Aisaia 12:2 - Nobonob Baibel

² Genab, Padal ii maknu ehanittak oh da aomi amu, Kayak Nug ehanittak amu oh diig daatte; da nuhignu oolppa genab doye, da geha ii baɗapa. Aɗinu? Yawe, ao Yawe, Nug am ɠagattag dahil. Nug uɗat ena hette, diig amunu da gamag ahak ahi edattem; Nugib dahil Padal ii maknu ehanittak daye, da padal ii memi.” Ag laib laib geha anam ahi ettaglag.

Aisaia 12:2 ပူးပေါင်းရင်းမြစ်များ

2 Samuel 7:24

Na Israel danab ah tituanatte, ag nahipadnab danab ah aakku daatteb; hanhan anam daaglag. Na, O Yawe, na ahilag Kayak bena daattem.

Job 13:16

Antte! Danab laa nug Kayaknu nuhig haknu ele uuak dootte amu, nug Kayak noobppa wab, Nug ele nai mattiglahnu oo ii hema. ⌊Amge da ool hette⌋ amunu amu, da beɗulppa aab iitta daattem ippunigtte, amuppa da ehanittak aottem.

Sam 112:8

Nug ɠagattag daatte. Nug aɗi keeke laanu ii baɗama. Nug nuhikkud kekeɗ ag nena qeppeg, nug anadkku.

Sam 118:14

Yawe Nug dahil ɠagattag dayaya, oo gamag ahak dahil diig ele daatte. Nug am dahil Padal ii maknu ehanittak daatte.

Sam 118:21

O Yawe, na dahil unuqittak doon, kobol ena dahilnu hena meɗame amunu, da na amenppa, “Ena hen meɗame,” awe attem. Yo, na am dahil Padal ii maknu ehanittak daattem.

Sam 27:1

Yawe Nug dahil amahlak, dahil Padal ii maknu ehanittak ele daatte amunu, da aun laa baɗidkkul? Ao, Yawe Nug ban haknu aben ɠagattag dahil bia daatte, da amuppa ukken daakkul amunu, da auntai laanu ii baɗapa.

Sam 65:6

Nahip ɠagattagppa, na qauko hatte bena, ag abenlagppa daatteb. Nahip ɠagattag am okkainab.

Sam 68:20

Kayak ihinig, Nug am Kayak, ig padal makppanu eɗua awigtte ele! Ao, Naɗi Yawe Nug ig ehanikke, ig ii mauhttem.

Sam 68:21

Amge Kayak Nug nuhig kekeɗ ikkilkad aduduɗadkku. Ao, Nug laa ag tuɗid ele hipunin hetteb amu, Nug ag ikkilkad aduduɗadkku.

Sam 83:18

O Kayak, na heppe, ag na, na onin am Yawe amu, ag na nakkaib na wan imuppa Kayak Attannab Laa Oh Eɗattak daattem, naib wan imu gumattem amu, ag amu dooglagnu ool daatte.

Eksodas 15:2

Yawe Nug nukka da ɠagattag iukkunu dootte; Nugib da ehaniɗtte amunu, da gamag ahak doye, ahi edattem. Nugib da ehaniɗe, da padal ii mettem. Nug am dahil Kayak, da Nug onig humakkul. Nug am da mamelnu Kayak, da Nug binag okkai humakkul.

Aisaia 10:24

⌊Ag Israel danab ah, laippu laippu qagaiettakppa ii mauhadna, eɗun⌋ uɗiglag amunu Naɗi, Nug Yawe Nukka Ɠagattag Oh Ele, Nug inam atte. “Danab ah dahilad Sion daatteb ag Asiria ag buppa makkuɗadna eheɗ hadatteb, anukka Isip ag ahilagppa daɗibppa heppig bia hetteb amu, ag amu dilagnu aib baɗappig.

Aisaia 17:10

Aɗinu? Ag ⌊Juda, ag⌋ Kayak ahilag, Nug ag ehanatte, ag padal ii metteb ele amu, ag Nug daulag atiom. Ao, ag ahilag Kayak, Nug kekeɗ aqamanu ehanattak ahilag, Nug am aab aɗ ɠagattagnab ele ahilag bia daatte amu, ag Nug dab-ii-metteb. Anam amunu, ag muɗi grep ena ena aon eppaglagtai. Ao, ag grep aben laihnu aon eppaglagtai. Ag buttua eppelagppa eppan heppeg, qaɗu buttua amuppaib belo. Ao, deɗ amuppa buttua ag eppan heppeg, haɗag ele qelo. Ag anam heppeg belo, amge meu awak haenppa keeke amu oh am keeke hamu. Ag grep meu laa ii aomna. Iitta. Ag meu diig aɗit laa, meu amuam oɗe digdig, amu guittak ii bodoedatte ele, ag meu amu aakkuib aoglag.

