1 Samuel 25:26 - Nobonob Baibel

²⁶ Amu O naɗi, Yawe Nug nahip ib oo ne, na nakka, na eppenppa laa nob nau ii mettan qee mauhom amu, Yawe Nug genab bau daatte, na ele genab bau daattem, genab amubia Yawe Nug heeb, nahip kekeɗ laa oh ag eheɗ heidkkulagnu hetteb ele amu, ag Nabal, ⌊gemu laa dilag neekkakppa nauib daatte,⌋ ag anamib daaglagnu ool daatte.

1 Samuel 25:26 ပူးပေါင်းရင်းမြစ်များ

Genesis 20:6

Abimelek anam a amu, Kayak Nug tulppa eɗua, nug amegppa aum. “Da doottem, na keeke imu heme, amge na doonna ii hee, na beɗunppa aab iitta amunu, da hei, na dahilppa hipunin ii heme. Da hei, na nug ele ii oipiɗ.

2 Samuel 18:32

Nug anam a, king nug oɗ mettom. “Ge, nid bau Apsalom, nug ena daattete?” awa oɗ mettom. Nug oɗ mette, Kus danab nug aum. “Na dahil naɗi, dahil king, nahipad kekeɗ laa oh ag na eheɗ heidkkulagnu ahaglag ele amu, ag oh nid bau amubia daaglagnu ool daatte,” awa aum.

2 King 2:2

Aa digmeya goyaya, Elaiya nug Elisa amegppa aum. “Na inam daye! Aɗinu? Yawe Nug da Betel gokkulnu aum,” awa aum. Nug anam aum, amge Elisa nug aha, inam amegppa aum. “Yawe Nug genab bau daatte, na ele genab bau daattem, genab amubia, da na ii uuidpa,” awa aum. Awa a, aakku aa oh Betel gopiɗ.

2 King 4:6

Haen nippud oh goɗen inan malanna, ah nug bekka laa amegppa aum. “Nippud laa aon dona meɗe!” awa aum. Amge bekka nug aum. “Anai, nippud laa ii daatte. Oh goɗen ele ambeppig,” awa aum. Anam a amu, goɗen baula nippud amu ooppanu ii neum. Iitta.

Sam 44:3

Amu ag akka, ahilag qep elabppa wan amu ii aoppig. Ge, ag akka ag ahilag ɠagattagppa, kekeɗ wan amuppa daappig ele ii eɗadppig. Amu iitta. Na ahilagnu oo mauhak doome amunu, na ag ele hanhan daan hena, nahip ɠagattag amuppa ehanatte, ag kekeɗ eɗadppig.

Prowerb 31:12

Ah diig enanag anam nug bau daatte, haen amu ohppa; nug gamu enaib hedatte, nuhigppa eheɗ laa ii hette.

Jeremaia 29:22

Danab aɗit amu aa Israel oolagppa eheɗ nau hepiɗ, gemu ele hettep amu, da doottem. Da anat-ttem. Aa mudippan lailti dilag ah ele ewau pakkua gappai heya, aa hambuppuak nai da ii matami, da aa mattiglahnu ii ami amu, aa nai amu mattiya, da ippuanatmi attep amunu, aa eheɗ hak ahilah, diig amunu qinob aa nob naunab aopeɗ, Juda danab ah oh ag Babilon wanppa diia ukka laih me dayak danab ah daatteb, ag laanu nug eheɗ laa awaknu anak waappa daakkunu akkulagnu hekkulag amu, ag inam akkulag. ‘Babilon dilag king nug Sedekaia, amu Ahap ele aab aɗuppa manate mauhpiɗ, amubia Yawe Nug heeb, nahip-ppa baɗ!’ aon akkulag.” Yawe Nug anam awa atte.

Daniel 4:19

King Nebukatnesar nug Daniel, onig laa Beltesasar, nug amegppa anam a, Daniel nug dabmak huan awe, nuhig dabmak he, nug eheɗ baɗe, king nug amu antta, Daniel amegppa aum. “Beltesasar, tul niiak dahil amunu, meu ele aib heeb baɗame,” awa aum. Nug anam a, Daniel nug eɗua, nob ma aum. “O dahil naɗi, tul niiak amuam nahip kekeɗ dilag ippuniglo am ena. Ge! Tul niiak amunu meu am laa ag na eheɗ heidkkulagnu hetteb dilag daalo am ena.

