2 Samuel 11:15 - Nobonob Baibel

¹⁵ Yaak amuppa amu, Dawit nug Joap ebqa hekkunu inam yom. “Na heppe, Uraia nug ban adekkuppa ɠagattagnab daatte amu, nug aben amuppa danab anuqak daatteb oolagppa dayaɗ! Na anam heppe, nug appa dayebeb, ban huanaknab aheb, kekeɗ ag nug qeppeg mauhkkunu ag laa oh nug uuidna, bittumttum gobeppeg, kekeɗ qeppeg mauhkku,” awa yom.

2 Samuel 11:15 ပူးပေါင်းရင်းမြစ်များ

2 Samuel 11:16

Dawit nug anam ye ukke, Joap nug ebqeum. Nug nuhikkud daup ele ag Amon dilag aab okkai onig Raba, aab amu oo mattan aqaknu maadna daanna, Joap nug aben adekkuppa Amon daup ɠagattag daappig doyom amunu, Uraia appa ban hekkunu meum.

2 Samuel 11:17

Joap nug anam he, Uraia appa dayeye, aab okkai amuppan daup ag dimittim uɗin, ban hena, ag Dawitnu daup laala aqaeg mauheg, ag Hit danab Uraia ele qeeg mauhom.

2 Samuel 12:9

Amunu aɗinu na da Yawe, na dahil nainu ena iinab doon, eheɗ nau amu heme? Na hee, kekeɗ ag Hit danab Uraia qep elabppa qeeg mauhom. Ao, ag nug qeeg mauhe, na nug wau, nahip ah daakkunu aome. Ge, na hee, Amon danab ag qep elabppa Uraia qeeg mauhom.

1 King 15:5

Yawe Nug Dawit daug ii atiom. Aɗinu? Dawit nug Yawenu neekkakppa kobol genab tutukku ele dim lamittom. Nug nuhig wanppan oiyaknu maɗ oh nug Yawenu haknunab anak oh dim lamittom. Haen laippu aakkuib nug Kayaknu nai tappe ne, eheɗ heum. Haen amuppa nug Uraia, nug Hit buɗubppan danab amu, nuhigppa nug eheɗ heum.

Sam 51:14

O Kayak, da padal mepanu ehanittak am naib. Da am eheɗ nau hemi amunu, na heppe, da mauhkkulnu elele, amge O Kayak na heppe, da ii mauhpa, da bau daakkulnu unuqidttem. Na anam hekkut amu, da gamag ahak okkai doyen, da nahip genab tutukku hak kobolnu ahi edakkul.

Sam 51:4

Da hipunin na, nahip-ppanab hemi. Ge, da nahip neekkakppa eheɗ hemi. ⌊Amu genab, da hipunin laa dilagppa hein, ahilagnu eheɗ hemi, amge diigppanab⌋ da hipunin nahip-ppa hemi. Ge, da nahip neekkakppa eheɗ hemi. Da hipunin hemi amunu, na Kayak, haen na dahilnu, “Na hipunin heme,” attem am, na tutukkuib attem. Yo, haen na da hettoɗiakppa meiɗna, na kobol tutukkuib hettem.

Eklisiastis 8:11

Danab eheɗ hena, ag paha bu ii aotteb dayeb, danab oh ag hibguitta henana, kobol eheɗ digdig hekkulagnu dabmetteb.

Jeremaia 17:9

O gadon, danab ah oolag unuqagppa hambuppuak aakkuib daatte. Danab aun laa danab oolagppanu nug amu heeb, babaittak daakkunu laa iitta. Aun nug amu tutukku dookkunu elele iitta.

Jeremaia 20:13

Ag Yawenu ahi ettalatteg! Ag Nug binag humeg! Aɗinu? Nug daɗek danab, ag ɠagattag iitta ele, Nug danab amu ehanatte, ag nau hak danab eppelagppa ii daatteb.

1 Samuel 18:17

Am danab ah oh ag Dawitnu oolag mauhom amunu, Saul nug inam dabmeum. “Da dakka Dawit ii qeppi mauhma. Iitta. Amge Dawit nug Pilistia ele ban henana, ag geha nug qeppeg mauhkku. Da amu ii hepa.” Saul nug anam dabmaama amu, nug Dawit amegppa aum. “Antte! Imuam nid ahin dahil tatamnu. Nug onig am Merap, amu na nug na waat daakkunu aokkutnu da ool daatte. Amge tatam aa ewau matulak ii awak, haen imuppa amu, na dahil ban danab tutukku daanna, na kekeɗ ele ban haknu amu, na ootppa ɠagattag doyak ele anidkkulnu ool daatte. Anam daappe, haen Yawe Nug ig Israel ig gopput, kekeɗ aun ele ban hekkunignu ab amu, aria na gona, ban amu hekkut. Aria, na anam henana amu, na da aɗel aokkut; iitta am iitta,” awa aum.

1 Samuel 18:21

Saul nug oo gamag ahe, nug inam dabmeum. “Da geha Dawit, nug da aɗel aokkunu elele appi, ewau matulak awaknu nai amu da nug ele qagapuɗ, da aɗel nug geha Dawit mauhkkunu ib daakku. Da geha appi, ah nob daden amu, Dawit nug Pilistia ele ban hekkulagnu daakku, amu ag geha nug qeppeg mauhkku.” Saul nug dabmak anam awa, nug Dawit amegppa baula aum. “Gemu na geha da aɗel amu aokkut,” awa aum.

1 Samuel 18:25

Ag Saul amegppa anam aeg, Saul nug he, ag Dawit amegppa akkulagnu eɗun goppig. Ag nug amegppa inam akkulagnu aum. “Aɗeg daden en amu, king nug keeke laalanu oo ii daatte. Iitta. Nug inamnu oo daatte. Geha na gona, Pilistia ban danab 100 aqappe mauhppeg, geha na hipalag gaɗa amu otaɗadna, akkan Saul toppa uɗie, amu geha ah daden daakku. King nug Pilistia ag kobol nau kuɗum ig Israel ihinigppa heppig doya, nug Pilistia ag amunu nob nau aoglagnu laa amu, ag anam mauhkkulagnu oo daatte.” Saul nug ag Dawit amegppa anam akkulagnu aum, amge Saulnu dabmaknab am, “Geha Pilistia ag banppa Dawit qeppeg mauhkku,” dayom.