50 ᒋᓴᔅ ᒪᒃ ᒥᓐ ᒋ ᑕᑈᐤ ᐊ ᒋᔄᐛᑦ᙮ ᐊᑯ ᒂ ᓂᐱᑦ᙮
ᒧᔭᒻ ᐃᔪᐤ ᐅᑯᓯᓴᓐ ᓇᒪ ᐅᒋ ᐸᒋ ᑎᑯᓯᓐ ᒐᒋ ᐊᑐᔅᑯᐛᑭᓄᐅᑦ, ᒋ ᑎᑯᓯᓐ ᒐᒋ ᐊᑐᔅᑯᐛᑦ ᐃᔪᐛ᙮ ᑭᔭ ᒋ ᑎᑯᓯᓐ ᒐᒋ ᐱᔅᑎᓇᐧᒃ ᐅᐱᒪᑎᓯᐅᓐ ᒥᔅᑯᒡ ᒥᒐᑦ ᐊᐛᔪᐛ ᒐᒋ ᐊᐱᐧᑯᓇᑭᓄᔨᒋ᙮”
ᒥᒄ ᒪᒃ ᐊᓐᒡ ᑯᑎᑭᒡ ᐊᐛᓐᒋ ᒋ ᐃᔅᒋᔄᐅᒡ, “ᐊᑲ ᐸᑎᒪ ᐃᑐᑕ᙮ ᐊᓱᐛᐱᒪᑕᐤ ᒪ ᒐ ᐸᒋ ᐎᒋᐃᑯᒂ ᐊᓂᔭ ᐃᓚᐃᒐᔨᒋ᙮”
ᒋᓴᔅ ᒪᒃ ᒋ ᑕᑈᐤ ᐊ ᒋᔄᐛᑦ, ᐊᑯ ᓇᐱᑦ᙮
ᒋᓴᔅ ᒪᒃ ᒋ ᐃᓯ ᑕᑈᐤ, “ᓄᑕ, ᒋᔾ ᐊ ᑕᔨᓐ ᓂ ᐱᔅᑎᓇᐤ ᓂᑦ ᐊᒐᐧᒄ ᒐᒋ ᑭᓄᐛᔨᒥᑦ᙮” ᐃᔅᐱ ᒪᒃ ᐅᔭᔪᐤ ᑲ ᐃᔅᒋᔄᑦ ᐊᑯ ᒂ ᓂᐱᑦ᙮
“ᓂᔾ ᐊᐅᒄ ᒪᔭᑕᓂᓯᐅ-ᐃᔪᐤ ᑲ ᒥᔪ ᑭᓄᐛᔨᒪᑦ ᐅᒪᔭᑕᓂᓯᒪ᙮ ᐊᓐ ᐊᐛᓐ ᑲ ᒥᔪ ᑭᓄᐛᔨᒪᑦ ᐅᒪᔭᑕᓂᓯᒪ ᒋᑭ ᐱᔅᑎᓂᒻ ᐅᐱᒪᑎᓯᐅᓐ ᐊᓂᔭ ᐅᒪᔭᑕᓂᓯᒪ ᒐᒋ ᐅᒋ ᐱᒪᒋᐅᔨᒋ᙮
ᒧᔭᒻ ᐊ ᐃᓯ ᒋᔅᒐᔨᒥᑦ ᐅᑕᐎᒪᐤ ᑭᔭ ᓂᔾ ᐊ ᐃᓯ ᒋᔅᒐᔨᒥᒃ᙮ ᓇᔅᒡ ᒪᒃ ᓂᑦ ᐃᑕᔨᑎᒥᐃᑯᐛᓐ ᒐᒋ ᐱᔅᑎᓂᓱᐅᒡ ᒐᒋ ᓂᐸᐃᑯᐅᒡ ᐎᔨᐛᐤ ᐅᒋ ᐊᓐᒡ ᓂᒪᔭᑕᓂᓯᒥᒡ᙮
ᒋ ᑎᑯᓐ ᒪᒃ ᐊᓐᑕ ᐎᔭᑭᓐ ᐊ ᓴᑭᔅᒋᓇᐸᒡ ᐊ ᐎᓯᑲᐧᑭᒥᒡ ᓱᒥᓇᐳᔾ, ᐊᑯᑕ ᐊᓐᑕ ᑲ ᐊᑯᑕᒡ ᐅᐱᓂᓯᔪᐤ ᑲ ᒪᑯᐱᑕᑭᓄᐎᒡ ᒥᔅᑎᑯᒡ ᐊᑯ ᐊᓐᑕ ᐅᑐᓂᔨᒡ ᑲ ᐃᓯ ᐃᑕᔅᑯᓂᒧᐛᒡ᙮
