14 ᒐᒋ ᑕᑈᒥᑭᓂᔨᒡ ᐊᓂᔭ ᐅᒋᔅᒋᐛᐃᒐᓱᐤ ᐊᐃᓴᔭ ᑲ ᐃᔅᒋᔄᑦ,
ᐊᐅᑯᓐ ᐊᓐ ᑲ ᐃᔅᐱᔨᒡ ᑕᓐ ᑲ ᐸᒋ ᐃᔅᒋᔄᔨᒋ ᐅᑎᐸᔨᒋᒐᐤ ᐅᒋᔅᒋᐛᐃᒐᓯᒪ ᑲ ᐃᔅᒋᔄᔨᒋ,
ᐊᑯᑕ ᒪᒃ ᐊᓐᑕ ᑲ ᑕᒡ ᐸᑐᔅ ᑲᒋ ᓂᐱᔨᒋ ᐊᕈᑕ᙮ ᐅ ᒪᒃ ᑲ ᐃᔅᐱᔨᒡ ᐊᐅᒄ ᑲ ᑕᑈᒥᑭᓂᔨᒡ ᐅᑎᐸᔨᒋᒐᐤ ᐅᒋᔅᒋᐛᐃᒐᓯᒪ ᑲ ᐃᔅᒋᔄᔨᒋ, “ᐃᒋᑉᑎᒡ ᐅᒡ ᓂᒋ ᐅᒋ ᑕᑈᑕᐤ ᓂᑯᔅ᙮”
ᐊᑯ ᐊᓐᑕ ᓇᓴᕆᑦ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᐊᑯᑕ ᑲ ᐎᒋᒡ᙮ ᑭᔭ ᒂ ᑕᑈᒥᑭᓂᔨᒡ ᐛᔅᑭᒡ ᑕᓐ ᑲ ᐃᔅᒋᔄᒡ ᐊᓂᔭᐧᑲ ᐅᒋᔅᒋᐛᐃᒐᓱᒡ, “ᓇᓴᕆᑎᒡ ᑲ ᐅᒋᑦ ᒋᑭ ᐃᓯᓂᐧᑲᑕᑭᓄᐤ ᐊᓐ ᐊᐛᔅ᙮”
ᒥᒄ ᒪᒃ ᐊᓐ ᐃᑎᔭᓇ, ᑕᓐᑕ ᒐᒋ ᐅᒋ ᐃᔅᐱᔨᒡ ᐊᓐ ᑲ ᐃᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐊᓐ ᒋᐸ ᐃᔅᐱᔪᐤ ?”
ᒥᒄ ᒪᒃ ᐛᔅ ᒥᓯᐛ ᑎᐱᐱᔪᐤ ᑕᓐ ᑲ ᐃᓯ ᒥᓯᓇᐊᒡ ᐊᓐᑕ ᒋᓴᒪᓂᑐᐛ ᐅᑦ ᐃᔨᒧᐅᓂᒡ ᐊᓂᔭᐧᑲ ᐅᒋᔅᒋᐛᐃᒐᓱᒡ᙮ ᐃᔅᐱ ᒪᒃ ᐅᔭ ᑲ ᐃᑕᑦ ᐊᑯ ᒥᓯᐛ ᐅᒋᔅᒋᓄᐊᒧᐛᑭᓇ ᒂ ᒋᑎᓯᒧᔨᒋ ᐊ ᓂᑭᑎᑯᑦ᙮
ᐊᑯ ᓂᑭᑕᐧᒃ ᓇᓴᕆᑎᔪᐤ, ᑭᔭ ᐊᓐᑕ ᑲᐳᕐᓇᐊᒻ ᑲ ᐃᓯᓂᐧᑲᑕᔨᒡ ᐅᑕᓇᔪᐤ, ᒥᒋᒪ ᑲᓕᓕ ᓴᑲᐃᑭᓂᒡ ᑲ ᑎᑯᓂᔨᒡ ᐊᑯᑕ ᑲ ᐎᒋᑦ, ᐊᓐᑕ ᓴᐳᓕᓐ ᑭᔭ ᓇᑉᑕᓕ ᑲ ᐃᓯᓂᐧᑲᑕᔨᒡ ᐊᔅᒋᔪᐤ᙮
