Aisaia 10:3 - Nobonob Baibel

³ Ag anam hetteb amunu, Yawe Nug geha ahilag hak nau amu nob mekkunu haen tituanom, amuppa Nug ag uug naunab madakkunu dabmette amu, ag amu eɗidkkulagnu elelete? Iitta! Haen amuppa Nug danab wan laa umanu diieb, ag ulah ɠagattag uɗitte, amubia ag uɗin, ag ag eheɗ madappeg, ag geha attem hekkulag? Ag geha oolna, aun toppa ehanadkkunu gokkulag? Keeke kuɗum ag aoppig, geha ag keeke amu aben adekkuppa mekkulag?

Aisaia 10:3 ပူးပေါင်းရင်းမြစ်များ

Genesis 31:1

Laban bekkod ag anam anidna amu, ag akka akka Jakopnu inam appig. “Jakop nug ig mamenignu keeke oh awom amunu, nug gemu enub kuɗum ele daatte,” aon appig. Ag anam aegeg, Jakop nug doyom.

2 King 7:15

King nug he, nuhikkud danab ag gona, Aram goppig baelag mattan gona, Jodan leppa batappig. Ag baelag mattan gonana, ibppa Aram ag paha gokkulag henana, ag keeke kuɗumnab mauhnoak akkaeg ukkom niiegeg anidppig. Ahilag ban lamen, am keeke laala ele. Anttona, ag eɗun gona, king amegppa appig.

Job 31:14

Kayak Nug wanppan danab hettoɗia, epeɗiadkku amunu, haen amuppa da attem helom? Ge, Nug wanppan danab ag aɗi aɗi heppignu hettoɗia, epeɗiak hekku amunu, haen amuppa da aɗi nai laa mattilom?

Prowerb 11:4

Kayak Nug danab ah hipunin heegeg bu madatte, haen amuppa en okkai am danab ah ii ehanadma; amge genab tutukku hak kobol am danab ehanitte, danab ii mauhtte.

Aisaia 13:6

⌊O Babilon danab ah,⌋ ag huan gayeg! Aɗinu? Yawenu deɗ naɗi miag doum. Deɗ amuppa amu Laa Nukka Ɠagattag Oh Ele Nug geha keeke kuɗum heeb nauhkkulag.

Aisaia 17:4

Yawe Nug atte. “Haen amuppa am inam bekku. Israel binalag am iitta mekku. Ao, danab titiɗak nug oɗe ma, ebehi tette, amubia ⌊geha kekeɗ ag heppeg,⌋ Israel huu ag geha laippu laippuib daanna, ⌊ag binalag iitta ele daaglag⌋.

Aisaia 20:6

Haen Asiria ag uɗin, Isip amu Kus ele aqappeg, danab yu ihippa daatteb ag geha haen amuppa akkulag. ‘Antteg! Wan amuppan danab, ag ig ehanigppeg, Asiria ii iqamna dabmemut ele amu, ag aakku iitta meppig. Ig Asiria dilag qep elab eɗidkkunignu ig ib laa iitta,’ aon akkulag.” Yawe Nug anam aum.

Aisaia 26:14

Gemu danab okkai ig gumigppig ele amu, ag mauhppig. Ag laa ii daatteb, ag geha eɗun bau ii ahamna. Na bu mattae, ag nauhna autnanab aoeg, danab ah ag gemu danab amu onilag baula ii dabmetteb. Iitta.

Aisaia 26:21

Aɗinu? Antteg! Yawe, Nug wanppan danab ah ag nau heppignu nob naunu bu madakkunu, Nug nuhig aben hab aabppa daatte amu uua, Nug nette. Amu wan nug geha danab tiilag danab laa aqappig, tiilag amu tuɗitta, ii lokkumadma. Iitta. Wan nug geha kobol nau amu oh danab ag heppig, am amu oh heeb, miag atiglag.

Aisaia 28:20

Aɗinu ⌊ag anam baɗaglag⌋? Danab nug niikkunu he, niiak balal tutu daye, nug beɗu taiedakkunu elele iitta daya, nug eheɗ dootte, amubia laa nai imu dooglag amu, ag ⌊bu aoglagnu doon,⌋ eheɗ dooglag. Ge! Laa blanget laa laakkunu he, nakok eppe, elele niikkunu elele iitta daya, eheɗ dootte, amubia danab nai imu dooglag ele amu, ag ⌊bu aoglagnu doon,⌋ eheɗ dooglag.

Aisaia 29:6

Nug am ag Juda danab ah gumatta tula bekku. Hakkaɗ qeebeb, mim neebeb, oqotti huanak oobob, ulah kilibob heebeb, ulah laa ele huanak uɗiebeb, aab ewa naɗi dittia, keeke ewebeb, Nug tula bekku.

