1 Korint 3:12 - Nobonob Baibel

¹² Amu danab ag lag ukku qaɗeppa lag hetteb ele amu, ag keeke laalappa, aab eokkunu elele iitta; gol, o iitta silwa, o iitta men ena amuppa lag hekkulagtai. O amu iitta ag keeke laalappa, aab eokkunu elele; ad, o iitta gikkiɗah, o iitta wit keeke gumu amuppa hekkulagtai. Amubia danab ag nai dahil aon tuɗidna uɗat hetteb.

1 Korint 3:12 ပူးပေါင်းရင်းမြစ်များ

Sam 119:72

Da men doɗo huanak ele daalom, amuam nakok enatai, amge da nahip ɗo aɗattem amu, amuam enanagnab. Da nahip ɗonu ool huanak hette.

Sam 19:10

Gol am nakok ena. Ge, gol ena dubuttid iitta ele kuɗum am nakok ena. Amge Yawenu ɗo oh am enanagnab. Uppuh leppu amu ubuhi ele. Ge, uppuh leppu teɗuppanu am ubuhi enanag. Amge Yawenu ɗo oh amu, am amu eɗidtte.

Eksodas 5:12

Anam daye, aria Israel danab ag akka brik hekkulagnu gikkiɗah bunaɗak mattin, qagmena akkan uɗiglagnu Isip dilagppa aben ohppa goppig.

Prowerb 16:16

Danab nug doyak dabmak ena ele aokku, amuam ena, am gol awak eɗidtte. Ao, danab nug diignu doyak tutukku, nug amu aokkun dabmekku, amuam ena, am silwa awak eɗidtte.

Prowerb 30:6

Nug aɗi atte amu, na aib tuɗidna, laa ele ame; na amu hekkut dayeb amu, Nug na daut bata, na am hambuppuak danab daattem ippunidkku.

Prowerb 8:10

Doyak dabmak ena ele am men laa onig rubi, daden nob okkainab ele, am amu eɗidtte. Aɗi keeke laa na aokkutnu oot huan daatte ele amu, keeke amu doyak dabmak ena ele ii eɗidtte amunu, na dahil ippunittak nai aokkutnu anuqak doon, silwa aokkutnu am anuqak aib doome. Ao, na doyak ena aokkutnu anuqak doon, na gol enanag aokkutnu anuqak aib doome.

Aisaia 60:17

Da heppi, danab ag keeke onig brans aon uɗin, ii mattamna. Iitta. Ag gol aon uɗin mattaglag. Da heppi, danab ag aen aon uɗin, ii mattamna. Iitta. Ag silwa aon uɗin mattaglag. Da heppi, danab ag ad aon uɗin, ii mattamna. Iitta. Ag brans aon uɗin mattaglag. Da heppi, danab ag men aon uɗin, ii mattamna. Iitta. Ag aen aon uɗin mattaglag. Da heppi, maɗoɗ kobol ag Juda, ahilag gawana daakku. Ao, da heppi, genab tutukku hak kobol am ahilag okkai daakku.

Jeremaia 23:28

Propet aun laa nug tul niia, nug tul niiak amuam dahilppanu uɗiom ii dookku dayeb amu, nug, ‘Tul niiak imuam dahil tul niiak,’ aakkuib akkuoitte, amge propet aun laa nug dahil nai doyom dayeb amu, nug tutukku, genabnab mehuqaɗ! Wit gumu am keeke hamu, wit aeg am keeke enanag, amubia.

Aposel 20:30

Am ag akka ahilkad danab laala ag ahan, ag doyak diig genabib baolinna, ag Kristen eeɗadppeg, ahan dim lamadkkulagnu hekkulag.

Rom 16:17

O lailad, nai ag aoppig amu, danab laala ag nai amu tappaeg neene, ag heeg, tamaniak ooppa obatak obatak daatteb, danab ah dilag ooppa genab doyak ele kobolitteb amu, da ag Rom daatteb, da danab amu dilagnu dabmena autna aoglagnu dabmak ahilkad maɗedattem. Ag danab amu dilagnu awaidna, dekkaɗnana dayeg!

1 Korint 3:11

Aɗinu? Tamaniak ukku laa ii daatte. Da Jesus Kristusnu nai mattimi aakkuib am tamaniaknu ukku daatte, amu danab laa nug ukku laa heeb bekkunu elele iitta.

1 Korint 3:13

Aria, danab ag lag, keeke piɗe piɗeppa heppig ele amu, aab lag amu eweb, ahilag uɗat am miag atikku. Laala ag keeke aab eokkunu elele iittappa uɗat heppig amu, ahilag uɗat am ii iitta mema. Amge laa ag keeke aab eokkunu eleleppa uɗat heppig amu, ahilag uɗat am iitta mekku. Amubia ele danab ag dahil nai aon, uɗat tuɗidna hetteb ele, ahilag uɗat am elele o elele iitta am miag atikku. Aab nug heeb, lagnu uɗat am miag atikku, amubia Kayak Nug heeb, danabnu uɗat am miag atikku.

