jesus Nug anam awowa amu Nug digma, keeke danab ag dootteb ii dootteb ele ouaqata ippuanittak nai laala inam aum. “Danab laa nug grep dad eppowa, aɗ ita, dad ooppa grep meu tappa leppu awaknu aben laa ha, nug neekkeb ukkeb, aɗi uɗitteb anttaknu lag attan ta ukkak laa ele heum. Aria, nug uɗat amu oh ha mala, nug dad uɗat danab eppelagppa mewowa, nug aha, atu laih umanab ukkom.
Israel ag am Kayaknu danab, ag Nug bekkod maattom daatteb. Ag Nug binag amahlak oppiaawak ele amu anidppig daatteb. Nug he, Nug ag ele nug tituanna nai qakkaladppig, nuhig ɗo ele aoppig. Ag Nug nuhig mettid lag, appa Nug noobppa dup noa binag maknu kobol aon dootteb, amu Nug ag ehanadkkunu nai qakka mattialatta maattom.
ကြော်ငြာတွေ