2 Samuel 7:23 - Nobonob Baibel

²³ Laa amu, aun aɗi laa ag nahipad danab ah, Israel, ag ag bia daatteb? Laa iitta. O Kayak, na huu laa ag begbeg maɗi nid daaegeg, na ag nahipad daaglagnu na ag begbeg dayaknu qagaiettakppanu eɗua uhuqak hemete? Iitta. Na nahipad danab ah Isip wanppanu dayaknu qagaiettakppanu eɗua uhuqak heme, amuppa na he, danab ah oh ag na onin dootteb. Na kobol okkai naɗi, danab hekkunu elele iitta, danab antta nug ebehi oh bodoetta le mette amu, na amu henana, amuppa na hee, nahipad danab Israel, ag Kanan wan imuppan danab, ahilkad kayak hambuppuak ele lamadppig.

2 Samuel 7:23 ပူးပေါင်းရင်းမြစ်များ

2 Samuel 7:24

Na Israel danab ah tituanatte, ag nahipadnab danab ah aakku daatteb; hanhan anam daaglag. Na, O Yawe, na ahilag Kayak bena daattem.

1 Stori 17:21

Aun aɗi laa ag nahipad danab ah, Israel, ag ag bia daatteb? Laa iitta. O Kayak, na huu laa ag begbeg maɗi nid daaegeg, na ag nahipad daaglagnu na ag begbeg dayaknu qagaiettakppanu eɗua uhuqak hemete? Iitta. Na nahipad danab ah Isip wanppanu dayaknu qagaiettakppanu eɗua uhuqak heme, amuppa na he, danab ah oh ag na onin dootteb. Na kobol okkai naɗi, danab hekkunu elele iitta, na amu henana, amuppa na hee, nahipad danab Israel, ag Kanan wan imuppan danab lamadppig.

Nehemaia 1:10

O Yawe, Israel danab ah ag am nahipad maɗi nid maɗi ah ele. Na eppen bahin, na nahip ɠagattag okkaippa na ag laa eppelkadppan qagaiettakppanu eɗua uhuqak daakkunu heme.

Sam 106:22

Nug kobol danab hekkunu elele iitta Ham wanppa heum amu, ag daulag atiom. Ao, Nug Le Kokoɗ appa keeke laala, danab ah anttegeg, ag ebehilag oh bodoetta le mette amu, ag Nug amu hattomnu daulag atiom.

Sam 111:9

Nug nuhikkud danab ah qagaiettakppanu eɗua uhuqak ha mattom. Ao, Nug nuhig nug tituana nai qakkak nai, Nug nai amu hanhan daakkunu meum. Yawe Nug oppiaawak daatte. Danab ah ag nuhignu ebehilag oh bodoetta le mette.

Sam 145:6

Danab ah ag geha nahip ɠagattag, na ɠagattag amuppa uɗat okkai okkai, danab ah ag uɗat amu anidna, ag ebehilag oh bodoetta le mette amu, ag ɠagattag amunu madippeppeg, da geha na uɗat okkai okkai hemenu madikkul.

Sam 147:20

Nug nuhig nai wan laa anam ii mattom. Ag nuhig ɗo ii dootteb. Ag Yawe binag meig!

Sam 40:5

O Yawe, dahil Kayak, na keeke kuɗum, danab amu hekkunu elele iitta, na aakku heme. Ao, na keeke ena ena kuɗum ihinignu maidme amu, laa nug keeke amu ohnu eɗua, na amenppa ab dookkutnu elele iitta. Keeke na hekkutnu maidttem am huanak, ebqaknu iitta amunu, da ma anttak hein, da laa amegppa keeke amu ohnu akkulnu hekkul dayeb amu, da elele iitta. Am keeke kuɗum, huanak ele.

Sam 44:3

Amu ag akka, ahilag qep elabppa wan amu ii aoppig. Ge, ag akka ag ahilag ɠagattagppa, kekeɗ wan amuppa daappig ele ii eɗadppig. Amu iitta. Na ahilagnu oo mauhak doome amunu, na ag ele hanhan daan hena, nahip ɠagattag amuppa ehanatte, ag kekeɗ eɗadppig.

