27 ᐊᑯ ᐃᔅᕋᐃᓪ ᐃᔪᒡ ᒂ ᐎᒋᒡ ᐊᓐᑕ ᑯᓯᓐ ᐊᔅᒋᒡ ᐊᓐᑕ ᐃᒋᑉᑎᒡ᙮ ᒋ ᒥᔪᐱᔪᐅᒡ ᑭᔭ ᒥᒐᑦ ᒋ ᑕᔪᐛ ᐅᑦ ᐊᐛᓯᒧᐛᐛ ᑭᔭ ᒂ ᒥᒐᑎᒡ ᐊ ᐃᔅᐱᒐᑎᒡ᙮
ᓂᑭ ᐃᑐᑐᐛᐅᒡ ᒋᓂᑕᐅᒋᐊᑭᓐᒡ ᒐᒋ ᒥᒐᑎᒡ ᒐ ᐊᑲ ᒋ ᐊᒋᒪᑦ ᐊᐛᓐ᙮ ᐅᔅᑕ ᒋᑭ ᒥᒐᑐᐅᒡ ᐃᔅᐱᔅ ᐊ ᑕᑎᓂᔨᒋ ᐃᔭᑲᐛ ᐅᑕ ᐊᔅᒋᒡ᙮
ᒋᑭ ᒥᔨᑎᓐ ᒥᒐᑦ ᐊᓂᔅᑯᑕᐸᓐᒡ ᑭᔭ ᓂᑲᓄᒡ ᐊᓐᑕ ᒋᑭ ᒥᒐᑐᔅᑲᓇᓱᐅᒡ᙮ ᐱᔅᒐ ᒋᑭ ᒋᓴᐅᒋᒪᐅᒡ᙮
ᓂᑭ ᒥᒐᑐᐛᐅᒡ ᒋᑦ ᐊᓂᔅᑯᑕᐸᓐᒡ ᒧᔭᒻ ᒋᓯᑯᒡ ᐊᔅᐱᒐᑎᒡ ᐅᒐᑭᑕᐧᑯᒡ ᑭᔭ ᓂᑭ ᒥᔭᐅᒡ ᐅᔭ ᒥᓯᐛ ᐊᔅᒋᔭ᙮ ᒋᑦ ᐊᓂᔅᑯᑕᐸᓐᒡ ᐅᒡ ᓂᑭ ᒥᔪᑐᑐᐛᐅᒡ ᒥᓯᐛ ᐊ ᑕᑐᔅᑲᓇᓯᒡ ᐃᔪᒡ ᐅᑕ ᐊᔅᒋᒡ᙮
ᓂᑭ ᒥᒐᑐᐛᐅᒡ ᒋᑦ ᐊᓂᔅᑯᑕᐸᓐᒡ ᒐ ᐊᑲ ᐊᐛᓐ ᒋᒋᒪᑦ, ᒋᑭ ᒥᓯᑕᐱᔪᐅᒡ ᐊᑎᒪᐱᓯᒧᒡ ᑭᔭ ᐛᐱᓄᑕᒡ ᐃᔅ, ᒋᐛᑎᓄᒡ ᑭᔭ ᐱᓯᒧᑕᒡ ᐃᔅ᙮ ᒋᔾ ᐅᒋ ᑭᔭ ᒋᑦ ᐊᓂᔅᑯᑕᐸᓐᒡ ᓂᑭ ᒥᔪᑐᑐᐛᐅᒡ ᒥᓯᐛ ᐊ ᑕᑐᔅᑲᓇᓯᒡ ᐅᑕ ᐊᔅᒋᒡ᙮
ᒋᑭ ᒋ ᐎᒋᒥᓇᓐ᙮ ᐎᔭᐸᑎᒥᒄ ᓂᑐᐎᔾ ᐃᑕᐅᓐ ᐛ ᐊᐱᒋᑕᔭᒄ᙮ ᒋᑭ ᒋ ᐎᒋᓇᐤ ᐅᑕ ᐊᔅᒋᒡ, ᒐ ᐃᑐᑕᔭᒄ ᑕᓐᑕ ᒥᒄ ᓇᑐᐛᔨᑎᒪᒄ ᒐᒋ ᐃᑐᑕᔭᒄ ᑭᔭ ᐃᔭᐱᒡ ᒋᑭ ᒋ ᐃᔭᓇᐛᐤ ᐊᔅᒋᔾ᙮”
ᐊᑯ ᒋᓴᒪᓂᑐᐤ ᐊᑕᑦ, “ᓂᔾ ᐅ ᒋᓴᒪᓂᑐᐤ ᒥᓯᐛ ᐊᓯ ᓱᐧᑲᑎᓯᑦ, ᒐ ᐃᔭᐛᑯᒡ ᒥᒐᑦ ᐊᐛᓯᒡ᙮ ᒋᑭ ᒥᒐᑐᔅᑲᓇᓱᐅᒡ ᒋᑦ ᐊᐛᓯᒥᒡ ᑭᔭ ᐱᔅᒐ ᒋᑭ ᒋᓴᐅᒋᒪᐅᒡ ᒋᑦ ᐊᐛᓯᒥᒡ᙮
