1 Jon 5:6 - Nobonob Baibel

⁶ Jesus Kristus Nug uɗia, leppa layattak awa ukka, ad emaitakppa mauha Nug tiigppa ig uhuqikkom. Amu le, tiig amu ele, keeke aɗit amu Nug Kayak Bekka ippunigtte. Le nug nukka ii ippunigtte. Iitta. Le tiig ele oh amu ippunigtte. Kayak Ouɗi Nug am doyak diig genabib diig amunu, Nug amunu mehuqtte.

1 Jon 5:6 ပူးပေါင်းရင်းမြစ်များ

Esekiel 36:25

Ag wan ahilagppanab daappeg, da le oppiaawak ele awen, ahilagppa tauɗppi ag oppiaawak daaglag. Da heppi, dubuttid, da noolppa daakkun elele iitta ahilagppa laa ii daama; ag baula kayak hambuppuak dottolkad noolagppa dup nona binalag ii memana.

Lewitikas 17:11

Aɗinu? Keeke oh bau daatteb ele amu, ag tiigppa bau daatteb. Qaɗabppa amu, mana mettak danab nug heeb, ahilag eheɗ haknu nob nau tiigppa iitta meeb elele medakkunu hette amunu, da ag eheɗ haknu nob nau tiigppa iitta meeb elele medakkunu hekkulagnu tiig ag mattami.

Sekaraia 9:11

Da hei, da ag Israel ele ig nug tituanta nai qakkamut. Amu nai qakkak dahil amu, am doɗ tiigppa ɠagattag qak dayom. Ig anam hemut amunu, diig amuppa da geha heppi, ahilagnu laa ag maniguittak danab moɗ naɗi le iitta eleppa daatte, ag amubia daatteb amu, ag amuppa ii daamna.

Matyu 26:28

Imu da tiil, amuppa da nug tituana nai qakkak bau hettem. Da danab ah kuɗum dilag hipunin uhuqen madakkulnu gokkaɗttem.

Matyu 3:16

Jesus layattak awa malowa, Nug leppanu beum. Amu haen amuppanab hab obata mette, Kayak Ouɗi Nug uppuɗil beɗulag nakok laabia naana, Nug qaɗeppa dayeye anttom.

Mak 14:24

Ag laegeg amu Jesus Nug ag amelagppa aum. “Imu da tiil, amuppa da nug tituana nai qakkak bau hettem. Da danab ah kuɗum dilag hipunin uhuqen madakkulnu gokkaɗttem.

Luk 22:20

Ag ee lana malona, Nug matu heum, amubianab Nug kap awa amelagppa aum. “Kap imuppa da nug tituana nai qakkak bau da tiilppa hettem. Da tiil ag ehanadkkunu gokkaɗttem.

Jon 14:17

Nug am Kayak Ouɗi; doyak diig genabib diig. Wanppan danab ah wannu kobol dim lamidtteb ele, ag Nug aoglagnu am elele iitta. Aɗinu? Ag Nug ii anidtteb, amu ag ele Nug ii dootteb. Amge ag da ele geha iikku daatteb, ag am Nug dootteb, Nug ag ele daatteb, dimppa Nug ag oolagppa ele daakku.

Jon 14:6

A amu, Jesus Nug nob ma aum. “Da am ⌊Kayak gumitta ukkaknu⌋ ib. Laa ele amu, da am doyak diig genabibnu diig, amu da bau dayaknu diig ele. Danab nug Kayak gumitta gokkunu amu, daib nug ehanidppi gokkunu elele daattem.

Jon 15:26

Kayak Ouɗi, Nug onig laa Ehanittak, Nug am doyak diig genabibnu diig Kayak toppa daatte amu, da Nug geha meppi, ag ehanadkkunu ahilagppa uɗikku. Nug amu Mame nuhigppa dayaya uɗikku. Haen Nug uɗia amu, Nug nai dahilnu ag amelagppa mattieb dooglag.

Jon 16:13

Amge Kayak Ouɗi, doyak diig genabib diig, haen Nug na, Nug keeke oh doyak diig genabibppanu ippunadkku. Nug nukka nuhig dabmakppa ii mattima. Iitta. Nug aɗi doyom aakkuib madikku. Aɗi aɗi dimppa bekku, amu ele ippunadkku.

Jon 3:5

Nikodemus anam a amu, Jesus oɗeppa awa aum. “Genabnab genab da na amenppa attem. Danab nug leppa, amu Kayak Ouɗippa ele menuak ii aokku amu, nug Kayaknu ɗo maɗoɗ ooppa nokkunu elele iitta.

