1 Samuel 16:1 - Nobonob Baibel

¹ Amu Yawe Nug Samuel amegppa aum. “Da hei, Israel dilag king dayaknu ehah am Saul eppegppa, nug baekkudppa eppelagppa ele ii daatte, me na nuhignu haen elab oot doyeye, oot uugnab doottem. Amu haen gane laa ele ukkeb, na kobol amu uukkut? Uuppe! Da danab laa, Jesi, Betlehem daatte, nug bekka, da nug king daakkunu tituanmi amunu, na ad olip meunu goɗen idppa qeppe noob, aon Betlehem Jesi laugppa gona, goɗen amu aon, laa nug king daakku amu, na nug igippa gokkaɗe!” awa aum.

1 Samuel 16:1 ပူးပေါင်းရင်းမြစ်များ

1 King 8:16

Nug da mamel Dawit amegppa inam aum. ‘Haen da dahilad danab ah Israel, ag Isipnu diie uɗimi, haen amuppanu uɗie, gemu batak, da Israel dilag huu okkai oh oolagppa aab okkai laa, amuppa ag mettid lag laa, da onil amuppa daakkunu hekkulagnu amu laa ii tituanmi. Amge Dawit na amu, na dahilad danab ah gumadkkutnu da na tituanidmi,’ awa aum.

2 King 9:1

Haen King Joram nug Jesril dayeye, Elisa nug propet dilag huuppan propet laa onigppa e uɗie, amegppa inam aum. “Na lamen nahip daug imuanppa ɠagattag takkan, olip goɗen hinai nakok imuppa aon, aab Ramot, Gileat wanppanu ukke!

2 King 9:3

na hinai nakok amu aon, olip goɗen amu Jehu igippa gokkaɗona, na inam amegppa akkut. ‘Yawe Nug atte. Da na Israel dilag king bekkutnu goɗen gokkaɗakppa tituanidttem, awa atte.’ Aria, na amu hewona, na aib daame. Na od matulna bena, qaiqaɗ ukke!” awa aum.

2 King 9:6

Propet nug anam a, Jehu nug ahe, aa lag ooppa noya, propet nug olip goɗen amu awa, Jehu igippa gokkaɗowa, nug Jehu amegppa aum. “Yawe, Israel dilag Kayak, Nug atte. ‘Gemu da na Israel dilag king bekkutnu goɗen gokkaɗakppa tituanidttem. Na geha dahilad danab ah Israel gumadkkut.

1 Stori 11:3

Ag anam aeg, Israel dilag ikki danab oh ag Dawit gumidna, Hebron uɗieg, nug he, ag nug ele Hebron appa, Yawe noobppa nug tituanna, nai qagappig. Ag nug tituanna, nai qakkan, ag Dawit, nug Israel oh dilag king daakkunu goɗen gokkaɗakppa tituanppig. Yawe Nug Samuel oɗeppa amu bekkunu aum, aumbia Dawit nug king abenabppa ta dayom.

1 Stori 28:4

Nug da amu hekkulnu aib aum, amge Yawe, Israel dilag Kayak, Nug da, da baeladppa ele ig hanhan king daagnignu ooppa ena doya, Nug tituanikka he, da iikku king daattem. Aɗinu? Nug Israel dilag huu okkai Juda ag Israel oolagppa noob awa ukkak danab daaglagnu tituanatta, Nug da mamel baegppa ele tituanikka, ag oolagppan Nug dahilnu oo ena daye, da king daakkulnu tituaniɗa he, da king daattem.

Aisaia 11:1

Danab ag ad oeg qiia, dimppa ad amu ita bette, amubia Jesi buɗub ooppanu laa geha ba, nug king daakku. Ao, ad bunaɗom, diɗi ita qa ba meu otte, amubia Jesi buɗub laa dimppa ba, king dayaya, meu okku.

