1 Samuel 13:13 - Nobonob Baibel

¹³ Saul nug Samuel amegppa anam a amu, Samuel nug eɗua, nug amegppa aum. “Na heme amu, amuppa na dabmak tutukku iittappa heme. Na Yawe, nahip Kayak, na nuhig nai ii dim lamidme. Na dim lamidlom amu Nug heeb, na, amu na buɗun ele ag hanhan Israel gumalob.

1 Samuel 13:13 ပူးပေါင်းရင်းမြစ်များ

Genesis 31:28

Na aɗinu da haen nakok ii meɗae, da nid ahin aɗit, amu alai aɗi ele ootuqatte, ‘Enade ukkeg,’ akkulnu ii ai diin uɗime? Na dabmak tutukku iittappa anam heme.

2 Samuel 24:10

Dawit nug he, Joap aɗi ag ban danab ebaqadna malaeg, Dawit dimppa nug nuhig ooppan oiyak ippunittaknu ulumppa amu, nug eheɗ doya, nug Yawe amegppa aum. “Da hemi imuppa amu, da hipunin okkainab hemi. Da hipunin hemi amunu, O Yawe, da, nahip maɗi nid, da na hipunin dahil uhuqna meɗakkunu ool ohppa oɗ medattem. Aɗinu? Da dabmak tutukku iittappa keeke laa iikku hemi.” Dawit nug Yawe anam unuqittom.

1 King 18:18

Nug anam oɗ mette, Elaiya nug Ahap aum, nug amu nob ma inam aum. “Da iitta, da Israel uug laa ii mattami, amge na, amu na mamen ele, aa, amu aa baelti ele, ag Israel uug mattaegeg uɗie, gemu ele hetteb. Aɗinu? Ag Yawenu haknunab nai tappaeg ne, ag kayak hambuppuak Bal iɗu iɗu noolagppa dup nona binalag meegeg uɗie, gemu ele hetteb.

1 King 21:20

Elaiya nug Yawe nai aum amu awa, nug Ahap gumitta ukkom. Ukka te amu, haen Ahap nug Elaiya antta, nug inam amegppa aum. “Kekeɗ dahil na, na eɗun dahilppa bemete?” awa aum. Awa a amu, Elaiya nug aum. “Ao, da na maditte uɗimi. Aɗinu? Na kobol eheɗib nahip ɠagattag ohppa hekkutnu dabmenan oittem. Yawe Nug nuhig neekkakppa kobol amunu am nauib dootte.

1 Stori 10:13

Saul nug Yawe ippunittom bia Nug dim lamidkkunu oo metta ii uuak kobol ii dim lamittom amunu, nug mauhom. Amge nug nau amuib ii heum. Iitta! Nug amu haaha, nug ele nau laa ele ha, nug mauhak ele gamag ah doyak medakkunu oɗ mettom.

2 Stori 16:9

Aɗinu? Yawe Nug aun nug Nugib dim lamidkkunu meu ohppa dabmette ele antta, nug ɠagattag medakkunu hanhan danab wanppa oitteb ele neekkadtte. Nug na ele kekeɗ eɗadkkutnu ɠagattag mettalo. Na heme am, na dabmak tutukku iittappa heme amunu, na hanhan ban anidnan daakkut,” awa aum.

2 Stori 19:2

Hanani bekka Jehu, nug propet amu, nug aha, King Jehosapat uɗa ta, nug amegppa aum. “Na danab nau ehanidkkut am enate? Na laa nug Yawenu nau ninig ele doottenu oo mauhak dookkut am enate? Na anam heme amunu, Yawe Nug nahipnu oppoɗi bak dootte.

Job 34:18

Kayak Nugib king amelagppa, ‘Ag ena iinab hetteb,’ iite atte? Ao, Nug anuqak danab laa amelagppa, ‘Ag nau hak danab daatteb,’ iite atte?

Prowerb 12:8

Danab ag laa nug doyak dabmak ena ele, ag nug binag metteb; amge danab nug dabmak kaliaknu kobol hette, laa nuhignu ena iinab dootteb.