Hibru 10:30

Aɗinu am anam daakku? Ig Kayak Nug inam aum doottem. “Eheɗ haknu nob tutukku eɗua mettak uɗat am dahil. Da geha aun aɗi ag eheɗ hetteb amu, da nob nau madakkul,” awa aum. Amu Nug nai inam ele aum. “Naɗi Nug nuhikkud danab ah epeɗiadkku,” awa aum.

1 Samuel 1:26

⌊Eli nug Hana ii doyom amunu,⌋ Hana nug amegppa aum. “O naɗi dahil, anukka ah laa nug uɗia, na heqon laihppa dayaya, Yawe unuqittom ele amu, ah amu am da iikkuib. Am ah laa iitta. Na genab bau daattem, genab amubia amu da am ah amu iikkuib.

1 Samuel 2:9

Yawe Nug nuhikkud danab ah ag nuhignu oo metta ii uuak kobol dim lamidtteb ele am atognoadtte. Ao, Nug he, nau hak danab ag gatatu ooppa daanna mauhtteb. Aɗinu? Danab ag akka, ag ahilag ɠagattagppa ena ii daatteb.

1 Samuel 20:16

Jonatan nug anam awowa, nug Dawit amegppa a, aa haen amuppa nug tituanak bau laa heya, Jonatan nug aum. “Yawe Nug Dawitnu kekeɗ oh heeb nauhkkulagnu ool daatte,” awa aum.

1 Samuel 20:3

Jonatan anam aum, amge Dawit nug nuhig nai ɠagattag qetta, nug nob ma amegppa aum. “Na mamen nug na dahilnu ena doottem dootte amunu, nug inam dabmette. ‘Jonatan nug da Dawit qeppi mauhkkunu hettem doya amu, nug ooppa guittak naunab dookku. Nug anam dookku amunu, nug aib amu doyom!’ Nuhig dabmak anam daatte amunu, nug da iweb mauhkkulnu hette amu, dabmak amuam nuhigppaib lokkumak daatte. Nug amu hette am, na nuhig dabmak amu ii doottem, amge Yawe genab bau daatte, na ele genab bau daattem, genab amubia na mamen nug da iweb mauhkkulnu hette; dahil mauhak amu miagnab daatte,” awa aum.

1 Samuel 22:3

Danab ag ukkaeg, Dawit ele daanna, Dawit nug aha, mameg, anig ele diiate, ag Mispa goppig. Aab amuam Moap wanppa dayom. Nug omalate gona, Moap wanppa tena, amu Dawit nug Moap dilag king amegppa inam aum. “Mama, anai ele, aa ena na ele daappeg ukkeb, haen Kayak Nug dabmak nuhig dahilnu heeb, miag bekku batakku am elelete, o iittate?” awa aum.

1 Samuel 25:25

O naɗi, da na oɗ medattem; na Nabal, nug am danab nau amu, na nai nug mettom am aib dabmeme. Aɗinu? Nug onignu diig eɗuak amu inam, ‘Danab nug Kayak dab-ii-maama ii dim lamidtte ele.’ Nug onig eɗuak am anam, amu eɗuak amuam genab, nug am danab anam ele aakku. Kobol nuhig ele amu, am anamib. Amge dahilnu amu, da na, dahil naɗi, da nahipad danab na ag amelagppa ae, ag ig gumigna goppig amu, da, da maɗi ah nahip, da danab amu da ag ii anadmi.

1 Samuel 25:39

Nabal mauhe amu, danab laa nug amunu Dawit amegppa a, Dawit nug aum. “Nabal nug dahilnu eheɗ heum, nug dahilnu am keeke hamunab doyaya heum, amge nob mettak nau Nabal nug heumnu amu, Yawe Nug da ehaniɗa, eɗua awa, Nabal mettom amunu, ig Yawe onig humapput, attan taɗ! Yawe Nug nuhig ehanittakppa da ehaniɗe, nob mettak nau eɗuen awen, Nabal medakkulnu ii hemi. Yawe nug Nabalnu eheɗ hak antta awa, eɗua Nabal mettom.” Dawit nug anam aum. Dawit anam awowa, dimppa amu nug nuhikkud maɗi nid laala maatte, ag Abigel gumidna gona, oɗ medappeg, nug uɗia, geha nug Dawit wau daakkunu goppig.

1 Samuel 26:10

Dawit nug anam awowa, nug baula tuɗitta aum. ⌊“I nug ii qepuɗ mauhma.⌋ Amu Yawe Nug genab bau daatte, genab amubia Yawe Nug geha nob nau Saul medakku. Ao, geha Saulnu haen maleb, nug mauhkku, o iitta geha nug ban heebeb, laa nug geha qeeb mauhkku,