Aisaia 11:10

Haen amuppa am inam daakku. Jesi buɗub nug geha king daakku. Nug pilak laa, pilak amuam ad elab attan ta ukkak galaeg daatte, nug amubia daakku, amu wanppan huu anen anen ohppan danab ah ag geha nuhigppa uɗin, gumidna dona, nug dooglagnu ba daakku. Nug anam dayebeb, wanppan wan ohppan danab ah ag nug gumidna goppeg, nuhig dayaknu aben am binag amahlak oppiaawak ele daakku.

Aisaia 55:4

Antteg! Da hei, Dawit nug huu digdig dilag gumitta danab dayom. Ib amuppa, da dahil ɠagattag danab ah huu ohppanu amu ippunadmi.

Jeremaia 11:14

Yawe Nug anam awowa, Nug da amelppa aum. “Jeremaia, na danab ah imu dilagnu aib unuqiɗme. Na da ehanadkkulnu aib oɗ meɗame. Aɗinu? Da nahip nai ii doopa. Ag uug nau anidnana, da unuqiɗppeppeg, da amu ele ii doopa,” awa aum.

Jeremaia 15:1

Amu dimppa amu Yawe Nug da, Jeremaia, Nug da amelppa aum. “Moses, Samuel ele aa am dahilaɗ danabnab daapiɗ, amge aanab da noolppa daaya, danab ah imu dilag unuqiɗlop amu, da ag ena daaglagnu ii ehanadlom. Heppe, ag da noolppanu ukkeg! Da noolppa daaglagnu aib heme!

Jeremaia 6:30

Gadon, Yawe Nug Juda danab ah geɗadkku amunu, laa ag ahilagnu, “Silwa laa dubuttid ele, danab silwa amuppa uɗat laa hekkunu elele iitta amunu nug geɗidkku amu, Juda danab ah ag amubia daatteb,” akkulag.

Jeremaia 7:16

Anam amunu, Jeremaia, na danab ah imu dilagnu da ag ehanadkkulnu aib oo doyakppa unuqiɗme. Na da ehanadkkulnu ɠagattag aib unuqiɗme. Aɗinu? Na amu hekkut amu, na hamu hekkut. Da daul humen ii doopa.” Yawe Nug anam awa atte.

Sekaraia 4:14

Da anam ai, nug aum. “Naɗi, Nug wan atu oh gumadtte ele, Nug danab aɗit aa Nug ehanidkkulahnu goɗen gokkaɗakppa tituanatom amu, ad aɗit amu, ad eppeg aɗit ele am danab aɗit amu ippunadtte,” awa aum.

Rom 15:12

Amunu nai laa am, Aisaia nug ⌊Kayak oɗe awa,⌋ nai imu ⌊Kayak naippa yaak daatte⌋ aum. “Genab, Jesi buɗubppanu danab laa ba dayaya, Nug geha wanppan wan ohppan danab ah dilag gumitta danab daakku. Nug beeb amu iitta aɗi ag geha nuhigppa ehanittak aoglagnu dabmak aɗan daaglag.”

Hibru 11:32

Amu oh ag anam heppig amunu, gemu da aɗi nai laa tuɗitte madikkul. Amu da Gideonnu kaya, Baraknu kaya, Samsonnu kaya, Jeptanu kaya, Dawitnu kaya, Samuelnu kaya, amu propet dilag kaya ele madikkulnu elele amge haen iitta.

1 Jon 5:16

Laa nug layag hipunin hette anidtte, amge hipunin am he, danab mauhtte, amu iitta ele antta amu, nug layagnu Kayak unuqitteb, Kayak Nug heeb, nug layag bau daakku. Nai amuam hipunin nug he, danab ii mauhtte amunuib, amge hipunin laa nug he, danab mauhtte ele amu, da ag amunu unuqidkkulagnu ain ii attem.