Prowerb 19:3

Danab nug Kayak dab-ii-maama hak kobol dim lamidtte, amuppa nug he, nuhig bau dayak nauhtte; amge nug, “Yawe Nug eheɗ he, da dahil dayak nau iguppa daattem,” awa atte.

Aisaia 39:5

Nug anam a amu, Aisaia nug Hesekaia amegppa aum. “Na Yawe Nukka Ɠagattag Oh Ele, na nuhig nai doye! Nug atte.

Jeremaia 18:10

amge wanppan wan amu, o ɗo maɗoɗ amu, amunu danab ah ag digmena, da oɗel ii dim lamidnana, da noolppa ele eheɗ hekkulag dayeb, da ag ena hadakkulnu dabmak dahil eɗuen, ii ehanadpa.

1 Samuel 1:22

amge Hana nug ii ukkom. Aɗinu? Elkana nug gokkunu heehe, Hana nug amegppa aum. “Da nid imu huh aɗittoya, da nug awe ukken, Yawe gumitten wain, Nug medappi, nug haen oh appa daakku,” awa aum.

1 Samuel 13:12

amunu, da dabmemi. ‘Pilistia ag ahan, Gilgal ippa uɗin lamigkkulagnu hekkulag, me da Yawe dahilnu ena doya ehanigkkunu doɗ laa ii mane mettami.’ Da amu dabmemi amunu, da manaknu ofa Nug medakkulnunab doyen hemi,” awa aum.

1 Samuel 15:11

“Saul nug da dimeɗa, dahil nai tappe neum amunu, da hei, nug Israel dilag king daatte amu, da amunu oolppa uugnab doottem,” awa aum. Yawe Nug Samuel amegppa anam a doya, Samuel nug oo uug ele daya, nug tuqan amu oh Yawe unuqittom.

1 Samuel 15:22

Saul nug anam aum, amge Samuel nug eɗua amegppa aum. “Yawe Nug manaknu ofa, amu mana mettak laala elenu oo hette, amge Nug danab ag Nug oɗe dim lamidkkulagnu amu, Nug amunu oo huanaknab hette. Yawe oɗe dim lamittaknu, am mana mettak eɗidtte. Ao, Yawenu nai doon dim lamittaknu, am sipsip dawai ittag mana, Kayak mettaknu eɗidtte.

1 Samuel 15:28

Lamen pattiɗe amu, Samuel nug Saul amegppa aum. “Na he, lamel pattiɗom, amubia Yawe Nug gemu Israel dilag king dayaknu ehah nahip-ppanu pattiɗa awom. Nug pattiɗa awa, nug danab laa, danab amu nug na eɗidtte amu, Nug danab amu uɗat amu hekkunu medakku.

1 Samuel 16:1

Amu Yawe Nug Samuel amegppa aum. “Da hei, Israel dilag king dayaknu ehah am Saul eppegppa, nug baekkudppa eppelagppa ele ii daatte, me na nuhignu haen elab oot doyeye, oot uugnab doottem. Amu haen gane laa ele ukkeb, na kobol amu uukkut? Uuppe! Da danab laa, Jesi, Betlehem daatte, nug bekka, da nug king daakkunu tituanmi amunu, na ad olip meunu goɗen idppa qeppe noob, aon Betlehem Jesi laugppa gona, goɗen amu aon, laa nug king daakku amu, na nug igippa gokkaɗe!” awa aum.

1 Samuel 26:21

Dawit nug anam a, Saul nug aum. “Da hipunin hemi. O Dawit, na da bekkal, da baula eɗue nahip-ppa eheɗ ii hepa amunu, na eɗun uɗippe, da ele daagnihnu oɗ medattem. Aɗinu? Gemu na dahil bau dayak am keeke okkai dabmeme. Genab, da Kayak ii dabmein, ii dim lamidttitti, kobol dahil am elele iittanab iitta.” Nug anam aum.