Aisaia 48:9 - Nobonob Baibel

⁹ Ag Juda ag eheɗ amu hetteb, amge da, da onilnu dabmak anuqak awewe, da ag Juda, da ag paha eheɗ ii hadattem. Ao, danab ah ag dahil hak pehettak doon, ag hak amu binag mekkulag amu, ag binag mak amu hekkulagnu da dabmak anuqak awewe, da bu elele paha ii madattem. Da ahilag haknu nob elele mattalom amu da hadappi, ag iitta melob, amge da amu bemanu da paha nob anam ii madattem.

Aisaia 48:9 ပူးပေါင်းရင်းမြစ်များ

Sam 106:8

Ig alankad ag anam heppig, amge Yawe Nug ag padal memananu ehanadkkunu matu aum amunu, nug anam heum. Nug amu heumnu diig laa am, Nug Nug onignu dabmak anuqak awa, danab ah ag nuhignu nai eheɗ mattinna, “Yawe Nug keeke hekkunu aum, amge Nug ii heum,” amananu heum. Laa am, Nug ɠagattag nuhig attemu ele danab ah ippunadkkunu heum.

Sam 143:11

O Yawe, danab ah ag na oninnu dabmak anuqak aoglagnu amu, na da mauhpanu ehaniɗkkutnu oɗ medattem. Keeke oh na hettem amu, amuam genab tutukkuib, amu na ehaniɗppe, da uug imuppa ii daapanu unuqidttem.

Sam 25:11

Da hipunin kuɗumnab hemi amunu, O Yawe, na oninnu dabmak anuqak awaknu amu, na hipunin dahil uhuqadna meɗakkutnu oɗ medattem.

Sam 78:38

Ag amu heppig, amge Kayak Nug ahilagnu oo gai-iitta doya oo matta ehanatta, Nug ahilag hipunin uhuqa mattom. Nug ag oh ii hatte nauhppig. Haen kuɗum Nug oo nauhak nuhig aɗom. Ao, haen kuɗum Nug ahilagnu oppoɗi bak doyom, amge Nug aɗaɗa, ag bu madakkunu dayom bia ii bu mattom.

Sam 79:9

O Kayak, na am Padal ii maknu ehanittak ihinig daattem. Laa ag na am binan amahlak oppiaawak ele dooglagnu, na ig ehanigkkutnu oɗ medattem. Ao, laa ag nahipnu dabmak anuqak aoglagnu, ig kekeɗ eppelagppa daamtanu, na ihinig hipunin uhuqna megakkutnu, ig na unuqidttem.

Prowerb 19:11

Danab nug doyak dabmak ena ele daatte amu, doyak dabmak ena amuppa nug oo maɗoɗ ele dayak danab daatte; haen danab laa nuhigppa eheɗ he, nug eheɗ hak amu uhuqa medatte, kobol amunu danab ah ag nug binag metteb.

Aisaia 30:18

Diig amunu amu, ⌊Ag oolag eɗueb,⌋ Yawe Nug oo bodoette enanag maɗoɗ ele hak kobol dim lamittatta, amuppa ag ehanadkkunu oo huan daatte. Ao, Nug ⌊ag oolag eɗueb,⌋ Nug ahilagnu oo bodoetta le mekkunu babaittak daatte. Aɗinu? Yawe Nug am Kayak haen oh nai doya mala hettoɗia epeɗia elele mettak kobol dim lamidtte. Amu aun aɗi ag Yawe ameg metteb ele amu, ag am itittak ena aoppig daatteb.

Aisaia 37:35

Da aab okkai imu ehanitte, guppiɗ bia daabppi, ena daakku. Da, da laa ag dahilnu dabmak pehettak iitta aomnanu, da amunu dabmak anuqak awewe, aab imunu guppiɗ dayeye, da dahil maɗi nid Dawit amegppa keeke laa hekkulnu ami amu, da amunu ele dabmak anuqak awewe, aab imunu guppiɗ daakkul.” Yawe Nug anam atte.

Aisaia 43:25

⌊Ag hipunin henana, padal mekkulagnu elele,⌋ amge da, da Yawe, da diilnu dabmak anuqak awewe, da ahilag hipunin uhuqen madattem. Da ahilag hipunin uhuqen matten, da daul atie, baula dab-ii-mettem.