ᒋᓴᒪᓂᑐᐛ ᐃᑎᑯᐤ, “ᓂᔾ ᐅ ᒋᓴᒪᓂᑐᐤ, ᒍᑕᐎᔾ ᐅᒋᓴᒪᓂᑐᒪ, ᐊᑲ ᑯᔅᑕᒋ ᒐᒋ ᐃᑐᑕᔨᓐ ᐃᒋᑉᑎᒡ, ᐛᔅ ᐊᑯᑕ ᒐ ᐃᑐᑎᒪᑕᓐ ᒐᒋ ᓱᐧᑲᑎᓯᐤ ᒥᒐᑐᔅᑲᓇᓯᔨᓐ᙮
ᐊᑯ ᒍᓯᑉ ᒋ ᐃᑐᑎᒺᐤ ᑲ ᐃᑎᓱᒥᑯᑦ ᒋᓴᐅᒋᒪᐛ᙮ ᒋ ᒥᔭᐤ ᐅᑕᐎᔭ ᑭᔭ ᐎᐧᑲᓂᓴ ᐊ ᒥᔽᔨᒡ ᐊᔅᒋᔪᐤ ᐃᒋᑉᑎᒡ ᐊᓐᑕ ᒥᒋᒪ ᕋᒪᓯᔅ ᐅᑕᓇᒡ᙮
ᐊᑯ ᒂ ᐃᑎᓴᐛᑦ ᑲᐧᑲᒍᐛ, ᒥᒄ ᒋ ᐱᐸᒥᔭᔪᐛ ᐸᑐᔅ ᑲᒋ ᐸᒂᔅᑭᒥᑲᔨᒡ᙮
ᒥᒄ ᐛᐱᓯᐤ ᐱᔭᓯᔅ ᓇᒪ ᐅᒋ ᒥᔅᑭᒻ ᒐ ᑥᐅᑦ, ᐊᑯ ᑲᐤ ᒋ ᒋᐛᐱᔪᐤ ᐊᓐᑕ ᐅᐤᑎᒡ᙮ ᐊᔅᒄ ᒋ ᑎᑯᓂᔪᐤ ᓂᐱᔪᐤ ᐃᔅᐱᒥᒡ ᐊᔅᒋᒡ᙮ ᐊᑯ ᒂ ᓱᐅᓂᔅᒐᔨᑦ ᓄᐛ ᑭᔭ ᒂ ᐱᑎᑲᐊᑦ ᐊᓐᑕ ᐅᐤᑎᒡ᙮
ᓇᔅᒡ ᒪᒃ ᒋ ᒥᒐᑐᐛᐤ ᐅᑦ ᐃᔨᒪ; ᐊᔪᐛᒃ ᑭᔭ ᒋ ᒥᔅᑯᐅᓯᐊᐤ ᐃᔅᐱᔅ ᑲ ᐛᐧᑲᑎᑯᔨᒋ᙮
ᒥᔽᒋᒪᐤ ᑭᔭ, ᒐᒋ ᐅᒋ ᐊᑎ ᓇᔅᒡ ᒥᒐᑎᔨᒋ; ᓇᒪ ᑭᔭ ᒋ ᓇᐊᔨᒪᐤ ᐅᑦ ᐊᐛᐧᑲᓂᒥᔨᐛ ᒐᒋ ᐊᑲ ᒥᒐᑎᔨᒋ᙮
ᒥᒄ ᐊᑎᑐᐤ ᒋ ᐊᑎ ᓇᐧᑲᒐᑭᓄᐅᒡ ᐃᔅᕋᐃᓪ ᐃᔪᒡ, ᐊᑎᑐᐤ ᒂ ᐊᑎ ᒥᒐᑎᒡ ᐸᑎᒪ ᒥᓯᐛ ᐊᓐᑕ ᐊᔅᒋᒡ ᑲᒋ ᐃᑕᒡ᙮ ᐊᑯ ᐃᒋᑉᑦ ᐃᔪᒡ ᒐᒃ ᒂ ᑯᔅᑕᒡ ᐃᔅᕋᐃᓪ ᐃᔪᐛ᙮
ᐊᑯ ᐊᓂᔭ ᐎᐧᑲᓂᓯᐛᐛ ᒋ ᒥᒐᑎᔪᐛ ᐅᑦ ᐊᐛᓯᒥᔪᐛ ᑭᔭ ᒂ ᑕᔨᒋ ᐅᓯᒥᔪᐛ ᑭᔭ ᐅᑦ ᐊᓂᔅᑯᑕᐸᓂᔪᐛ᙮ ᒋᒋᐛ ᒋ ᒋᓯᐱᔨᔪᐤ ᐊ ᒥᒐᑎᔨᒋ ᒂ ᐊᑎ ᓴᑭᔅᒋᓇᔨᒋ ᐊᓐᑕ ᑯᓯᓐ ᐊᔅᒋᒡ᙮
“ᒐᒃ ᒪᒃ ᒋ ᐅᑎᒋᐱᔪᐤ ᒐᒋ ᐃᑐᑕᐧᒃ ᒋᓴᒪᓂᑐᐤ ᐊᓂᔭ ᑕᓐ ᑲ ᐃᑕᑦ ᐊᑉᕋᐊᒪ ᒐᔅᑎᓇᔅ ᒐ ᐃᑐᑎᒧᐛᑦ᙮ ᓴᔅ ᒪᒃ ᓇᔅᒡ ᒋ ᒥᒐᑐᐅᒡ ᐊᐛᓐᒋ ᐊᓐᑕ ᐃᒋᑉᑎᒡ ᐊᑉᕋᐊᒪ ᐊ ᑕᔨᒋ ᐊᒋ ᐅᒋ ᐊᓂᔅᒐ ᐱᒪᑎᓯᒡ᙮