Aisaia 11:10 - Nobonob Baibel

¹⁰ Haen amuppa am inam daakku. Jesi buɗub nug geha king daakku. Nug pilak laa, pilak amuam ad elab attan ta ukkak galaeg daatte, nug amubia daakku, amu wanppan huu anen anen ohppan danab ah ag geha nuhigppa uɗin, gumidna dona, nug dooglagnu ba daakku. Nug anam dayebeb, wanppan wan ohppan danab ah ag nug gumidna goppeg, nuhig dayaknu aben am binag amahlak oppiaawak ele daakku.

Aisaia 11:10 ပူးပေါင်းရင်းမြစ်များ

Genesis 49:10

Juda nug hanhan kingnu qakun aɗa daakku. Ao, Juda buɗub laa ag hanhan king daan oiglag. Ag anam daappeg ukkebeb, dimppa laa nug kingnu qakun mamegnab nug uɗia aweb batakku. Nug uɗieb amu, wan laalappan oh ag nuhig nai dim lamidkkulag.

1 Stori 2:12

Boas bekka am Obet. Obet bekka am Jesi.

Sam 116:7

Nug anam he, da dakka da amelppa, da dahilnu inam ami. “Yawe Nug nahip-ppa ena heum amunu, na baula maɗoɗ daye!” Da anam ami.

Sam 145:11

Nahipad danab ah ele ag nahip ɗo maɗoɗ am binag amahlak oppiaawak ele mattiglag. Ao, ag nahip ɠagattagnu ele mattiglag.

Sam 149:5

Nug anam aakku hette amunu, danab ah ag Yawenu oo metta ii uuak kobol dim lamidtteb ele, ag Yawe ag binalag okkai mattomnu gamag ahak okkai doyeg! Ao, ag niiak abenppa niinna, ag gamag ahak okkainab doon, ahi etteg!

Sam 91:1

Laa nug Kayak Attannab Laa Oh Eɗattak guppiɗ dimugppa daatte amu, nug Kayak Nukka Ɠagattag Oh Ele, nug nuhig dabmettak waappa daakku.

Sam 91:4

Ai laa nug nakkud haugppa dabmadatte bia, Nug na atognoidkku. Ao, nahip padal mak eɗitteb ena dayaknu aben Nug haug waappa daakku. Ge, nuhig oo metta ii uuak kobol, amuam nahip guppiɗ, aria nahip wan buue te aɗ itak bia, Nug amubia ele daakku.

Aisaia 11:1

Danab ag ad oeg qiia, dimppa ad amu ita bette, amubia Jesi buɗub ooppanu laa geha ba, nug king daakku. Ao, ad bunaɗom, diɗi ita qa ba meu otte, amubia Jesi buɗub laa dimppa ba, king dayaya, meu okku.

Aisaia 11:12

Naɗi Nug pilak laa, pilak amuam ad elab attan ukkak galaeg daatte, Nug pilak laa amubia galeb daakku. Nug pilak amu anam meeb, pilak amuam danab ah wan atu ohppanu ag anidna, ⌊pilak amuam Naɗi Nug nuhikkud danab ah ag diia ukka laih me dayak danab ah daatteb, Nug ag eɗua diikku ippunadkku⌋. Nug anam ha, Nug Israel danab ah ag diia ukka laih me dayak danab ah wan laalappa daatteb amu, Nug ag eɗua diikku. Ao, Nug Juda danab ah tamtam gona, aabaab daatteb, Nug ag eɗua diikku. Nug nuhikkud danab ah gona aben ohppanab daatteb eɗua diikku.

Aisaia 14:3

Yawe Nug geha heeb, ag Israel, ag huu laa waappa daan, ahilag nai dim lamidna, ag amu dilag uɗat nau heppig amu, ag baula ii anam hemana. Ag uɗat amuppanu guittak baula iinab doomna. Ag ooppa uug nau doyak amunu baula ele iinab doomna. Haen amuppa amu

Aisaia 2:11

Amu Yawe Nug anam uɗia, Nug beɗuppa tak danab oh onilag qeeb nekku. Nug heeb, dada danab ag nena qekkulag. Yawe Nugib haen amuppa onig okkai, binag ele daakku.

Aisaia 2:2

Qauko laa, Yawenu mettid lag qauko amuppa daatte amu, deɗ laa dimppa, Yawe Nug heeb, qauko amuam qauko laa oh eɗattak daakku. Ao, Yawe Nug heeb, qauko amuam qauko nakok laa oh eɗadkku. Amu geha danab ah kuɗumnab, wan atu ohppanu ag appa ⌊qagmekkulagnu⌋ uɗiglag.

