Aisaia 27:6 - Nobonob Baibel

⁶ Amu qinob dimppa, haen laappa ⌊Yawe Nug heeb⌋, Jakop buɗub ag ad diɗi wanppa noum daatte bia daaglag. Ao, Israel danab ah ag am ad haɗag qa, meu metta, meu huanak otte, ag amubia daaglag. Amu haen amuppa Israel ag anam daappeg, ahilag meu ena wan oh tonadkku.

Aisaia 27:6 ပူးပေါင်းရင်းမြစ်များ

Job 37:12

Lombig anam daaegeg, Kayak Nug ag aɗi hekkulagnu, ag adeppa adeppa gokkulagnu haknunab a, ag aakku hetteb.

Aisaia 35:1

⌊Amu Aisaia nug haen laa dimppa, haen amunu nug inam aum⌋. Dimppa amu, atu taɗakppa, amu atu taɗak huana qaɗaiedatte ele amu, aben amuppa wanppan keeke oh ena beppeg, gamag ahak daakku. Ao, wan meu waknu nakokib elele, wan amuam gamag ahak daakku. Amu appa, bala onig lili mappatadtteb bia, bala huan mappatadkkulag.

Aisaia 35:2

Keeke kuɗumnab atu taɗak appa mappatadppeppeg, wan amuam bala mabatak ena ele, amubia enanag daakku. Wan amunu keeke oh danab nug oo gamag ahak doyaya, baag okkainab ele ahi edatte, amubia wan amunu keeke oh ag danab daaloblob am gamalag aheb, ahi ettalob. Yawe Nug heeb, gemu laih atu taɗak daatte amu, atu amu qinob Lebanon wan binag ele daatte, am binag amubia ele daakku. Ao, Yawe Nug heeb, atu taɗak amu, am qauko Karmel, uɗem naɗi onig Saron ele, aa aben enanagnab, onig ele, am wan amubia daakku. Yawe Nug heeb, atu amu anam bekku amunu, danab ah atu ohnu ag anam anidna, ag Yawenu binag amahlak oppiaawak ele anidkkulag. Ao, ag Kayak, Nug am ihinig Kayak, ag nuhig ɠagattag okkai naɗi ele anidkkulag.

Aisaia 37:31

Juda danab ah oɗo yaak daaglag amu, ag gikkiɗah keeke, hiɗaeg be, wanppa niiaya, diɗi eɗua wan ooppa noa he, gikkiɗah eɗua bau dayaya meu otte, Juda amubia baula appatna, ena daaglag.

Aisaia 4:2

Aria haen amuppa amu, Yawenu wan, am Israel amu, wan amuam aben anttaknu enanag, onig binag oppiaawak ele daakku. Am geha wanppanu ee meulkad ena huan obeppeg, Israel danab ah qagaiettaknu ii mauhppig daatteb, ag amu oh anidna, diig amunu ag oolag gamag huan ahebeb, danab ah laa ag binalag mekkulag.

Aisaia 6:13

Am danab ah laib laib laa wan imuppa daaglag, amge da baula heppi, wan imu eɗua baula nauhaknab daakku. Amge amu dimugppa danab ah dahilad oppiaawak ele laippu laippunab, ag ad laa oeg qiiom, diig daatte, ag amubia daaglag. Ag ad terebint laa, o ad ok laa ele oeg, diig dayaya, ita bette amu, danab ah dahilad ag amubia hekkulag,” awa aum.

Aisaia 60:22

Ag Juda ag oolagppanu aab ikki laa, aab ikki amuam danab kuɗum iitta amu, ag dahil ehanittakppa appatna, kuɗumnab daaglag. Ao, aab ikki nakoknab, aab ikki laa oh aab ikki amu eɗidtteb amu, aab ikki amuam appatppeg, huu naɗinab, ɠagattag ele daakku. Da am Yawe. Da keeke imu bekkunu haen uɗieb amu, da paha heppi bekku.” Yawe Nug anam atte.

Jeremaia 30:19

Da anam ehanadppi, Jakop buɗub ag ahi ettanna, ag ahi amuppa, ‘Ena hen mekkame,’ da amelppa akkulag. Ag oo gamag ahak okkai doon, gamag ahaknu heppeg, oqotti okku. Da heppi, ag appatna, kuɗum daaglag. Ag ahilag ebqak am tutu ii mema. Da heppi, ag danab onilag ɠagattag ele daaglag; danab laa ag ahilagnu, ‘Ag binalag ele,’ dooglag.

Esekiel 36:10

Da heppi, Israel buɗub oh, Israel danab ah amu, ag eɗun, kuɗum appatna, kuɗumnab daaglag. Ag aab nauhppig daatteb, ag amuppa eɗun daan, bappaidkkulag.

Esekiel 36:8

Amge ag Israel dilag qauko, Israel danab ah ag paha eɗun uɗiglag amunu, Israel ag ee lakkulagnu ad ahilagppa bena, meu okkulag.

Hosea 2:23

Geha da dahilad danab ah ag ahilag wanppa dahilnu bappalatten maadkkul. Geha da laa da amelagppa, ‘Da ahilagnu oo bodoetta le mak kobol ii dim lamidpa,’ ami amu, da ahilagnu oo bodoetta le mak kobol hein ippuanattette, laa da ag amelagppa ‘Ag am danab ah dahilad iitta,’ ami amu, da ag amelagppa, ‘Ag am dahilad danab ah,’ appi, ag da amelppa dahilnu, ‘Na am ihinig Kayak,’ akkulag.” Kayak Nug anam aakku atte.

Sekaraia 2:11

Haen amuppa amu, wanppan wan kuɗumnu danab ah ag Yawe gukkuidna daan, Nug dim lamiɗkkulagnu hekkulag. Ag nuhikkud danab ah bena daaglag. Nug ag oh, ag oolagppa daakku. Anam beeb amu, ag Yawe Nukka Ɠagattag Oh Ele Nug da meiɗe, da ahilagppa uɗimi dooglag.

Galesia 3:29

Amu ag Kristusnu daatteb dayeb amu, aria ag am Abraham buɗub aakku daatteb amunu, ag aakku Kayak Nug anukka Abraham amegppa keeke laa heeb bekkunu nai qakka aum amu, ag amu aoglag.

Pilipai 3:3

Aɗinu ag amu dilagnu dabmena autna aoglag? Ag am gaɗa otaɗak danab genab iitta. Ig Kayak Ouɗippa Kayak noobppa dup nota binag meta, ig Kristus Jesusnu uɗatppa aakkuib ig padal mematanu ehanittak aognignu dabmeta, ig beɗunignu kobol ig ehanigkkunu elele oonigppa genab ii doottem ele amu, ig ikka am gaɗa otaɗaknu kobolnu danab genab daattem.

Revelesen 11:15

Aria, engel ebqak 7 nug trampet nuhig iwale amu hab aab appa da laa baalag okkaippa inam aeg doomi. “Wan ohppan gumak uɗat aakku eɗua, ihinig Naɗi, amu laa Nug danab ah dilag Padal ii maknu ehanittak daakkunu tituanom, am Kristus, Nug ele eppelahppa daatte. Naɗi Nug hanhan uɗat amu hekku,” aon appig.