Aisaia 48:11

Amu da diilnu dabmak anuqak awewe, da ag qagaiettakppanu eɗuen diiadkkul. Ge! Da, da diilnu dabmak anuqak awewe, da ag qagaiettakppanu eɗuen diiadkkul. Aɗinu? Da laa uuidppi, nug heeb, laa ag da onilnu, ‘Am keeke hamu,’ dooglagnu elele iitta. Ao, da laa uuidppi, nug dahil binag amahlak oppiaawak ele awa, nug onigppa qataqekkunu iinab hepa.” Yawe Nug anam awa atte.

Aisaia 65:8

Amu Yawe Nug atte. “Danab ag grep meunu leppu aonna, ag grep meu aɗa auta awak laa, meu amunu leppu oh ii awak anidna, ‘Leppu ina daatte amunu, ig keeke ena imu, keeke ena iitta ele oh laippu, hamu buɗipput ukka nauhkkunu ii hemata,’ atteb, amubia da Juda danab ah, ag am dahilad maɗi nid maɗi ah ele amu, da ahilagnu anam hekkul. Da ahilagnu dabmeine, da ag ohnab, hadappi ii nauhmana.

Jeremaia 14:7

⌊Yawe Nug gu ii nekkunu anam mattie, da unuqitte ami.⌋ “O Yawe, ig hipunin hemut, amge na, na oninnu dabmak anuqak aon, na ehanigkkutnu unuqidttem. Ig haen kuɗum na dimedata autta aomut. Ao, ig nahip-ppa hipunin hemut.

Esekiel 20:14

Da amu dabmein ami, amge da onilnu dabmak anuqak doyen, da onil wanppan wan ohppan danab ah ag da Israel Isipnu diien, omalatti uɗieg anidppig amu, danab ah amu ag da onilnu, am keeke hamu bia doomnanu da amu ii hemi.

Esekiel 20:22

Amge da ii hemi. Da amu dabmein ami, amge da onilnu dabmak anuqak doyen, da onil wanppan wan ohppan danab ah ag da Israel Isipnu diien, omalatti uɗieg anidppig amu, danab ah amu ag da onilnu, am keeke hamu bia doomnanu, da amu ii hemi.

Esekiel 20:44

O Israel danab ah, ag amu dabmena, ag da, da onilnu dabmak anuqak awen, da ahilag hak nau, eheɗ hak ahilag ele, da amunu heppi, ag padal mena iitta mekkulagnu elele, amge da anam ii hemi amu, ag amu dabmena, ag dooglag, da am Yawe.” Naɗi Yawe Nug anam atte.

Esekiel 20:9

Da amu dabmein ami, amge da ii hemi. Da anukka Israel ag laa oolagppa daan oiyegeg, da ag amelagppa da ehanadppi, ag Isip wan uuglagnu ai, ag, am danab ag oolagppa daan oippig ele dooppig. Ag dooppig amu da dabmemi helom am, danab ah laa amu ag da onilnu am keeke hamu bia doolob amunu, da, da onilnu dabmak anuqak doyen, da nob amu ii mattami.

Esekiel 36:21

Israel ag heeg, da lamatti, laih laih gona, wanppan wan laalappa daan heeg, da onil oppiaawak ele, amu dilag neekkakppa hamu bia dayom, gemu ele daatte amu, da amunu ena ii doye, anam daamanu dabmak aottem,” awa aum.

Josua 7:9

Kanan danab, amu danab laala wan imuppa daatteb ele amu, ag imu beum doon, ag oo mekkan, ig iqappeg mauhkkunig. Ag amu hekkulag, amge O Yawe, amu anam beeb amu, na onin okkai, amuppa am attem bekku?” awa unuqittom.

1 Samuel 12:22

Ag Yawe aib dimedappig. Iitta. Ag Nug dim lamidkkulag. Aɗinu? Yawe Nug amunu ena doya, Nug ag danab ah nuhikkud daaglagnu tituanattom amunu, Nug onignu dabmak anuqak awa, Nug ag, ag am nuhikkud danab ah amu, Nug ag uuatta, di-ii-mattama.