1 Korint 10:22 - Nobonob Baibel

²² Ig anam hepput, Naɗi Kristus Nug ihinignu, dahilppa anam daalon dabmak aɗa daakkunu dabmettemte? Ig nuhig ɠagattag eɗidkkunignu elelete?

1 Korint 10:22 ပူးပေါင်းရင်းမြစ်များ

1 King 14:22

Juda danab ah ag Yawenu neekkakppa eheɗ heppig. Ag hipunin hattana, amuppa ag heeg, Yawe Nug ahilagnu oo nauhak laa, oo nauhak amuam dahil dooi laa aomanuppa bette, oo nauhak amu be doyom. Ag mamelkad aɗi anukka hipunin kuɗum heegeg, Yawe anam doyom, amge Rehoboam nug Juda gumom, haen amuppa Juda danab ah ag heeg, Yawe Nug ahilagnu oo nauhak amu huana doyom.

Job 9:4

Kayak Nug keeke oh dootte, doyak dabmak ena nuhig am bodok iitta. Nuhig ɠagattag ele okkai, naɗi ele. Laa nug wagai ma, Kayak eɗidkkunu haaha eɗidkkute? Iittanab iitta!

Sam 78:58

Ag kayak hambuppuak dilag mettid lag nakokppa ag kayak hambuppuak noolagppa dup nona binalag meppig amu, kobol amuppa ag heeg, Kayak oo nauhak doyom. Ao, ag kayak hambuppuak dottolkad noolagppa dup nona binalag meeg, Nug ahilagnu dahil doya laa aomanu doyak aɗa dayom.

Eksodas 20:5

Na dottog hattak laa, na amu noolagppa aib dup nona binag meme. Aɗinu? Da am Yawe, nahip Kayak; da dahilad dilagnu dahil doya laa aomanu doyak aɗe daattem. Da danab ag dahilnu nau ninig ele doon, hipunin hetteb ele amu, da ag bu aqai ukke, ag buɗulkad menuattak huu laippu bia ewam, o waɗele batak, bu qak amunu uug ag ele aqadtte,

Eksodas 34:14

Aɗinu? Da Yawe, da onil laa am Dahil Doya Laa Aomanu Doyak Aɗeɗe Daattem; da am Kayak, da dahilad dilagnu dahil doya laa aomanu doyak aɗe daattem amunu, ag kayak hambuppuak laa noobppa dup nona binag aib meppig.

Eklisiastis 6:10

Aɗi keeke daatte amu, keeke amu oh am onilkad ataɗattak daatteb; amu danab ag attem daatteb am miag atia dayom. Kayak Nug ɠagattag oh ele, amu laa Nug ele nai apeɗ ona, apeɗ dokkunu elele iitta.

Aisaia 45:9

Danab nug laa nug heittom ele, nug nuhignu nai hette amu, danab amunu am gadonnab gadon. Ao, danab ag waa aoɗak qatti laa, ag amubia aakkuib daatteb, amu danab nug laa nug heittom ele nuhignu nai hette ele amu, nug waa aoɗak qatti kuɗum oolagppa bia daatte aakkuib amunu, nuhignu am gadonnab gadon. Waanu lekkoh nug aha, nug waa keeke hak danab amegppa, ‘Na aɗi hekkutnu hettem,’ attete? O waa nug aha, ‘Laa heiɗtte ele amu, nug eppeg iitta,’ attete?

Jeremaia 44:8

Ag eppelagppa kayak hambuppuak dottolkad bappaidtteb, amu ag Isip daanna oiglagnu uɗin daanna, ippa ag kalu danab ile muttuɗig enanag bette main, kayak hambuppuak madatteb. Aɗinu ag heppeg, da oppoɗi bak dookkul? Ag amu tuɗidna hekkulag dayeb amu, ag akka ag hena, ag beɗulagppa ag nauhkkulag. Anam beeb, danab ah wanppan wan laa ohppan ag anidna, ag aon aon aqan, ag eheɗ laa awaknu anak waappa daaglagnu akkulag.

