2 Korint 6:10 - Nobonob Baibel

¹⁰ Ig am oonigppa uug elenab, amge haen oh ig maɗoɗppan gamag ahak doottem. Ig daɗek danab bia daattem, amge ig am danab kuɗum keeke kuɗum madattem. Ig am eppenigppa keeke laa ii daatte bia, amge keeke oh am ig aɗattem.

2 Korint 6:10 ပူးပေါင်းရင်းမြစ်များ

Sam 84:11

Aɗinu? Yawe Kayak Nug am ihinig amahlak, guppiɗ ele daatte. Nug ii helo bia me, Nug ehanittak kobol dim lamidttatta, Nug binag okkai ele megatte. Yawe Nug danab ah nuhikkud ag nuhig neekkakppa oolagppa kaliak laa iitta ele amu, Nug ag keeke ena ena oh madatte.

Prowerb 13:7

Danab laa nug enub okkai ele bia ippu hak hette, me nug keeke ele ii daatte; amge danab laa nug daɗek daatte bia ippu hak hette, me nug am keeke kuɗum ele daatte.

Prowerb 16:16

Danab nug doyak dabmak ena ele aokku, amuam ena, am gol awak eɗidtte. Ao, danab nug diignu doyak tutukku, nug amu aokkun dabmekku, amuam ena, am silwa awak eɗidtte.

Matyu 5:12

Danab kobol nau amu hetteb ele, anukka danab ag Kayaknu propet ele anam eheɗ hadappig amunu, ag gemu ahilagnu ele anam heppeg, aria, ag gamalag ahebeb, ag oolag enaib dayaɗ! Aɗinu? Nob ahilag hab attan am okkainab.

Matyu 5:4

Danab aun aɗi ag oolagppa ⌊hipuninnu⌋ guittak dootteb ele amu, ag itittak ena aoppig daatteb. Aɗinu? Ag oo mak aoglag.

Luk 6:21

Ag gemu enug aqatte ele, ag itittak ena aoppig daatteb. Aɗinu? Kayak Nug heeb, ag oolag didikku. Ag gemu oolagppa uug doon gaatteb ele amu, ag itittak ena aoppig daatteb. Aɗinu? Ag oolag gamag ahakku.

Jon 16:22

Anamnab aakku. Gemu amu ag oolagppa oo doyak ele daatteb, amge da geha ag eɗue anadkkul, amu haen amuppa ag maɗoɗppan gamag ahak okkai dooglag. Amu laa nug ahilag maɗoɗppan gamag ahak amu qeeb nekkunu elele iitta,” awa aum.

Aposel 16:25

Qagate, aa anam daayya, tuqan tugmag Pol, Silas ele Kayak unuqidya daayya, ahi ele ettayya daapiɗ. Anam heeheh, maniguittak danab laa ag doyatppig.

Aposel 3:6

Nug ooppa anam aum, amge Pita nug aum. “Da men doɗo iitta, amge da dahil keeke daatte amu, da na medakkul. Jesus Kristus, Nasaret ted, Nug onigppa da na amenppa attem. Na ahan tappan oiye!” awa aum.

Aposel 5:41

Ag anam heeg, totol danab 12 ag Juda dilag hettoɗiak okkai onig Sanhidren, amuppanu dimittim gona, ag maɗoɗppan gamag ahak doona, inam dabmeppig. “Kayak nug ig Jesus onignu uɗa nak, guittak ele aognignu elele anikkom amu, amuam ena.” Ag anam dabmeppig.

Rom 11:12

Amu ag ib apiɗidppig amuppa Kayak Nug wanppanu danab oh dilagppa ehanattak okkai hette. Ag Kayaknu kobol ena uuppig, amuppa Kayak Nug iitta aɗi dilagppa kobol enanag hette. Anam amunu, Israel ag eɗun Kayak toppa dokkulag haenppa amu, geha wanppan danab ag enanag daaglag.

Rom 12:15

Danab ag maɗoɗppan gamag ahak dootteb ele, ag ele oh maɗoɗppan gamag ahak doyeg! Danab gaappeg, ag ele oh gayeg!

