1 Jon 3:5 - Nobonob Baibel

⁵ Amu ag dootteb, Kristus Nug heeb, hipunin iitta mekkunu miag atiom. Nug ooppa hipunin laa ii daatte.

1 Jon 3:5 ပူးပေါင်းရင်းမြစ်များ

Hosea 14:2

Ag eɗun, Yawe waappa daaglagnu wana, ag nai inam aig! “Mana mettak ou daakkunu, ig oɗenigppa na binan mekkunignu, ig na ihinig hipunin oh uhuqna megakkutnu oɗ medattem. Ao, na oo bodoette enanag maɗoɗ ele hak kobol dim lamidna awigkkutnu unuqidttem.

Matyu 1:21

Nug geha nid danab aokku, amu na Nug onig Jesus ataɗkkut. Aɗinu? Nug nuhikkud danab ah, ag ahilag hipuninnu padal ii memananu ehanadkku,” awa aum.

Luk 23:41

I nitaeg mauhttep imunu am ag eheɗ laa ii hetteb; ag kobol elele hetteb. I nob imu aognihnu am nai iitta. Aɗinu? Ihinih eheɗ hemuɗ nob iikku aottep, amge danab imu Nug eheɗ laa ii heum,” awa aum.

Luk 23:47

Jesus mauhe, ban daup 100 dilag ikki nug amu antta, nug Kayak binag ma aum. “Genabnab danab imu Nug genab tutukku hak danab,” awa aum.

Jon 1:29

Wagɗe deɗ amuppa Jesus Nug Jon gumitta uɗieye, Jon Nug antta aum. “Antteg, Kayaknu Sipsip Nag, Nug wanppan danab ah dilag hipunin uhuqtte, Nug am uukku daatte.

Jon 1:31

Laa ele, da dakka da Nug am aun ii doomi, amge nug Israel danab ah, nug ahilagppa miag atiak bekkunu, da diig amunu uɗien danab ah leppa layadttem,” awa aum.

Jon 14:30

Wan imuppan okkai nug amu, nug uɗat nuhig hekkunu haen miag beum daatte amunu, da ag ele nai kuɗum baula ii mattimta. Nug dahilppa keeke laa hekkunu ɠagattag iitta,

Jon 8:46

Danab laa nug genab dahilnu, ‘Nug hipunin heum,’ akkunu elele iitta amunu, da nai genab madittem imu amu, aɗinu ag oolagppa genab ii dootteb?

2 Korint 5:21

Kristus Nug eheɗ laa ii heum amge Kayak he, Nug ihinig mana mettak dayeye, Kayak Nug hipunin ihinig oh awa, laippu qagma Nug qaɗeppa me, Nug mawom. Anam amunu, gemu Kayak Nug Kristusnu uɗat okkaippa ig anikka, ihinignu, “Genab tutukku hak danab,” awa akkunu elele.

1 Timoti 1:15

Nai imuam genab, meu ele amunu ag aona, oolagppa genab dooglagnu ele elele. Nai am inam. Jesus Kristus Nug wan imuppanu hipunin danab ah eɗua diiadkkunu uɗiom. Hipunin hak danab ah oh eɗattak am daib.

1 Timoti 3:16

Genab, ig Kristen tamaniakppa daattem, ig doyak laa aɗattem, amu doyak amuam lokkumak dayeye, gehaib miag atiom. Doyak amuam unuqagnab ele daatte. Doyak amuam inam. Jesus Nug danab beɗu awa, miag atia beum. Kayak Ouɗi Nug ig Nug tutukkunab ippunikke, engel ag Nug ele anidppig. Nuhig nainu mehuqak am wanppan ɗo maɗoɗppa ukke, wanppanu danab ah ag oolagppa genab dooppig. Kayak he, Nug hab aabppa teum.

Taitus 2:14

Kristus Nug ig ihinig nau hak ohnu qagaiettakppanu eɗua uhuqak hekkunu, ig nuhikkudnab danab ah oppiaawak ele daatta, kobol ena tutukku aakkuib hekkunignu dabmak aognignu amu, Nug ihinignu mauhom.

Hibru 1:3

Aam lettod ye, amahlak amia ukke, danab ah anidtteb, amubia Kayak Bekka Nug Kayak binag amahlak oppiaawak ele he, danab ah anidtteb, amu Nug Mameg daatte, amubianab daatte. Nug keeke oh nuhig naippa ɠagattag aqadtte. Nug nuhig mauhakppa Nug danab dilag hipunin uhuqa mattaknu ib ooɗom. Nug ib amu ooɗowa, Nug eɗua hab aabppa ta, Nug Kayak, Nug dagom onig ɠagattag ele, Nug Nug eppeg naɗiap-ppa daatte.