Jon 4:10

Ah anam a amu, Jesus oɗeppa awa aum. “Na Kayak Nug ɗo medakkunu hette doolom, amu na danab aun Nug nahipnu, ‘Na le aon doppe lai!’ aum ele, na Nug ele doolom amu, na Nug amegppa appe, Nug na le bauklel ele mettalo,” awa aum.

Jon 4:14

amge laa nug le da medattem ele imu, nug amu lakku amu, nug baula le baag ii diima. Iitta. Le da medakkul ele imu am, le moɗ bia nug ooppa baaba daakku. Anam haen oh qeppuɗia baaba, nug bauklel hanhannu medakku,” awa aum.

Jon 6:55

Aɗinu? Da teppul tiil ele amu lanaknu ee genab.

Aposel 8:36

Aa anam heyaya goya goya, le laa anidya, danab amu nug Pilip amegppa aum. “Antte! Le iikku. Aɗi keeke laa da layattak ii aopanu da qakkiɗtte?” awa aum.

Rom 3:25

Anukka Kayak Nug eheɗ haknu nob elele eɗua mettak uua, danab dilag hipuninnu nob nau paha ii mattom amunu, Nug tutukkuib daatte, Nug amu ippunigkkunu haaha, Nug ig aun laa ig Jesus tiigppanu oonigppa genab doottem, Jesus Nug ihinig eheɗ haknu nob nau Nug tiigppa iitta mekkunu heeb elele medakkunu Nug tituanom.

Epesus 1:7

Kayak Nug nuhig doyak dabmak ena ele oh, nuhig diignu doyak tutukku oh eleppa Nug dabmekka, Nug nuhig ehanittak okkai hamu mettak naɗinab megakka, Nug Jesus Kristus tiigppa Nug ig hipuninnu qagaiettakppanu eɗua uhuqak ha mekka, ⌊amuppanu laih amu⌋ ig hipuninnu uhuqak aomut.

1 Timoti 3:16

Genab, ig Kristen tamaniakppa daattem, ig doyak laa aɗattem, amu doyak amuam lokkumak dayeye, gehaib miag atiom. Doyak amuam unuqagnab ele daatte. Doyak amuam inam. Jesus Nug danab beɗu awa, miag atia beum. Kayak Ouɗi Nug ig Nug tutukkunab ippunikke, engel ag Nug ele anidppig. Nuhig nainu mehuqak am wanppan ɗo maɗoɗppa ukke, wanppanu danab ah ag oolagppa genab dooppig. Kayak he, Nug hab aabppa teum.

Taitus 3:5

Nug ig eɗua awikkom. Ig ihinig genab tutukku hak kobol hemutnu laala anatta ii heum. Iitta. Nug ihinignu oo gai-iitta doya oo mekka ehanikkom amunu, Nug ig ihikka, nuhig Ouɗippa Nug bauklel mekke, ig bau menuak aomut.

Hibru 10:29

Aria, anukka danab nug ɗo tippalom amu, ag nug qeppeg mauhkkunu dayom amunu, gemu danab laa nug Kayak Bekka dimedatte ele, nuhignu attemnab? Danab amu nug geha qagaiettak naɗinab anidkkunu elele. Aɗinu? Nug Kristusnu, Nug am keeke hamu doya, Nug tiignu ele, amuppa Kayak Nug nug ele nug tituanya nai qagapiɗ, amuppa Kayak he, danab amu oppiaawak beum, amge danab amu nug tiig amunu keeke oppiaawak iitta doyom. Laa ele amu, nug Kayak Ouɗi, Nug ehanittak okkai hamu mettaknu diig amu, nug nuhigppa ele kobol eheɗnab heum.

Hibru 12:24

Amu ag Jesus, Nug am gamag danab, Nug nug tituana nai qakkak bau heum daatte ele amu, ag nuhigppa wappig. Kain nug Abel qe mauhom, haen amuppa Abel tiig neum, amunu nob nau mak dayom, amge Jesus ehanigkkunu he, Nug tiig neum amu, ag amuppa wappig.

