ᒋᔅᒐᔨᑕᑯᑕᒐᐅᓐ 7:3 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

³ “ᐊᑲᐎᔾ ᓂᓱᐅᓇᒋᑕᒄ ᐊᔅᒋᔾ ᑭᔭ ᒪᒃ ᐎᓂᐸᒄ ᑭᔭ ᒪᒃ ᒥᔅᑎᑯᒡ ᐸᑐᔅ ᒋ ᒋᔅᒋᓄᐛᒋᐃᒪᒐᓂ ᒋᓴᒪᓂᑐᐤ ᐅᑦ ᐊᐱᒋᐊᑭᓇ ᐅᔅᑲᑎᑯᐛᒡ᙮”

ᒋᔅᒐᔨᑕᑯᑕᒐᐅᓐ 7:3 ပူးပေါင်းရင်းမြစ်များ

ᐊᒃᓱᑕᔅ 12:13

ᐊᓐ ᒥᐧᒄ ᒪᒃ ᒋᑭ ᐅᒋᔅᒋᓄᐛᒋᒋᑭᓂᓇᐛᐤ ᒥᒋᐛᐱᒡ ᐊ ᑕᔭᒄ: ᐃᔅᐱ ᒪᒃ ᐛᐸᑎᒪᓇ ᒥᐧᒄ, ᒋᑭ ᐎᒪᔅᑲᑎᓇᐛᐤ, ᑭᔭ ᐊᐧᑯᐃᑕᔅᐱᓇᐅᓐ ᓇᒪᐎᔾ ᒋᑭ ᐅᑎᑎᑯᓇᐛᐤ ᒐᒋ ᓂᓱᐅᓇᒋᐃᑯᔭᒄ, ᐃᔅᐱ ᐅᑕᒪᐊᒪᓇ ᐃᒋᑉᑦ ᐊᔅᒋᔾ᙮

ᐊᒃᓱᑕᔅ 12:23

ᐊᓄᒡ ᒐ ᑎᐱᔅᑲᒡ ᒋᑭ ᐃᑐᑕᐤ ᑎᐸᔨᒋᒐᓱᐤ ᐊᓐᑕ ᒥᓯᐛ ᐃᒋᑉᑎᒡ ᒐᒋ ᓂᐸᐊᑦ ᒥᓯᐛ ᓂᔅᑎᒧᓴᓇ ᑲ ᓇᐸᓯᔪᐎᔨᒋ ᐅᑯᓯᒪᐛ ᐃᒋᑉᑦ ᐊ ᐃᑎᔅᑲᓇᓯᔨᒋ, ᐛᐸᑎᒥᔨᒐᓂ ᒥᐧᑯᔪᐤ ᐊᓐᑕ ᔅᑐᐧᑭᓇᑎᑯᒡ ᐊᑯ ᓇᒪ ᒋᑭ ᓇᐊᔨᒪᐤ ᐊᓐᒋᓇ ᑲ ᓂᐸᔪᐛᔨᒋ ᒐᒋ ᐱᑎᒂᑎᔨᑕᑯᐤ ᒐᒋ ᓂᐸᐃᑎᑕᑯᐤ᙮

ᒪᑎᔪᐤ 24:22

ᒋᓴᒪᓂᑐᐤ ᒪᒃ ᒋ ᐛᑕᔨᑎᒻ ᒐ ᐊᒍᓇᐧᒃ ᐊᓂᔭ ᐊ ᒋᓯᑲᔨᒡ ᐊᓐᑕ ᒋᐸ ᓂᓇᐧᑲᑕᔨᒧᓇᓄᔪᐤ᙮ ᐊᑲ ᐅᒋ ᐃᑐᑎᒧᑯᐱᓇ ᐅᔭ ᓇᒪ ᐊᐛᓐ ᒋᐸ ᐅᒋ ᓴᐳᔅᑭᒻ᙮ ᒥᒄ ᒪᒃ ᐊ ᒋᔅᒋᓯᑐᑐᐛᑦ ᐊᓂᔭ ᑲ ᐅᑎᓇᑦ ᐅᑦ ᐃᔨᒪ ᒋᓴᒪᓂᑐᐤ ᐊᐅᑯᓐ ᐊᓂᔪᐤ ᒐ ᐅᒋ ᐊᒍᓇᐧᒃ ᐊᓂᔭᔪᐤ ᐊ ᒋᓯᑲᔨᒡ᙮”

