2 Korint 1:12 - Nobonob Baibel

¹² Aria, ig keeke laanu maɗoɗppan gamag ahak doottem. Ihinig ooppan oiyak ippunittaknu ulum am keeke amuam genab ippunigtte. Keeke amuam inam. Ig wanppa oimut, gemu ele oittem amu, ig Kayaknu oppiaawak kobol amu nuhig hambuppuak iitta kobol ele aot oimut. Ig danab dabmakppa ii hemut. Iitta. Ig Kayaknu ehanittak okkai hamu megatte, ig amuppa hetata amu, ig ag Korint daatteb oolagppa huana hemut.

2 Korint 1:12 ပူးပေါင်းရင်းမြစ်များ

2 Samuel 22:22

Aɗinu? Da Yawe oɗe dim lamidmi. Ao, da Kayak dahil dimettalom amu, da nau helom, amge da kobol eheɗ ii hemi.

Job 13:15

Da amu hekkulnu diig am inam. Kayak heeb, da mauhkkultai, amge anam bekkunulob, da Nug ehaniɗeb, da eɗuen ena daakkulnu dabmak aɗe daattem; da Nug amegppanab da dahilnu nai madippi, Nug dookku oolppa genab doottem.

Aisaia 38:3

“O Yawe, na dahil hak imu dabmekkutnu oɗ medattem. Da na noomppa oo metta ii uuak kobol dim lamitte oiyeye, da meul ohppa na dim lamidkkulnu heine oiyeye, da amenppa kobol aɗi aɗi am ena, da amu dim lamidmi.” Hesekaia nug anam unuqittowa, nug huana gayom.

Aposel 23:1

Pol nug noolagppa hibaitta dayaya, hettoɗiak okkai danab daappig amu oh neekkattatta, nug aum. “O lailad, da Kayak noobppa oolppan oiyak ippunittaknu ulum ippuniɗom bia oiiyi uɗie, gemu ele oittem,” awa aum.

Aposel 24:16

Amunu da hanhan deɗ oh da oolppa keeke eheɗ laa Kayak noobppa, danab ah amelagppa ele ii daamanu, da wagai mettem.

Rom 9:1

Da Kristusnu dayeye, da nai imu genabib madittem. Da ham-ii-bubuttem. Kayak Ouɗi Nug da oolppan oiyak ippunittaknu ulum gumeme, amuppa ele da ham-ii-bubuttem doottem.

1 Korint 1:17

Kristus Nug da danab layadkkulnu meiɗe ii uɗimi. Iitta. Da Nai Ena mehuqkkulnu he uɗimi. Amge da wan imuppan doyak danab nai maditteb bia, da nai ii mehuqmi. Am da nai anam, ag maditteb bia mehuqlom amu, Kristusnu ad emaitak am keeke hamu bia daalo amunu, da amubia ii hemi.

1 Korint 12:8

Kayak Ouɗi Nug danab laa dabmak ena laa ippunadkkunu ehah medatta, Kayak Ouɗi laippu amu, Nugib danab laa nug Kayaknu nai mehuqeb, danab ah tutukku dooglagnu ehah medatte.

1 Korint 15:10

Amge Kayak Nug da ehanittak okkai hamu meɗe, da gemu attem daattem amu ehanittak nuhig amuppa da aakku daattem. Nug da ehanittak okkai hamu meɗe amu, da ii kakidmi. Iitta. Da uɗat ɠagattag hei uɗie, gemu ele hettem. Totol danab laa ag da uɗat ɠagattag hettem bia ɠagattag ii hetteb, amge da dakka ii hettem. Iitta! Kayak Nug da ehanittak okkai hamu meɗe, da amuppa amu hettem.

1 Korint 2:13

Amunu ig nai imu mehuqttem ele, ig wan danab laanu doyak dabmak ena ele aot ii mehuqttem. Iitta! Kayak Ouɗi Nug ig ippunikke, ig nai imu mehuqttem. Kayak Ouɗi Nug ippunikke, ig danab Kayak Ouɗi ele ag amelagppa Kayaknu dabmak amu mehuqttem.