Jeremaia 7:19

Ag amu hetteb, amge diigppanab ag heeg, da eheɗ aottemte? Iitta. Ag akka ag ahilag eheɗ hak henana, ag eheɗ aonna, ag akka ag uɗa nak madatteb,” Yawe Nug anam awa atte.

Esekiel 22:14

Da Yawe, da ag bu madakkul, amu deɗ laa da amu hekkul amu, ag oolagppa ɠagattag qettak daaglagte? Ag ɠagattag daaglagte? Iitta! Amu da Yawe, da aakku amu hekkulnu ain malami amunu, da anamnab aakku hekkul.

Sepanaia 1:18

Deɗ Yawe Nug danab ah bu madakku amu, deɗ amuppa ahilag silwa, o gol am nakok laa ii ehanadma. Yawe Nug danab ah nuhikkudnu, dahil doya laa aomanu doyak aɗa daatte, amge ag nuhikkudib daaglagnu ii heegeg, nug oo huana nauhtte. Oo nauhak amuam aab ewak laa huan ewawa, keeke oh he nauhtte, amubia daatte. Nuhig oo nauhak amuam heeb, wan oh nauhkku. Aɗinu? Danab ah oh ag wanppa daatteb, Nug heeb, ag padal mena autna aoglag.

Duteronomi 32:16

Israel danab ah ag wan laala dilag kayak hambuppuak noolkadppa dup noa binag mak kobol hena, amuppa ag heeg, Kayak Nug ahilagnu dahil doya laa aomanu doyak aɗa dayom. Ao, ag kayak hambuppuak dottolkad, Kayak Nug amunu ooppa uuaknab dootte, ag amu noolagppa dup nona binalag meppig amunu, Nug oo nauhom.

Duteronomi 32:21

Ag kayak hambuppuak dottolkad noolagppa dup noa binag mak kobol heeg, da ahilagnu dahil doya laa aomanu doyak aɗe daami. Dottolkad amu ag kayak genab iitta. Ao, ag kayak hambuppuak dottolkad, keeke amuam ag ehanadkkunu elele iitta, ag amu noolagppa dup noa binag mak kobol heeg, da ool nauhom. Gemu amu, da danab ah ag dahilad iitta ehanadppi, Israel danab ah ag amu anidna, ag ehanittak amunu ittag aqeeb, ag ele aoglagnu dabmak aona, ag dahilppa eɗun uɗiglag. Ao, danab ah dahilad iitta, ag diignu doyak tutukku iitta, da ag ehanadppi, Israel danab ah ag amunu oolag nauhkku.

Duteronomi 4:24

Ag amu hekkulagnu diig am, Yawe, ahilag Kayak, Nug am aab dittiak naɗi, keeke oh ewatte iitta metteb, Nug amubia daatte. Nug nuhikkud dilagnu dahil doya laa aomanu doyak aɗa daatte, ⌊Nug danab ah ag dup nona, kayak laa binalag mekkulag ele hatteb nauhkkulag.⌋

Duteronomi 6:15

Ag kayak laa noolagppa dup noa binag mak kobol ii hemananu diig am, Yawe, ahilag Kayak, ag oolagppa daatte, amu Nug nuhikkud dilagnu dahil doya laa aomanu doyak aɗa daatte. Ag kayak laa dilagnu dup noa binag mak kobol hekkulag dayeb amu, Nug ahilagnu oo nauhak huana doya heeb, ag mauhna, iittanab mekkulag.

Hibru 10:31

Amu danab laa nug hipunin nuhignu, Kayak bauklel ele eppegppa epeɗiak aokkunu gokkunu am keeke hamu iitta. Keeke amuam keeke baɗak, uug naunab ele.

Josua 24:19

Ag anam appig amu, Josua nug danab ah amelagppa aum. “Yawe Nug am oppiaawak daatte, Nug ahilagnu dahil doya laa aomanu doyak aɗa daatte amunu, ag Yawe, kayak laala ele waappa daan, ag oh oɗelag dim lamidkkulagnu elele iitta. Am ag tuɗid ele hipunin hekkulag dayeb, Nug ahilag nai tappe nak, ahilag hipunin elenu bu aqadkku; bu qak iittappa ii uhuqa mattama.