ᒪᑎᔪᐤ 24:31

ᐃᔅᐱ ᒪᒃ ᐸᑕᒂᒐ ᑲ ᒋᔄᐛᒥᑲᒡ ᐳᑕᒋᑭᓐ ᐊᑯ ᒐ ᐃᑎᓴᐛᑦ ᒋᓴᒪᓂᑐᐤ ᐅᑦ ᐊᓐᒋᓂᒪ ᒐᒋ ᒪᒧᓇᔨᒋ ᐊᓂᔭ ᐊᐛᔪᐛ ᑲ ᐅᑎᓇᑦ ᓇᐅᐎᔨᒡ ᐊ ᐅᑎᓂᔨᒡ ᑲ ᐅᒋᔨᒋ᙮ ᓇᔅᒡ ᐊ ᐃᔎᔭᔨᒡ ᐊᔅᒋᔪᐤ ᐊᓐᑕ ᒪᒃ ᑭᔭ ᓇᔅᒡ ᐊ ᐃᔎᔨᒡ ᒋᒋᒋᓯᑯᔪᐤ ᒋᑭ ᐅᑎᓇᔪᐛ᙮”

ᒠᓐ 12:26

ᐊᓐ ᒪᒃ ᐊᐛᓐ ᓂᔾ ᑲ ᐊᑐᔅᑯᐅᑦ ᓂᑭ ᐸᒋ ᓇᓴᐅᒄ᙮ ᐊᑯ ᒪᒃ ᒐ ᑕᑦ ᓂᑦ ᐊᐱᒋᐊᑭᓐ ᐊᓐᑕ ᒐ ᐊᑎ ᐃᑕᐅᒡ᙮ ᒋᑭ ᒋᔅᑕᔨᒥᑯᐤ ᓄᑕᐎᔭ ᐊᓐ ᐊᐛᓐ ᒐ ᐊᑐᔅᑯᐅᒂ᙮”

ᒠᓐ 3:33

ᐊᓐ ᐊᐛᓐ ᑲ ᐅᑎᓂᒺᑦ ᑕᓐ ᐊ ᐃᔅᒋᔄᔨᒋ ᐊᑯᑕ ᐊ ᓄᑯᓂᔨᒡ ᐊ ᑕᑈᑕᐧᒃ ᒋᓴᒪᓂᑐᐛ ᐊ ᑕᑈᐅᒐᔨᑕᑯᓯᔨᒋ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 6:22

ᐊᓄᒡ ᒪᒃ ᐎ, ᔅᒋ ᐎᐧᑯᒋᐃᑯᐅᓐ ᒥᒋᑥᐅᓂᒡ ᐅᒡ ᒋᓴᒪᓂᑐᐤ ᐊᑯ ᒐᒋ ᐅᑦ ᐊᐱᒋᐊᑭᓂᑐᑕᔅᒃ᙮ ᐊᑯ ᒪᒃ ᓇᔅᒡ ᒋᓴᒪᓂᑐᐤ ᐊ ᑕᑦ ᐊᑯ ᐊ ᐃᓯ ᑎᐸᓂᔅᑕᒡ ᒋᐱᒪᑎᓯᐅᓐ, ᒋᑭ ᐊᑎ ᐅᑎᑕᓐ ᒪᒃ ᑲᒋᒡ ᐱᒪᑎᓯᐅᓐ᙮