Aisaia 30:16

Ag amu uuna, ag appig. ‘Iitta. Ig hos attan oolkkunig.’ Ag anam appig amunu genab, ag oolkkulag, ⌊amge kekeɗ ag ag lamadkkulag⌋. Ag, ‘Ig hos qaiettan gotteb ele attan daat oolkkunig,’ appig amunu genab, ag anam oolkkulag, amge ahilag kekeɗ ag hos qaiettan, huan gotteb ele amu, ag amuppa ag lamadna, ag eɗadkkulag.

Aisaia 30:7

Ag Isip gotteb, amge Isip nug ag ehanadkkunu elele iittanab iitta. Isip nug anam daatte amunu, da Isipnu, “Nug am doɗ beɗu okkai okkai, amge gai-iitta daatte,” attem.

Aisaia 33:14

Hipunin hak danab ah Sion daatteb ele, ag eheɗ nau baɗatteb. Ao, Kayaknu nuhig haknu ele uuak danab ag hahaɗtteb. Ag hahaɗnan atteb. “Ig oonigppanu amu, aun nug Kayak, Kayak Nug aab aɗu keeke oh ewe iitta mette bia daatte amu, aun nug Nug ele daaglahnu elele?” Ao, ag hahaɗnan, “Ig oonigppanu aun nug Kayak, Kayak Nug aab aɗu keeke oh ewe iitta mette bia daatte amu, aun nug Nug ele hanhan daaglahnu elele?” atteb.

Aisaia 39:3

Hesekaia nug anam he, propet Aisaia nug aha, King Hesekaia toppa ukka, oɗ metta aum. “Danab uɗippig ele amu, ag aɗi nai madippig? Ag adeppan uɗippig?” awa oɗ mettom. Aisaia nug anam a, Hesekaia nug aum. “Ag umanunab uɗippig. Ag da aniɗkkulagnu Babilonnu uɗippig,” awa aum.

Aisaia 5:14

Diig amunu amu, mauhaknu aben nug oɗe aaheum daatte. Ge, mauhaknu aben nug nuhig oɗe okkainab, huanak aaha daatte. ⌊Mauhaknu aben anam daatte⌋, amu Jerusalemnu danab okkai aɗi, amu Juda danab ah laa kuɗumnab ele, ag mauhak abenppa nokkulag. Ao, Juda danab ah ag gemu gamalag ahehe, hobul henana, muttub qetteb ele amu, ag am geha mauhak abenppa nokkulag.

Aisaia 5:26

Amu Yawe Nug geha wanppanu wan laala umanu ⌊ban danab⌋ ag uɗin, ⌊nuhikkud danab ah eheɗ hattaglagnu⌋ Nug at laa qappeb daakku. Ao, Nug wanppanu wan laala umanabnu dilag ⌊ban danab⌋ ag uɗin, ⌊nuhikkud danab ah eheɗ hattaglagnu⌋ hiwalakppa ag onilagppa ekku. Nug anam heeb, geha ⌊ban danab⌋ ag qaiqaɗ paha uɗiglag.

Jeremaia 22:7

Da heppi, kekeɗ ag anen anen bannu keeke eppelagppa aɗan, ag uɗin, ag Juda dilag king laulag heppeg nauhkku. Ag laulagnu ad sidanu plang ena ena daatteb amu, ag mauhnoak oppatppeg neeb, ag amu akkan, aab aɗuppa mawadppeg teppeg aab eweb, iitta mekkulag.

Jeremaia 4:30

Haen amu bekku amu, Yawe Nug Juda danab ah amelagppa inam akku. “O Juda danab ah, kekeɗ ag uɗin, ag eheɗ hattana daatteb amunu, ag eheɗ amu aoppig ele, ag aakku aɗi hetteb? Am imu bia. Ib baag ah laa, danab laa ag nuhignu ena doon, nuhig hak attenppa ag eɗun, nuhignu eheɗ doon, ag baula eɗun nuhignu ena dooglagnu nug lamen kokoɗnab tagakka, bala ena ena ele ma, nug amegppa bala, kala ena ele mette. Ib baag ah nug danab amu ag eɗun, nuhignu ena dooglagnu anam hette, amge danab ag nuhignu oolag huana nauhtte amunu, ag nuhig hak amu ohnu ii dabmemana, amubia ag Juda ag ahilag kekeɗ ag eɗun, ahilagnu ena iinab doon, ahilag kekeɗ daanna, aqappeg mauhkkulagnu hetteb,” awa akku.