Aisaia 27:5

Amge dahilad danab ah dilag kekeɗ ag da ahilag padal mak eɗitteb ena dayaknu ehanittak daakkulnu oolag daatte dayeb amu, ag da ele maɗoɗ daagnignu unuqiɗkkulagoitte. Ao, ag da ele maɗoɗ daagnignu unuqiɗkkulagoitte,” awa aum.

Aisaia 32:2

Haen amuppa kobol inam bekku. Danab okkai amu oh ag gilil ulah qehagtte bia daaglag. Ao, ag ulah huanak uɗieye, danab nug padal mak eɗitteb ena dayaknu abenppa ukka daatte, ag aben amubia daaglag. Okkai danab amu ag atu taɗak, le iitta ele, ag appa le laa noa gotte bia daaglag. Ao, ag wan laappa, aam gakkaɗak naunab nau neene, danab nug men okkainab logoppa ukka daatte, ag lokko amubia daaglag.

Aisaia 33:22

Aɗinu keeke amu bekku? Yawe Nug ihinig gumak danab daatte. Nug ɗo nuhig ig megatte. Yawe Nug ihinig king daatte. Nug ehanikkebeb padal ii memata.

Aisaia 38:20

Yawe Nug ehaniɗe, da ii mauhmi amunu, ig bau daattem ele, ig haen amu ohppa nuhig mettid lagppa Nug onig humagnignu musik gitappa, amu keeke gita biappa hetat daagnig.” Hesekaia nug ahiettak anam yom.

Aisaia 45:17

Amge Yawe Nug Israel ehanatteb, ag padal iinab memana. Ehanitteb, padal ii mak amuam hanhannu; iitta ii mema. Ao, ag Israel, ag uɗa nak ii aomna; laa noolagppa uɗa nak nau guittak ele ii daamna. Ag hanhan anamib daaglag.

Aisaia 49:5

Yawe Nug da anil ooppa, Nug da nuhig maɗi nid meiɗa, Nug da Jakop buɗub, ag nuhigppa eɗue diie uɗikkulnu heiɗom. Yo, Nug da Israel danab ah ehanadppi, ag eɗun, nuhigppa uɗiglagnu heiɗom. Yawe Nug da binag okkai meɗatte. Ao, dahil Kayak Nug ɠagattag meɗatte.

Aisaia 50:10

Danab ah oh oolagppanu aun nug Yawenu ebehi oh bodoetta le mette, nug nuhig maɗi nidnu nai dim lamidtte ele amu, danab amu nug deɗ laa gatatuppa oiyaya, nug amahlak laa ii anidtte dayeb amu, nug Yawenu ooppa genab doyaɗ! Nug Kayakib dim lamittaɗ; laa aib dim lamittom!

Aisaia 51:12

Amu Yawe Nug atte. “Da, ge da, da oo mak madattem. Danab am keeke gai-iitta, oh mauhtteb amunu, aɗinu ag danabnu baɗadtteb? Ao, aɗinu ag danab bekkalkad, ag gikkiɗah bia paha nauhtteb ele amu, aɗinu ag ag baɗadtteb?

Aisaia 61:10

Da padal mepanu Yawe Nug ehaniɗom, amuam Nug lamen ena da beɗulppa melo, amubia daatte. Ge! Kayak he, da genab tutukku hak danab daattem, amuam Nug lamen elab enanag da beɗulppa melo, amubia daatte. Nug anam heum amunu, da nuhignu enanagnab doottem. Ge! Da nuhignu oo gamag ahak okkai doottem. Lamen Nug dahilppa meum amu, amuam danab nug ah aokkunu haaha, nug igippa lamen enanag, mana mettak danab mette bia mette amu, lamen dahilppa meum am amubia. Yo, ah nug danab aokkunu haaha, nug bala enanag beɗuppa mette amu, lamen dahilppa meum am amubia.

Aisaia 62:11

Yawe Nug wan atu ohnab danab ah dooglagnu nai imu mattiom. Nug aum. “Ag Juda danab ah amelagppa appeg doyeg! ‘Antteg! Laa nug ag ehanatteb, ag padal ii memananu uɗitte. Ge, antteg! Nug nuhig en okkai nuhikkud danab ah madakkunu awa uɗitte. Am ⌊genab⌋ Nug nuhig keeke enanag, nuhikkud danab ah madakkunu awa uɗitte, ag anam madippeg doyeg!’ ” Yawe Nug anam aum.

Aisaia 65:18

Amu da heppi, Jerusalem am danab ah oh enanagnab dooglagnu daakku. Da heppi, Jerusalem danab ah ag laa dilagppa gamag ahak mattaglagnu daaglag. Anam amunu, dahilad danab ah ag da aɗi aɗi hekkul, ag amunu hanhan oolag gamag ahaɗ!