ᓂᑐᑎᒧᒄ ᒋᔨᐛᐤ ᓴᐳᓕᓐ ᑭᔭ ᓇᑉᑕᓕ ᐊᔅᒋᒡ ᑲ ᑕᔭᒄ, ᑲᓕᓕ ᐎᓂᐸᑯᒡ ᐃᔅ ᑭᔭ ᒋᔨᐛᐤ ᒂᔅᑕᒐᑲᒻ ᒠᕐᑕᓐ ᓯᐱᒡ ᑲ ᐎᒋᔭᒄ᙮ ᓂᑐᑎᒧᒄ ᑭᔭ ᒋᔨᐛᐤ ᑲᓕᓕᒡ ᑲ ᐎᒋᔭᒄ, ᐊᓐᑕ ᐛᒋᒡ ᐊᑲ ᒍᐤ ᐃᑎᔅᑲᓇᓯᒡ ᐃᔪᒡ᙮
ᒋ ᐃᑐᑎᒧᐛᐤ ᐃᔪᐛ ᐅᔭ ᒐᒂᓇ ᐊᑯ ᒪᒃ ᒐᒋ ᐃᔅᐱᔨᒡ ᐊᓂᔭ ᐅᒋᔅᒋᐛᐃᒐᓱᐤ ᐊᐃᓴᔭ ᓂᑲᓐ ᑕᓐ ᑲ ᐃᓯ ᐎᑎᒧᒂ ᒐ ᐃᔅᐱᔨᒡ ᑲ ᐃᔅᒋᔄᑦ, ᔅᒋ ᒥᓏᒋᐃᑯᓄᐤ ᑭᔭ ᒋ ᐃᒐᓂᒻ ᒥᓯᐛ ᓂᓇᐧᑯᐤ ᒋᑦ ᐊᐧᑯᓱᐅᓄᐛ᙮
ᐛᔅ ᐅ ᐛᒋ ᐃᑎᑎᑯᒡ ᒋᑭ ᑎᐱᐱᔪᐤ ᑕᓐ ᑲ ᐃᓯ ᓂᑲᓐ ᐊᔨᒧᒥᑯᔭᓐ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᑲ ᐃᑎᔅᑕᒡ, ᒋ ᐊᔅᑎᒋᒪᑭᓄᐤ ᐊᓐᑕ ᐊ ᓂᑕᐅᒋᒧᑎᓇᓄᐎᒡ᙮ ᐅ ᒪᒃ ᑲ ᐃᓯ ᑎᐸᒋᒥᑯᔭᓐ ᑕᑈ ᒋᑭ ᐃᔅᐱᔪᐤ᙮”
ᐊᑯ ᒋᓴᔅ ᒂ ᐃᑎᑯᒡ, “ᐊᐅᒄ ᒪᒃ ᐅ ᑲ ᐃᓯ ᐛᐎᑎᒪᑎᑯᒡ ᐊᔅᒄ ᒪᒂᒡ ᐊᒋ ᐎᒐᐅᑎᑯᒡ ᑲ ᐃᔅᒋᔄᔭᓐ, ᒐᔅᑎᓇᔅ ᒋᑭ ᑎᐱᐱᔪᐤ ᒥᓯᐛ ᐊ ᐃᓯ ᐊᔨᒧᒥᑯᐅᔭᓐ ᐊᓐᑕ ᒧᓱᔅ ᐅᐎᓱᐛᐅᓂᒡ ᑭᔭ ᐊᓐᑕ ᐅᒥᓯᓇᐃᑭᓂᐛᒡ ᐊᓂᔭᐧᑲ ᐅᒋᔅᒋᐛᐃᒐᓱᒡ, ᑭᔭ ᑎᐱᑦ ᐅᓂᑭᒧᐅᓂᒡ᙮”
ᐅᔭ ᒪᒃ ᑲ ᐃᑐᑐᐅᒡ ᐛᔅ ᐊᐅᑯᓐ ᑲ ᐃᑎᔅᑕᔨᒡ ᐅᐎᓱᐛᐅᓄᐛᒡ ᒐ ᐃᑐᑐᐅᒡ᙮ ᒋ ᓂᑲᓐ ᐎᑕᑯᓂᔪᐤ ᐊᓐᑕ ᑲ ᐃᑎᔅᑕᔨᒡ, ᓴᔎᒡ ᓂᒋ ᐛᐧᑲᑎᑯᒡ᙮”
ᐸᑎᒪ ᒪᒃ ᒋᓴᔅ ᒋ ᒋᔅᒐᔨᑎᒻ ᓴᔅ ᒥᓯᐛ ᒐᒂᔪᐤ ᐊᒋ ᒋᔅᑕᐱᔨᒡ ᐊᑯ ᒂ ᐃᔅᒋᔄᑦ, “ᓂᐎ ᒥᓐ᙮” ᐊᐅᑯᐤ ᐅᔭ ᑲ ᐃᔅᒋᔄᑦ ᒐᒋ ᑎᐱᐱᔨᒡ ᑕᓐ ᑲ ᐃᓯ ᓂᑲᓐ ᐎᑕᑭᓄᐎᒡ ᐊᓐᑕ ᒋᓴᒪᓂᑐᐛ ᐅᑦ ᐃᔨᒧᐅᓂᒡ ᒐ ᐃᔅᒋᔄᑯᐱᓇ᙮