Hibru 4:15

Ele amu ihinig mana mettak ikki danab, Nug am danab laa ihinignu oo ii dookkunu laa iitta. Hipunin haknu eeɗak kobol oh ihinigppa bette amu, amu ele nuhigppa beum, amge Nug hipunin laa iinab heum amunu, keeke nuhigppa beum bia ihinigppa beebe, ig gai-iitta bia daautut amu, Nug ihinignu oo doyak dookkunu elelenab daatte.

Hibru 7:26

Mana mettak ikki danab anam nug ig ehanigkkunu daakkunu am enanag. Nug am oppiaawak, ooppa kaliak laa iitta. Nug oppiak ele, hipunin danab bia ele iitta. Nug onig attannab tak daatte.

Hibru 9:26

Nug laa hetteb bia helo amu Nug haen kuɗum, Kayak wan heum uɗie, gemu haen imu ele guittak awawa daalo, amge anam iitta. Haen nakok malele, Kristus Nug haen laippu aakkuib wanppa na, hipunin uhuqkkunu nukka Nug beɗu mana mettak bia Kayak mettom.

Hibru 9:28

amubia Kristus Nug danab kuɗum dilag hipunin uhuqa madakkunu Nug nukka haen laippu aakkuib, Nug beɗu mana mettak bia Kayak mettom. Nug anam heum amu dimppa Nug baula eɗua uɗikku, amge hipunin uhuqkkunu iitta. Nug danab ameg mena daatteb ele amu eɗua diikkunu uɗikku.

1 Pita 1:18

Ag dootteb, ag mamelkad aɗi ib uug ele, nuhig meu am keeke hamu, ag ib amu dim lamitteg neum amu, Kayak Nug ag ib amunu qagaiettakppanu eɗua uhuqak ha mattom, amge Nug keeke nauhtte ele, gol, silwa bia, Nug amuppa ag qagaiettak amuppanu ii uhuqattom. Iitta!

1 Pita 1:20

Kayak Nug wan imu, nuhig keeke oh ii beum haenppa Nug tituanom, amge dimppa gog tak haen gamag imuppaib Kayak me uɗia, ag ehanadkkunu miag atiom.

1 Pita 2:22

Nug hipunin laa ii heum, oɗeppa nai hambuppuak ele ii dayom.

1 Pita 2:24

Ig hipuninnu begbeg maɗi nid daamtanu, ig Kayak dim lamidta genab tutukku hak danab daagnignu, Jesus Nug ihinig hipunin oh ad emaitakppa mawom. Genab, Jesus nug guittak awe, ig amuppa elele daattem.

1 Pita 3:18

Kristus Nug hipunin uhuqa mettaknu haen laippu aakku mauhom. Nug baula ii mauhma. Nug beɗuppa aab laa iitta, amge Nug ig danab, ig beɗunigppa aab ele, Nug ig omaikka, Kayak toppa wakkunu Nug mauhom. Ag heeg, Nug beɗu mauhom, amge Kayak Ouɗi Nug he, Nug eɗua hibaitta, bauklel daatte.

1 Jon 1:2

Kayak he, Kristus, Nug bauklel hanhannu diig amu, Nug miag atia be, ig Nug anidmut. Ig anidmut ele amu, ig ag amelagppa genabnab iikku madittem. Ig Kristusnu madittem. Nug anukka ig Mamenig Kayak ele daayya, Kayak he, Nug ihinigppa miag atia beum.

1 Jon 1:7

Amge Nug nukka amahlakppa daatte, amubia ig amahlakppa oittem dayeb amu, ig oh nug oo laippu ele nug doya dayakppa daattem, amu Nug Bekka Jesus, Nug tiig ihinig hipunin oh mihehe, ig oppiak daattem.

1 Jon 2:1

O nid naunau dahilad, ag hipunin ii hemananu da nai imu ye madattem. Amge laa nug hipunin hekku amu, ihinig ehanittak, Nug am gamag danab, Nug Mame toppa daatte. Nug Jesus Kristus; Nug am genab tutukku hak danab.

1 Jon 2:2

Nug ad emaitakppa mana mettak bia dayaya, ihinig eheɗ haknu nob nau Nug tiigppa iitta mekkunu he elele mettom. Amge Nug ihinignuib anam ii heum. Iitta. Nug danab ah wan atu ohppa daatteb ele amu, Nug amu dilagnu ele heum.

1 Jon 2:29

Ag Kristus Nug genab tutukku hak danab daatte dootteb amunu, ag imu ele doyeg! Danab ag genab tutukku hak kobolppa oitteb amu, ag aakku Kayak bekka daatte.

1 Jon 3:8

Satan nug digmakppanu uɗie, gemu ele hipunin hette amunu, aun nug hipuninppa oitte amu, nug Satannu danab daatte. Kayak Bekka Nug Satannu hak nau amu heeb nauhkkunu miag atia beum.