Aisaia 2:3

Danab ah huu kuɗumnabppanu geha ag ahan uɗin, akka akka mattin akkulag. “Yawe Nug nuhig ib ig ippunigkkunu, ig nuhig ib dim lamidkkunignu amu, doppeg, ig Yawenu qaukoppa tetu! Ao, ig Jakopnu Kayaknu mettid lag, ig amuppa gotu!” aon akkulag. Aɗinu ag anam akkulag? Yawenu ɗo nai am Sion appanu aha, tuala gokku. Yo, Yawenu nai Jerusalem appanu aha gokku.

Aisaia 28:12

Kayak Nug matu wan imu ag mattowa, Nug ag amelagppa inam aum. “Imuam hik awa, oo maɗoɗ ele dayaknu aben laa. Danab ah ag uug dootteb ele, ag uɗin, ippa hik aweg! Imuam oo maɗoɗ ele dayaknu aben.” Nug anam aum, amge Israel danab ah ag nai amu doon dabmekkulagnu uuppig.

Aisaia 42:4

Nug amu hekkunu dabmak nug ooppa dayebeb, aɗitai laa ii qeeb nema; nug ooppa ɠagattag ele doyaya, nug uɗat amu ii uuma. Nug heeb, nai doya mala hettoɗia epeɗia elele mettak kobol am danab ah wan ohppa daatteb, ag kobol amu tonatteb oiglag. Danab ah wan miagnu, wan umanu ele, ag nuhig nai amuppanu ena bekkulagnu dabmak aɗan oiglag,” awa atte.

Aisaia 49:22

Ag anam akkulag, amge Naɗi Yawe, Nug atte. “Antteg! Da danab laa nug layag keeke dookkunu eppegppa hette, amubia da iitta aɗi ag nid naunau ahilkad diin uɗiglagnu heppi dooglag. Ao, da danab nug laa antta, keeke dookkunu pilak ad attan humatte, amubia da wan laa ohppan danab ag ahilkad nid naunau diin uɗiglagnu pilak humappi dooglag. Da amu heppi, ag ag bekkalkad diin uɗinna, ag ag aɗelkad ele diin uɗiglag.

Aisaia 59:19

Nug ɠagattagnab, gu huanaknab neene, le ui eheɗ oowo, ulah huanak ele dim lamitta le duttuntte bia haaha, bu madakku. Anam amunu, danab ah ag aam nodeppa daatteb, ag Yawenu ebehilag oh bodoetta le mekku. Ao, aam bedeppanu danab ah ag Yawe, Nug binag amahlak oppiaawak ele, ag amu doon, nuhignu ebehilag oh bodoetta le mekku.

Aisaia 60:3

Juda danab ah, amahlak Yawenu ahilagppa uɗitte amu, wanppan wan ohppan danab ag ahilag amahlak, amuppa uɗiglag. Ao, king ag aam buttua ba, wan atu oh amahlak medatte, amubia king ag amahlak okkai ahilag am anidkkulagnu uɗiglag.

Aisaia 60:5

Ag amu anidna amu, ag oolag gamag eheɗ ahakku. Ao, ag gamag ahak naɗinab dooglag. Aɗinu? Wan laappan danab ag Yawe binag mekkulagnu yu qaɗeppa uɗina, en kuɗum aon uɗiglag. Ao, wan laappan danab ag Yawe binag mekkulagnu en okkai mawadna uɗiglag.

Aisaia 62:10

Ag Juda danab ah ag danab ah ag uɗin, Yawe binag mekkulagnu, ag Jerusalemnu ahan, dimittim gona ehanatteg! Ao, ag Juda danab ah ag danab ah ag Yawe binag mekkulagnu ag ahilag ib babaitteg! Ag men oh agappeg ukkeb! Danab ah ag Jerusalem uɗiaknu ib anidkkulagnu, ag Juda, ag pilak laa, ag amu anidna uɗiglagnu humappeg taɗ!

Aisaia 66:19

Da uɗat naɗi, da heminu at daatte ag oolagppa heppi, ⌊aun laa nug amu antta, da dim lamiɗa amu, nug bau daakku⌋. Laa amu ag bau daaglag amu, da ag oolagppan laala ag maadppi, danab ah huu laa dilagppa gona, ag binag amahlak oppiaawak ele dahilnu ag amelagppa mattiglag. Danab amu ag da onil okkainu nai laanu ii dooppig; ag binag amahlak oppiaawak ele dahil ele ii anidppig daatteb. Danab amu ag am Tarsis, Libia, Lidia, Tubal amu Grik danab, amu nud umanabnu danab ele. Lidia danab ag am lat ewaknu doyak okkai ele.

