23 ᐊᑎ ᐊ ᒍᐤ ᐊᔭᒥᐊᐅᒋᓯᑲᒡ ᐃᔭᐱᒡ ᒋ ᒋᔅᒋᓄᐛᒋᔄᐛᐅᒡ ᓇᐸᓯᒡ ᐊ ᐃᔅᐱᔅ ᐎ ᑭᓄᐛᔨᑎᒺᒄ ᒧᓱᔅ ᐅᐎᓱᐛᐅᓐ, ᒐᒂᓐ ᒪᒃ ᐛᒋ ᒋᔄᓯᔅᑐᔭᒄ ᓇᔅᒡ ᐊᒋ ᒥᓏᒋᐃᒃ ᐊᓐ ᓇᐸᐤ ᐊ ᐊᔭᒥᐊᐅᒋᓯᑲᔨᒡ ?
ᒋᑭ ᐎ ᓇᐃᑕᓐ ᓂᑦ ᐃᑎᓱᐛᐅᓇ ᐊ ᓇᑭᑐᐛᔨᑕᑭᓄᐅᒡ ᐊᔽᓯᐅᒋᓯᑲᒡ ᐛᔅ ᒋᒋᐛ ᐸᔭᐧᑭᓐ᙮ ᐊᐛᓐ ᐊᑲ ᓇᓴᐊᐧᒃ ᓂᑦ ᐃᑎᓱᐛᓂᔪᐤ ᑭᔭ ᒐ ᐊᑐᔅᒐᒂ ᐊᓂᔭ ᒋᓯᑯᔪᐤ, ᒋᑭ ᓂᐸᐊᑭᓄᐤ᙮
ᒋ ᑕᐤ ᒪᒃ ᐊᓐᑕ ᓇᐸᐤ ᐅᑎᒋᔾ ᐊ ᒪᔅᑲᔨᒡ᙮ ᒋ ᑕᐅᒡ ᒪᒃ ᐊᓐᑕ ᐱᔅᒐ ᐸᕆᓯᔨᒡ ᐊ ᒋᒧᑦ ᓂᓇᑭᑐᐛᔨᒪᒡ ᐊᓂᔭ ᒋᓴᓴ ᐊ ᐎ ᓇᓂᑐᐤ ᒥᔅᑲᒡ ᒐᒂᔪᐤ ᒐᒋ ᐅᒋ ᐊᑕᒪᔨᒪᒡ ᐊ ᒥᒋᑐᑎᒥᔨᒋ ᐊᑯ ᒂ ᑯᒂᒋᒪᒡ, “ᐅᓂᑐᑕᑭᓄᐤ ᐊ ᐊᐛᓐ ᐊ ᒥᓏᒋᐊᑭᓄᐅᑦ ᐊᔭᒥᐊᐅᒋᓯᑲᔨᒡ ?”
ᐃᔅᐱ ᒪᒃ ᐊᓐᒡ ᐸᕆᓯᔨᒡ ᐎᔭᐱᒪᒡ ᐊᓂᔭ ᐊ ᐃᑎᔨᒋ ᒋ ᐃᑕᐅᒡ ᐊᓂᔭ ᒋᓴᓴ, “ᒐᒂᓐ ᐛᒋ ᐃᑐᑎᒪᒄ ᐊᓐ ᒐᒂᓐ ᐊᑐᒡ ᒋᐸ ᐅᒋ ᐃᑐᑕᑭᓄᐤ ᐊ ᐊᔭᒥᐊᐅᒋᓯᑲᒡ ?”
ᑭᔭ ᔅᒋ ᐃᔨᒥᑕᓇᐛᒐ ᐊᓐᑕ ᐎᓱᐛᐅᒥᓯᓇᐃᑭᓂᒡ, ᐊᓐᒡ ᐊᔭᒥᐊᐅᒋᒪᐅᒡ ᐊ ᐊᑐᔅᒐᒡ ᐊᓐᑕ ᒋᓴᐊᔭᒥᐊᐅᒋᐛᐱᒡ ᐊ ᐊᔭᒥᐊᐅᒋᓯᑲᔨᒡ ᐱᑯᓂᒧᒡ ᐊᓂᔭ ᐎᓱᐛᐅᓂᔪᐤ ᑕᓐ ᒋᐸ ᐃᓯ ᓂᓇᑭᑐᐛᔨᑕᑭᓄᐅᔪᐤ ᐊ ᐊᔭᒥᐊᐅᒋᓯᑲᔨᒡ, ᓇᒪ ᒪᒃ ᒐᒂᔪᐤ ᒋᑭ ᒋ ᐃᓯ ᐊᑕᒪᔨᑕᑯᓱᐅᒡ ?
ᐊᑯ ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᒂ ᐃᑕᒡ ᐊᓂᔭ ᓇᐸᐛ ᑲ ᒥᓏᒋᐊᑭᓄᔨᒋ, “ᐊᔭᒥᐊᐅᒋᓯᑲᐤ ᐊᓄᒡ ᓇᒪ ᐃᑎᔅᑕᐤ ᓂᐎᓱᐛᐅᓇᒡ ᒐᒋ ᑕᐧᑯᓂᒥᓐ ᒋᑦ ᐊᔅᐱᓯᒧᓐ ᐊ ᐊᔭᒥᐊᐅᒋᓯᑲᒡ᙮”
ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᐸᐃᒄ ᒪᒥᔅᑲᒡ ᐃᑐᐅᓐ ᓂᒋ ᐃᑐᑕᓐ, ᔅᒋ ᒥᔅᑲᑕᔨᑎᒥᐃᑯᓇᐛᐤ ᒪᒃ ᐊ ᐊᔭᒥᐊᐅᒋᓯᑲᒡ ᐊᓐ ᐊᒋ ᐃᑐᑎᒪᓐ᙮
ᐱᔅᒐ ᒪᒃ ᐊᓐᒡ ᐸᕆᓯᔨᒡ ᒋ ᐃᑕᐅᒡ, “ᐅ ᓇᐸᐤ ᒋᓴᔅ ᓇᒪ ᒋᓴᒪᓂᑐᐛ ᐊ ᑕᔨᒋ ᐅᒋᐤ, ᑕᐸ ᐊᐱᑕᔨᑎᒻ ᐊ ᒍᐤ ᐊᔭᒥᐊᐅᒋᓯᑲᔨᒡ᙮” ᑯᑎᑭᒡ ᒪᒃ ᒋ ᐃᑕᐅᒡ, “ᑕᓐᑕ ᒐᒋ ᐅᒋ ᒪᒥᔅᑲᒡ ᐃᑎᑦ ᐊᐛᓐ ᐊ ᒥᒋᑐᑎᒧᒂ᙮ ᒋ ᑎᐸᓂᐱᔪᒡ ᒪᒃ ᐅᔭ ᐅᒋ ?”