Rom 15:13

Amu Kayak Ouɗinu ɠagattagppa ag butti aɗi hab aabnu keeke aoglagnu dabmak aɗan daan autna aoglagnu, da ag Kayak, Nug am aɗi keeke oh ena bekkunu dabmak aɗa dayaknu diig, ag nuhignu oolagppa genab doobppeg, Nug heeb, ag oolagppa maɗoɗppan gamag ahak okkai, amu maɗoɗ ele naɗi daaglahnu ool daatte.

Rom 8:32

Nug Bekka ig megakkunu amu Nug amunu oo ii qe, Nug ig oh ehanigkkunu me uɗiom. Nug anam heum amunu geha, keeke laa oh ele amu, Nug ig iite megakku? Yo, Nug megakku.

Rom 9:2

Nai amuam inam. Israel danab ag Jesus dimedappig amu, da amunu oolppa uug okkai doyeye, haen oh da oolppa guittak nau doottem.

1 Korint 1:5

⌊Amu da Kayak amegppa imunu ele, “Ena heme,” awe attem.⌋ Kristusnu nai ag dooppig ele ahilagppa ɠagattag eppe, Kayak Nug Kristus Jesus, nuhigppa he, ag Kayaknu ɗo maɗoɗppa uɗat oh hekkulagnu elelenab daatteb; amuam ahilag nai mattiakppa, ahilag doyakppa ele.

2 Korint 2:4

Da anukka ahilag uɗugppa nai uug ele yaami, haen amuppa amu da ahilagnu oolppa uug nau, amu guittak ele doyeye, da huanak ele gaami. Am da ad uɗug yaami amuppa da ag oolag uug medakkulnu ii yaami. Iitta. Da ad uɗug yaami amu, ag da ahilagnu ool okkai mauhtte, amu dooglagnu yaami.

2 Korint 4:15

Kayaknu ehanittak okkai hamu megatte amu gemu danab kuɗum laala ahilagppa ambeebeb, ag Kayaknu, “Ena heme,” okkainab anana, ag Nug binag attan humaglagnu, keeke imu oh beum amu, ag ehanadkkunu beum.

2 Korint 4:7

Ig Kayak binag amahlak oppiaawak elenu doyak aomut, amge ig am danabib, waa wanppa hak amubia, ig keeke ena amu aot, laa oh ag ɠagattag okkainu diig am Kayak, ig iitta, amu dooglagnu daattem.

2 Korint 8:9

Ag ihinig Naɗi Jesus Kristusnu ehanittak okkai hamu mettak kobol dootteb. Nug am keeke oh Mameg, amge Nug ag ehanadkkunu ha, Nug keeke iitta ele dayom. Nug ha, keeke iitta ele dayomnu diig am, amuppa ag Kayak noobppa enub danab daaglanu elele.

Epesus 3:16

Da gatel qaun oin unuqidttem amu, da Kayak Nug nuhig Ouɗippa ag ehanatta, Nug nuhig ehanittak enanagnab, Nug amuppa ag oolag ɠagattag aqakkunu,

Epesus 3:8

Da am Kayaknu danab ah oppiaawak ele laa oh noolagppa keeke hamunab daattem, amge Kayak Nug ehanittak okkai hamu meɗa, Nug da iitta aɗi noolagppa Kristusnu keeke ena ohnu, danab nug amu antta dookkunu elele iitta, nai amu mehuqkkulnu meiɗom.

Pilipai 2:17

Ag Jesusnu oolagppa genab dootteb, diig amunu ag Kayak waappa daan, Nug oɗe dim lamidtteb. Anam amu, amuam ag doɗ manan Kayak medatteb bia. Aria, da am wain gokkaɗaknu ofa ahilag mana mettak amu qaɗeppa gokkaɗaknu bia daakkul dayeb amu, da maɗoɗppan gamag ahak doottem, amu da ag ele maɗoɗppan gamag ahak amu dooglagnu ool daatte.

