21 ᐊᑯ ᒪᒃ ᒂ ᐃᓯ ᒥᔅᑎ ᑕᑈᒡ, “ᒋᔅᑕᔎᑕᐧᒄ, ᒋᔅᑕᔎᑕᐧᒄ !”
ᒥᓐ ᒪᒃ ᒋ ᑕᑈᐅᒡ, “ᒋᔅᑕᔎᐤ ᒋᐱᔭᑎᑯᒡ᙮”
ᑈᓚᑦ ᒪᒃ ᒋ ᐎ ᐱᔅᑎᓇᐤ ᐊᓂᔭ ᒋᓴᓴ ᐊᑯ ᒥᓐ ᒂ ᑯᒂᒋᒪᑦ ᐊᓂᔭᔪᐛ ᐃᔪᐛ ᒐᒋ ᐱᔅᑎᓇᑦ ᒋᓴᓴ᙮
ᐊᐅᒄ ᐊᑯ ᓂᔍᐤ ᑈᓚᑦ ᑲ ᐃᑕᑦ, “ᒐᒄ ᒥᒋᑐᑎᒧᐅᓂᔪᐤ ᒪᒃ ᑲ ᐃᑐᑕᐧᒃ ᐅ ᓇᐸᐤ ᐊᓂᔭ ᒐ ᐅᒋ ᓂᐸᐊᑭᓄᐅᑦ ? ᓂᑭ ᐃᑎᓱᐛᓐ ᒐᒋ ᐸᐱᓯᔅᑕᐛᑭᓄᐅᑦ ᐊᑯ ᒐ ᐱᔅᑎᓂᒃ᙮”
ᐊᑯ ᐊᓐᒡ ᐃᔪᒡ ᐃᔭᐱᒡ ᒂ ᐃᓯ ᑕᑈᒡ ᓇᔅᒡ ᓱᒃ ᐊ ᓂᑐᐛᔨᒪᒡ ᒋᓴᓴ ᒐᒋ ᒋᔅᑕᔎᑕᑭᓄᔨᒋ᙮ ᒋ ᓴᐧᑯᒋᒪᐅᒡ ᒪᒃ᙮
ᒋ ᐃᓯ ᑕᑈᐅᒡ ᒪᒃ ᐊᓐᒡ ᒍᐤ ᐃᔪᒡ, “ᓂᐸᐊᐧᒄ, ᓂᐸᐊᐧᒄ, ᒋᔅᑕᔎᑕᐧᒄ,” ᐊ ᐃᔅᒋᔄᒡ᙮ ᐊᑯ ᑈᓚᑦ ᒂ ᐃᑕᑦ, “ᒋ ᓂᑐᐛᔨᒥᓇᐛᐤ ᐊ ᒐᒋ ᐱᔅᑎᓂᒃ ᒋᒋᓴᐅᒋᒪᒧᐛᐤ ᒐᒋ ᒋᔅᑕᔎᑕᑭᓄᐅᑦ ?” ᐊᑯ ᐊᓂᔭᔪᐛ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᒋ ᐃᓯ ᐎᑎᒪᑯᐤ ᑈᓚᑦ ᐊ ᐃᑎᑯᑦ, “ᒥᒄ ᓯᓴᕐ ᓂ ᐅᒋᓴᐅᒋᒪᒥᓇᓐ ᓇᒪ ᑯᑎᒃ ᐊᐛᓐ᙮”
ᐊᑯ ᐊᓐᒡ ᐃᔪᒡ ᒂ ᐃᑕᒡ ᐊᓂᔭ ᑈᓚᑕ ᒐᒋ ᓂᐸᐊᑭᓄᔨᒋ ᒋᓴᓴ, ᒋ ᒋᔅᒐᔨᑎᒧᒡ ᒪᒃ ᐊᑲ ᐅᒋ ᒥᒋᑐᑎᒥᔨᒋ ᒥᒄ ᒪᒃ ᐃᔭᐱᒡ ᒋ ᐃᑕᐅᒡ ᒐ ᓂᐸᐊᑭᓄᔨᒋ᙮
