11 ᓂᒋ ᐃᔅᒋᔄᓐ ᓯᔅᒋᑯᒡ, “ᒥᓯᐛ ᐃᔪᒡ ᑭᑭᒋᔭᐅᒡ᙮”
ᒥᓯᐛ ᑕᑐᐤ ᐊ ᐃᑎᓯᒡ ᑭᑭᒋᔭᒪᐅᒡ ᐎᒋ ᐃᔪᐛᐛ; ᒪᒥᒋᒧᐛᐤ ᒥᑐᓂᒡ ᑭᔭ ᑭᑭᒋᐊᐅᓂᒡ ᐅᒋ ᐃᔨᒧᐅᒡ᙮
ᑎᐸᔨᒋᒐᓱᐤ ᒋᑭ ᒥᓂᓯᒻ ᒥᓯᐛ ᒪᒥᒋᒧ ᒥᑐᓇ, ᑭᔭ ᒥᑕᔨᔨᔪᐤ ᑲ ᐊᔭᔨᒧᒥᑭᓂᔨᒡ ᒋᔅᑕᔨᒧᐤ ᒐᒂᔪᐛ᙮
ᐛᔅ ᓯᔅᒋᑯᒡ ᓂᒋ ᐃᔅᒋᔄᓐ, “ᓂᒋ ᒥᓂᓱᑯᐅᓐ ᒐ ᐊᑲ ᒋ ᐛᐱᒥᔨᓐ᙮” ᐃᔭᐱᒡ ᒪᒃ ᔅᒋ ᐸᑕᓐ ᓂᒪᐅᓐ ᐃᔅᐱ ᑲ ᒪᑕᑕᓐ᙮
ᒐᔅᑎᓇᔅ ᐃᔪᒡ ᑲ ᐊᐱᔅᑕᔨᑕᑯᓯᒡ ᓂᑐᐎᔾ ᐃᑕᔨᑕᑯᓱᐅᒡ, ᑭᔭ ᐃᔪᒡ ᑲ ᐃᔅᐸᔨᑕᑯᓯᒡ ᑭᑭᒋᔭᐅᒡ: ᒐᒋ ᑎᐸᔅᑯᓇᑭᓄᐅᒡ, ᐅᔅᑕ ᔭᐧᑭᓱᐅᒡ ᐃᔅᐱᔅ ᓂᑐᐎᔾ ᒐᒂᓐ᙮
ᓇᒪᐎᔾ ᑭᑈ, ᓇᒪ ᓇᔅᒡ ᒋᑭ ᒋ ᐃᓯᓇᑯᓂᔪᐤ ᐊᑲ ᒪᒧᔭᒻ ᒐᒋ ᐃᑎᑦ ᒋᓴᒪᓂᑐᐤ᙮ ᑕᑈᐤ ᐎᔾ ᒋᓴᒪᓂᑐᐤ ᐊᑎ ᒥᓯᐛ ᐊᐛᓐ ᐊ ᑭᑭᒋᔭᑦ᙮ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐎᔾ ᒋᓴᒪᓂᑐᐤ ᐊ ᐊᔨᒧᒪᑭᓄᐅᑦ, ᐃᔨᒥᓇ ᒥᓯᐛ ᐊᐛᓐ ᒋᑭ ᒋᔅᒐᔨᑎᒻ ᐊ ᑕᑈᔨᓐ᙮ ᐊᑯ ᒪᒃ ᒪᒥᓯᒥᑯᔨᓇ ᐊ ᐃᑎᑯᔨᓐ ᐊ ᒥᒋᑐᑎᒥᓐ ᒋᑭ ᓄᑯᓐ ᑕᑈ ᐊᑲ ᐅᒋ ᐃᑐᑎᒥᓐ ᑕᓐ ᐊ ᐃᓯ ᒪᒥᓯᒥᑯᔨᓐ᙮