Sam 65:5

O Kayak, na am ihinig padal mematanu ehanittak daattem. Haen na nahip uɗat hettem amu, na kobol genab tutukkuib dim lamidna heehe, danab ag uɗat amu anidna, ag ebehilag oh bodoetta le mette. Nahip uɗat am anam aakku amunu, haen na unuqittak ihinig nob mettem amu, na uɗat anam aakku hettem. Amu danab ah wan ohppanu, miagnu, amu umanu ele ag nahipnu oolagppa genab dootteb

Sam 66:3

Ag Kayak amegppa inam aig! “Keeke na hattame am enanagnab. Danab ag amu anadna, ag ebehilag oh bodoetta le mette. Ɠagattag nahip am okkainab, amu nahip kekeɗ ag amu doona, ag baɗana, na noomppa gatelag qaun ona daatteb.

Eksodas 12:12

Tuqan amuppa amu, da geha Isip wanppa oiyeye, Isip danab ah dilag nid ⌊danab⌋ tatamnu oh, amu doɗ nalkad ⌊dawai⌋ tatamnu oh ele aqakkul. Amuppa amu, da kayak hambuppuak oh Isip dilag amu, da ag bu okkai madakkul. Da am Yawe.

Eksodas 33:16

Aɗinu? Na ig ele anam ii gopput amu, danab ah huu laa ag na dahilnu ena doottem, am nahipad danab ah dilagnu ele ena doottem amu, ag amu attem dooglagnu elele? Na ig ele, elele anam ii gopput amu, ib adekkuppa danab ah huu laappanu ag dahilnu, nahipad danab ah dilagnu ele, ig am danab ah huu laa dooglag?” awa aum.

Eksodas 6:7

Da geha heppi, ag am dahilad danab ah daappeg, da ahilag Kayak daakkul. Haen amuppa amu, ag da am Yawe, da ag Isip appa maɗi nid maɗi ah ele daappig, da amuppanu uhuqatti, ag hamu, ena daatteb dooglag.

Eksodas 9:15

⌊Genab, laa da bia ii daatte. Aɗinu?⌋ Da amu hekkulnu dabmelom amu, da matu na nahipad danab ah ele oɗe nau danab kuɗum aqe mauhtteb ele, amuppa eheɗ hadappi, ag oh iitta melob,

Eksodas 9:16

amge da geha dahil ɠagattag okkai na ippunidkkulnu, danab ah wan atu ohppa da onil dooglagnu amu, da na king meitti, na okkai aakku daattem ⌊amunu, da ag aqai ii mauhppig⌋.

Jeremaia 32:20

Anukka na Isip wanppa na nahipnu dabmettaknu kobol danab haknu elele iitta, amu uɗat ɠagattagnab ele hee, uɗie uɗie, gemu ⌊nai imu yaak haenppa⌋ ele, uɗat ɠagattag anamib hettem. Na ig Israel, ig oonigppa heme, danab laa oolagppa ele heme. Na uɗat ɠagattag amuppa danab ah ag na am onin ele doyegeg uɗie, gemu ele, ag dootteb.

Jeremaia 32:21

Na nahip ɠagattag okkaippa, na ebehin eleppa na nahipnu dabmettaknu kobol danab haknu elele iitta, amu uɗat ɠagattagnab ele henana, na Israel danab ah omalatte, ag Isip uun uɗippig. Na amu heehe, Isip danab ag eheɗ nau baɗappig.

Esekiel 20:9

Da amu dabmein ami, amge da ii hemi. Da anukka Israel ag laa oolagppa daan oiyegeg, da ag amelagppa da ehanadppi, ag Isip wan uuglagnu ai, ag, am danab ag oolagppa daan oippig ele dooppig. Ag dooppig amu da dabmemi helom am, danab ah laa amu ag da onilnu am keeke hamu bia doolob amunu, da, da onilnu dabmak anuqak doyen, da nob amu ii mattami.

