1 Samuel 6:3 - Nobonob Baibel

³ Ag anam oɗ mattaeg amu, Pilistia dilag mana mettak danab, keeke doyaknu eman hak danab ele ag appig. “Ag Israel dilag Kayaknu Tituanak Nainu Kunup meppeg, nug eɗua nuhig abenppa gokkunu hekkulagnu hetteb dayeb amu, ag hamu aib meppeg ukkom. Iitta! Ag keeke laa, eheɗ haknu ofa daakkunu ele meppeg ukkaɗ! Ag anam heppeg amu, Kayak Nug heeb, ag eɗun ena daaglagtai. Ena daaglag dayeb amu, amuppa ag genab dooglag, Yawenu Tituanak Nainu Kunup ippa dayom amunu, Nug he, uug okkainab aqom,” aon appig.

1 Samuel 6:3 ပူးပေါင်းရင်းမြစ်များ

Job 10:2

Da Kayak amegppa akkul. ‘Na diig lokkumakppanu da amelppa, na eheɗ heme, ii amananu oɗ medattem. Ao, na da eheɗ hemi akkutnu daatte dayeb amu, na da hipunin atten atten hemi appe dookkulnu unuqidttem.

Eksodas 23:15

Hobul amu laa am Bret Yis Iitta Lanaknu Hobul Nakok. Ag hobul amu gamag ahak ele hena, da ag Israel amelagppa haknunab ami, amubia ag bret yis iitta deɗ ebqak eblaih aɗit ele lakkulag. Da ag amu hekkulagnu haen tituanmippa hekkulag. Da haen tituanmi am kalam onig Abib, kalam amuppa ag Israel ag Isip uun uɗippig amunu, ag kalam amuppa hobul amu heig! Ag amu henana, ag ɗo hamu mettak dahilnu aon uɗiglagoitte. Ag hamu aib uɗippig.

Eksodas 34:20

Ag donki ⌊gaiɗ⌋ tatamnu qagaiettakppanu eɗua uhuqak dayaknu hekkulagnu, ag sipsip nag laa aon main, Kayak mettaglag, amge ag amu hekkulagnu uuglag dayeb amu, ag donki ⌊gaiɗ⌋ amu duug qiippeg mauhkku. Anam amge, ahilkad nid danab tatamnu amu, ag tituanakppanu eɗua uhuqak hekkulagoitte. ⌊Amu oh dahilad daatteb amunu,⌋ laa nug dahil mettid lakka, da noolppa eppeg hamu aib uɗiom.

Eksodas 8:15

Yawe Nug anam he, og amu mauhna iitta meeg, haen ena daye, Paro nug amu antta, Yawe aumbia, nug he, nuhig dabmak ɠagattag eppom. Nug Moses, Aron ele nai apiɗ amu doya, dab-ii-meum.

Lewitikas 5:6

Nug nuhig hipunin miag uhuqowa, nug hipunin amu heum, amunu nug sipsip balatte, o meeme balatte laa awa, Yawe toppa wakkuoitte. Amuam nuhig ib etta hipunin haknu ofa aakku. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele medakku.

Lewitikas 6:6

Nug eheɗ haknu ofa amu awa doa, mana mettak danab medakkuoitte. Nug mana mettak danab medatta, nug aakku Yawe medatte. Doɗ amuam sipsip dawai, amu nug beɗuppa eheɗ laa iitta ele daakku; doɗ amu nug doɗ ena laa silwappa daden metteb, am nuhig noob am, amubia daakkuoitte.

Duteronomi 16:16

Maɗ anen anenppa haen ewam ag Israel danab oh, ag Yawe, ahilag Kayak, ag aben Nug epeɗikkuppa Nug noobppa dup nona binag mekkulagnu, ag Nug amegppa uɗieg! Ag amu hobul gamag ahak ele ewamppa hekkulagoitte. Hobul dayak ewam amuam Bret Yis Iitta Lanaknu Hobul Nakok, Ee Tatam Oɗue Digma Awaknu Hobul, amu Pehppa Dayaknu Hobul ele. Ag Yawe, ahilag Kayak, ag Nug aben epeɗikku, amuppa haen anen anen amu ohppa Nug noobppa miag atiglag, ag ɗo hamu mettak Yawenu aon wakkulagoitte. Ag hamu aib goppig.

1 Samuel 5:11

Ag anam appig amunu, ag heeg, Pilistia danab okkai laa oh ag uɗin qagmeeg, ag ag amelagppa appig. “Ag heppeg, laa ag Israel dilag Kayaknu Tituanak Nainu Kunup imu maon ukkeg! Nug eɗua, nuhig abenppa ukkaɗ! Anam iitta amu, Nug heeb, ig oh mauhkkunig,” aon appig. Ag amu appignu diig am, Kayak Nug bu okkainab matta he, ag oolagppanu danab ah kuɗum ag mauhppig amunu, aab okkai amunu danab ah ag eheɗ baɗappig.

1 Samuel 5:7

Uug amu anam be, haen Asdot danab ag amu anidna, ag akka akka appig. “Israel dilag Kayak Nug he, uug imu oh ihinigppa baaba, Dagon, ihinig kayak, nuhigppa ele bette amunu, Kayaknu Tituanak Nainu Kunup nug ippa iinab daama!” aon appig.

1 Samuel 5:9

Ag maon goppig, amge ag appa meppig dimppa amu, Yawe he, uug okkainab danab appanu ele, uug amu ahilagppa ele be, ag eheɗ baɗappig. Yawe he, aab okkai amunu danab ah bau, kaino ele, ag beɗulkadppa mamattin nau beum.

1 Samuel 6:8

Ag anam awona, ag tuɗidna appig. “Ag nakuɗ diiatna, aɗppa maatppeg daapepeɗ, ag Yawenu Tituanak Nainu Kunup uɗatnu karis attan meig! Aria, ag keeke dottog golppa heppig ele, keeke amuam eheɗ haknu ofa bia, ag Yawe mettaglag amu, ag dottog amu aon, kunup nakok laappa inan, ag kunup amu Yawenu Tituanak Nainu Kunup heqo laih mewona, ag heppeg, makau ag uɗatnu karis amu eeɗpeɗ, Yawenu Tituanak Nainu Kunup am eɗua ukkaɗ!

1 Samuel 6:9

Ag amu heppeg, makau aɗit amu aa uɗatnu karis Yawenu Tituanak Nainu Kunup ele, aa uɗatnu karis amu eeɗya, Yawenu Tituanak Nainu Kunup Israel wanppa, aab Betsemes appa tutukku gokkulahnu Betsemes gukkuidya gokkulah dayeb amu, amuppa ag dooglag, Yawe Nug he, uug naunab imu oh ihinigppa beum. Amge makau aa uɗatnu karis, Yawenu Tituanak Nainu Kunup ele appa tutukku aoya ii gokkulah dayeb amu, amuppa ig doognig: uug ihinigppa beum ele amu, amuam Yawe eppegppanu iitta. Uug amu oh ihinigppa hamu beum doognig,” aon appig.