2 Korint 11:13 - Nobonob Baibel

¹³ Danab amu ag am totol danab hambuppuak. Ag am hambuppuak uɗat danab, ag danab amelagppa totol danab bia daatteb, amge ag gaɗalag aakkuib Kristusnu totol danab daatteb.

2 Korint 11:13 ပူးပေါင်းရင်းမြစ်များ

Jeremaia 23:16

Amu Yawe Nukka Ɠagattag Oh Ele, Nug imu Juda danab ah dilagnu atte. “Ag propet ⌊hambuppuak⌋ dilag nai, propet ag nai amu maditteb amu, ag nai amu aib dooppig; aib dabmeppig. Propet amu ag heegeg, ag Juda danab ah ag, ‘Ig aakku ena daagnig,’ anan oitteb, amge iitta. Ag ena ii daamna,” awa atte. Propet amu ag akka ag dabmak ahilagppa keeke henan anidtteb, ag Yawe oɗeppanu nai laa aon, nai amu ii maditteb.

Jeremaia 27:14

Nahipad propet laa ag na amenppa, ‘Na Babilon dilag king waappa maɗi nid daanna, nuhig uɗat ii hemana,’ atteb amu ag dimppa aɗi bekkunu nai hambuppuak aakku maditteb amunu, na ahilag nai aib doome; aib dabmeme!

Matyu 25:24

Am danab nug talent laippu awom nug ele doa, nuhig okkai amegppa aum. ‘Naɗi, da doottem, na am danab ɠagattag, na ii eppameppa meu aokkutnu doottem. Am na ee aeg ii tauɗmeppa ele meu aokkutnu doottem.

Aposel 15:1

Pol, Barnabas ele aa Antiok appa Kristen tamaniak ele daaegeg amu, danab laala ag Juda wanppanu uɗina, Kristen amelagppa appig. “Laa nug Jesusnu ooppa genab dootte amu, nug gaɗa ele otaɗak awaɗ! Laa ag Mosesnu ɗo amu ii dim lamidna, gaɗa otaɗak ii aoglag amu, aria geha Kayak Nug ag eɗua ii diiadma,” aon ippunadna appig.

Aposel 15:24

Amu ig aakku anidmut. Ihinigppan danab laala ag gona, ag nai mehuqegeg, ag appanu ag nai amu doon ottaippig. Amu ihinigppanu ag gona, nai mattinna, ag ahilag dabmak kabolippig ele amu, ag gona appa anam hekkulagnu ig laa ii amut.

Aposel 20:30

Am ag akka ahilkad danab laala ag ahan, ag doyak diig genabib baolinna, ag Kristen eeɗadppeg, ahan dim lamadkkulagnu hekkulag.

Rom 16:18

Danab amu ag ihinig Naɗi Kristus waappa daan nuhig uɗat ii hetteb. Iitta. Ag am beɗulagnu dabmak nau amuib dim lamidtteb. Amu oo eeɗaknu nai ittag ele, ag amuppa danab ag kobol atten am ena, kobol atten am nau ii dootteb ele amu, ag buppualadtteb.

2 Korint 11:15

Anam amunu nuhikkud maɗi nid ag ele hambuppun henana, ag danab amelagppa, “Ig genab tutukku hak kobolnu maɗi nid daattem,” aon akkulag dayeb, ig Kristen danab, ig amunu dabmak okkai ii aomta. Ig ii ottaimta. Geha dimppa ag uɗat hetteb, amuppa ag nob ahilag aoglag.

2 Korint 2:17

Danab kuɗum laa ag oinna, Kayak naippa men doɗonu uɗat hetteb ele amu, ig amubia ii hettem. Iitta. Ig Kristusnu daatta, maɗi nid Kayak maatte gotteb bia, ig oonig oppiaawak eleppa Kayak noobppa nai amu mehuqttem.

2 Korint 4:2

Iitta. Ig kobol uɗa nak ele, laa lokkumakppa hetteb amu, ig kobol amu dimettota, hambuppuak kobolppa ele ig ii oittem. Am ig Kayak nainu ele amu ig baolita ii hettem. Iitta. Ig Nai Ena tutukku miag mehuqttem, amu amuppa ig danab oh ig am aun ippuanadttem. Ig amu heut, ag ig Kayaknu neekkakppa attem daattem oolagppa dooglagnu elele.

Galesia 1:7

Amge Nai Ena laa ii daatte. Iitta. Amge danab laala ag heeg, ahilag dabmak kabolie, danab amu ag Kristusnu Nai Ena eɗuegeg, ib laappa gokkunu hetteb.

Galesia 2:4

Nai imu beumnu diig am, ihinkad laa, ag gaɗalagib Kristen, ag qagmakppa ii uɗilob amge ag oqeqaɗak uɗin, ag lokkumakppa nai italak danab daanna, ag Kristus Jesus uhuqak mekke, ig qakkak iitta daattem anidkkulagnu hena, ag awigna, ɗo waappa begbeg maɗi nid daagnignu meigkkulagnu heppig.

Galesia 4:17

Genab, danab laala ahilagppa uɗat hetteb amu, ag wagai mena eeɗadkkulagnu amelag qagatteb, amge nai ittag amuam kobol enappa ii gotte. Danab amu ag heppeg, ag Galesia danab ag ig ele ouqak ii daapput, ag Galesia ag eɗun danab amu binalag mekkulagnu hetteb.

