Aisaia 1:11 - Nobonob Baibel

¹¹ Am Yawe Nug inam awa atte. “Ag doɗ kuɗum main meɗatteb, amge da amunu ool ii hette. Ag sipsip dawainu manaknu ofa hena, amu doɗ ittag huanak ele, ag doɗ amu ittag main meɗatteb, amge da matu elele aomi; da baula aokkulnu ool iinab daatte. Ag makau dawai, sipsip gaiɗ, meeme dawai ele manadna meɗaglagnu henana, ag baalag otaɗattegeg, tiilag nette, amge da tiilag amunu oolppa ena ii doottem.

Aisaia 1:11 ပူးပေါင်းရင်းမြစ်များ

Sam 40:6

O Yawe, na ootppa keeke anuqak am, danab ah ag ofa iɗu iɗu na mettaglagnu ii daatte. Ge, danab ag nahip qaɗabppa manaknu ofa, ib etta hipunin haknu ofa ele na mettaglagnu amu, na amunu ootppa keeke anuqak ii doottem. Kobol na amunu anuqak doottem ele am, danab nug nahip nai dim lamidkku.

Sam 50:8

Da ahilag mana mettaknu amu, da ii aladttem. Ao, da ag manaknu ofa hanhan main meɗattebnu amu, da amunu ag ii aladttem.

Sam 51:16

Aɗinu? Da doɗ manen, na mettalom amu, na enanagnab ii doolom. Am da manen mettalomnu oot anam daalo, da anam helom. Ao, da manaknu ofa manen mettalom amu, na ii aolom; na ena ii doolom.

Prowerb 15:8

Haen nau hak danab nug mana mettak laa hette amu, Yawe Nug mana mettak amunu ooppa uuaknab dootte; amge haen genab tutukku hak danab ag unuqittak hetteb amu, Nug amunu ooppa ena dootte.

Prowerb 21:27

Nau hak danab ag doɗ manan, Kayak mettaglagnu heegeg anatta, Nug ooppa uuaknab dootte. Nug amunu uuaknab dootte amunu, genabnab genab ag ɗo hamuib dim lamidna, eheɗ hekkulagnu dabmena, mana mettak hekkulag amu, Nug amunu ooppa uuaknab okkai dootte.

Prowerb 21:3

Danab nug Yawenu mana mettak hekku dayeb amu, amuam ena; amge danab nug kobol tutukku, amu nai doya mala hettoɗia epeɗia elele mettak kobol ele hette amu, amuam Yawenu neekkakppa enanag.

Aisaia 58:2

Deɗ oh Israel danab ag ⌊gaɗalagppaib⌋ da aniɗna dim lamiɗkkulagnu mattiɗtteb, ag dahil nai dooglagnu hetteb bia hetteb, ⌊amge ag keeke amu oh ag oolagppa ele ii hetteb⌋. Ag huu laa kobol tutukku dim lamidtteb, dahil ɗo di-ii-mettan oitteb, ag huu amu, ag kobol amu genab hetteb bia ⌊dimittimnuib⌋ hetteb. Ag anam heegeg, laa anadna, ‘Danab ah umu ag genab Kayaknu ib dim lamidkkulagnu oolag hette,’ atteb, amge iitta! Ag da, Kayak, ag da hettoɗiakppa nai doya mala hettoɗia epeɗia elele mettak kobol dim lamidkkulnu anana, ag da Kayak, ag dahilnu, ‘Nug ig guguikka uɗikkunu oonig hette,’ ele atteb ⌊amge ag amu oh am gaɗalkadppaib hetteb. Oolagppa ele ii hetteb⌋.

Aisaia 66:3

Amge laa nug ⌊dahil nai ii dim lamitta,⌋ nug makau dawai mana, da meɗatte amu, nug am danab layag qe mauhtte bia daatte. Laa nug ⌊dahil nai ii dim lamitta,⌋ nug sipsip nag mana, da meɗatte amu, nug danab nug qai mana, da meɗatte bia daatte. Laa nug ⌊dahil nai ii dim lamitta,⌋ nug ee aegnu ofa da meɗatte amu, nug am danab nug bo tiig awa meɗatte bia daatte. Laa nug ⌊dahil nai ii dim lamitta,⌋ nug kalu danab ile muttuɗig enanag bette ele mana, da meɗatte amu, nug am danab kayak hambuppuak dottolag noolagppa dup noa binalag mette bia daatte. Danab amu ag ahilag dabmakib dim lamidtteb. Ag keeke eheɗ nau, ag amunu oolagppa uuaknab doolob, ag hak amunu enanagnab dootteb.

Jeremaia 6:20

Juda danab ah, ag Sebanu kalu danab ile muttuɗig enanag bette, ag kalu amu amotna, da meɗatteb, amge ag hipunin hekkulagnu ii uutteb amunu, da kalu amunu ool hettete? Da amunu oolppa ena doottemte? Iitta! Ao, ag goɗen muttuɗig enanag hekkulagnu wan umanabnu keeke qaittobttob bia onig kalamus aon, da meɗatteb, amge ag hipunin hekkulagnu ii uutteb amunu, da kalamus amunu ool hettete? Da amunu oolppa ena doottemte? Iitta! Manaknu ofa ahilag amu, ag am pehettak iitta; da ii aopa. Ao, ahilag mana mettak laa amu, da amunu ena ii doottem.” Yawe Nug anam atte.

Jeremaia 7:21

Amu Yawe Nukka Ɠagattag Oh Ele, Israel dilag Kayak, Nug da nai imu Juda danab ah amelagppa akkulnu da amelppa aum. “Ag Juda, ag doɗ digdig main meɗatteb amu, ag amu tuɗidna henana, ag manaknu ofa ele da meɗaglagnu bappaidtteb, amge ag teppu amu aon, ag akka ag aakkud laig! Da aib meɗappig.

