2 Korint 2:16 - Nobonob Baibel

¹⁶ Danab laala ag Kayaknu oolagppa genab ii dootteb, padal mekkulagnu oitteb ele amu, ag am muttuɗig ena otte amubia ii dootteb; ag eheɗ, mauhak beɗak uɗig otte anam bia dootteb, amge danab ag oolagppa genab doona, padal ii memananu oitteb amu, ag am muttuɗig ena otte amubia dootteb; ag am bau dayak muttuɗig dootteb. Ig anam bia daattem amge aun nug uɗat anam hekkunu elele? Ig oh am elele iitta.

2 Korint 2:16 ပူးပေါင်းရင်းမြစ်များ

Namba 15:3

ag anen anen deɗ laala aab aɗunu ofa henana, Yawe mettaglagnu doɗ aon, Nug gumidna wana, Nug mettaglag. Ag mana mettak hena, doɗ maippeppeg, muttuɗig teebeb, Yawe Nug mana mettak amunu muttuɗignu ooppa ena dookku. Doɗ laala amu makau, laala amu sipsip, o iitta meeme. Mana mettak amuam manaknu ofa, o iitta mana mettak laala daaglag. Mana mettak amuam nai genab ana qakkaknu ofatai, o iitta mana mettak amuam ɗo hamu mettaknu ofatai, o iitta mana mettak amuam hobul dayaknu haen epeɗiaknu ofatai. Amge ag aɗi mana mettak aon, Yawe gumidna wana mettaglag amu, auntai laa nug anam hette amu, nug ee aegnu ofa ele awa, Yawe gumitta ukka medakku. Mana mettak amu haknu am 1 kilogram plaua enanag, 1 lita goɗen ele kabolia, mana Kayak medakku.

Luk 2:34

Simeon anam ana, nug itittak ena matowa, nid anig Maria amegppa aum. “Doye, nid imu heeb, Israel danab ah kuɗum ag nena qekkulag, amge Nug heeb, kuɗum ag eɗun ahaglag. Nug am Kayak anidkkunignu epponak keeke daakku, amge danab kuɗum nuhignu nai nau akkulag.

Jon 9:39

Danab nug anam he, Jesus aum. “Da amelag gaɗuak ag eɗun neegkkulagnu, amelag ena ele ag eɗun amelag gaɗuak daaglagnu, da wan imuppa epeɗiak hekkulnu uɗimi,” awa aum.

1 Korint 15:10

Amge Kayak Nug da ehanittak okkai hamu meɗe, da gemu attem daattem amu ehanittak nuhig amuppa da aakku daattem. Nug da ehanittak okkai hamu meɗe amu, da ii kakidmi. Iitta. Da uɗat ɠagattag hei uɗie, gemu ele hettem. Totol danab laa ag da uɗat ɠagattag hettem bia ɠagattag ii hetteb, amge da dakka ii hettem. Iitta! Kayak Nug da ehanittak okkai hamu meɗe, da amuppa amu hettem.

2 Korint 12:11

Da nai madittem imuam danab nug Kayak dab-ii-maama ii dim lamidttenu nai bia, amge ag akka da nai imu inam madikkulnu duttuniɗeg, da madittem. Aɗinu? Ag dahilnu, “Nug ena hette,” pasppa yaaglagnu am aib iitta, amu kobol elele, ag helob am ena, amge ag anam ii heppig. Genab, da amu keeke hamu, amge da gaɗalagib totol danab ahilkad amu ag waalagppa ii daattem.