14 ᐅ ᒋᓴᒪᓂᑐᐤ, ᑲ ᒋᔅᑕᔨᒧᒡ ᓂᒋ ᐱᓯᑯᔅᑕᑯᒡ, ᑭᔭ ᐊ ᒪᐛᒋᐃᑐᒡ ᑲ ᐊᒂᑎᓯᒡ ᐃᔪᒡ ᒋ ᓇᓂᑐᐛᔨᒪᐅᒡ ᓂᑦ ᐊᒐᒂ; ᓇᒪ ᒪᒃ ᒋ ᐅᒋ ᑎᔨᑯᒡ ᐅᑎᔅᑯᐤ ᐅᔅᒋᓯᑯᐛᒡ᙮
ᒋ ᐃᔅᒋᔄᐤ ᐅᑕᐃᒡ, “ᒋᓴᒪᓂᑐᐤ ᒋ ᐅᓂᒋᔅᒍᐤ: ᑲᓱᐤ, ᓇᒪ ᓂᑕ ᒋᑭ ᐛᐸᑎᒻ᙮”
ᒐᒂᔪᐤ ᐛᒋ ᒪᔭᔨᒪᑦ ᐅᒥᒋᑥᐤ ᒋᓴᒪᓂᑐᐛ ? ᒋ ᐃᔅᒋᔄᐤ ᐅᑕᐃᒡ, “ᓇᒪᐎᔾ ᓂᑭ ᐊᓏᔨᒥᒄ᙮”
ᐅᒥᒋᑥᐤ, ᐊ ᒋᔅᑕᔨᒧᓇᑯᓯᑦ, ᓇᒪᐎᔾ ᓇᓂᑐᐛᔨᒪᐤ ᒋᓴᒪᓂᑐᐛ: ᒋᓴᒪᓂᑐᐛ ᓇᒪᐎᔾ ᓇᔅᒡ ᑕᔪᐛ ᐅᒥᑐᓇᐃᒋᑭᓂᒡ᙮
ᑲ ᒋᔅᑕᔨᒥᓱᒡ ᓇᔅᒡ ᓂᒋ ᒥᒪᔭᔨᒥᑯᒡ: ᐃᔭᐱᒡ ᒪᒃ ᓇᒪ ᓂ ᐅᒋ ᐳᓂᑕᓐ ᒋᑦ ᐃᑎᓱᐛᐅᓐ᙮
ᐅᒋᔅᑕᔨᒧᐅᒡ ᓂᒋ ᑭᑭᒋᔭᐛᑕᒋᒥᑯᒡ; ᒥᒄ ᓂᑭ ᑭᓄᐛᔨᑕᓐ ᒋᐎᓱᐛᐅᓇ ᒥᓯᐛ ᓂᑕᐃᒡ᙮
ᑲ ᒋᔅᑕᔨᒥᓱᒡ ᓂᒋ ᒧᓇᐊᒪᑯᒡ ᐛᑎᑯᓇ, ᐊ ᐊᑲ ᐃᔅᒋᔄᒥᑭᒡ ᒋᐎᓱᐛᐅᓐ᙮
ᒥᓯᐛ ᑲ ᒥᒐᑎᓯᒡ ᓇᒪ ᐊ ᐅᓂᔅᑐᑎᒧᓄᐅᒡ ? ᑲ ᒧᐛᒡ ᓂᑦ ᐃᔨᒪ ᐊ ᐃᓯ ᒧᐛᒡ ᐸᒂᓯᑭᓇ, ᐊᑲ ᑭᔭ ᓇᓂᑐᐛᔨᒪᒡ ᑎᐸᔨᒋᒐᓱᐛ᙮
ᑲ ᒋᔅᑕᔨᒧᒡ ᓂᒋ ᑕᐱᒂᑎᑯᒡ, ᑭᔭ ᓴᔅᑎᒂᔭᐱᔭ ᒋ ᐃᑕᐊᐅᒡ; ᒋ ᑕᔅᑲᑕᓇᐅᒡ ᐊᐃᐱᔭ ᐱᒧᑕᔅᑭᓇᒡ; ᒋ ᐊᔅᑕᐅᒡ ᐊᔅᒋᐧᑯᒪᓇ ᐊ ᐎ ᑕᐧᑯᒧᐃᒡ᙮
ᐅᓂᑐᑎᒧᐅᓄᐛᐤ ᐅᒥᒋᑥᐅᒡ ᓂᐎᑎᒪᑯᓐ ᓂᑕᐃᒡ, “ᐊᑲ ᐊ ᑎᒂᓂᔨᒡ ᐅᔅᒋᓯᑯᒡ ᒋᓴᒪᓂᑐᐛ ᐅᓇᓂᒋᔅᑕᑯᓱᐅᓂᔪᐤ᙮”
ᐊᑯᔅ ᐊᑲᐎᔾ ᒋᔅᑕᔨᒧᐤ ᒥᓯᑦ ᓂᑭ ᐸᒋ ᐎᔭᔅᑐᑕᑯᓐ, ᐊᑲ ᑭᔭ ᐅᑎᒋᐛᐤ ᐅᒥᒋᑥᐅᒡ ᓂᑭ ᐊᒋᐸᔨᐃᑯᐛᓐ᙮
ᐛᔅ ᒪᓐᑕᐅᒡ ᓂᒋ ᐱᓯᑯᔅᑕᑯᒡ ᑭᔭ ᐅᑦ ᐊᔨᒥᐃᐛᐅᒡ ᓇᓂᑐᐛᔨᒪᐅᒡ ᓂᑦ ᐊᒐᒂ: ᓇᒪᐎᔾ ᐅᒡ ᐊᔭᐅᒡ ᒋᓴᒪᓂᑐᐛ ᒐᒋ ᐅᑎᔅᑲᐎᔅᑲᑯᒡ᙮
ᑲ ᒪᔭᑎᓂᔨᒡ ᒋᑭ ᑎᐸᒧᐛᐤ ᑲ ᐛᐧᑲᓯᔨᒋ: ᓂᓱᐅᓇᒋᐃᒡ ᒋᑕᑈᐅᓂᒡ᙮