19 “ᒥᓐ ᒋ ᐎᑎᒪᑎᓇᐛᐤ, ᓂᓱ ᐊᐛᓐᒋ ᑕᐱᔅᑯᓐ ᐊ ᐃᑕᔨᑎᒥᐃᑯᒡ ᒐᒂᔪᐤ ᑕᓐ ᐊ ᐃᓯ ᓂᑐᑎᒪᒡ ᐊᐅᑯᓐ ᐊᓐ ᒐ ᐃᓯ ᐃᑐᑎᒪᑯᒡ ᓄᑕᐎᔭ ᒋᒋᒋᓯᑯᒡ ᐊ ᑕᔨᒋ᙮
ᒥᒄ ᑕᓐ ᒐ ᐃᓯ ᓂᑐᑎᒪᔭᒄ ᐊ ᐊᔭᒥᐊᔭᒄ, ᑕᑈᑎᒧᒄ ᓴᔅ ᐊ ᐊᔭᔭᒄ ᑭᔭ ᒐ ᒥᔨᑯᐅᔭᒄ ᐊᓐ ᑲ ᐃᓯ ᓂᑐᑎᒪᔭᒄ᙮”
ᓂᑭᑕ ᐊᓐ ᒋᒥᔨᐛᐅᓐ ᐊᓐᑕ ᐱᔅᑎᓂᒐᐅᓇᐱᔅᑯᒡ, ᓂᔅᑎᒻ ᒐ ᒥᔪ ᐎᒐᐅᑦ ᐊᓐ ᒋᒡ ᐃᔪᐤ᙮ ᐊᑯ ᒥᓐ ᑲᐤ ᒐ ᑎᑯᓯᓂᔨᓐ ᐊᑯ ᒪᒃ ᐃᔭᒄ ᒐ ᒥᔨᑦ ᒋᓴᒪᓂᑐᐤ ᐊᓂᔭ ᑲ ᐎ ᒥᔨᑦ ᒥᔨᐛᐅᓂᔪᐤ᙮
“ᓂᑐᑎᒪᒄ ᑕᓐ ᐊ ᐃᓯ ᓂᑐᐛᔨᑎᒪᒄ, ᐊᑯ ᒪᒃ ᒐ ᒥᔨᑯᐅᔭᒄ᙮ ᓇᓂᑐᐛᔨᑎᒧᒄ, ᐊᑯ ᒪᒃ ᒐ ᒥᔅᑭᒪᒄ᙮ ᑎᑥᐛᐃᒐᒄ, ᐊᑯ ᒪᒃ ᒐ ᔪᑕᓂᒪᑯᐅᔭᒄ᙮
ᐊᑯ ᒪᒃ ᐊ ᐃᑎᑎᑯᒡ, ᒥᒄ ᑕᓐ ᒐ ᐃᓯ ᓂᑐᑎᒪᔭᒄ ᐊ ᐊᔭᒥᐊᔭᒄ, ᑕᑈᑎᒧᒄ ᓴᔅ ᐊ ᐊᔭᔭᒄ ᑭᔭ ᒐ ᒥᔨᑯᔭᒄ ᐊᓐ ᑲ ᐃᓯ ᓂᑐᑎᒪᔭᒄ᙮
ᓇᒪ ᒋᔨᐛᐤ ᒋ ᐅᒋ ᐎᔭᐱᒥᓇᐛᐤ, ᓂᔾ ᐊᐅᒄ ᑲ ᐅᑎᓂᑎᑯᒡ᙮ ᐊᓐ ᒪᒃ ᐊᒋ ᐅᑎᓂᑎᑯᒡ ᒋᑦ ᐃᑕᔨᒥᑎᓇᐛᐤ ᒐᒋ ᒥᔪ ᒥᓂᓱᐅᔭᒄ ᑭᔭ ᒧᔅ ᒐᒋ ᒥᔪ ᒥᓂᓱᐅᔭᒄ᙮ ᐊᑯ ᒪᒃ ᐅᑕᐎᒪᐤ ᒐ ᒥᔨᑕᒄ ᑕᓐ ᒥᒄ ᒐ ᐃᓯ ᓂᑐᑎᒧᐛᒄ ᓂᑦ ᐃᓯᓂᐧᑲᓱᐅᓐ ᐊ ᐊᐱᒋᑕᔭᒄ᙮