Jeremaia 5:31

Kobol naunab nau ag hetteb am inam. Propet danab ag doonna, propet nai hambuppuak maditteb. Mana mettak danab ag akka, ahilag dabmak dim lamidna, danab ah gumadtteb. Propet, mana mettak danab ele ag anam aakku hetteb, amge dahilad danab ah ag kobol amunu oolag mauhtte. Anam, amge ib amu batakppa ag attem anidkkulag?” awa atte.

Jeremaia 9:9

Ag amu hetteb amunu, da ag bu iite madakkul? Ao, da wan imuppan danab ah, ag nau amu hetteb amu da ag bu iite madakkul?” Yawe Nug anam awa atte.

Hosea 5:13

Amu Israel danab ah ag ahilag oɗe anidna doon, ag Asiria dilag king ehanadkkunu dabmena oɗ medappig. Ge, Juda danab ah ag ag ihilkad anidna, ag Asiria dilag king okkai ehanadkkunu dabmena oɗ medappig. Ag anam heppig, amge Asiria dilag king nug heeb, ag ahilag oɗe iitta mekkunu elele iitta. Ao, Asiria dilag king nug heeb, ag ihilkad iitta mekkunu elele iitta.

Hosea 9:5

Anam amunu, hobul dayaknu haen epeɗiak, haen amuppa ag aɗi hekkulag? Ao, ag Yawenu qagmak gamag ahak elenu deɗppa, ag aɗi hekkulag?

Hosea 9:7

Israel dilag bu awak haen aakku uɗitte. Ao, ahilag noob awak haen aakku uɗitte. Israel danab ah ag amu doyeg! Ag Israel, ag hipunin kuɗum henana; ag Kayak, nuhikkud danab ele dilagnu kekeɗ mattan daatteb amunu, ag propet dilag, “Ag am ootot,” atteb. Ao, danab Kayak Ouɗi ehanatte, ag nai maditteb ele, ahilagnu ag, “Ag kaaka,” atteb.

Amos 5:19

Deɗ amu geha danab laa nug doɗ laion laa baɗitta, oola ukka, doɗ bea laa noobppa watte bia daakku. O iitta, danab laa nug ⌊aɗi keeke baɗitta oola,⌋ laug ooppa noa, nug eppeg bahia, lagnu gilil aɗa hik aokkunu heehe, mat nau laa eppeg emaltte bia daakku.

Maika 7:4

Danab amu oolagppanu laa, nug laa oh naunab hetteb bia ii hette, nug nakok ena hette; nug anam daatte, amge nug ele am nau, uud keeke qaun ele bia. Ao, danab amu oolagppanu laa nug danab nakok ena bia daatte, amge nug ele am nau, aɗ keeke qaun ele eppak, amubia daatte. Amu ahilag bu awaknu deɗ, ahilag gumak danab tutukku, ag appig bia, deɗ amu aakku paha uɗitte. Ao, deɗ Kayak Nug ag bu madakku amu, deɗ amu aakku uɗiom daatte. Gemu am ahilag kaaka aqeb oiyak haen.

Sepanaia 1:18

Deɗ Yawe Nug danab ah bu madakku amu, deɗ amuppa ahilag silwa, o gol am nakok laa ii ehanadma. Yawe Nug danab ah nuhikkudnu, dahil doya laa aomanu doyak aɗa daatte, amge ag nuhikkudib daaglagnu ii heegeg, nug oo huana nauhtte. Oo nauhak amuam aab ewak laa huan ewawa, keeke oh he nauhtte, amubia daatte. Nuhig oo nauhak amuam heeb, wan oh nauhkku. Aɗinu? Danab ah oh ag wanppa daatteb, Nug heeb, ag padal mena autna aoglag.

Luk 19:44

geha ag ag Juda, ag buɗulkad ele tappaladna oɗoɗadna autna aoglag. Aab okkainu aɗ, lag ele menppa heppig amu kekeɗ ag loppaɗppeg, men laa nug laa qaɗeppa iinab daama. Kayak Nug ag Juda ehanadkkunu heum, amge ag amu ii dabmeppig amunu, kekeɗ ahilagnu ag anam hekkulag,” awa aum.

Duteronomi 28:49

Yawe Nug wanppan wan laanu danab, ag am atu umanabnu amu, Nug ag diia uɗikku. Danab amu ag ai igel, doɗ nakok laa aokkunu notte amubia hekkulag. Am ag danab amu nailag madippeg doon, oolag ii maidkku.

1 Pita 2:12

Amu ag danab laa Kayak baekkudppa ii daatteb ele amu, ag ag oolagppa daanna, kobol ena tutukkuib heig! Ag anam hebeppeg, danab amu ag ahilagnu nai nau akkulagtai, ge ag ahilag kobol ena amu anidna, haen Naɗi Nug ig danab ig ehanigkkunu uɗikku amu, ag ele Nug binag mekkulag.