Galesia 6:12

Danab laala ag onilag okkai ele daaglagnu hetteb, ag Galesia danab ag gaɗalag otaɗkkulagnu wagainab metteb ele amu, ag diig laippuppaib hetteb. Amuam inam. Ag danab laala ag Kristus ad emaitakppa ehanigkkunu mauhom oolagppa genab ii dootteb dabmenana, eheɗ hattamnanu gaɗa otaɗaknu nai amu huana maditteb.

Epesus 4:14

Amu nai ittag, hambuppuak danab dilag, amu ele heeb, ig uub nug ulah kaɗag haenppa duban he, ukka qa, uɗia qa hette amubia ii hemata. Nid nakok ag amubia hetteb amu ig baula, ag bia ii daamta.

Pilipai 3:18

Aɗinu? Danab kuɗum laa, ag ig oittem bia ii oitteb. Da matu haen kuɗum ag amelagppa danab amunu ami, amubia gemu ele iikku aiyi, amel leb nette. Ag Kristus, Nug ad emaitakppa mauhom, ag dabmak amunu kekeɗab daatteb.

Pilipai 3:2

Amu ag danab laa ag qai bia daanna kobol nau hetteb, ag kobol eheɗ henan oitteb, ag gaɗa otaɗak kobol dim lamidna oin, laa ele hekkulagnu atteb, amge gaɗa otaɗak kobol ahilag am beɗu mauhnoak oppatak kobol bia, aakkuib.

Kolosi 2:4

Amu da danab laa nug nuhig nai ittag ele amge meu iittappa ag eeɗadmanu dabmein, da ag amelagppa nai amu madittem.

Kolosi 2:8

Ag danab laa nug ag ulah nai, nai meu iitta ele amelagppa mattia hambuppualatteb, nug waappa daamnanu dabmeig! Danab kobol amu hetteb ele amu, ag mattiak ahilagppa alai aɗi dilag kobolnu, amu wan imuppan ɗo ɠagattag iitta ele, ag amunu maditteb. Kristusnu amu ag ii maditteb.

1 Jon 2:18

O nid naunau dahilad, haen aakku gogppa tekkunu hette. Kristusnu kekeɗ uɗikkunu amu, anukka laa ag ag amelagppa aeg dooppig. Anam aakku amu gemu Kristusnu kekeɗ kuɗumnab beppig amunu ig doottem, haen aakku gogppa tekkunu hette.

1 Jon 4:1

O gamalad, propet hambuppuak kuɗum ag ihinigppanu qatin gona wan imuppa oitteb amunu, ag danab ag, “Da Kayak Ouɗi oɗe awen madittem,” atteb ele, ag amu oh dilag nai oolagppa genab aib dooppig. Iitta. Ag nai dootteb ele ag ouɗi aun laa nai maditteb ele ehanatte, ag nai maditteb, ag amu pehettan epeɗin, aun nug Kayak Ouɗippa nai maditte anidna, ahilag naiib ag oolagppa genab doyeg!

Jut 1:4

Da nai inam yaattemnu diig am, ippunittak danab hambuppuak ag matu tamaniak ooppa lokkumna noppig daatteb. Danab amu, ag am Kayaknu nuhig haknu ele uuak danab amu, ag atteb. “Ig Kayak baegppan danab bewota, kobol eheɗ kuɗum hetata, ig Kayaknu ehanittak okkai hamu mettak, ig amuppa ig nuhig hettoɗiak deɗ eɗidkkunig,” aon atteb. Ag ele Jesus Kristus guhuɗidtteb; Nug am ihinig Naɗi, ihinig Gumak Danab Anuqak. Anukka danab laa nug Kayak naippa danab amubia dilagnu nai yom daatte, amubia ag am genabnab nob nau aoglag.

Revelesen 19:20

Anam amge, laa ⌊hos hakkab attan dayom⌋ nug doɗ dakkuɗ aɗa, propet hambuppuak ele aɗom. Propet amu nug doɗ dakkuɗ ehanidkkunu epponak keeke kuɗum danab haknu elele iitta heum. Kobol amuppa nug danab oh, ag doɗ dakkuɗnu epponak keeke aoppig, ag ele doɗ dakkuɗ dottog noobppa dup nona binag meppig amu, nug ag hambuppualattom. Amunu doɗ dakkuɗ nug propet hambuppuak ele aa bau daaeheh, laa ⌊hos hakkab attan dayom ele,⌋ nug aa aɗalata, aab ameg kalu laa huana eotte onig salpa eotteppa buɗiate nopiɗ.

Revelesen 2:2

Da nahip hak, uɗat ɠagattag nahip, amu na uɗat amu hekkutnu ii uun, tuɗidna hettem ele amu, da doottem. Na danab nau dilag ele oot iinab hette. Amu laa ag, ‘Ig am totol danab,’ hambuppun appig amu, na ma anttak matte, ag am hambuppuak danab daatteb anidme.

Revelesen 2:20

Amge eheɗ hak nahip laippu imunu da na amenppa iikku attem. Na ah Jesebel, nug nuhig haknu amu, na nug amegppa aib ii attem. Nug, ‘Da am propet ah,’ awa atte, amge nug anam ii daatte. Nug ippunittak hette, amuppa nug he, dahil maɗi nid ag gappai kobol hena, laa doɗ main kayak hambuppuak dottolkad madappig ele, ag doɗ amu ele latteb.

Revelesen 2:9

Da guittak uug ele nahip-ppa beum, na keeke iitta, amuppa qagaiettaknab daame amu, da doottem, amge na keeke kuɗum ele! Da danab laa ag nahipnu baeg qak nai madippig amu, da doomi. Laa ag amu appig amu ag, ‘Ig am Juda,’ aon atteb, amge ag am Juda tutukku iitta; ag am Satannu daupib.