Hosea 6:6

Amunu diig am, da ag laanu oolag gai-iitta doon, oolag mattan ehanadkkulagnu anuqak doottem. Da ag doɗ main meɗaglagnu anuqak ii doottem. Ao, ag da, Kayak, ag da genab dooiɗkkulagnu da anuqak doottem. Da ag manaknu ofa, da meɗaglagnu anuqak ii doottem,” awa atte.

Hosea 8:13

Israel danab ah ag doɗ main, da meɗatteb. Ag mana mettak hena, ag teppu latteb, amge da, Yawe, da ahilagnu ena ii doottem. Gemu da ahilag hak naunu dabmein; da hipunin ag heppignu bu madakkul. Ag geha eɗun, Isip gokkulag.

Amos 4:5

Ag ena heme anaknu ofa hekkulagnu bret yis ele aon uɗin, maneg! Yo, ag akka ag ɗo hamu mettaknu ofa laala ele henan, danab ah laa amelagppa ag akka binalag mena, ag appeg doyeg! Ge, ag Israel danab ah, ag akka ag amunu binalag meig! Aɗinu? Ag amu hekkulagnu oolag huana daatte.” Naɗi Yawe Nug anam atte.

Amos 5:21

Yawe atte. “Ag hobul da ag hekkulagnu ami amu, ag hetteb, amge ⌊ag hambuppun hetteb⌋ amunu, da nau ninig ele doottem. Ge, da amunu ena iinab doottem Ag da onilppa qagmak okkai hetteb, amge ⌊ag hambuppuna heeg,⌋ da qagmak okkai amunu amu, da nau aakkuib doottem.

Amos 5:22

Ag manaknu ofa hekkulagnu doɗ aon uɗin, manadna meɗaglagtai, o iitta ag ee aegnu ofa da meɗaknu ee aeg akkan uɗin, manan meɗaglagtai. Ag amu hekkulagtai, amge ⌊ag hipunin uuglagnu uun autna aotteb amunu,⌋ da mana mettak amu ii aopa. Yo, ag da ele laippu dayaknu ofa hekkulagnu doɗ ena ena akkan uɗin, manadna meɗaglagtai, amge ⌊ag hipunin uuglagnu uun autna aotteb amunu,⌋ da mana mettak amu ii dabmepa.

Maika 6:7

Da sipsip dawai tausen gane awe wakkul amu, Yawe Nug amunu oo ena daakkute? O iitta, da goɗen huanaknab, le 10,000 nonana gotteb bia, da amu awe wakkul am, Nug amunu ena dookkute? O da nid ⌊danab⌋ naanaeg dahil qaɗab qakppa hipunin uhuqaknu mane, Yawe medakkul amu, Nug amunu oo ena daakkute? Ge, da beɗulppan nid awen, Yawe Nug eheɗ hak dahil heeb iitta mekkunu nid amu mane, Nug medakkulte?

Hagai 2:14

Ag anam aeg, Hagai nug aum. “Yawe Nug atte. ‘Dahil neekkakppa amu, Israel danab ah, ahilagnu anamnab aakku daatte. Ag aɗi hetteb, ag aɗi doɗ mana mettak hekkulagnu maitteb ele amu, keeke amu oh am da, Kayak, dahil neekkakppa am dubuttid tak ele daatte.

Sekaraia 7:5

“Na wan imuppan danab ah oh, ahilag mana mettak danab ele amelagppa inam appe doyeg! Maɗ 70, kalam tanig eleppa, kalam eblaih aɗitppa ele ag ee ohnu kud mena daappig, amge ag heppig ele, ag genab dahilnu dabmena heppigte?

Malakai 1:10

Yawe Nukka Ɠagattag Oh Ele Nug atte. “Da laa nug ag mana mettak danab oolagppanu, nug ag mana mettak ena iitta amu ii manadmananu, nug dahil mettid lag, nuhig tomppan keeke oh elenu od manadkkunu ool okkai daatte! Da ahilagnu ena ii doottem. Da ahilag mana mettak amu, da ii aopa.

Matyu 22:4

Danab ii ukkaeg amu, king nug maɗi nid laa maatte gokkulagnu daaegeg, nug amelagppa aum. ‘Ag gona, danab aun aɗi da hobulnu deɗ mattami ele, ag ag amelagppa inam appeg dooglag. “Da lanaknu keeke oh bappaidmi. Da dahil makau okkai ebehi ele, amu makau titiɗak ele aqadmi, keeke oh babaittak daatte amunu, ag ah awak hobulppa uɗieg,” aon aig!’ awa aum.

Matyu 9:13

Gemu ag nai imu Kayak Nug mattiom, nuhig naippa daatte, ag nai amu anidna doyeg! Nai am inam. ‘Da ag laanu oolag gai-iitta doon oolag mattan ehanadkkulagnu anuqak doottem. Da ag doɗ main meɗaglagnu anuqak ii doottem.’ ” Jesus Nug anam anana, Nug tuɗitta aum. “Da genab tutukku hak danab ag oolag eɗukkunu ii uɗimi. Iitta! Da hipunin danab ag oolag eɗukkunu uɗimi,” awa aum.

1 Samuel 15:22

Saul nug anam aum, amge Samuel nug eɗua amegppa aum. “Yawe Nug manaknu ofa, amu mana mettak laala elenu oo hette, amge Nug danab ag Nug oɗe dim lamidkkulagnu amu, Nug amunu oo huanaknab hette. Yawe oɗe dim lamittaknu, am mana mettak eɗidtte. Ao, Yawenu nai doon dim lamittaknu, am sipsip dawai ittag mana, Kayak mettaknu eɗidtte.