Hibru 13:20

Aria Kayak, Nug am maɗoɗ diig daatte amu, Nug he, ihinig Naɗi Jesus Nug mauhak oolagppanu eɗua hibaittom. Jesus tiig ne mauhom, amu Kayak Nug Jesus tiigppa nug tituana nai qakkak bau hanhannu ɠagattag qettom. Amu Kayak Nug heeb, keeke ena oh ag nuhig dabmak dim lamidkkulagnu elele daaglagnu ahilagppa dayeb, Nug ig oonigppa aɗi hekkunu oo daatte amu hekkunu ool daatte. Jesus Nug am sipsip gumak danab bia ihinig gumikkak danab anuqak okkai daatte. Binag amahlak oppiaawak ele hanhan alet ele nuhigppa dayaɗ! Genab!

Hibru 9:14

amge gemu, ig Kayak bauklel ele waappa daat Nug oɗe dim lamidkkunignu ig Kristus tiigppa genab oppiaawak daagnignu elelenab. Aɗinu? Kristus Nug beɗuppa eheɗ laa iittanab, Nug Kayak Ouɗi hanhan daatte ele, nuhig ɠagattagppa, Nug nukka Nug beɗu, mana mettak bia, Kayak mettom amunu, Nug tiig ig beɗunigib ii ihom. Iitta! Ig Kayak bauklel waappa daat, nuhig uɗat hekkunignu Nug tiigppa ihinig hak nau, hak amuam danab mauhakppa omaladna gotteb amu, am hak nau amu oh uhuqa mekkak daatteb.

Hibru 9:7

amge mana mettak ikki danab, nugib am lag oo makkulak ooppanab, amuppa hipunin nuhig amu danab oh dilag ele doɗ tiilagppa mana mettak hekkunu maɗ laippu ooppa, haen laippuib noa hettom. Nug hamu iinab nottom. Iitta! Nug doɗ tiig awa ele gottom.

1 Pita 1:2

Ag Jesus Kristus oɗe dim lamidkkulagnu, Jesus tiigppa oppiak bena daaglagnu amu, Kayak, ig Mamenig, Nug anukka ag doyattom, amu amuppa Nug, ag nuhikkud danab ah daaglagnu tituanatte, nuhig Ouɗi he, ag oppiaawak daatteb. Ag amu, Kayaknu ehanittak okkai hamu mettak, amu nuhig maɗoɗ ele ahilagppa naɗi daaglahnu ool daatte.

1 Pita 3:21

Aria, ag gemu daatteb amu, ag am Noa aɗi, ag aɗi keeke ippunigtteb bia daatteb. Ag ele leppa ehanittak aotteb. Amuam layattak, amge layattak am beɗunigppanu dubuttid ihaknu keeke iitta. Iitta. Layattakppa ⌊ag oolag eɗueb,⌋ ahilkad ooppan oiyak ippunittaknu ulum am ag oolagppa eheɗ laa ii daatte ippunatte, ag amuppa Kayak oɗe genab dim lamidkkulagnu Nug amegppa ahilag nai ɠagattag qettan maditteb. Amunu diig am Jesus Kristus, Nug mauhakppanu eɗua hibaittom.

1 Jon 1:7

Amge Nug nukka amahlakppa daatte, amubia ig amahlakppa oittem dayeb amu, ig oh nug oo laippu ele nug doya dayakppa daattem, amu Nug Bekka Jesus, Nug tiig ihinig hipunin oh mihehe, ig oppiak daattem.

1 Jon 4:10

Ig Kayaknu oonig mauhom, diig amunu Kayak Nug Bekka me wan imuppa uɗiom am genabte! Iittanab! Nug ihinignu oo mauhom amunu, Nug Bekka laippunab me, Nug ihinig eheɗ haknu nob nau Nug tiigppa iitta mekkunu heeb elele medakkunu wan imuppa uɗiom. Amuam oo mauhak kobol tutukku aakku.

Revelesen 5:9

Ikki danab 24 ag anam hena, ag ahi bau laa inam edappig. “Na buk itoɗiak amu aona, qataqak oh tolakkutnu ehah ele. Aɗinu? Ag heeg, na mauhme, amu na danab ah huu ohppanu, nai ohppanu, beɗulag iɗu iɗu ohppanu, wanppan wan ohppanu ele na tiinppa hipuninnu qagaiettakppanu eɗua uhuqak hena, Kayak mettame.

Revelesen 7:14

Oɗ meɗe, da nuhig oɗmak nob mein ami. “Naɗi, na doottem,” awe ami. Da ai amu, nug da amelppa aum. “Danab imu amu, ag eheɗ hattak okkainab, amuppa daappig, amge ag Kayak di-ii-medappig. Ag lamen elab ahilkad Sipsip Nag tiigppa ihalatteg hakkab ebappig