19 ᒋᑯᐃᔅᑯᑕᑎᓯᐅᓐ ᑭᔭ, ᐅ ᒋᓴᒪᓂᑐᐤ, ᓇᔅᒡ ᐊ ᐃᔅᐸᔨᑕᒂᒡ, ᑲᒋ ᐃᑐᑎᒥᓐ ᒋᒋ ᒐᒂᓇ: ᐅ ᒋᓴᒪᓂᑐᐤ, ᐊᐛᓐ ᓇᔅᐱᑕᔅᒃ ?
ᐊᑯ ᐅ ᒋᔅᒐᔨᑎᒧᐅᓐ ᐅᓴᒻ ᒪᒥᔅᑲᑕᔨᑕᑯᓐ ᓂᔾ ᐅᒡ: ᐃᔅᐸᔨᑕᑯᓐ, ᓇᒪᐎᔾ ᓂᑭ ᒋ ᑕᐱ ᒋᔅᒐᔨᑕᓐ᙮
ᒥᓯᐛ ᓂᔅᑭᓇ ᒋᑭ ᐃᔅᒋᔄᒪᑭᓇ, “ᑎᐸᔨᒋᒐᓱᐤ, ᐊᐛᓐ ᓇᔅᐱᑕᔅᒃ, ᑲ ᐎᒂᒋᐊᑦ ᐅᒋᔅᑎᒪᓱᐤ ᐊᓂᔭ ᐅᒋ ᐊᔪᐛᒃ ᑲ ᒥᔅᑯᐅᓯᔨᒋ, ᓂᐦᐃ, ᐅᒋᔅᑎᒪᓱᐤ ᑭᔭ ᐅᒥᓇᓯᐤ ᐊᓂᔭ ᐅᒋ ᑲᒋ ᒥᔅᑭᒥᑯᑦ ?”
ᑕᑈ ᒋᔅᑕᔨᑕᑯᓐ ᒋᓴᒋᐃᐛᐎ ᒋᓴᐛᑎᓯᐅᓐ, ᐅ ᒋᓴᒪᓂᑐᐤ ! ᐊᐅᒄ ᐅᒡ ᐃᔪᒡ ᐅᑦ ᐊᐛᓯᒥᓱᐛᐛ ᒪᒥᓯᑐᑎᒥᔪᐛ ᐊ ᐊᑯᓇᐎᔨᓐ ᒋᑎᑎᐧᑭᓇ᙮
ᐛᔅ ᒋᓱᐛᔨᒋᒐᐅᓐ ᒥᔅᑎ ᐃᑕᔨᑕᑯᓐ ᒋᓯᑯᒡ ᐃᓯ, ᑭᔭ ᒋᑕᑈᐅᓐ ᒋᓯᑯᒡ ᐃᓯ᙮
ᒋᑭ ᐎ ᒪᒥᒋᒪᑭᓄᐤ ᑕᐸᔨᒋᒐᓯᐅᑦ ᒋᓴᒪᓂᑐᐤ, ᐅᒋᓴᒪᓂᑐᒪ ᐃᔅᕋᐃᓪ, ᐎᔾ ᒥᒄ ᑲ ᒪᒪᑕᐤ ᐃᔨᑎᑦ᙮
ᐊ ᑕᓯᒡ ᒥᓂᑐᐅᒡ ᓇᒪᐎᔾ ᐛᐛᒡ ᐸᐃᒄ ᒋ ᓂᔅᐱᑕᒄ, ᐅ ᑎᐸᔨᒋᒐᓱᐤ; ᓇᒪ ᑎᒂᓐ ᑭᔭ ᐊᑐᔅᒐᐅᓐ ᒧᔭᒻ ᒋᔾ ᒋᑦ ᐊᑐᔅᒐᐅᓐ᙮
ᑎᐸᔨᒋᒐᓱᐤ, ᒐᒄ ᒥᓂᑐᐧᑲᓐ ᐊ ᑕᑦ ᒧᔭᒻ ᒋᔾ, ᒋᔅᑕᔨᑕᑯᓯᓐ, ᐊᐛᓐ ᐊ ᑕᑦ ᒐᒋ ᐃᑐᑕᐧᒃ ᒪᒥᔅᑲᒡ ᒐᒂᔪᐛ ᒧᔭᒻ ᒋᔾ !
ᐛᔅ ᒋᓴᒪᓂᑐᐤ ᑲ ᓱᐧᑲᑎᓯᑦ ᒪᒥᔅᑲᒡ ᓂᒋ ᐃᓯ ᒥᔪᑐᑎᒪᒄ ᑭᔭ ᒋᔅᑕᔨᑕᑯᓂᔪᐤ ᐅᑦ ᐃᓯᓂᐧᑲᓱᐅᓐ᙮