1 Samuel 7:1 - Nobonob Baibel

¹ Bet Simes danab ag nai amu meeg ukke, Kiriat Jearim danab ag uɗin, Yawenu Tituanak Nainu Kunup aon gona, Kiriat Jearim ted onig Abinadab, nug laugppa meppig. Abinadab nug Kiriat Jearim appa, qauko nakok igippa dayom. Amu ag Tituanak Nainu Kunup aon gona, nug laugppa meeg dayeye, ag Abinadab bekka Eleasar, nug Yawenu tituana mettak dayaya, ag nug nainu kunup atognokkunu otieg, nug Kayak noobppa uɗat amu hekkunu dayom.

1 Samuel 7:1 ပူးပေါင်းရင်းမြစ်များ

1 Stori 13:3

Ig apput, ag uɗippeg, ig gota, ihinig Kayaknu Tituanak Nainu Kunup aot uɗignig. Aɗinu? Saul king dayeye, haen amuppa amu, ig Israel, ig Kayaknu Tituanak Nainu Kunupnu ii dabmeut, hamu dayom,” awa aum.

Sam 132:6

Antte! Ig Eprata appa daatta amu, ig Tituanak Nainu Kunupnu nai laa doomut. Ao, ig doota, ig mattit gota, Kiriat Jearim guguittak appa anidmut.

Aisaia 52:11

⌊Haen amuppa amu, Juda danab ah, ag nai imu dooglag.⌋ Ag ahan, ⌊Babilon⌋ uun ukkeg! Ge, ag ahan, ⌊Babilonnu⌋ ukkeg! Ag ahan gonana, ag keeke Kayaknu neekkakppa dubuttid ele aib aɗappig! Ao, ag laa, ag Yawenu tappiɗ keeke, ag keeke amu maon oitteb ele amu, ag ahan, Babilon uun, ag oppiak ele dayeg!

Josua 18:14

Appanu amu, tom am laih yau uɗitteppanu ukka, qauko nakok amu heqo laih qaban uɗitteppanu, appa ukka, Kiriat Bal appa batom. Kiriat Bal, onig laa am Kiriat Jearim, amuam aab laa Israel dilag huu okkai Juda dilag. Amuam Israel dilag huu okkai Benyamin dilag qaban uɗitteppanu tom aakku.

Josua 9:17

Israel ag amu doon, ag laippun bappaidna gona, ag deɗ ewamppa Gibeon dilag aab okkai laala, amu italkkulagnu amuppa teppig. Aab okkai amu onilkad amu, Gibeon, Kepira, Berot, amu Kiriat Jearim ele.

1 Samuel 6:21

Ag anam anana amu, ag nai meeg, Israel dilag aab laa onig Kiriat Jearim, ag danab appa daappig ele, ag nai meeg, ahilagppa ukkom. Ag nai meeg ukke, ag appig. “Pilistia danab ag heeg, Yawenu Tituanak Nainu Kunup eɗua, ihinigppa uɗiom amunu, ag ahan uɗin, ag maon ahilagppa ukkeg!” aon appig.

1 Samuel 7:2

Kiriat Jearim danab ag amu oh hena malaeg, Yawenu Tituanak Nainu Kunup appa haen elab, maɗ 20 dayom. Amu Israel danab ag eɗun Yawe dim lamidkkulagnu dabmenan, mahippig.