2 Stori 14:4 - Nobonob Baibel

⁴ Nug Juda ag Yawe, Nug ag mamelkad aɗi dilag Kayak, ag Nug anidna dim lamidkkulagnu Nug mattiglagnu, ag nuhig ɗo oh, nuhig haknunab anak oh ele dim lamidkkulagnu haknunab ag amelagppa aum.

2 Stori 14:4 ပူးပေါင်းရင်းမြစ်များ

Amos 5:4

Laa amu, Yawe Nug Israel danab ah amelagppa atte. “Israel danab ah, ag bau daaglagnu, ag da aniɗna dim lamiɗkkulagnu da mattiɗna oiyeg!

Sam 119:10

O Yawe, da nahip dabmak dookkulnu meul ohppa dabmettem. Na heppe, da ɗo nahip dim lamittaknu ib amu apiɗidpanu oɗ medattem.

Nehemaia 13:9

Da amu hewoya, da ag oo amu, oo laala ele dubuttid teum daatteppa ele, oo amu oh Kayaknu neekkakppa oppiak ele daaglagnu babaittak hekkulagnunab ami. Da ai, ag hena malaeg, da Kayak laugppan keeke oh eɗue, oo amuppa dayom bia mein, ee aegnu ofanu ee aeg, kalu danab ile muttuɗig enanag bette ele eɗuen, aguppa memi.

2 Stori 33:16

Nug amu ha mala, nug Yawenu qaɗab babaitta, amuppa nug laippu dayaknu ofa, amu ena heme anaknu ofa ele heum. Amu Nug Juda danab ah ag Yawe, Israel dilag Kayak, ag Nug waappa daan nug oɗe dim lamidkkulagnu aum.

2 Stori 30:12

King, nuhikkud ehanittak anuqak danab ele ag Yawe Nug ag Pasowanu aɗi hekkulagnu ippuanattom hekkulagnu haknunab appig amu, Juda appa Kayak Nug he, Juda danab ah ag nai amu dim lamidkkulagnu dabmak amu aon dayeg, dabmak amu ɠagattag dayom.

2 Stori 29:30

King Hesekaia, nuhikkud ehanittak anuqak danab ele, ag Lewi buɗub ag ahi laala, Dawit, propet danab Asap ele yaapiɗ amu, ag ahi amu ettanna, Yawe binag mekkulagnu appig amunu, Lewi buɗub amu ag ahi amu oo gamag ahak ele ettanna, ag Yawe noobppa dup nona Nug binag meppig.

2 Stori 29:27

Ag anam babaittak daappig amu, Hesekaia nug mana mettak danab ag manaknu ofa hekkulagnu haknunab a, ag digmena heegeg, laa ag ahi ahiettak Yawe binag metteb ele digmena ahi ettaeg, mana mettak danab trampet aɗappig ele ag amu iwaleg, laa ag musik haknu keeke Israel dilag king Dawit anukkanab ag mamelkad aɗi amu haknu ippunattom amu, ag ele amuppa digmena, musik heppig.

2 Stori 29:21

Ag gona, ag makau dawai eblaih aɗit ele, sipsip dawai eblaih aɗit ele, sipsip gaiɗ eblaih aɗit ele, amu meeme dawai eblaih aɗit ele diin goppig. Doɗ amu oh am ib etta hipunin haknu ofa daappig. Hesekaia, danab okkai ele ag mana mettak danab ag doɗ amu manadna, Kayak medappeg, Juda okkai dilag hipunin uhuqak daaglagnu, Juda danab ah dilag hipunin uhuqak daaglagnu, Yawenu mettid lag ele nuhig neekkakppa oppiak daakkunu diin goppig. Ag diin gona, king nug mana mettak danab, ag Aron buɗub amu, nug ag qaɗabppa doɗ amu manadna, Yawe mettaglagnu ag amelagppa haknunab aum.

2 Stori 11:16

Jeroboam nug anam heum, amge Israel danab laala, Israel dilag huu okkai ohppanu, ag nug waappa daappig, amge ag Yawe, Israel dilag Kayak, ag Nug mattin anidna dim lamidkkulagnu oolag heum amunu, ag Lewi buɗub dim lamadna, Jerusalem appa doɗ manadna, Yawe, Nug ag mamelkad aɗi dilag Kayak, ag Nug mettaglagnu goppig.

1 Samuel 3:13

Ge! Eli bekoɗ aa eheɗ nau heyaya, da noolppa, amu Israel danab noolagppa ele aa danab nau daaeheh, Eli doyom, amge nug aa ii hemayanu aa daulah elele ii batom amunu, da nug amegppa, da nug, amu nug buɗub dilagnu ele oh epeɗiatten, uug madakkulnu ami.

Josua 24:15

Anam, amge ag Yawe waappa daan, Nug oɗe dim lamidkkulagnu oolag ii daatte dayeb, ag gemu aun dim lamidkkulagnu amu dabmak aweg! Ag mamelkad aɗi Mesopatemia daanna, kayak laala waalagpa daan, oɗe dim lamidppig, amute, o iitta, Amo danab, wan ag amuppa gemu daatteb ele, ahilag kayak waalagppa daan binalag mekkulagtai. Ag amu hekkulagtai, amge da, da baeladppa ele amu, ig Yawe waappa daatta, Nug oɗe dim lamidkkunig,” awa aum.

Genesis 18:19

Aɗinu? Da Abraham doottem, nug, nug bekkod, nug laugppanu ele, ag da, Yawe, ag dahil ib dim lamidkkulagnu ippunadkku. Ippuanatteb, ag kobol tutukku, amu nai doya mala hettoɗia epeɗia elele mettak kobol ele dim lamidkkulag amunu, da nuhigppa aɗi hekkulnu nai ain qakkami amu, da amu hekkul,” awa aum.

2 Stori 14:3

Nug atu laihnu kayak hambuppuak dilag qaɗab loppaɗatta, nug aabaabppanu mettid lag nakok loppaɗatta, nug men gappi he aoɗatteg, nug kayak hambuppuak Aserah dabmekkulagnu biidod ele okkulattom.

2 Stori 14:5

Amu Asa nug Juda dilag aabaab ohppa aabaabppanu mettid lag nakok, amu kalu danab ile muttuɗig enanag bette elenu qaɗab oh ele loppaɗattom. Nug anam ha, king dayeye, Juda danab ah ag maɗoɗib daappig.