ᓂᔾ ᒪᒃ ᐊ ᑕᔭᓐ ᒧᔅ ᐃᓯ ᐱᒪᑎᓯᔭᒂ ᑭᔭ ᓂᑦ ᐃᔅᒋᔄᐅᓇ ᐱᒋᔅᑲᑯᔭᒂ ᒥᒄ ᑕᓐ ᒐ ᐃᓯ ᓂᑐᑎᒪᔭᒄ ᒐᒂᓐ ᐊᐅᑯᓐ ᐊᓐ ᒐ ᐃᑐᑎᒪᑯᐅᔭᒄ᙮
“ᐅᑎᒋᐱᔨᒐ ᒪᒃ ᐅ ᑲ ᐃᓯ ᐊᔨᒧᑎᒪᑎᑯᒡ ᓇᒪ ᒐᒂᓐ ᒋᑭ ᐅᒋ ᓂᑐᑎᒧᓇᐛᐤ᙮ ᑯᐃᔅᒄ ᐊ ᐎᑎᒪᑎᑯᒡ ᒥᒄ ᑕᓐ ᒐ ᐃᓯ ᓂᑐᐛᔨᑎᒧᐛᒄ ᐅᑕᐎᒪᐤ ᓂᑦ ᐃᓯᓂᐧᑲᓱᐅᓐ ᐊ ᐊᐱᒋᑕᔭᒄ ᒋᑭ ᒥᔨᑯᐛᐤ᙮
ᒥᓯᐛ ᒪᒃ ᒋ ᓇᐊᔨᑎᒧᒡ ᒧᔅ ᒐᒋ ᐸᐃᑯᒪᒧᐎᒡ ᐊ ᒪᒧᐤ ᐊᔭᒥᐊᒡ᙮ ᐊᑯᑕ ᑲᒋ ᑕᒡ ᑭᔭ ᐊᓐᒡ ᐃᔎᐅᒡ, ᑭᔭ ᒪᕆ ᒋᓴᔅ ᐅᑲᐎᔭ, ᑭᔭ ᒋᓴᔅ ᐎᐧᑲᓂᓴ ᑲ ᓇᐸᐎᔨᒋ᙮
ᒪᒂᒡ ᒪᒃ ᐱᑕᕐ ᑲ ᑕᑦ ᐊᓐᑕ ᑲᒪᑯᓄᐛᓯᐅᒋᐛᐱᒡ ᐊᓂᔭ ᐅᒪᒧᐊᔭᒥᐊᐤ ᓱᒃ ᒋ ᐊᔭᒥᐊᔅᑎᒪᑯᐤ᙮
ᐃᔅᐱ ᒪᒃ ᑲ ᐎᑎᒧᔨᒥᑦ ᑈᓪ ᐅᔭ ᑲ ᐃᓯᓇᐧᒃ, ᓂᒋ ᒐᔅᑎᓇᐅᓇᓐ ᒋᓴᒪᓂᑐᐤ ᐊ ᓂᑐᐛᔨᒥᔨᒥᑦ ᒐᒋ ᐎᑎᒧᐅᒋᒡ ᐊᓐᒡ ᐃᔪᒡ ᒥᔽᒋᒧᐅᓂᔪᐤ᙮ ᐊᑯ ᑎᐛᒡ ᑲ ᐊᔭᔅᑯᐎᔭᒡ ᒐ ᐃᑐᑕᔭᒡ ᐊᓐᑕ᙮
ᐊᑯ ᒪᒃ ᓂᔭᓐ ᒐ ᐃᔅᐱᓯᔭᒡ ᒐᒋ ᐊᔭᒥᐊᔭᒡ ᑭᔭ ᐊ ᑭᒐᔅᒋᒧᔭᒡ᙮”
ᓱᒃ ᒪᒃ ᓂᑭ ᒥᔽᔨᑕᓐ, ᓂ ᒋᔅᒐᔨᑕᓐ ᒐ ᐱᔅᑎᓂᑯᐅᔭᓐ ᐛᔅ ᒋᑦ ᐊᔭᒥᐊᔅᑎᒧᓇᐛᐤ ᑭᔭ ᑲ ᐸᔭᒋᓯᑦ ᐊᒐᐧᒄ ᓂ ᐸᒋ ᐎᒋᐃᒄ᙮
ᒋᑭ ᒥᔨᑯᓄᐤ ᒐᒂᔪᐤ ᐊ ᐃᓯ ᓂᑐᐛᔨᑎᒧᐛᐧᒄ, ᐊ ᐃᑐᑎᒪᐧᒄ ᑕᓐ ᐊ ᐃᑎᓱᒥᑕᐧᒄ ᑭᔭ ᐊ ᐃᑐᑎᒪᐧᒄ ᐊᓂᔭ ᒐᒂᔪᐛ ᓂᐊᔨᑎᒥᐃᑯᑦ᙮