Aisaia 13:8 - Nobonob Baibel

⁸ Baɗak okkai, eheɗ naunab tonatteb, geha guittak okkai dooglag. Ag geha ah nid aokkunu guitte, beɗu itoɗia akkoniaya bia hekkulag. Ag akka akka nug iɗu neekkidna, iɗulagppa haen naunab aakku beum anidkkulag. Ag geha anam anidna ag geha nau, eheɗnab baɗaglag.

Aisaia 13:8 ပူးပေါင်းရင်းမြစ်များ

2 King 19:26

Appan danab ah ag ahilag ɠagattag iitta me, ag oolag uug nau qe, ag uɗalag neum. Ag am datta keeke eppak, keeke amu digma baaba, gai-iitta daatte bia daappig. Ao ag gikkiɗah aben laa wan teppu iittanabppa appa be, ulah gakkaɗak nau uɗia he, okkai ii meum haenppa bunaɗtte, ag amubia daappig.

Sam 48:7

Amuam genab, ulah kaɗag laa uɗia he, Tarsis uub ag nauhppig, amubia na king, ahilkad daup ele ag uɗin, Jerusalem ele ban hekkulag heeg, na Kayak, na hee, ag nauhppig.

Aisaia 26:17

⌊Na noomppa ig eheɗ heut,⌋ na bu mekkame ⌊amunu,⌋ ig ah nid aokkunu guitte, beɗu itoɗia akkoniaya, gayaya hette bia na noomppa hetat daamut. O Yawe, ig guittak okkai nau aota, ig dabmak ihinigppa, “Keeke ena laa geha bekku,” doomut, amge iitta. Ig ehanitteb padal ii maknu uɗat laa wanppa heut ii beum. Ig kekeɗ tappaladpput noppeg, ig hepput, ihinig dayak ena bekkunu amu, ig ii heut beum.

Jeremaia 13:21

Laa yawalti uɗitteppanu uɗitteb amu, tatam ag Juda okkai, ag ag ele nug tituana nai qakkakppa daaglagnu wagai men heppig, amge Yawe heeb, amu dilag ag okkai ahilkad daappeg, ag ag waalagppa daaglag amunu, haen amuppa ag aɗi nai mattiglag? Iitta. Ag uug okkai, ah nid aokkunu guittak dootte, ag amubia dooglag.

Jeremaia 30:6

Oɗ mattan doye! Danab nug ah nid menutte bia nid menukkunu elelete? Iitta amunu, aɗinu da danab ɠagattag ohnab anen anen ag ah nid aokkun oo eppegppa lamuhitte bia, ag oolag lamuhieg anadttem? Aɗinu da danab ɠagattag iɗulag oh hakkab eppom anidttem.

Jeremaia 4:31

⌊O gadon tuleglegppa da⌋ gayak doottem. Da ah nug nid tatamnu aokkunu haaha, ewawa aiqagatte, da gayak amubia doottem. Da gayak doottem am, ag Juda danab ah, ahilag. Ah laa nug laa ehanidkkunu eppeg bahia, “O gadonnab gadon, da mauhkkulnu hettem. Da danab nau eppelagppa daaiyi, ag heppeg mauhkkulnu hettem,” atte amu, ag Juda danab ah ag amubia daatteb doomi.

Jeremaia 46:5

Ag amu hekkulag, amge da aɗi iikku anidttem? Da Isip dilag daup ag baɗak eheɗ nau doon, ag eɗun ooltteb. Babilon dilag daup ag Isip dilag daup eɗadppig. Isip ag eheɗ ooltteb. Ag eɗun neegnana, ii ooltteb. Iitta. Ag oolna ukkakib eheɗnab gotteb. Baɗak eheɗ nau ag taliliatte daatteb.

Jeremaia 48:41

Kekeɗ ag uɗin, Keriot eɗadna, wan amuppan aab aɗ ɠagattagnab ele aoppeg, Keriot danab ah ag eppelagppa daaglag. Amu beeb, deɗ amuppa Moapnu daup ag ah nid aokkunu hette bia daaglag.

Jeremaia 49:22

Antteg! Ai igel hagagaɗa oiyaya, doɗ aokkunu noa ukka, eɗua tette, amubia kekeɗ ag Bosra danab ah diiadppeg, ag eppelagppa daaglag. Amu beeb, deɗ amuppa Edom dilag daup ag ah nid aokkun hette bia daaglag.

Jeremaia 49:24

Damaskus danab ah ag gai-iitta daaglag. Ag oolkkulagnu henana, baɗak naɗi okkai doon, ag guittak nau ele aoglag; guittak amuam ah nid aokkun haaha, guittak nau dootte, amubia.

Jeremaia 50:43

Babilon dilag king nug daup amunu nai dookku amu, nug aɗi keeke hekkunu laa iitta, nug gai-iitta daakku. Nug ooppa guittak naɗi dookku; ah nid aokkun haaha, guittak dootte, guittak amubia nug ooppa dookku.

Jeremaia 51:30

Yawe Nug amu heeb beeb, Babilon dilag daup ag kekeɗ ele ban hak uun, ban haknu aben ɠagattag ooppa wana, appa daaglag. Ag ban huana heppeg ukkeb, beɗulag bodoetteb, ag ah bia, gai-iitta daaglag. Kekeɗ ag Babilon amotppeg eokku. Ag aɗ od manak qaknu keeke aɗappeg qiikku.

Esekiel 20:47

Na ad amu, danab ah daalob, na ag amelagppa anan, ‘Ag Yawenu nai doyeg! Naɗi Yawe Nug inam atte,’ appe doyeg! Dahil nai am inam. ‘Da amotadppi, ag ad bau, ag ad bunaɗak ele ag oh eoglag. Aab ewak amuam aab ewak okkai, gakkaɗak nau ele, amu laa nug heeb, iitta mekkunu elele iitta. Aab ewak amu ewebeb, danab ah Israel wan ohppa daatteb, ag gakkaɗak nau amu dooppeg, ag iɗulag eokku.

Hosea 13:13

Israel danab ah ag am bau daaglagnu ib ele, amge ag ib amuppa ukkaknu ag doyak dabmak ena ele iitta; appa ii oitteb. Aɗinu? Ag am nid yuɗ laa menuaknu daatte, amge nid loabppan dokkunu uua daatte, ag amubia daatteb.

Joel 2:6

Am danab wanppan wan ohppa daatteb ele, ag tap-lokus amu anidna, ag eheɗ baɗaeg, beɗulag hahaɗtte; iɗulag ele hakkab ebatte.

Nahum 2:10

Kekeɗ ag Niniwenu keeke oh aakku ban hena aoglag. Ag aon gokkulag. Ag anam hebeppeg, Niniwe danab ah ag beɗulag gai-iitta mekku. Oolagppa am ag ɠagattag laa ii doomna. Ag hahaɗppeppeg, ag iɗulag am hakkab ebakku.

Jon 16:21

Ah nug nid menukkunu haen male, nug guittak dootte, amge nug nid menuowa, nug baula guittak ii dabmette. Aɗinu? Nug nid menue doum amunu, nug maɗoɗppan gamag ahak dootte.

1 Tesalonaika 5:3

Danab ah ag, “Haen ena aakku beum, ig maɗoɗ ena daagnig,” abeppeg, haen amuppanab keeke eheɗ, ag heeb nauhkkulagnu, ahilagppa bekku. Keeke eheɗ amuam ah nug nid aokkunu guittak paha bette, amubia beeb dooglag. Danab ah ag keeke eheɗ amu ii qe-eɗidmana.