Jeremaia 6:16

Yawe Nug inam atte. “Da ami. ‘Ag ib oɗatleppa daanna, ag pehettan neegna antteg! Ag, “Ig alankad ib attenppa oippig? Ib atten am ib ena?” ag oɗmak amu heig! Ag oɗ mattan, ib atten am ib ena doon, ag amuppa oinna, ag maɗoɗ aoglag,’ ami. Da anam ami, amge ag uuppig. Ag, ‘Ig ib amuppa ii oimta,’ appig.

Hagai 2:9

Gemun lag imunu binag amahlak oppiaawak ele am anukka lag dayomnu binag amahlak oppiaawak ele eɗidkku. Anam daakku amu, da heppi, aben imuppa maɗoɗ daakku.” Yawe Nukka Ɠagattag Oh Ele Nug anam atte.

Sekaraia 6:13

Nug Yawenu mettid lag hekku. Da heppi, nug danab dagom onig ɠagattag ele daakku. Nug nuhig sia kingppa dayaya, danab ah gumadkku. Mana mettak danab laa nug danab amunu sia king heqo laih dayaya ehanittebeb, aa oh maɗoɗ, dabmak laippu ele uɗat hekkulah.” Yawe Nug nai amu da meɗom.

Namba 10:33

Moses nug Hobap ele aa amu mattiya malaeh, dimppa amu Israel danab ah ag Sinai qauko uuna, ag digmena, deɗ ewam goppig. Laa ag Yawenu Tituanak Nainu Kunup kontrak inak ele, laa ag amu maoppig ele amu, ag Yawe Nug ag haen tutu dayak aab adekkuppa kalaglagnu ippuanatteb daaglagnu, ag danab ah noolag aon anuqna goppig.

Matyu 12:21

Danab ah wanppan wan anen anenppanu, ag Nug onigppa ena bekkulagnu dabmak aɗan oiglag,” awa aum.

Matyu 8:11

amunu, da ag amelagppa attem. Geha danab kuɗum aam bedeppanu, aam nodeppanu ele ag uɗippeg, Abraham, Aisak, Jakop ele ag Kayaknu ɗo maɗoɗppa daanna, hobulppa ee lanan, laippu daaglag,

Luk 2:32

Nug iitta aɗi ag nahip ib anidkkulagnu, Nug Israel ag binag amahlak oppiaawak ele aoglagnu amahlak daatte,” awa aum.

Jon 12:32

Amge haen ag da ad emaitakppa aihiɗkkulag, haen amuppa amu da danab ah oh eeɗadppi, ag dagattolppa dokkulag,” awa aum.

Aposel 11:18

Pita nug anam awa a, ag nai amu doyona, ag nai ahilag madippig amu uuna, ag Kayak binag mena appig. “Kayak heehe, iitta aɗi danab ele ag oolag eɗutte, bau dayak aotteb,” aon appig.

Aposel 28:28

Amunu ag doyeg! Kayak Nug ig eɗua awigkkunu uɗat ena imu ihinignu heum amu, Kayak Nug he, iitta aɗi danab dilagppa ukkom, amu iitta aɗi amu, ag am dooglag,” awa aum.

Hibru 4:1

Aria, Kayaknu hik awaknu nai, nug amunu nai qakka aum amu, nai amu gemu ele daatte amunu, danab laa ag oolagppanu nug hik awak amu etta ii aomanu amu, ig dabmeta autta aotu!

1 Pita 5:10

Kayak Nug am ehanittak okkai hamu mettak kobolnu diig daatte, Nug ag Jesus Kristusnu uɗatppa ag geha nuhig binag amahlak oppiaawak hanhan daatte ele, ag amu ooppa daaglagnu onilagppa eum amunu, ag geha uug haen tutuib doonna daappeg, dimppa Nug eɗua heeb, ag eɗun ena daan, ag lag ukku enappa ɠagattag daatte bia ag ɠagattag daaglag.

Revelesen 22:16

Da Jesus, da dahil engel laa mei, ahilagppa ukka, nai dahil imu tamaniak ohppa ag amelagppa mehuqkkulagnu madakkunu ukkom. Dawit nug dahilppan be, da nug buɗubppan bemi. Da hoɗopai boitinannu amahlak bia daattem,” awa aum.

Revelesen 5:5

Anam gaaiyi, ikki danab laa nug da amelppa aum. “Na aib gaame! Antte! Danab laa, ɠagattag nuhig am laion bia, Nug Juda danab, Dawit buɗubppanu, Nug ban eɗittom amunu, Nug buk itoɗiak qataqak eblaih aɗit ele amu, Nug amu tola matulkkunu elele,” awa aum.