ᒋᔅᒐᔨᑕᑯᑕᒐᐅᓐ 13:16

ᐅ ᒪᒃ ᒥᒋ ᐊᐛᓯᔅ ᒋ ᐊᔨᐧᑭᒥᐊᐤ ᒥᓯᐛ ᐊᐛᔪᐛ ᒐᒋ ᒋᔅᒋᓄᐛᒋᓯᓇᐛᑭᓄᔨᒋ ᐅᒥᔪᓂᔨᒡ ᒥᑎᒋᒡ ᒪᒃ ᐅᔅᑲᑎᑯᐎᒡ, ᒥᓯᐛ ᐊᓂᔭ ᑲ ᒋᔅᑕᔨᑕᑯᓯᔨᒋ ᑭᔭ ᐊᓂᔭ ᐊᑲ ᒋᔅᑕᔨᑕᑯᓯᔨᒋ, ᐊᓂᔭᔪᐛ ᑲ ᐛᔪᑎᓯᔨᒋ ᑭᔭ ᐊᓂᔭ ᑲ ᒋᔅᑎᒪᑎᓯᔨᒋ, ᐊᓂᔭᔪᐛ ᑲ ᐅᑦ ᐊᐱᒋᐊᑭᓂᑐᑐᐛᑭᓄᔨᒋ ᑭᔭ ᐊᓂᔭ ᐊᑲ ᐅᑦ ᐊᐱᒋᐊᑭᓂᑐᑐᐛᑭᓄᔨᒋ᙮

ᒋᔅᒐᔨᑕᑯᑕᒐᐅᓐ 13:17

ᓇᒪ ᒪᒃ ᐊᐛᓐ ᐅᒋ ᐊᑕᐛᐤ ᑭᔭ ᓇᒪ ᐊᐛᓐ ᐅᒋ ᐅᑎᓇᓱᐤ ᒧᔭᒻ ᐊᑲ ᐅᒋ ᒋᔅᒋᓄᐛᒋᓯᓇᐛᑭᓄᒂ᙮ ᐊᓂᔭ ᒪᒃ ᐊᓐᑕ ᑲ ᒋᔅᒋᓄᐛᒋᓯᓇᐛᑭᓄᐎᒡ, ᐊᓂᔭ ᐊ ᐃᓯᓂᐧᑲᓱᔨᒋ ᐊᓂᔭ ᒥᒋ ᐊᐛᓯᓴ ᑭᔭ ᒪᒃ ᐊᓂᔭ ᐅᑦ ᐊᒋᑕᓱᐅᓂᔪᐛ ᒋ ᒥᓯᓇᑕᔪᐤ ᐊᓐᑕ᙮

ᒋᔅᒐᔨᑕᑯᑕᒐᐅᓐ 14:1

ᐃᔅᐱ ᒥᓐ ᑲ ᐃᑕᐱᔭᓐ ᓂᒋ ᐛᐱᒪᐤ ᐊᓐ ᒪᔭᑕᓂᔅ ᐊᓐᑕ ᐊᓂᔭ ᐱᔅᑯᑎᓇᔪᐤ ᓴᐃᔭᓐ ᑲ ᐃᓯᓂᐧᑲᑕᔨᒡ ᐊ ᓂᐳᐅᑦ᙮ ᐸᐃᑯ ᒥᑕᓯᒥᑎᓄᐤ ᐊᓱ ᓇᐎᔪᐤ ᐊᓱ ᓇᐛᐤ ᒐᓯᐱᔪᐤ ᒋ ᑕᑎᓯᔪᐛ ᐊᐛᔪᐛ ᐊᓐᑕ ᐊ ᑕᑦ᙮ ᐊᓂᔭᔪᐛ ᒪᒃ ᐊᐛᔪᐛ ᐅᔅᑲᑎᑯᐎᒡ ᒋ ᒥᓯᓇᑕᔪᐤ ᐊᓂᔭᔪᐛ ᒪᔭᑕᓂᓴ ᐅᑦ ᐃᓯᓂᐧᑲᓱᐅᓂᔪᐤ ᑭᔭ ᒋᓴᒪᓂᑐᐛ ᐅᑕᐎᒪᐛ ᐅᑦ ᐃᓯᓂᐧᑲᓱᐅᓂᔪᐤ᙮