Aisaia 7:14

Na atnu oɗmak hekkutnu uume amunu, Naɗi Nug nukka geha at laa na ippunidkku. At amuam inam. Ah makkun laa nug oo ele daya, geha nug nid danab menua, nid onig Imanuel ataɗkku.

Jeremaia 23:6

Haen nug king dayebeb amu, Juda ag geha padal memananu ehanittak aon daaglag. Ao, Israel danab ah ag baɗak iittappa daaglag. Geha ag king amu onig am inam ataɗkkulag. ‘Yawe Nug Kobol Genab Tutukku, Nug Amunu Diig Daatte.’ ” Yawe Nug anam atte.

Jeremaia 3:23

Anukka ig qauko nakok igippa kayak hambuppuak noolagppa dup nota binalag metata, muttub ele qemut, amge amu oh am ii ehanikkom. Yawe, Nug ig Israel, ihinig Kayak, Nugib ehanikkeb, ig padal ii memata.

Daniel 3:28

Anam daye, Nebukatnesar nug aum. “Ig Satrak, Mesak, Abetnego dilag Kayak binag metu! Nug he, nuhig engel laa uɗia he, nuhikkud maɗi nid ag eheɗ laa ii aoppig. Ag ahilag Kayaknu oolagppa genab doon, da ag eheɗ hekkulagnunab ami amu, ag nai amu ii dim lamidppig. Ag ahilag Kayak, ag Nug noobppa dup nona, Nugib binag mekkulagnu hena, ag kayak laa noobppa dup nona binag mekkulagnu uun autna aona, amu ii hemananu ag mauhkkulagnu dayeb am nai iitta doon, dabmak amuib dim lamidppig.

Hosea 1:7

Amge da, da Yawe, ahilag Kayak, da geha oo gai-iitta doya oo metta ehanittak kobol Juda danab ah dilagppa hekkul. Da dakka geha ahilkad kekeɗ eppelagppanu eɗuen diiadkkul. Da amuam latppa, o qep elabppa, o banppa, o hosppa, o bannu karisppa ii hepa. Iitta. Da dakkaib, da hekkul,” awa aum.

Joel 2:23

Yawe Nug hanhan genab tutukku hak kobol dim lamidtte amunu, Nug he, oug haen digmetteppa gu neum. Ao, Nug he, gu elelenab, oug haen digmetteppa, gakkaɗak haen digmetteppa ele, anukka neum bia, nette. Anam amunu, Sion danab ah ag gamalag ahaɗ! Ao, ag Yawe, ahilag Kayak, ag nuhignu gamag ahak okkai doyeg!

Jona 2:9

Ag uutteb, amge da, ‘Ena heme,’ anaknu ahi laa edette, doɗ manen na medakkul. Ge, da keeke genabnab hekkulnu nai ain qakkami amu, da keeke amu oh hekkul. Yawe nukka ehanikke, ig padal ii mettem.” Jona nug anam awa unuqittom.

Habakuk 3:18

⌊Uug nau amu oh anam bena daaglagtai,⌋ amge da Yawenu gamag ahak dookkul. Ao, da Kayak, Nug da ehaniɗe, da padal ii mettem amu, da nuhignu ool gamag ahakku.

Rom 1:16

Da Jesusnu Nai Enanu amu, da uɗa nak ii doottem. Aɗinu? Nai amuam Kayaknu ɠagattag, amu Kayak Nug amuppa danab aun aɗi ag oolagppa genab dootteb ele, Nug ag eɗua diitte; Juda ag tatam ⌊nai amu⌋ doyegeg, iitta aɗi ag aakku geha dootteb.

1 Timoti 3:16

Genab, ig Kristen tamaniakppa daattem, ig doyak laa aɗattem, amu doyak amuam lokkumak dayeye, gehaib miag atiom. Doyak amuam unuqagnab ele daatte. Doyak amuam inam. Jesus Nug danab beɗu awa, miag atia beum. Kayak Ouɗi Nug ig Nug tutukkunab ippunikke, engel ag Nug ele anidppig. Nuhig nainu mehuqak am wanppan ɗo maɗoɗppa ukke, wanppanu danab ah ag oolagppa genab dooppig. Kayak he, Nug hab aabppa teum.

Revelesen 7:10

Ag baalag okkaippa ena appig. “Eɗua awikkaknu diig am ihinig Kayak, Nug nuhig sia king ⌊anuqak,⌋ appa daatte, amu Sipsip Nag ele,” aon appig.

1 Samuel 2:1

Hana nug Yawe binag ma mattiaya, nug inam aum. “Da Yawenu amu, da ool gamag ahatte. Nuhig ehanittakppa amu, da ɠagattag daattem. Yawe Nug he, da kekeɗ dahilad imadttem. Aɗinu? Nug da ehaniɗe, da amunu enanagnab doottem.