1 Samuel 16:20 - Nobonob Baibel

²⁰ Saul nug nai anam me, Jesi toppa ukke doya, Jesi nug aha, bret awa, wain doɗ gaɗappa inak laippu ele awa, donki laa attan mewowa, nug meeme nag nakok okkai meum laa ele awa, bekka Dawit mette aɗa he, Saul gumitta ukkom.

1 Samuel 16:20 ပူးပေါင်းရင်းမြစ်များ

Genesis 43:11

Anam awa a amu, ag mamelag Israel nug aum. “Ig ib laa iitta amunu, ag inam hekkulag. Ag wan imuppanu keeke ena ena laa, amuam marasin, uppuh leppu, spais digdig, mir, amu ad aɗit onilah pistasia, almon ele, amu meulti lanaknu ele laa aon, bek ahilkadppa inona gona, Isip danab amu, nuhig daakkunu hamu mettaglag.

Prowerb 18:16

Am na danab okkai anidkkutnu gona, nug ena dookkunu na keeke nuhig daakkunu hamu mettaknu aon gokkut; keeke amuam heeb, na nug gumidna gokkut.

1 Samuel 10:27

Amge hib guitta danab laa ag appig. “Saul nug attem heeb, ig ehanittak aognig? Nug elele iitta!” aon appig. Ag Saulnu ena iinab dooppig amunu, ag amu mattinna, ag ɗo ii medappig. Ag anam heppig, amge Saul nug ag amelagppa nai laa ii mattiom.

1 Samuel 10:4

Anadppe, ag humittona, ag na bret kunum aɗit mettaglagnu hekkulag. Ag anam heppeg, na aib uume. Iitta. Na ag eppelagppanu aokkut.

1 Samuel 16:19

Saulnu maɗi nid amu nug anam a, Saul nug nuhikkud danab laa ag appa gokkulagnu he, ag Jesi gumidna gona amegppa inam appig. “Saul nug nahipnu, ‘Na nid nahip Dawit, sipsip gumadtte ele, na nid amu meppe, da gumiɗa uɗiaɗ!’ atte,” aon appig.

1 Samuel 17:18

Keeke laa ele, na sis maha eblaih laih ele imu ele aon gona, na awanad dilag ban daup ikki mette! Na gona, na awanad ewam amu anadna, ag attem daatteb anttona, na keeke laa ag ena daatteb ippuniɗkkunu ele aon uɗie!

1 Samuel 25:18

Danab amu nug Abigel amegppa anam mattie, Abigel doya, nug paha aha, bret kunum 200 diia, wain doɗ gaɗappa inak aɗit, sipsip manak tanig ele, 20 kilogram ee aeg manik, grep meu qaɗaiettak batappatak 100, ad fig meu qaɗaiettak batappatak 200 ele, nug ee amu oh diia qagma, donki laala attan maattom.