1 Korint 4:4

Da Naɗi noobppa da dahil ooppan oiyak ippunittaknu ulumppa da eheɗ hemi ii doottem, amge amu Naɗi noobppa da genabnab da beɗulppa aab iitta ii ippunigtte. Laa Nug da epeɗiltte am Naɗi, Nugib.

1 Korint 5:8

Amunu ig Pasowanu Hobulppa bret yis alag eleppa aib lamut. Yis amuam oo aeg bak kobol, am hipunin laa oh hak kobol ele. Ig Pasowanu Hobulppa bret yis iitta ele latu! Bret amuam kobol tutukku, kobol doyak diig genabibppanu ele ippunigtte.

2 Korint 1:17

Da anam hekkulnu ool maittom, amge anam ii beum amunu, da oɗelppa nai eɗuak eɗuak hamu madittemte? O da nai keeke hekkulnu attem amu da hamu naiibtai, wanppan danab nai atteb amubia amu da, “Ao,” o “Iitta,” hamu madittemte? Anam iittanab. Da nai oh genabib attem.

2 Korint 11:3

Amge da baɗattem. Mat nug lokkumakppa kobol kobol hekkunu doya auta awak kobol nuhigppa anukka Ewa bubuitte na qeum amu, amubia kobol anam laa ahilagppa ba eeɗatteb, ag oppiak kobolppa dayaknu ib apiɗidna, ag Kristusnuib daaglagnu daatteb ii dabmemananu ool baɗatte.

2 Korint 2:17

Danab kuɗum laa ag oinna, Kayak naippa men doɗonu uɗat hetteb ele amu, ig amubia ii hettem. Iitta. Ig Kristusnu daatta, maɗi nid Kayak maatte gotteb bia, ig oonig oppiaawak eleppa Kayak noobppa nai amu mehuqttem.

2 Korint 4:2

Iitta. Ig kobol uɗa nak ele, laa lokkumakppa hetteb amu, ig kobol amu dimettota, hambuppuak kobolppa ele ig ii oittem. Am ig Kayak nainu ele amu ig baolita ii hettem. Iitta. Ig Nai Ena tutukku miag mehuqttem, amu amuppa ig danab oh ig am aun ippuanadttem. Ig amu heut, ag ig Kayaknu neekkakppa attem daattem oolagppa dooglagnu elele.

2 Korint 8:8

Da ami amuppa amu, da ag ɗo ii madattem. Iitta. Amge da danab laala ag uɗat pehettak hetteb ele andette, ag Korint ag aɗi heppeg ele anttena, da ahilag oo mauhak am keeke hamutai o iitta keeke genab eletai dookkul.

Galesia 6:4

Danab oh ag anen anen ahilag uɗat melemel mettan epeɗieg! Ag anam hena amu, ag ena hettebte o eheɗte hetteb dooglag. Danab nug anam hette amu, nug nukka nuhig kobolnu gamag ahakku. Nug danab laanu kobol amu nuhig kobol ele melemel ma aib epeɗiom.

Epesus 6:14

Ag ⌊Kristen anen anen, ag⌋ ɠagattag daaglagnu ag imu heig! Ag doyak diig genabib, matagiɗ imualagppa tagatteb, amubia takkeg! Ag genab tutukku hak kobol aona, qahaɗ palatteb bia ag momolag heppeg nauhmananu paleg!

Pilipai 1:10

Amunu diig am, ag amuppa geha kobol atten am enanagnab daatte epeɗidkkulagnu elele daaglag. Ag anam heppeg ukkeb ukkeb, Kristusnu deɗppa ag oppiak, Kayaknu neekkakppa danab oolagppa kaliak laa iitta ele daaglag.

