2 Samuel 18:3 - Nobonob Baibel

³ Nug amelagppa anam aum, amge ag eɗun appig. “Iitta! Na ig ele aib gomut. Aɗinu? Apsalom aɗi ag ig eɗigna heppeg, ig oolkkunig dayeb amu, ag ihinignu dab-ii-memana. Ag iqappeg, ig kuɗumnab mauhkkunig dayeb amu, ag amunu keeke okkai ii doomna. Ag ig oonigppa danab 10,000 aqappeg, na bau daakkut dayeb amu, ag oolag gamag ii ahama, amge ag naib nidappeg mauhkkut amu, ag oolag huana gamag ahakku. Anam daamanu, na aab okkaippa ippa daanna, ippa na ehanikkak megakkut am ena. Na banppa gokkut am ena iitta,” aon appig.

2 Samuel 18:3 ပူးပေါင်းရင်းမြစ်များ

2 Samuel 10:11

Nug anam babaitta, nug Abisai amegppa aum. “Aram dilag daup ag da eɗilkkulagnu hekkulag dayeb amu, na uɗin da ehaniɗe! O iitta, Amon dilag daup ag na eɗidkkulagnu hekkulag dayeb, da ukken, na ehanidkkul.

2 Samuel 17:2

Ig gota, Dawit aɗi ag beɗulag gai-iitta, bodoettak ele daappeg, ig gota tepput, Dawit aɗi ag eheɗ nau baɗan oolppeppeg, da king aakkuib qeppi mauhkku.

2 Samuel 21:17

Isbi Benob nug anam a, nug Dawit ele ban heyaya, Dawit beɗu lemelem qe, gai-iitta me, Pilistia danab amu nug Dawit qeeb mauhkkunu heehe, Seruia bekka Abisai nug uɗia, Dawit ehanitta, Pilistia danab amu qe mauhom. Nug anam he, Dawitnu daup ag uug amu bekkunu miag dayom anidna, ag Dawit amegppa ɠagattag appig. “Na ig Israel, na ihinig amahlak hanhan eotte bia daattem amunu, amahlak amu iitta memanu, na baula ig oonigppa daappe, ban ii hemata. Ig, nahipad ban danab amu, igib banppa daagnig,” aon appig.

1 King 22:31

Amu ban ii digmeeme, Aram dilag king nug nuhikkud ban daup ikki ban haknu karis gumappig ele, ahilag ebqak am 32 amu, nug ag inam hekkulagnunab ag amelagppa aum. “Ig ban hekkunig, amge ag auntai laa, nug daup okkai, o nug daup hamu, ag ag laa amubia ele ban hekkulagnu dabmak anuqak aib dooppig. Iitta. Ag Israel dilag king Ahap, ag nugnab ele ban hekkulagnu anuqak doyeg!” awa aum.

Gayak Nai 4:20

Amu danab laa, Yawe nug ihinig king daakkunu goɗen gokkaɗakppa tituane, ig ehanikka auta autanab awom amu; kekeɗ ag ahilag pelem meeg, nug amuppa teum. Ig nuhignu, “Ig nug waappa daat; wanppan wan laa oh oolagppa ena daagnig,” dabmemut, ⌊amge iitta⌋.

Sekaraia 13:7

Yawe Nukka Ɠagattag Oh Ele Nug atte. “Qep elab, na ahan, dahil sipsip gumak danab qe! Ge, qep elab, na danab da gukkuiɗak daatte ele qe! Qep elab am sipsip gumak danab qeeb amu, sipsip, ⌊dahilad danab ah amu,⌋ ag oolna, matatun gokkulag. Anam, amge da dahiladnab sipsip gumak danab sipsip nakkud bekkadtte bia atognoadkkul.

1 Samuel 18:7

Ah ag ahi goɗanna, ahi inam edappig. “Haen kuɗum Saul nug danab 1,000 aqe mauhtteb, amge Dawit nug danab 10,000 aqe mauhtteb.” Ag anam anan ettanna goɗappig.