1 Samuel 10:1

Maɗi nid nug anuqa ukke, Samuel nug id nakok goɗen inak ele awa, goɗen gokkaɗe, Saul igippa no, Samuel nug Saul ootuqitta aum. “Yawe Nug na, na nuhikkudnab danab ah gumadkkutnu iikku iite goɗen gokkaɗakppa tituanittom.

1 Samuel 15:11

“Saul nug da dimeɗa, dahil nai tappe neum amunu, da hei, nug Israel dilag king daatte amu, da amunu oolppa uugnab doottem,” awa aum. Yawe Nug Samuel amegppa anam a doya, Samuel nug oo uug ele daya, nug tuqan amu oh Yawe unuqittom.

1 Samuel 15:23

Aɗinu? Kayaknu nai tappe naknu am hipunin nau; eman hak bia. Beɗuppa tak kobol am ele hipunin nau; kayak hambuppuak dottolkad danab ag laulkadppa maatteg daatteb noolkadppa dup noa binag mak bia. Na Yawenu nai dim lamidkkutnu uume amunu, Nug king dayaknu ehah na eppenppa, na buɗunad eppelagppa ele daakkunu uutte,” awa aum.

1 Samuel 15:26

Saul nug anam a, Samuel nug aum. “Da na ele ii gomaɗa. Na Yawenu nai dim lamidkkutnu uume amunu, Yawe Nug king dayaknu ehah na eppenppa, na buɗunad eppelagppa ele daakkunu uutte,” awa aum.

1 Samuel 15:35

Amu Samuel nug Rama ukka daye ukke mauhom. Nug appa dayaya, haen amu oh nug baula Saul ii anttom, amge nug Saulnu oo uug dayeye, nuhignu gayom. Yawe amu, Nug Saul Israel dilag king daakkunu meum amu, Nug amunu oo uug dayom.

1 Samuel 16:15

Anam daye, danab ag Saul ehanidtteb ele ag nug amegppa appig. “Antte! Imuam ouɗi nau laa Kayak noobppanu uɗia, na uug nau mette nauhme,” aon appig.

1 Samuel 16:23

⌊Saul nug nai anam me, Jesi toppa ukke, Jesi nug Saul aum, nug amunu ena doye, Dawit nug Saul ele daaeheh,⌋ haen ouɗi nau amu, Kayak Nug ib oo ii neum ele amu, haen nug Saul nuhigppa uɗia, Saul nau mette daye, Dawit nug harp qe, ouɗi nau amu Saul uuitte, eɗua ena dayom.

1 Samuel 17:12

Amu Dawit mameg Jesi amu, Saul nug Dawit ukkeb, nug ele daaglahnu Jesi oɗ mette, nug ena aum amunu, nug ukke, Saul ele daapiɗ, dimppa amu nug eɗua mameg toppa ukka, nuhig sipsip guma, eɗua Saul toppa ukka ehanitta, eɗua ukka, mamegnu sipsip gumattom. Jesi nug am Betlehem danab, Israel dilag huu okkai Judanu; nuhig aab ikki am Eprata. Haen Saul nug king dayom, Jesi nug kaino meum. Nug bekkod nid danab am eblaih ewam ele. Dawit nug am huh bieg. Aria, nid danab tatamnu, nug dimugppanu, amu nug dimugppanu ele, ewam amu ag Saul dim lamidna, Pilistia ele ban hekkulag goppig. Nid danab tatamnu onig Eliap, nug dimugppanu onig Abinadab, amu nug dimugppanu Sama.

1 Samuel 9:16

“Dahilad danab ah ag Pilistia waalagppa daan gaaegeg doottem amunu, butti, haen inamppa amu, da heppi, danab laa nug na gumitta uɗikku; nug am Benyamin ted, nug appanu uɗikku. Nug uɗieb amu, nug Israel danab ah dilag king daakkunu na nug goɗen gokkaɗakppa tituane! Nug dahilad danab ah Pilistia waalagppa daamnanu, ag ehanadkku,” awa aum.