2 Samuel 11:21 - Nobonob Baibel

²¹ Ag aun nug Gideon bekka Abimelek qe mauhom iite dootteb? Abimelek nug Tebes danab ele ban henana, nug aɗ amu guguittak ukke, ah laa, nug aab okkainu aɗ attan dayaya, ee aeg ganuɗaknu men okkai buɗie noa, ikki aoɗe mauhom. Aɗinu ag aabnu aɗ guguittak appa wappig? Ag kaaka heppig!’ King nug anam akkutai. Nug anam anan, oɗ medakku dayeb amu, na inam appe doyaɗ! ‘Amge nahip maɗi nid laa mauhom ele amu, nug am Hit danab Uraia.’ Na anam a!” Joap nug nai awa ukkak danab amegppa anam aum.

2 Samuel 11:21 ပူးပေါင်းရင်းမြစ်များ

2 Samuel 11:17

Joap nug anam he, Uraia appa dayeye, aab okkai amuppan daup ag dimittim uɗin, ban hena, ag Dawitnu daup laala aqaeg mauheg, ag Hit danab Uraia ele qeeg mauhom.

2 Samuel 11:20

nug ana oo nauhkkutai. Nug oo nauhkku dayeb, nug na inam oɗ medakkutai. ‘Aɗinu ag ban hekkulagnu aab okkainu aɗ guguittak anam daappig? ⌊Aɗ amu menppa hak, teppu ele amunu⌋ ag Amon daup ag aɗ attan daanna, lat doɗo eppeg nekkunu iite dooppig?

2 Samuel 11:22

Joap nug amu mattia male, nai awa ukkak danab nug ukka Dawit toppa te, Nug keeke oh Joap mattia madikkun aumbia Dawit amegppa mattiom.

2 Samuel 3:27

Anam daye, haen Apner nug eɗua Hebron uɗie amu, Joap nug aabnu aɗ odppa dayaya, nug Apner ele aa laih danab ii daattebppa goya, aya daayya, nai mattiglahnu he goya, appa Joap nug Apner big qep-ppa ye mauhom. Apner nug Asahel ye mauhom amunu, Joap nug gemu nob ma, Apner ye mauhom.

2 Samuel 3:34

O Apner, na danab ah gumattak danab ag danab nau eppeg hippalna, qeeg mauhtte, na amubia ii mauhme. Ao, na danab ah gumattak danab ag danab nau baeg qakkan, qeeg mauhtte, na amubia ii mauhme. Iitta. Danab nau ag danab laa hamu qeeg mauhtte, na amubia mauhme.” Dawit nug anam ahi ettom. Ahi ette, danab ah oh ag baula gaappig.

Sam 39:8

Da hipunin hemi amunu, na hipunin dahil oh uhuqna meɗan, heppe iitta mekkunu oɗ medattem. Na da uuiɗppe, danab ag Kayak dab-ii-menan ii dim lamidtteb ele ag dahilnu, “Keeke hamunab,” doomnanu unuqidttem.

Aisaia 14:10

Aab amuppan ag na anidna, ⌊aon aon nittan⌋ akkulag. “Gemu na ɠagattag iitta, ig bia beme. Gemu na ig bianab daattem,” akkulag.

Ikki Danab 6:32

Joas nug anam a, haen amuppa laa ag, “Bal nug nugakka nug atognoaɗ!” anana, ag Gideonnu, Jerubal appig. Gideon nug Balnu qaɗab loppaɗe neum amunu, ag nuhignu anam appig.

Ikki Danab 7:1

Kayak Nug Gideon anam ehanittom amunu, Gideon, onig laa am Jerubal amu, nug, nuhikkud ban daup ele ag buttua ahan, le qeppuɗia bak onig Harot appa gona, ag haen tutu dayaknu aab appa kalappig. Midian dilag daup ag ahilag haen tutu dayaknu aab amu, Harot leppanu laih yawalti uɗitteppanu kalappig. Ag am oolnu noakppa, qauko nakok onig More guguittak, appa ahilag haen tutu dayaknu aab kalappig.