23 ᐃᔅᐱ ᒋᓴᔅ ᑲ ᐱᒐᐛᑦ ᐅᒋᒪᐛ ᐎᒋᔨᒡ, ᒋ ᐛᐱᒪᐤ ᐊᓂᔭ ᒋᑐᒐᐎᔪᐛ ᑭᔭ ᐃᔪᐛ ᐊ ᓂᓇᐧᑲᑥᐅᑎᒥᔨᒋ᙮
ᐊ ᑕᑈᑎᑐᒡ, ᐊ ᐃᔅᒋᔄᒡ, ‘ᐊ ᓂᐳᐅᓇᓄᐅᒡ ᓂᒋ ᐎ ᐃᓯ ᒪᑐᐛᓇᓐ, ᐊ ᒋᔍᐛᐱᒐᔭᒡ ᐊ ᑎᔭᒡ, ᓇᒪ ᒪᒃ ᒋ ᐅᒋ ᓂᒥᓇᐛᐤ, ᑭᔭ ᓂᒋ ᓂᑭᒧᓇᓐ ᐊ ᒋᔅᑎᒪᒋᑕᒂᒋ ᓂᑭᒧᐅᓇ, ᓇᒪ ᒪᒃ ᒋ ᐅᒋ ᒪᓇᐛᐤ᙮’
ᒪᐅ ᐊ ᐃᑕᔨᑕᑯᓯᒡ᙮ ᒧᔭᒻ ᐊᐛᓯᒡ ᐊᓐᑕ ᐊ ᒪᑐᐛᒡ ᐎᐎᑎᒥᒡ ᐊᑲ ᒪᒃ ᒋ ᓂᓇᐊᔨᑎᒥᐃᑐᒡ ᑕᓐ ᐛ ᐃᓯ ᒪᑐᐛᒡ᙮ ᐊ ᑕᑈᑎᑐᒡ, ᐊ ᐃᔅᒋᔄᒡ, ‘ᐊ ᓂᐳᐅᓇᓄᐅᒡ ᓂᒋ ᐎ ᐃᓯ ᒪᑐᐛᓇᓐ, ᐊ ᒋᔍᐛᐱᒐᔭᒡ ᐊ ᑎᔭᒡ, ᓇᒪ ᒪᒃ ᒋ ᐅᒋ ᓂᒥᓇᐤ, ᑭᔭ ᓂᒋ ᓂᑭᒧᓇᓐ ᐊ ᒋᔅᑎᒪᒋᑕᒂᒋ ᓂᑭᒧᐅᓇ ᓇᒪ ᒪᒃ ᒋ ᐅᒋ ᒪᓇᐛᐤ᙮’
ᐃᔅᐱ ᒪᒃ ᒧᓯᑕᑦ ᑈᓪ ᑕᓐ ᐊ ᐃᔅᐱᔨᒡ ᒋ ᓂᑎᒋᐛᐤ, ᐊᑯ ᒂ ᐅᒋᒋᐧᑯᓂᐱᔪᐅᑦ ᐅᐱᒪ ᐊ ᑕᔨᒋ ᐊᓂᔭ ᓇᐸᓴ ᑭᔭ ᒂ ᐊᑎ ᐛᐅᒋᑯᐃᐛᐱᑕᑦ᙮ ᐊᑯ ᒂ ᐃᔅᒋᔄᑦ, “ᐊᑲᐎᔾ ᐊᔨᒪᔨᑎᒧᒄ, ᓇᒪ ᓂᐳᐤ᙮”
ᐱᑕᕐ ᒂ ᐱᓯᑯᑦ, ᒂ ᐎᒐᐛᑦ ᐊᓂᔭ ᓇᐸᐛ᙮ ᐃᔅᐱ ᒪᒃ ᑕᑯᓯᒡ ᓇᑕ, ᒋ ᐃᑐᑕᐊᑭᓄᐤ ᐊᓐᑕ ᐃᔅᐱᒥᑎᑯᒡ ᐊᓐᑕ ᐊ ᑎᑯᓂᔨᒡ ᐊᓂᔭ ᒥᔭᔪᐤ᙮ ᒋ ᑕᐅᒡ ᐊᓐᑕ ᑲ ᐸᐃᑯᓯᒡ ᐃᔎᐅᒡ, ᒋ ᑕᐱᑐᑲᐳᔅᑐᐛᐅᒡ ᐱᑕᕋ ᐊ ᒪᒡ ᑭᔭ ᐊ ᐛᐸᑎᔭᒡ ᐱᒍᐎᔭᓇ ᑭᔭ ᐊᑯᐸ ᐊᒋ ᐅᓯᑕᒪᑯᒡ ᐊᓂᔭᔪᐛ ᐃᔎᐛ ᑕᐸᑕᔨᒋ᙮
ᓇᒪ ᓂᑕ ᒥᓐ ᒋᑭ ᐅᒋ ᐸᑕᑯᓐ ᐊᓐᑕ ᐊ ᑕᔨᓐ ᐸᐱᓗᓐ, ᐊ ᒥᔪᑕᑯᑕᒡ ᐊᓐᒡ ᐊᐛᓐᒋ ᑲ ᒪᑐᐛᒡ ᐊᓂᔭᔪᐛ ᑲ ᒥᔪᑕᑯᓂᔨᒋ ᒋᔍᐛᐱᒋᑭᓂᓴ᙮ ᓇᒪ ᓂᑕ ᒥᓐ ᒋᑭ ᐅᒋ ᐸᑕᑯᓱᐅᒡ ᐊᓐᒡ ᓂᓇᐧᑯᐤ ᒐᒂᔪᐛ ᐊ ᒥᔪᑕᑯᓂᔨᒋ ᑲ ᑭᔅᒋᐅᒡ ᐊ ᒪᑐᐛᒐᒡ ᒪᒃ ᐊᓐᒡ ᓂᓇᐧᑯᐤ ᐳᑕᒋᑭᓇ ᑲ ᒪᑐᐛᒡ᙮ ᓇᒪ ᓂᑕ ᒥᓐ ᒋᑭ ᐅᒋ ᐛᐱᒪᑭᓄᐎᒡ ᐊᓐᒡ ᐊᐛᓐᒋ ᓂᓇᐧᑯᐤ ᒐᒂᔪᐛ ᑲ ᐃᓯ ᑭᔅᒋᐅᒡ ᐊ ᐅᓯᑕᒡ᙮ ᓇᒪ ᓂᑕ ᑭᔭ ᒥᓐ ᒋᑭ ᐅᒋ ᐸᑕᑯᓐ ᐊ ᑎᑯᐃᑭᓄᐅᒋ ᓂᑕᐅᒋᑕᑭᓇ᙮