1 Samuel 14:47 - Nobonob Baibel

⁴⁷ Amu Saul nug Israel dilag king ba daye, nug nuhikkud daup ele ag Israel dilag kekeɗ oh ele ban heppig; kekeɗ ag ele ban heppig, amuam Moap danab, Amon danab, Edom danab, king laala ag Soba wanppa daappig, ahilkad daup ele, amu Pilistia danab ele. Saul, nuhikkud daup ele ag ban amu hena, kekeɗ eɗadppig.

1 Samuel 14:47 ပူးပေါင်းရင်းမြစ်များ

Genesis 19:37

Oolah ele daayya, aɗeg tatamnu nug nid danab menua, onig Moap ataɗom. Nug buɗub amu, ag Moap danab.

Genesis 19:38

Aria, aɗeg gehanu nug ele nid danab menua, nug onig Benami ataɗom. Nug buɗub amu, ag Amon danab.

Genesis 36:1

Aria Esau, onig laa Edom, nug buɗub amu inam.

Genesis 36:19

Amuam Esau, onig laa Edom, nug alakkud onilag. Ag aab ikki anen anen mamelkad daappig.

Genesis 36:8

Elele iitta amunu, Esau, onig laa Edom, nug aha ukka, wan laa onig Seir, aben qauko qauko ele, amuppa dayom.

2 Samuel 1:22

Jonatan nug latppa heeb, ban danab tiilag nekkunu ii baɗom. Saul nug qep aɗa heeb, ban danab nena qekkulagnu ii uuom.

2 Samuel 10:6

Aria, Amon danab ag amu heeg ukke, ag Dawitnu neekkakppa eheɗ nau heppig dooppig. Dawit nug ahilagnu, danab nug uɗig nau noobppa dootte, nug ahilagnu anam doyom dooppig. Ag anam doyona, ag nai meeg ukke, daup laala ag uɗin ehanadkkulagnu daden maadppig. Daup uɗippig am inam. Aramnu am 20,000. Ag am aab onig Betrehop am Sobanu ele uɗippig. Aab onig Makanu amu daup 1,000, ahilag king ele, aria Tobnu am daup 12,000.

2 Samuel 8:15

Dawit nug Israel danab ah oh gumattom. Nug gumattatta, nug nai doya mala hettoɗia epeɗia elele mettak kobol, kobol tutukkuppa ele ag gumattom.

2 Samuel 8:3

Am Dawit nug Rehop bekka onig Hadateser, nug am Soba dilag king amu, nug nug ele ban hepiɗ. Haen Hadateser nug wan laa le onig Yupretis guguittak dayom eɗua gumakkunu nug nuhikkud daup ele appa ukkaegeg amu, Dawit nuhikkud daup ele ag ukkaeg, ag ele ban heppig. Ag appa ban hena, Dawit nug Hadateser eɗittom.

1 King 11:23

Amu Kayak Nug he, danab laa ele Solomon kekeɗ medakkunu ahom. Danab amu onig Reson, nug am Eliada bekka. Reson nug anukka Soba wannu King Hadatesernu maɗi nid dayaya, oola ukkom.

2 King 14:27

Yawe Nug anukka heeb, Israel oh ag iitta mena autna aoppeg, hab waappa amu, danab laa nug ahilagnu baula dab-ii-memanu, Nug ii aum. Iitta amunu, Nug Jehoas bekka, King Jeroboam ehanitte, Israel ag padal memananu nug ehanattom.

1 Samuel 12:2

Da nug king abenabppa mei daatte amunu, gemu nug ag gumattatta, ulum madakkunu daatte. Da kaino mei, ikkil uɗug umimi beum. Da bekkalad ag okkai mena, ag oolagppa daan oitteb. Da nid bau dayeye, da digmein, ulum mattaiyi uɗie, gemu batak.

1 Samuel 13:1

Saul nug maɗ 30 dayaya, nug king ba dayom. Nug ba daye, maɗ aɗit ukke,

1 Samuel 14:46

Aria, amu dimugppa amu, Saul nug Pilistia lamadkkunu uue, Pilistia ag gona, ag wanelagppa daappig.

1 Samuel 14:52

Amu haen Saul nug king dayeye, nug nuhikkud daup ele ag hanhan Pilistia ele ban eheɗ heppig amunu, haen adekkuppa Saul nug Israel danab laa, nug am danab ebehi ele, o nug am danab nug ooppa ɠagattag doyak ele amu, Saul nug danab amubia antta, nug danab amu nuhig daup daakkunu tituanom.

1 Samuel 21:7

Am deɗ amu Dawit nug uɗia, Nop aabppa beum amu, Saulnu maɗi nid laa nug appa deɗ amuppa Yawe noobppa daakkunu dayom. Danab amu nug danab huu laa ag sipsip, makau, keeke Saulnu gumadtteb, nug am amu dilag gumak danab. Danab amu onig am Doeg, nug am Edom danab.