ᒋᔅᒐᔨᑕᑯᑕᒐᐅᓐ 14:9

ᒥᓐ ᑯᑎᒃ ᐊᓐᒋᓐ ᒋ ᐅᒋ ᐱᒥᔭᐤ ᓇᔅᒡ ᐊ ᐃᔅᐸᐅᑦ ᐃᔅᐱᒥᒡ ᐊᓐᑕ ᐊ ᐃᓯ ᐱᒥᔭᑦ᙮ ᐊᑯ ᒪᒧᐤ ᓂᔅᑐ ᐊᓐᒋᓐᒡ ᒂ ᓄᑯᓯᒡ᙮ ᐊᑯ ᐅ ᓂᔅᑐ ᐊ ᑕᑦ ᐊᓐᒋᓐ ᒂ ᐃᔅᒋᔄᑦ ᐊ ᒋᔄᐛᑦ, “ᐊᓐ ᐊᐛᓐ ᒐ ᐊᔭᒥᐊᔅᑐᐛᒂ ᐊᓂᔭᔪᐛ ᒥᒋ ᐊᐛᓯᓴ ᑭᔭ ᐊᓂᔭᔪᐛ ᒥᓂᑐᐧᑲᓇ, ᒧᔭᒻ ᐊᓐ ᒥᒋ ᐊᐛᓯᔅ ᐊ ᐃᓯᓇᑯᓯᑦ ᑲ ᐃᓯᐊᑭᓄᔨᒋ ᑭᔭ ᒐ ᐱᔅᑎᓂᓱᒂ ᒐᒋ ᒋᔅᒋᓄᐛᒋᐊᑭᓄᐅᑦ ᐅᔅᑲᑎᑯᒡ ᒪᒃ ᐅᑎᒋᒡ,

ᒋᔅᒐᔨᑕᑯᑕᒐᐅᓐ 19:2

ᐛᔅ ᒥᓯᐛ ᑕᐱᑐᐤ ᐃᓯ ᑎᐸᔅᑯᓇᐤ ᐊᐛᔪᐛ ᑭᔭ ᐊᓐ ᐊ ᐃᑕᔨᑕᑯᓂᔨᒡ ᒐᒋ ᐃᓯ ᑎᐸᔅᑯᓇᑭᓄᔨᒋ, ᐊᐅᑯᓐ ᐊ ᐃᓯ ᑎᐸᔅᑯᓇᑦ᙮ ᒋ ᑎᐸᔅᑯᓇᐤ ᒪᒃ ᐊᓂᔭᔪᐛ ᑲ ᒥᔪ ᒋᔅᒐᔨᒪᑭᓄᔨᒋ ᐱᓯᒂᑎᓯᔎᐛ᙮ ᒥᒐᑦ ᐊᐛᔪᐛ ᐅᑕ ᐊᔅᒋᒡ ᒋ ᐎᔭᓯᐊᐤ ᐅ ᐃᔎᐤ ᑕᓐ ᑲ ᐃᑕᑎᓯᑦ᙮ ᒋᓴᒪᓂᑐᐤ ᒋ ᐛᐛᓯᐊᐤ ᐊᓂᔭ ᐱᓯᒂᑎᓯᔎᐛ ᐊᒋ ᓂᐸᐊᔨᒋ ᐊᓂᔭᔪᐛ ᒋᓴᒪᓂᑐᐛ ᑲ ᐊᑐᔅᑯᐛᔨᒋ᙮”

