2 Korint 1:4 - Nobonob Baibel

⁴ Uug oh ihinigppa bette amu, Kayak Nug ig oo mak megakkunu ig oonig aotte. Anam amunu, ig danab uug digdig ele dootteb amu, ig ag oo mak aoglagnu ag oolag aognignu elele daattem.

2 Korint 1:4 ပူးပေါင်းရင်းမြစ်များ

Sam 32:5

Da anam hei ukke, deɗ laa da hipunin dahil mehuqe, amenppa oh miag ami. Da kobol nau dahil ii lokkummi. Da oh miagib mattien, na Yawe, na amenppa ai, na hipunin dahil uhuqna meɗae, da oolppa aab dayom am iitta meum. Sila.

Sam 32:7

Na aakkuib na dahil lokkumak aben, dahil guppiɗ ele daattem! Ao, na da ehaniɗe, nauhakppa ii daattem amunu, diig amunu da ehanittak nahip-ppanu ahi edattem.

Sam 66:16

Aun aɗi oh ag Kayaknu ebehilag oh bodoetta le mette ele amu, ag doppeg, Kayak Nug aɗi keeke dahilppa ena heum amu, da amunu madippi doyeg!

Sam 86:17

O Yawe, na dahilnu ena doottemnu at daakkunu amu, na ehaniɗkkutnu, oo mak ele meɗakkutnu oɗ medattem. Aɗinu? Na anam hekkut dayeb amu, laa ag dahilnu nau ninig ele dootteb, ag amu anidna, ag uɗa nak dooglag.

Aisaia 12:1

Haen amuppa amu ⌊Israel danab ah, Juda danab ah ele ag oh laib laib⌋ geha ahi inam ettan akkulag. “O Yawe, na dahilnu oot nauhom, amge gemu nahip oo nauhak amu na uume. Ao, na uunna, nai ena da meɗan oo mak meɗame amunu, da na binan humakkul.

Aisaia 40:1

Ag ahilag Kayak, Nug atte. “Ag dahilad danab ah oo mak matteg! Ao, ag ɠagattag qatteg!

Aisaia 49:10

Ag gobeppeg, enug ii aqama; le baalag ele ii diima. Atu taɗaknu aam gakkaɗak ele ii aqama. Aɗinu? Laa ag oo madatte amu, Nug ag ulum madatta, Nug ag le qeppuɗia betteppa omalatta gokku.

Aisaia 51:12

Amu Yawe Nug atte. “Da, ge da, da oo mak madattem. Danab am keeke gai-iitta, oh mauhtteb amunu, aɗinu ag danabnu baɗadtteb? Ao, aɗinu ag danab bekkalkad, ag gikkiɗah bia paha nauhtteb ele amu, aɗinu ag ag baɗadtteb?

Aisaia 51:3

⌊Yawe Nug Abrahamnu anam heum⌋ amunu, genab Nug heeb, danab ag Sion eɗun bappaidppeg, ag Juda ag oolag mekku. Yo, Nug Sion nauhom antta heeb, danab ag Sion bappaidkkulag. Nug heeb, Juda wanppa aben laala atu taɗak beppig daatteb amu, aben amuam Iden dayom bia daaglag. Ao, Nug heeb, Juda wanppa aben wan meu waknu nakokib elele amu, ag am Yawenu dad bia daaglag. Danab ah ag Sion appa, Juda wanppa ele daaglag amu, ag oolag gamag ahebeb, ag, Yawe amegppa, “Ena hen mekkame,” doon anan, ahi ettaglag.

Aisaia 52:9

O Juda danab ah, ag aab nauhak daatte bia daatteb amu, Yawe Nug oo mak ag madakku. Ao, Yawe Nug ag laa eppelagppa dayaknu qagaiettakppanu eɗua uhuqak ha madakku. Anam amunu, ag laippun ahan, gamag ahaknu ele ahi ettalatteg!

Jon 14:16

Amu da Mamel oɗ medappi, Nug Ehanittak laa madakku. Nug ag ele hanhan daaglag.

Jon 14:18

Da ag nid laa, nug anig mameg ele mauhpiɗ, nukkanab daatte, da amubia ii uuadpa. Iitta. Da gumatte uɗikkul.

Jon 14:26

Amge ahilag Ehanittak, Kayak Ouɗi, da Mamel Nug da onilppa meeb uɗikku amu, Nug uɗia, keeke oh ippuanatta, da ag amelagppa aɗi ami amu Nug heeb, ag daulagppa dokku.

2 Korint 7:13

Kobol eleleib ahilagppa daatte anidmut, amu diig amuppa ig oo ɠagattag qettak doottem. Ig diig amunu oo ɠagattag qettak doottem, amge amuib iitta. Keeke laa ele daatte. Amuam ag oh Taitus ɠagattag qettaegeg, nug gamag ahom, ig amu anidta, amu ig amunu ele enanagnab doottem.

2 Korint 7:4

Da nai tutukku miag ag amelagppa attem, da ag tutukku oittemnu oolppa genabnab doottem. Da ahilagnu enanagnab doottem. Da oo ɠagattag qettak doottem. Uug kuɗum ihinigppa betteb, amge amu ohppa da maɗoɗppan gamag ahak huanak doottem.

Pilipai 1:14

Amu da lailad kuɗum, ag Naɗinu oolagppa genab dootteb ele, ag da hippalakppa daattemnu dabmeeg, ag oolag ɠagattag qette, ag oolagppa ɠagattag doon, baɗak iitta Kayak nai mehuqtteb.

1 Tesalonaika 4:18

Anam amunu, ag nai amuppa lailkad ele nug ɠagattag qeig!

1 Tesalonaika 5:11

Anam amunu, ag gemu hetteb amu, ag tuɗidna, anamib henana, akka akka nug ehanidna, nug oo ɠagattag qettak ele heig!

Hibru 12:12

Anam amunu ag danab nug eppegte, iitta nug gategte gai-iitta meum ɠagattag qedatte, amubia ag akka ɠagattag aqeg!