1 Samuel 25:17 - Nobonob Baibel

¹⁷ Ag anam heppig, amge ihinig danab okkai, nug am danab nau, laa nug ele nai mattiglahnu elele iitta, gemu nug kobol nau he, nug, nug baegppan ele, ig oh aakku naunab aognignu miag daattem. Ig nauhmut miag daattem amunu, na geha keeke amu ohnu na dabmekkutnu ool daatte. Na dabmena, na keeke aɗi hekkutnu elele amu, na hekkut.” Danab amu nug Abigel amegppa anam aum.

1 Samuel 25:17 ပူးပေါင်းရင်းမြစ်များ

2 Samuel 24:13

Yawe Nug Gad amegppa anam aum amunu, Gad nug aha, Dawit toppa ukka, amegppa aum. “Yawe Nug da amelppa uug imu imutai laa bekkunu aum amunu, maɗ ewam Israel wanppa enug haen daakkutai, o iitta ahilkad kekeɗ ag kalam ewam ag Israel eɗadna lamadkkulagtai, o iitta oɗe nau danab kuɗum aqe mauhtteb am deɗ ewam Israel wan ooppa daya heeb, danab ah mauhkkulagtai? Na dabmak aona, na appe, da nahip dabmak laa meiɗe uɗimi ele amegppa appi dookku,” awa aum.

1 King 21:10

Dayebeb, aria ag danab nau aɗit laa, Nabot daakku, amu guguittak maatppeg daayya, aa Nabot nug Kayak, king ele aa eheɗ laa awaknu anak waappa daaglahnu aum, amu Nabot beɗuppa yaapeɗ, ag doon, dimppa Nabot aon, aab okkai dimittim gona, menppa makkuɗppeg mauhaɗ!” Nug uɗugppa anam yom.

1 King 21:13

Meeg dayeye amu, ⌊ag⌋ danab nau aɗit ⌊aeg dooya,⌋ Nabot dayom gukkuidya goya, heɗep neya daayya, aa danab ah oh daaegeg noolagppa daayya, aa Nabot nug Kayak, amu king ele aa eheɗ laa awaknu anak waappa daaglahnu aum apiɗ. Ayaya, Nabot beɗuppa yaapiɗ. Amu danab ah nai amu doon, ag ahan, Nabot aɗan, aon aab okkai dimittim gona, menppa makkuɗeg mauhom.

2 Stori 13:7

Jeroboam nug anam he, dimppa danab nau ag nug ɠagattag mettanna, ag nug ele hena, Solomon bekka Rehoboam nug danabnab ii daya, nug king abenabppa ta, king dayom, amge nug king haen elab dayayate, nug king daakkunu dabmak elele aolo, amge anam iitta, haen nug bau king beum, haen amuppa Jeroboam nug laikkud ele ag uɗin, nug aɗi aɗi hekkunu nug amegppa aeg, nug ahilag nai qeeb nekkunu ɠagattag elele iitta.

2 Stori 25:16

Propet nug anam mattieye, nai nuhignu mattiom am gog ii teum, amge King Amasaia nug aha, nuhignu nai am okkula, nug amegppa aum. “Da am king, amu ig na da ulum meɗak danab daakkutnu tituanidmutte? Uue! Na ii uukkut dayeb amu, da appi, na mauhkkut,” awa aum. Amasaia nug anam a, propet nug mattiak uuom, amge nug tatam nai tutu laa mattia, inam aum. “Na tatam eheɗ heme, gemu na dahil ulum mettak nai dookkutnu uume amunu, da doottem, Kayak Nug nuhig dabmak na nitteb mauhkkutnu ɠagattag eppom daatte,” awa aum.

Esta 7:7

Esta anam a, king nug oppoɗi be ameg kokoɗ eppe, nug hibaitta, nuhig lag enanagnab guguittak dad dayom amu, nug amuppa ukkom. Amge Haman nug dayom. Aɗinu? Nug king geha nug qeeb mauhkku doya, nug Kuin Esta unuqeb, nug ab ehanidkkunu dayom.

Prowerb 12:8

Danab ag laa nug doyak dabmak ena ele, ag nug binag metteb; amge danab nug dabmak kaliaknu kobol hette, laa nuhignu ena iinab dootteb.

Ikki Danab 19:22

Ag daanna, gamag ahak doon, nug gamag aon heegeg amu, nau hak danab laa aab okkai amuppanu, ag lag eidna talilidna daanna, ag digmena od huanaknab qeqalnana, danab kaino, lag amu mameg, ag nug onigppa eppig. “Na danab uɗie, na ele daattep aon doppe, ig nug ele gappai aotu!” anana eppig.

1 Samuel 10:27

Amge hib guitta danab laa ag appig. “Saul nug attem heeb, ig ehanittak aognig? Nug elele iitta!” aon appig. Ag Saulnu ena iinab dooppig amunu, ag amu mattinna, ag ɗo ii medappig. Ag anam heppig, amge Saul nug ag amelagppa nai laa ii mattiom.

1 Samuel 2:12

Elkana, Hana ele aa goya aabppa daaeheh, Samuel nug Eli ele Silo appa daapiɗ. Aa anam daaeheh, Eli bekoɗ, aa onilah am Hopni, Pinias ele, aa mana mettak uɗat hepiɗ, amge aa am danab nau; aa Yawenu, “Nug am keeke hamu,” doopiɗ.

1 Samuel 20:7

Na geha mamen amegppa anam appe amu, nug, ‘Am ena, da nai iitta,’ akku dayeb amu, da, nahip maɗi nid, da am geha ena daakkul. Amge nug doya, nug amunu oo nauheb, na miag tutukku dookkut; na mamen nug da eheɗ heiɗkkunu dabmak awe ɠagattag eppom daatte.

1 Samuel 20:9

Dawit anam a amu, Jonatan nug nob ma amegppa aum. “Na aib anam dabmeme! Aɗinu? Da mamel nug na eheɗ heidkkunu dabmak aɗe ɠagattag eppom daalo, da amu nakok doolom amu, da na amenppa iite alom?” awa aum.

1 Samuel 25:16

Amun tuqan ele haen ig ag gukkuadta oita, sipsip gumadtat oitut, danab amu ag am ihinig aɗ ɠagattag ig taliligna daappig.

1 Samuel 25:18

Danab amu nug Abigel amegppa anam mattie, Abigel doya, nug paha aha, bret kunum 200 diia, wain doɗ gaɗappa inak aɗit, sipsip manak tanig ele, 20 kilogram ee aeg manik, grep meu qaɗaiettak batappatak 100, ad fig meu qaɗaiettak batappatak 200 ele, nug ee amu oh diia qagma, donki laala attan maattom.

1 Samuel 25:25

O naɗi, da na oɗ medattem; na Nabal, nug am danab nau amu, na nai nug mettom am aib dabmeme. Aɗinu? Nug onignu diig eɗuak amu inam, ‘Danab nug Kayak dab-ii-maama ii dim lamidtte ele.’ Nug onig eɗuak am anam, amu eɗuak amuam genab, nug am danab anam ele aakku. Kobol nuhig ele amu, am anamib. Amge dahilnu amu, da na, dahil naɗi, da nahipad danab na ag amelagppa ae, ag ig gumigna goppig amu, da, da maɗi ah nahip, da danab amu da ag ii anadmi.