Namba 6:27

Amu Yawe Nug aum. “Aron bekkod ele ag anam hena, amuppa ag da onil Israel danab ah dilagppa mattaglag, amu da ag itittak ena madakkul,” awa aum.

Epesus 1:6

Kayak Nug anam heum, diig amunu nuhig ehanittak okkai hamu mettak, amuam binag amahlak oppiaawak ele amu, ehanittak okkai hamu mettak amu binag aotte. Nug Kristusnu oo mauhtte, amu Nug Kristusnu uɗat okkai ihinignu heum ele amu dabmaama, ehanittak okkai hamu mettak amu oo qak iitta ig mekkom.

Duteronomi 10:21

Nug am ahilag Kayak, Nug ahilag binag mak aokkunu elelenab daatte. Nug aakkuib he, hak ɠagattag, danab hekkunu elele iitta, danab ah anidna, ebehilag oh bodoetta le mette ele amu, Nug aakkuib amu he, ag anidppig.

Duteronomi 15:15

Am ag anukka Isip wanppa begbeg maɗi nid daaegeg, Yawe, ahilag Kayak, Nug ag ehanatta, nuhig ɠagattag okkaippa amunu qagaiettakppanu eɗua uhuqak heum amu, ag appa baula begbeg maɗi nid ii daatteb, ag amu daulagppa doaɗ! Diig amunu gemu da ag haknunab anak imu madattem.

Duteronomi 33:29

O, Israel, ag itittak ena aon malappig! Auntai laa ag bia laa iitta. Yawe Nug nukka ag padal memananu ehanattom. Nug am ahilag guppiɗ, ahilag ehanittak, ahilag qep elab enanag ele. Ahilkad kekeɗ ag ag noolagppa ag beɗulkad aɗappeg neeb, ag Israel ag ahan, tappaladppeg nokkulag,” awa aum.

Duteronomi 9:26

Da Yawe unuqitte ami. “O Naɗi Yawe, na danab ah nahip imu heppe, padal memananu oɗ medattem. Ag am nahipadnab daatteb. Israel danab ah amu, ag Isip appa begbeg maɗi nid daaegeg, na ag amunu qagaiettakppanu eɗua uhuqak nahip ɠagattag okkaippa heme. Ao, na ebehinppa ehanadna, na Isipnu diin uɗime.

Taitus 2:14

Kristus Nug ig ihinig nau hak ohnu qagaiettakppanu eɗua uhuqak hekkunu, ig nuhikkudnab danab ah oppiaawak ele daatta, kobol ena tutukku aakkuib hekkunignu dabmak aognignu amu, Nug ihinignu mauhom.

Josua 7:9

Kanan danab, amu danab laala wan imuppa daatteb ele amu, ag imu beum doon, ag oo mekkan, ig iqappeg mauhkkunig. Ag amu hekkulag, amge O Yawe, amu anam beeb amu, na onin okkai, amuppa am attem bekku?” awa unuqittom.

1 Pita 2:9

Amge ag Kristen danab ah amu, ag gatatuppa daaegeg, Kayak Nug diia amahlak enappa maattom, ag Nug ahilagppa ena heum, ag amu miag atiglagnu Nug ag tituanatte daanna, ag am mana mettak danab, king ele daatteb, ag am danab ah Kayaknu ɗo maɗoɗppa daatteb, ag danab ah nuhikkudnab ele daatteb.

Revelesen 5:9

Ikki danab 24 ag anam hena, ag ahi bau laa inam edappig. “Na buk itoɗiak amu aona, qataqak oh tolakkutnu ehah ele. Aɗinu? Ag heeg, na mauhme, amu na danab ah huu ohppanu, nai ohppanu, beɗulag iɗu iɗu ohppanu, wanppan wan ohppanu ele na tiinppa hipuninnu qagaiettakppanu eɗua uhuqak hena, Kayak mettame.