ᒋᔅᒐᔨᑕᑯᑕᒐᐅᓐ 20:4

ᐊᑯ ᒥᓐ ᑯᑎᒡ ᒐᒂᓐ ᒂ ᐛᐸᑎᔨᑯᔭᓐ᙮ ᒋᓴᐅᒋᒪᐤ ᑕᑎᐳᐛᑭᓇ ᓂᒋ ᐛᐸᑕᓐ᙮ ᒋ ᑕᐅᒡ ᒪᒃ ᐊᓐᒡ ᑲ ᐊᐱᒡ ᐊᓂᔭᔪᐛ ᒋᓴᐅᒋᒪᐤ ᑕᑎᐳᐛᑭᓇ᙮ ᒋ ᒥᔭᑭᓄᐎᒡ ᐅᒡ ᒐᒋ ᑎᐸᔅᑯᓂᒐᒡ᙮ ᐊᑯ ᒂ ᐛᐱᒥᒂᐤ ᐊᓐᒡ ᐊᒐᐧᑯᒡ ᑲ ᒋᒥᒂᐛᑭᓄᐛᑯᐱᓇ ᐊᓂᔭ ᐅᒋ ᐊᒋ ᑎᐸᒋᒪᒡ ᒋᓴᓴ ᑕᓐ ᑲ ᐃᑎᔨᒋ ᑭᔭ ᐊᒋ ᐛᐎᑎᒺᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮ ᓇᒪ ᐅᒋ ᐊᔭᒥᐊᔅᑐᐛᐛᑯᐱᓇ ᐎᔨᐛᐤ ᐊᓂᔭᔪᐛ ᒥᒋ ᐊᐛᓯᓴ ᒪᒃ ᐊᓂᔭᔪᐛ ᒥᓂᑐᐧᑲᓇ ᒧᔭᒻ ᐊᓐ ᒥᒋ ᐊᐛᓯᔅ ᐊ ᐃᓯᓇᑯᓯᑦ ᑲ ᐃᓯᐊᑭᓄᔨᒋ᙮ ᓇᒪ ᑭᔭ ᐅᒋ ᐊᔭᐛᐅᒡ ᐊᓂᔭ ᐅᒋᔅᒋᓄᐛᒋᒋᑭᓂᔪᐤ ᐅᔅᑲᑎᑯᐛᒡ ᒪᒃ ᐅᒥᔪᓄᐛᒡ᙮ ᑲᐤ ᒋ ᐱᒪᑎᓯᐅᒡ ᐅᒡ, ᐊᑯ ᑲ ᑕᑎᐱᒡ ᐊᓂᔭᔪᐛ ᒋᓴᐅᒋᒪᐤ ᑕᑎᐳᐛᑭᓇ᙮ ᒋ ᐎᒋ ᒋᓴᐅᒋᒪᐅᒪᐅᒡ ᒪᒃ ᒋᓴᓴ ᐸᐃᒂᐤ ᒐᓯᐱᔪᐛ ᐱᐳᓇ ᐃᔅᐱᔅ᙮

ᒋᔅᒐᔨᑕᑯᑕᒐᐅᓐ 22:4

ᐛᒋᒡ ᒋᑭ ᐛᐸᑎᒥᔪᐛ ᐅᑕᔅᑎᒥᐧᒄ᙮ ᐅᑦ ᐃᓯᓂᐧᑲᓱᐅᓐ ᒋᑭ ᒥᓯᓇᑕᔪᐤ ᐅᔅᑲᑎᑯᐎᒡ᙮

ᒋᔅᒐᔨᑕᑯᑕᒐᐅᓐ 6:6

ᐊᑯ ᒂ ᐸᑎᒪᓐ ᐸᑕᑯᓱᐅᓐ ᒧᔭᒻ ᐊᐛᓐ ᐊ ᐃᔨᒥᑦ ᐊ ᐃᑎᑕᒂᒡ ᒪᒂᒡ ᐊᓐᒡ ᓇᐤ ᑲ ᐱᒪᑎᓯᒡ ᐊᐛᓐᒋ ᐊ ᑕᒡ ᐊ ᐅᑎᑕᑯᒡ᙮ ᐊᓐ ᐊᐛᓐ ᑲ ᐃᔨᒥᑦ ᒋ ᐃᑕᐤ, “ᐸᐃᒄ ᒋᓯᑲᐛ ᐊᔅᐱᔅ ᐊᑐᔅᒐᑦ ᐊᐛᓐ ᒥᒄ ᓂᓱ ᑎᐸᐸᑲᐃᑭᓇ ᐸᒂᓯᑭᓇ ᒋᑭ ᓴᑯᑕᐛᐤ ᒪᒃ ᐊᓱᑕᒡ ᑎᐸᐸᑲᐃᑭᓇ ᐊᔪᒥᓇ᙮ ᒥᒄ ᒪᒃ ᐊᑲᐎᔾ ᐎ ᓂᓱᐅᓇᒋᑕ ᐊᓐ ᐱᒥᔾ ᑭᔭ ᐊᓐ ᓱᒥᓇᐳᔾ᙮”

