1 Pita 3:1 - Nobonob Baibel

^1-2 Amubia ah ag danab ele amu, ag gamulkad waalagppa daanna, kobol enaib heig! Ag anam hekkulagnu diig am inam. Danab ahilkad oolagppanu laala ag Kayak nai ii dim lamidtteb dayeb amu, danab amu ag waalkad ag Kayak pehettak binag mena daanna, kobol oppiak ele dim lamidna oitteb anidna, anttak amuppa, ah dilag nai mattiak iittappa, ag oolag eɗueb, oolagppa genab dooglagtai.

1 Pita 3:1 ပူးပေါင်းရင်းမြစ်များ

Genesis 3:16

Yawe Kayak Nug anam awowa, Nug eɗua, ah amegppa aum. “Da heppi, nid awak haenppa na guittak okkai dookkut. Ao, na guittak doon, nid menuadkkut. Na gamutnu oot huanaknab daakku, amu nug na gumidkku,” awa aum.

Prowerb 11:30

Danab ag genab tutukku hak kobol dim lamidtteb amu, amuppa ag heeg, danab laa ag bau daatteb; amu danab doyak dabmak ena ele, nug kobol attem attem, laa ag aon bau oiglagnu ippunadtte.

Prowerb 18:19

Na aɗi heppe, na awan, o amap nug oo nauhkku dayeb amu, na eɗun nug ele laippu daaglahnu am uug naunab nau, danab nug aab ooppa aben aɗ ɠagattagnab ele eɗidkkunu uug bia. Ao, na laa ele nug qeyaya daaglah dayeb amu, na eɗun heppe, eheɗ hak amu iitta mekkunu am uug naunab nau, aab aɗ ɠagattagnab ele, aab amunu manak qaknu keeke heeb aoɗkkunu uug bia.

Matyu 18:15

Amu laa ele, na layap nug nahipnu eheɗ heeb amu, na goppe, aa aya daayya, nuhig eheɗ hak amu ippunidkkut. Ippunidppe, nug nahip nai dookku amu, nug na layap daakku.

Rom 10:16

Amge Juda danab dilagnu, ag ohnab Nai Ena imu ii aon dim lamidppig; laa aon dim lamidppig, laa am iitta. Propet Aisaia nug amunu inam aum. “Naɗi, aun nug ihinig nainu ooppa genab doyom?”

Rom 6:17

Ib aɗit amu oh daattep, amge ig ahilagnu Kayak amegppa, “Ena heme,” aot attem. Aɗinu? Anukka ag hipuninnu begbeg maɗi nid daappig, amge dimppa Kayaknu nai aon, ag nai amu dim lamidna autna aotteb.

Rom 7:2

Ag amu anidkkunignu amu da nai imu madippi dooglag. Ah laa nug danab awom amu, gamu nug bau daatte haenppa, ah nug aakku ɗo atte bia, nug gamu eleib ewau daaglahnu daatte. Amge gamu mauheb amu, ɗo amu ah amu geha ii toneb, nug aakku ɗo amu waappa ii daatte.

1 Korint 11:3

Amge ag nai imu dooglagnu da ool daatte. Danab oh ikkilag am Kristus, ah ikki am danab, Kristus ikki am Kayak.

1 Korint 14:34

ah ag oɗelag qamutna daaglagoitte. Ag nai mattiglagnu ii daatte. Iitta. Ag ɗo atte bia ag ⌊gamulkad⌋ waappa daaglag.

1 Korint 7:16

Ah na geha na danab nahip ehanidppe, nug oo eɗueb Kristen daakkute o iitta amu, na ii doottem. Aria danab na, geha na ah nahip ehanidppe, nug oo eɗueb Kristen daakkute o iitta amu na ele amu ii doottem.

Epesus 5:33

amge ag akka akka anen anen imu dooglagnu ele ippunigtte. Na nakka nahipnu oot mauhtte, amubia na waatnu oot mauhaɗ! Amu ah ele nug gamunu ena elele dookkuoitte.

Kolosi 3:18

Amu ah ag Naɗi Nug oo niitte, amubia ag gamulkad waalagppa dayeg!

Kolosi 4:5

Danab ag Nai Enanu oolagppa genab ii dootteb ele, ag Kolosi danab ag danab amu oolagppa oinna, ag akka ahilag oiyaknu dabmena autna aonna, ag uɗat ena hekkulagnu laa dayeb anidna, ag aib uuppig. Ag haen aguppanab heig!

2 Tesalonaika 1:8

Naɗi Nug danab ag Kayak ii dootteb, amu ag ihinig Naɗi Jesusnu Nai Ena ele dim ii lamidtteb amu, Nug ag nob nau tutukku madakku.

Hibru 11:8

Abraham nug ele Kayaknu ooppa genab doyom amunu, nug Kayak oɗe dim lamitta, Kayak Nug wan atu laa nug aug daakkunu medakkunu aum, amuppa ukkom. Amu nug appag diignab uua aha, aab attenppanab ukka daakkunu amu, nug oo ii maittette ukkom.

Hibru 5:9

Jesus Nug uug amu oh mawom amuppa Nug mana mettak ikki danab daakkunu elelenab mettom, amu Nug danab oh nuhig nai dim lamidtteb ele amu, Nug am ahilag ehanatta eɗua diiak hanhannu diig beum daatte.

1 Pita 1:22

Ag gemu ag doyak diig genabib dim lamidtteb, amuppa ag danab oolag ihan oppiak daatteb amunu, ag oo mauhak kobol genabppa ag lailkad dilagnu oolag mauhtte. Ag anam daatteb, amge ag tuɗidna, ag lailkad dilagnu oolkad unuqagppanu oo mauhaknab doyeg!

1 Pita 3:7

Amubia ele ah gamulkad ag waalkad ele daanna, kobol ena ahilagppa heig! Ah ag gamulkad ele oh Kayaknu ehanittak okkai hamu mettak amu aona, bauklel daaglag amunu, ah gamulkad ag ahilkad ah dilagnu, “Dahil kadoi, nakok gai-iitta bia,” doyadnana, ahilagnu ena elele doyeg! Ag amu oh hekkulagnu diig am, geha keeke laa unuqittak ahilag heeb ii nauhma.

1 Pita 4:17

Kayak Nug danab ah epeɗiadkkunu haen digma miagnab daatte, amu Kayak nuhikkud danab tatam epeɗiadkku. Anam amu, Nug anam ihinigppa epeɗiak digmekku dayeb amu, danab ag Kayaknu Nai Ena tappaeg nette ele, ahilagppa amu attemnab daakku? Ag uug naunab aoglag.