2 Samuel 21:7 - Nobonob Baibel

⁷ Dawit anam aum, amge nug anukka Saul bekka Jonatan amegppa nuhig nai Yawe noobppa ɠagattag qetta, layam hanhan daaglahnu aum amunu, nug Jonatan bekka Mepiboset Gibeon danab eppelagppa ii meum.

2 Samuel 21:7 ပူးပေါင်းရင်းမြစ်များ

2 Samuel 16:4

Siba nug anam a, Dawit nug aum. “Keeke oh Mepiboset eppegppa dayom am, gemu nahip daatte,” awa aum. Awa a am Siba nug aum. “Na dahil okkai, dahil king. Da am nahip maɗi nid. Na dahilnu ena dookkutnu ool daatte,” awa aum.

2 Samuel 19:25

Mepiboset nug Jerusalemnu aha, king uɗa te, King Dawit nug oɗ mettom. “Mepiboset, aɗinu na da ele oh ii gomuɗ?” awa oɗ mettom.

2 Samuel 4:4

Amu Saul buɗub laa, am Jonatan bekka onig Mepiboset. Nug baekuɗ am kaliak ele. Uug amu nuhigppa beumnu diig am, haen Pilistia ag Israel eɗadna heeg, Saul, Jonatan ele mauhpiɗ, haen amuppa nid amu nug maɗ tanig ele, amu haen amuppa ele laa Jesrilnu uɗia, mauhpiɗnu a, ah nug nid amu gumom ele nug nai amu doya, oola gokkunu nid amu huma awa, qaiqaɗ ugakka, nid paɗe na qa, guittak awe, baekuɗ kaliak daapiɗ.

2 Samuel 9:1

Am deɗ laa Dawit nug nuhikkud ehanittak laala oɗ matta aum. “Da Jonatannu dabmein, nuhignu dabmak anuqak awen, Saul baekkudppan laa, nuhignu oo mauhaknab kobol doye dim lamitten hekkulnu ool daatte, amge Saul buɗub laa gemu daattete o iittate?” awa oɗ mattom.

2 Samuel 9:10

Da nug mettami amunu, na, na begapad, nahip maɗi nid ele ag wan amuppa ee eppan, meu aonna, Mepiboset baekkudppa laa oh ag keeke ele daaglagnu nug mettaglag, amge nahip okkai alag Mepiboset, nug hanhan balal dahilppa ee lakku,” awa aum. Siba nug bekkod 15, maɗi nid 20 ele.

2 Samuel 9:6

Ag Jonatan bekka Mepiboset, Saul alag amu, ag nug omalna uɗieg, nug Dawit toppa ta, nug Dawit binag mekkunu Dawit noobppa dup noa, ikki wan yom. Nug anam he, Dawit nug oɗ metta, “Na Mepibosette?” awa oɗ mettom. Oɗ mette Mepiboset nug aum. “Ao, da Mepiboset, nahip maɗi nid,” awa aum.

2 Samuel 9:7

Mepiboset nug Dawit amegppa anam a, Dawit nug aum. “Da na mamen Jonatannu dabmak anuqak awen, nahipnu oo mauhaknab kobol doye dim lamidkkulnu hettem amunu, na aib baɗame! Na alan Saulnu wan oh amu, da eɗue, na eppenppa mekkul. Laa amu, na hanhan dahil balalppa ee lakkut,” awa aum.

Eklisiastis 8:2

Na king oɗe dim lamidkkutnu Kayak noobppa daanna, na nahip nai ɠagattag qettan mattime amunu, na kingnu haknunab anak dim lamitte!

1 Samuel 18:3

Aria, Dawit nug aben Saul daatte, amuppa dayeye, Saul bekka Jonatan, nug nukka nuhignu oo mauhom, amubia nug Dawitnu oo mauhom amunu, nug Dawit ele aa nug tituana nai qakkak laa hepiɗ.

1 Samuel 20:12

Aria aa ahai, aab okkai dimittim dad okkaippa goya, amu Jonatan nug Dawit amegppa aum. “Da Yawe, Israel dilag Kayak, da Nug noobppa imu hekkulnu iikku madittem. Butti, o laatu amu, da geha nahipnu mama oɗ medakkul. Oɗ medappi, nug nahipnu ena akku amu, da na appi dookkut.

1 Samuel 20:15

⌊Amge haen gamag imuppa da mauhppi, dimppa haen na king bewona,⌋ na da baeladppa dilagnu oo mauhaknab doon, aqappe ii mauhmananu oɗ medattem. Ao, Yawe Nug heeb, nahip kekeɗ ohnab ag mauhadna malappeg amu, haen amuppa ele na da baeladppa dilag enaib hekkutnu oɗ medattem,” awa aum.

1 Samuel 20:17

Amu Jonatan nug nukka nug nuhignu oo mauhom, amubia nug Dawitnu oo mauhom amunu, nug he, Dawit nug baula Jonatan layag tuɗid daakkunu nuhig nai ɠagattag qetta aum.

1 Samuel 20:42

Aa gaaya maloya, Jonatan nug Dawit amegppa aum. “Na ena, oot maɗoɗ ele ukke! Aɗinu? I Yawe onigppa nug ehanittak hekkunihnu nai ɠagattag qeɗa amuɗ, amu Yawe Nug geha amu haen oh dabmedakku. Dabmettebeb amu, i oonihppanu laa nug nai amu tippaleb, aria Yawe Nugib nug epeɗidkku,” awa aum. Jonatan nug anam a, Dawit aha ugekke, Jonatan eɗua, aab okkaippa ukkom.

1 Samuel 20:8

Anukka na he, i nug tituana nai qakkak laa Yawe noobppa hemuɗ, amu tituanak amuppa i iya iya geha ehanitkkunihnu amuɗ amunu, na dahilnu oo mauhaknab doon, na ame amu, na nai amu dim lamidna ehaniɗkkutnu oɗ medattem. Amge da eheɗ laa hemi dayeb amu, na iuppe mauhei! Aib omaiɗna, na mamen gumidna goppe, nug da iwom.” Dawit nug Jonatan amegppa anam aum.

1 Samuel 23:18

Jonatan nug a amu, aa Yawe noobppa geha aa aya, ⌊aa nug ehanittak hekkulahnu⌋ aa baula nug tituanya nai qagapiɗ. Aa nai qakkak hewoya, Jonatan nug eɗua appagppa ugekke, Dawit nug Hores dayom.

1 Samuel 24:22

Saul nug anam a, Dawit nug anam hekkunu Yawe onig awa, nuhig nai ɠagattag qettom. Nug anam he, Saul nug eɗua aabppa ukkom, amge Dawit nug nuhikkud danab ele ag eɗun, ban haknu aben ɠagattag eleppa gona, appa daappig.