ᒋᔅᒐᔨᑕᑯᑕᒐᐅᓐ 7:1

ᐃᔅᐱ ᑲ ᐃᔅᐱᔨᒡ ᐅ ᑲ ᐃᓯ ᐛᐸᑎᔨᑯᐅᔭᓐ, ᐊᑯ ᒂ ᐛᐱᒥᒂᐤ ᓇᐤ ᐊᓐᒋᓐᒡ ᐊ ᓂᐳᐅᒡ ᒥᓯᐛ ᐊᓐᑕ ᓇᐅᐎᒡ ᐊ ᐅᑎᓂᔨᒡ᙮ ᒋ ᐊᑯᔅᒋᑲᐳᐅᒡ ᒐ ᐊᑲ ᒋ ᔪᑎᓂᔨᒡ ᐊᓐᑕ ᐊᔅᒋᒡ ᐃᔅ ᑭᔭ ᒪᒃ ᐊᓐᑕ ᐎᓂᐸᑯᒡ ᐃᔅ ᑭᔭ ᒪᒃ ᐊᓐᑕ ᒥᔅᑎᒂ ᐃᔅ ᐊ ᑕᔨᒋ᙮

ᒋᔅᒐᔨᑕᑯᑕᒐᐅᓐ 7:2

ᒥᓐ ᒪᒃ ᑯᑎᒃ ᐊᓐᒋᓐ ᓂᒋ ᐛᐱᒪᐤ ᐊᓐᑕ ᐛᐱᓄᑕᒡ ᐊ ᐅᑐᑕᑦ᙮ ᒋᓴᒪᓂᑐᐛ ᐅᒋᔅᒋᓄᐛᒋᒋᑭᓂᔪᐤ ᒋ ᐸᒋ ᑕᐧᑯᓂᒺᐤ᙮ ᒋ ᒋᔄᐛᐤ ᐊ ᑕᑈᑕᑦ ᐊᓂᔭᔪᐛ ᓇᐤ ᐊᓐᒋᓇ ᑲ ᒥᔭᑭᓄᔨᒋ ᒐᒋ ᓂᓱᐅᓇᒋᑕᔨᒋ ᐊᔅᒋᔪᐤ ᑭᔭ ᐎᓂᐸᑯᔪᐤ᙮ ᒋ ᐃᑕᐤ ᐊᓂᔭᔪᐛ ᐊᓐᒋᓇ,

ᒋᔅᒐᔨᑕᑯᑕᒐᐅᓐ 9:4

ᒋ ᐃᑕᑭᓄᐎᒡ ᒐ ᐊᑲ ᒋ ᓂᓱᐅᓇᒋᑕᒡ ᒥᔅᑯᓱᐛ ᐊᓐᑕ ᐊᔅᒋᒡ ᑭᔭ ᒥᔅᑎᒂ ᒐ ᐊᑲ ᒋ ᓂᓱᐅᓇᒋᐊᒡ ᑭᔭ ᑕᓐ ᐊ ᐃᓯ ᓂᑕᐅᒋᓂᔨᒋ ᓂᑕᐅᒋᑕᑭᓇ᙮ ᒥᒄ ᐊᓂᔭᔪᐛ ᐊᐛᔪᐛ ᐊᑲ ᐊᔭᔨᒋ ᒋᓴᒪᓂᑐᐛ ᐅᒋᔅᒋᓄᐛᒋᒋᑭᓂᔪᐤ ᐊᓐᑕ ᐅᔅᑲᑎᑯᐎᒡ, ᐊᐅᑯᓂ ᐊᓂᔭᔪᐛ ᑲ ᒥᔭᑭᓄᐎᒡ ᒐᒋ ᐎᔭᔅ ᐃᑐᑐᐛᒡ᙮