Pilipai 4:4

Ag Pilipai daatteb amu, ag hanhan Naɗinu maɗoɗppan gamag ahak doyeg! Yo, da baula ag amelagppa attem, ag hanhan maɗoɗppan gamag ahak doyeg!

Kolosi 1:24

Amu da gemu beɗulppa guittak maottem imu amu, da amunu maɗoɗppan gamag ahak doottem. Aɗinu? Da Kristusnu Kristen tamaniak, amuam Nug beɗu aakku amu, da tamaniak amu ehanidkkulnu ool daatte. Guittak Kristus Nug Kristen tamaniak ehanidkkunu mawom amuam daatte, amge guittak da dakka beɗulppa maottem imuam da amuppa hei, Kristus Nug guittak mawom amu aakku ambette.

Kolosi 3:16

Kristusnu nai enanag meu ele ag oolagppa daakkuoitte! Ag akka akka doyak dabmak ena eleppa nug ippunidnana, nug ehanittak ele heig! Ag oolagppa Kayak amegppa, “Ena hen mekkame” anana, ag sam, mettidnu ahi, amu Kayak binag maknu ahi ele etteg!

1 Tesalonaika 1:6

Ag ihinig kobol dim lamidnana, Naɗinu ele dim lamidppig. Ag uug teppu ele maoppig, amge Kayaknu nai ii uuppig. Iitta. Ag Kayak Ouɗinu maɗoɗppan gamag ahak ele nai amu aoppig.

1 Tesalonaika 5:16

Ag haen oh maɗoɗppan gamag ahakppa oiyeg!

1 Timoti 4:8

Aɗinu? Beɗunig ehanittaknu kobol hak amu nakok ehanigtte, amge genab tutukku hak danab dayaknu ehanittaknu kobol hak, am keeke ohnu ehanigtte. Amuam ig gemu bau daattem amunu ehanigtte, amu bauklel dimppa aognig, amunu ele ehanigtte.

1 Timoti 6:18

Laa amu, na danab ah enulag ele ag ena, ao ag kobol ena okkai hena, ag danab ah oo qak iitta ele ehanadna, ag enulag laih oppatna, danab laa ɗo mattaglagnu babaittak daaglagnu haknunab nai ag matteg!

Hibru 10:34

Amu ag danab maniguittakppa daappig, ag amu dilag oolag doyom. Amu haen laala dimittim danab ag uɗin, ahilkad keeke ena ena aɗadna diippig, amge ag amunu oolag ii nauhom. Iitta. Ag maɗoɗppan gamag ahak doon uueg aoppig. Aɗinu? Ag ahilag keeke ena hanhannu, dimppa aoglagnu appa ana daatte dooppig.

Jems 2:5

O lailad, ag doyeg! Danab ag wanppan danab oh noolagppa daɗek daatteb ele, danab amu Kayak Nug ag ooppa genab doyak ɠagattag aɗan oiglagnu, ag nuhig ɗo maɗoɗ ooppa, Kayak Nug danab ag nuhignu oolag mauhtte ele ag aguppa daaglagnu nai qakka aum amu, ag amu ooppa daaglagnu tituanattom daatteb.

1 Pita 4:13

Iitta. Dimppa Kristus binag amahlak oppiaawak ele miag atiak bekku, haen amuppa ag maɗoɗppan gamag ahak naɗi dooglagnu, ag uug mawak haenppa ag uug anamppa ag Kristus uug mawom bia ag uug maotteb doonna, maɗoɗppan gamag ahak doyeg!

Revelesen 2:9

Da guittak uug ele nahip-ppa beum, na keeke iitta, amuppa qagaiettaknab daame amu, da doottem, amge na keeke kuɗum ele! Da danab laa ag nahipnu baeg qak nai madippig amu, da doomi. Laa ag amu appig amu ag, ‘Ig am Juda,’ aon atteb, amge ag am Juda tutukku iitta; ag am Satannu daupib.

Revelesen 21:7

Laa nug ban eɗidkku amu, da nug imu medakkul. Da nuhig Kayak daakkul; nug dahil nid daakku.