2 Korint 2:17

Danab kuɗum laa ag oinna, Kayak naippa men doɗonu uɗat hetteb ele amu, ig amubia ii hettem. Iitta. Ig Kristusnu daatta, maɗi nid Kayak maatte gotteb bia, ig oonig oppiaawak eleppa Kayak noobppa nai amu mehuqttem.

2 Korint 4:2

Iitta. Ig kobol uɗa nak ele, laa lokkumakppa hetteb amu, ig kobol amu dimettota, hambuppuak kobolppa ele ig ii oittem. Am ig Kayak nainu ele amu ig baolita ii hettem. Iitta. Ig Nai Ena tutukku miag mehuqttem, amu amuppa ig danab oh ig am aun ippuanadttem. Ig amu heut, ag ig Kayaknu neekkakppa attem daattem oolagppa dooglagnu elele.

Kolosi 2:8

Ag danab laa nug ag ulah nai, nai meu iitta ele amelagppa mattia hambuppualatteb, nug waappa daamnanu dabmeig! Danab kobol amu hetteb ele amu, ag mattiak ahilagppa alai aɗi dilag kobolnu, amu wan imuppan ɗo ɠagattag iitta ele, ag amunu maditteb. Kristusnu amu ag ii maditteb.

1 Timoti 6:3

Laa nug ihinig Naɗi Jesus Kristusnu nai genab ippunikkom, Kayaknu kobol tutukkunu nai ele, nug nai amu uua, ippunittak hamu meu iitta madikku dayeb amu, ig doognig,

2 Timoti 2:20

Lag okkai laa ooppa tappiɗ laa golppa hak, laa silwappa hak, laa adppa hak, laa wanppa hak bia daatteb. Tappiɗ amu oolagppa amu, danab ag laalanu ena dootteb, amge laalanu amu enanag ii dootteb.

2 Timoti 3:13

Amge danab nau, hambuppuak aɗi ele, ag kobol nau henana, tuɗidna naunab henana, ag laa hambuppualattegeg, laa amu ag ele ag hambuppualadkkulag.

2 Timoti 3:7

Ah amu ag haen oh ippunittak nai dooglagnu hetteb, amge ag doyak diig genabib aoglagnu elele iitta.

2 Timoti 4:3

Aɗinu? Dimppa haen laa amu danab ag ippunittak nai genab ena ele uuglag. Ag akka ahilag dabmak dim lamidna, ippunittak danab hambuppuak kuɗum diiglag. Diippeg, ippunittak danab amu ag nai laala, danab ag dooglagnu oolag niitte ele, amu appeg dooglag.

Hibru 13:9

Ippunittak bau digdig, am Nai Ena bia iitta amu, ag doon aib dim lamidppig. Aɗinu? Ig Kayaknu ehanittak okkai hamu mettakppa, Nug dim lamidkkunignu ɠagattag aognig am ena. Ig eenu ɗo kuɗum dim lamidta, ɠagattag amu aognignu hekkunig am ena iitta. Danab laala ag anam henan oippig amge ii ehanattom.

1 Pita 1:7

Uug betteb amu, ag diig imunu betteb. Ag beppeg, ahilag ooppa genab doyak am ena, ɠagattag daattete o iittate, amu anttaknu aakku betteb. Gol am nauhkkunu keeke, amge danab ag gol babaitta epeɗia awak daakkunu uɗat hetteb, amubia Kristen danab, ag ahilag ooppa genab doyak, nug nauhkkunu keeke iitta, gol eɗittak, enanag, amu epeɗidkkunu uug amu ag betteb. Ooppa genab doyak ahilag nug ɠagattag daakku, amu dimppa, Jesus Kristus eɗua uɗikku haenppa, ag binag amahlak oppiaawak ele, onig okkai, amu binag ele aoglag.

Revelesen 2:14

Amge eheɗ hak nahip laippu laippu imunu da na amenppa iikku attem. Nahipad danab laa Pergamum appa ana daatteb, ag Balamnu kobol amu ɠagattagnab aɗatteb. Nug Balak ippunitte, Balak nug he, Israel danab ah ag hipuninppa nena qeppig. Amuam Israel aɗi ag danab laa, ag doɗ main kayak hambuppuak dottolkad madappig ele, ag doɗ amu lana, gappai kobol ele heppig.

Revelesen 21:18

Aabnu aɗ am Kayak Nug men jaspa, amuppa heum. Aab amu golppa heum, am gol ena dubuttid iitta ele, amu anttak nuhig amu le ameg oppiaawak kinipan iitta bia, o lettod bia.

Revelesen 3:18

Anam amunu, da ulum mettak nai imu na medattem. Na enun ele daakkutnu, na gol babaitta epeɗia awak dahilppanu daden mena, na bam iittanu uɗa nak doomnanu, na lamen hakkab ele dahilppanu daden mena, aria, na neegna keeke anidkkutnu, na marasin na amenppa mekkutnu ele dahilppanu daden me!