1 Samuel 24:15 - Nobonob Baibel

¹⁵ Yawe Nug i oh ihinihnu nai doya mala, hettoɗia epeɗieb, da eheɗ laa ii hemi miag atikkunu ool daatte. Nug na eheɗ dahilppa heme bappaidkkunu ele ool daatte, amge da nahip-ppa eheɗ laa ii hepa.” Dawit nug Saul amegppa anam aum.

1 Samuel 24:15 ပူးပေါင်းရင်းမြစ်များ

2 Stori 24:22

King Joas nug Sekaraia mameg Jehoiada nug nuhignu ena heum ii dabmeum. Iitta. Nug danab nuhignu ena heumnu bekka aakku qe mauhom. Nug anam he, Sekaraia nug mauhaha, nug aum. “Yawe Nug nahip hak imu antta, Nug heeb, nahip hak nau imunu bu mettak nahip-ppa bekkunu ool daatte,” awa aum.

Sam 119:154

Danab ah ag da eheɗ nau hemi anan, da mauhkkulnu atteb, amge na heppe, ag hambuppuak madittebnu miag atikkunu, na da qagaiettakppanu eɗua uhuqak hena meɗakkutnu oɗ medattem. Ao, na da bau daakkulnu nai ame amu, na amu hekkutnu unuqidttem.

Sam 35:1

O Yawe, na laa ag da ele mehqak hettem ele amu, na ag ele nug mehqak hekkulagnu oɗ medattem. Yo, na laa ag da ele ban hettem amu, na ag ele ban hekkulagnu unuqidttem.

Sam 43:1

O Kayak, na heppe, tutukku hak dahil miag atikkunu ool daatte. Ao, danab ag nahipnu oo metta ii uuak kobol ii dim lamidtteb amu, ag da naippa meiɗppeg, na dahilppa daanna, ahilag nai qeppe nekkunu oɗ medattem. Ge, haen danab nau, ag hambuppuak danab, ag da heiɗppeg nauhkkulnu heppeg amu, na ehaniɗppe, da ag eppelagppa, qagaiettak amuppa ii daapanu unuqidttem.

Maika 1:2

Naɗi Yawe, Nug ⌊Israel⌋ ag eheɗ heppignu ab dooglagnu, Naɗi Nug nuhig mettid lag nuhignu tituanak daatte, Nug appanu ⌊Israel ag eheɗ heppig⌋ ab ag dooglagnu, ag danab ah wan ohppa daatteb, ag doyeg! Ao, ag danab ah ag laih laih ohppa daatteb amu, ag oh daulag humeg!

Maika 7:9

Ig Yawe noobppa hipunin hemut amunu, ig nuhig bu mekkak aottem. Ig bu mekkak amu aopput ukkeb, Yawe Nug eɗua ehanikkebeb, haen amuppa iitta mekku. Iitta meeb, ig eɗut, ena daagnig. Ao, haen amuppa Nug heeb, ig eɗut amahlakppa daagnig. Haen amuppa amu ig eɗut, Yawe Nug genab tutukku daatte, anam ele hette amu, ig amu anidkkunig.

Ikki Danab 11:27

Da nahip-ppa hipunin laa ii qemi. Me, na dahilppa eheɗ hena, da niɗakkutnu banel uɗin hena hettem. Uuppe, Yawe, Nug epeɗiak danab okkai daatte amu, Nug gemu ig Israelte ena hettem, o ag Amonte ena hetteb, Nug amu epeɗitaɗ!” awa aum.

1 Samuel 17:43

Nug anam dabmeum amunu, nug Dawit amegppa aum. “Da am qai laate amunu, na ad amuppa da oiɗkkutnu uɗime?” awa aum. Nug anam awowa, nug nuhig kayak hambuppuak onilagppa Dawit nug eheɗ laa awaknu anak waappa daakkunu aum.

1 Samuel 24:12

Am Yawe Nug geha kobol dahil, amu nahip kobol ele awa, i oonihppa aun nug eheɗ hette anidkkunu i oh hettoɗitkkunu ool daatte. ⌊Nug anam ha, nug geha anidkku, da eheɗ ii hemi⌋, amu geha Nugib na eheɗ hemenu nob tutukku medakkunu ool daatte, amge da am, da keeke eheɗ laa nahip-ppa ii hepa.

1 Samuel 25:39

Nabal mauhe amu, danab laa nug amunu Dawit amegppa a, Dawit nug aum. “Nabal nug dahilnu eheɗ heum, nug dahilnu am keeke hamunab doyaya heum, amge nob mettak nau Nabal nug heumnu amu, Yawe Nug da ehaniɗa, eɗua awa, Nabal mettom amunu, ig Yawe onig humapput, attan taɗ! Yawe Nug nuhig ehanittakppa da ehaniɗe, nob mettak nau eɗuen awen, Nabal medakkulnu ii hemi. Yawe nug Nabalnu eheɗ hak antta awa, eɗua Nabal mettom.” Dawit nug anam aum. Dawit anam awowa, dimppa amu nug nuhikkud maɗi nid laala maatte, ag Abigel gumidna gona, oɗ medappeg, nug uɗia, geha nug Dawit wau daakkunu goppig.

1 Samuel 26:20

Amu da wan laappa mauhe, Yawenu wanppa ii mauhkkul dayeb amu, amuam nau, ena iitta amunu, na heppe, da mauhpanu oɗ medattem. Aɗinu? Na am Israel dilag king, da am danab hamu. Na da iuppe mauhkkul, amuam da am mi laa danab aoɗom bia; o danab laa qaukoppa mala qe mauhom bia,” awa aum.

1 Samuel 26:4

nug lokkumakppa atu italaknu danab laala maatte, ag gona oippig. Ag gona anidppig, am genabnab Saul nug teum, Hakila daatte anidppig. ⌊Ag anam anidna, ag eɗun gona, Dawit amegppa amunu appig.⌋