ᐃᔅᐱ ᒋᓴᔅ ᑲ ᒥᓐᑦ ᐊᑯ ᒂ ᐃᔅᒋᔄᑦ, “ᓴᔅ ᒋᔅᑕᐱᔪᐤ᙮” ᐊᑯ ᒂ ᐊᑎ ᓂᔭᒥᔎᔨᑦ ᒂ ᐊᑎ ᐳᓂᐱᒪᑎᓯᑦ᙮
ᐃᔪᐛ ᐊᓂᔭᔪᐛ ᑲ ᐃᑕᑦ ᐊᓂᔭ ᑲ ᐃᔅᒋᔄᑦ ᓂᑦ ᐊᐛᓯᒥᒡ᙮ ᒋᓴᔅ ᑭᔭ ᐎᔾ ᒋᒋᐛ ᓇᔅᒡ ᐃᔪᐛ ᒋ ᐃᓯᓇᑯᓱᐤ ᑭᔭ ᓇᔅᒡ ᐃᔪᐛ ᒋ ᐃᑕᔨᑕᑯᓱᐤ᙮ ᐊᐅᒄ ᐅᔭ ᐃᔪᐛ ᐛᒋ ᑕᑦ ᒐᒋ ᓂᐱᑦ, ᒐᒋ ᐅᒋ ᓴᐧᑯᒋᐊᑦ ᒥᒋᒥᓂᑐᐛ, ᐊᓂᔭ ᑲ ᑎᐸᔨᑎᒥᔨᒋ ᓂᐳᐅᓂᔪᐤ᙮
ᒪᒂᒡ ᐅᑕ ᐊᔅᒋᒡ ᑲ ᐱᐸᒧᑕᑦ ᒋᓴᔅ ᒥᒐᑥᐤ ᒋ ᐃᓯᓇᑯᓱᐤ ᓱᒃ ᐊ ᓂᑐᑎᒧᐛᑦ ᐊᓂᔭᔪᐛ ᑲ ᒋᔅᒐᔨᒪᑦ ᒐᒋ ᐎᒋᐃᑯᑦ ᒐ ᐊᑲ ᒋ ᓂᐸᐊᑭᓄᐅᑦ᙮ ᒋ ᐸᑕᑯᐤ ᒪᒃ ᐛᔅ ᒋ ᓂᓇᐃᑐᐛᐤ᙮
ᒧᔭᒻ ᒪᒃ ᐊᐛᓯᔅ ᐅᒥᐧᒄ ᐊ ᐸᔭᒋᑕᒐᒥᑭᓂᔨᒡ ᒪᒥᑐᓇᔨᑎᒧᒄ ᑕᓐ ᐊᔅᐱᔅ ᐊᑐᐎᔅ ᒐᒋ ᐃᓯ ᐎᒋᐃᑯᐛᐧᒄ ᙭ ᐅᒥᐧᒄ᙮ ᒋ ᐱᒪᑎᓯᐤ ᐅᑕ ᐊᔅᒋᒡ ᐊᑲ ᐛᐛᒡ ᐅᒋ ᒥᒋᑐᑕᐧᒃ᙮ ᑲ ᐸᔭᒋᓯᔨᒋ ᐊᒐᒂ ᑲᒋᒡ ᐊ ᑕᔨᒋ ᒋ ᐎᒋᐃᑯᐤ ᐃᔅᐱ ᑲ ᐱᔅᑕᔨᒥᑎᓱᑦ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᐅᒥᐧᒄ ᐊᐅᒄ ᒐ ᐸᔭᒋᐃᑯᐛᐧᒄ᙮ ᓇᒪ ᐎ ᐊᓂᔭᔪᐛ ᐊᑲ ᐅᔭᔅ ᐃᑕᐱᑎᓂᔨᒋ ᒐᒂᔪᐛ ᑲᒋ ᐃᑐᑎᒪᐧᒄ ᒋᑭ ᐅᒋ ᐱᒪᒋᐃᑯᓇᓄᐤ᙮ ᐊᑯ ᒪᒃ ᑲᒋᒡ ᒐᒋ ᐊᑐᔅᑯᐛᐧᒄ ᒋᓴᒪᓂᑐᐤ᙮