1 Tesalonaika 2:10

Ag Tesalonaika daatteb ag oh ihinig hak ag oolagppa hemut, ag anidna, ihinig aɗi heehe anttomnu mattiak danab daatteb; Kayak ele anam daatte. Ig ag oolagppa genab dooppig ele, ig ag oolagppa oitta, ig oppiaawak daatta, genab tutukku hak kobol hetata, oonigppa kaliak laa iitta ele oimut.

1 Timoti 1:5

Da danab oh ag Jesusnu oolagppa genab dootteb ele, da ag oolagppa oo mauhak amba dayeb oiglagnu, da diig amunu haknunab anak amu madattem. Oo mauhak amunu amu, am danab oolkad oppiak ele, ahilkad ooppan oiyak ippunittaknu ulum eheɗ laa heppig ii ippunadtte, amu ag Kayaknu ooppa genab doyak genab doonna oitteb, oo mauhak amuam danab ag oolkad amubia daatte, am ahilagppanu ba gotte.

Taitus 2:7

Na amu, na aɗi hettemppa na ag ippulag enaib ippunadnana, tutukku he! Amu laa ag nahip nai tabappeg nekkunu hetteb ele, ag ihinignu nai eheɗ laa mattiglagnu ib iitta anidkkulag amunu, ag ⌊anam heppignu⌋ uɗa nak dooglagnu na ippunattak nai nahip-ppa na danab dabmak oiyak nuhig ele am tutukkuib, na danab nug nuhig uɗatnu am keeke meu ele, hamu iitta dootte, amu na danab nug nai genab ena ele, danab ag nai amunu nai nau anaknu elele iitta maditte, na danab anam daan ippunadna, ippunittak nai nahip mattie!

Hibru 13:18

Ihinkad ooppan oiyak ippunittaknu ulum am Kayaknu neekkakppa ig beɗunigppa aab iitta ippunigtte oonigppa genab doottem, ig haen oh tutukkuib oignignu oonig daatte amunu, ag Kayak ig ehanigkkunu unuqitteg!

Jems 4:6

Anam daatte amunu, Kayak Nug ehanittak okkai hamu mettak, Nug amu megatte. Diig amunu Kayak naippa, nai inam daatte. “Kayak Nug dada danab ippulag oo nette, amge danab ag akka onilag qeeg nette ele, Nug ahilagnu ii helo bia me, Nug ag ehanadtte.”

Josua 24:14

Amu Josua nug nai amu mattiowa, nug tuɗitta aum. “Gemu amu, ag Yawenu ebehilag oh bodoetta le meeb, ag Nug waappa daan, Nug oɗe dim lamidkkulagnu oo metta ii uuak kobol tutukkuppa heig! Ag mamelkad aɗi Yupretis le laih appa, Isip wanppa ele kayak hambuppuak noolagppa dup nona binalag meppig ele amu, ag kayak hambuppuak amu oh agappeg goppeg, ag Yawe, Nugib waappa daan, Nug oɗe dim lamitteg!

1 Pita 3:16

amge na oo bodoettak kobol, na laanu ena elele doyak kobol ele dim lamidna, anam he! Danab laa ag na Kristusnu daanna, hak ena hettem anidna, ag baeg qak nai nahipnu maditteb amu, ag amunu uɗalag nekkunu na beɗunppa aab iitta eleppa henan oikkut.

1 Pita 3:21

Aria, ag gemu daatteb amu, ag am Noa aɗi, ag aɗi keeke ippunigtteb bia daatteb. Ag ele leppa ehanittak aotteb. Amuam layattak, amge layattak am beɗunigppanu dubuttid ihaknu keeke iitta. Iitta. Layattakppa ⌊ag oolag eɗueb,⌋ ahilkad ooppan oiyak ippunittaknu ulum am ag oolagppa eheɗ laa ii daatte ippunatte, ag amuppa Kayak oɗe genab dim lamidkkulagnu Nug amegppa ahilag nai ɠagattag qettan maditteb. Amunu diig am Jesus Kristus, Nug mauhakppanu eɗua hibaittom.